Yesu Shihilɛ Kɛ Esɔɔmɔ Nitsumɔ

Afɔ Gbɛsaalɔ Lɛ

ELISABET fɔmɔ be eshɛ. Maria kɛ lɛ ebahi shi nyɔji etɛ. Agbɛnɛ be eshɛ ni Maria kɛbaashi lɛ ni eku esɛɛ efa gbɛ kakadaŋŋ lɛ kɛya Nazaret ekoŋŋ. Lɛ hu ebaafɔ bi yɛ nyɔji ekpaa mli.

Beni Maria shi Elisabet lɛ sɛɛ etsɛɛɛ kwraa ni Elisabet fɔ bi. Mɛɛ miishɛɛ ana nɛkɛ beni Elisabet fɔ shweshweeshwe ni ekɛ ebi lɛ fɛɛ yɔɔ hewalɛ lɛ! Elisabet wekumɛi fɛɛ na miishɛɛ beni ekɛ ebinuu lɛ tsɔɔ amɛ lɛ.

Yɛ efɔmɔ lɛ sɛɛ gbii kpaanyɔ lɛ, taakɛ Nyɔŋmɔ mla lɛ tsɔɔ lɛ, esa akɛ afo gbekɛ lɛ ketia. Kɛ be nɛɛ shɛ lɛ, nanemɛi kɛ wekumɛi baa amɛbasaraa amɛ. Amɛkɛɛ akɛ atsɛ gbekɛ lɛ gbɛi akɛ Zakaria taakɛ atsɛɔ etsɛ lɛ. Shi Elisabet kɛɛ ‘dabi, atsɛ lɛ Yohane moŋ.’ Kaimɔ akɛ no ji gbɛi ni bɔfo Gabriel kɛha akɛ atsɛ gbekɛ lɛ.

Shi amɛnanemɛi lɛ ekpɛlɛɛɛ, ni amɛkɛɛ: ‘Mɔ ko mɔ ko bɛ nyɛweku lɛ mli ni atsɛɔ lɛ kɛ nɛkɛ gbɛi nɛɛ.’ Kɛkɛ ni amɛkɛ amɛnine fee okadi amɛbi tsɛ lɛ bɔ ni esumɔɔ ni atsɛ gbekɛ lɛ. Kɛkɛ ni ebi ni akɛ tao fioo ko aha lɛ. Kɛkɛ ni Zakaria ŋma akɛ. ‘Egbɛi ji Yohane.’

Amrɔ nɔŋŋ pɛ kɛkɛ ni elilɛi fɛne yɛ naakpɛɛ gbɛ nɔ. Obaanyɛ okai akɛ etɔ mu beni eheee bɔfo lɛ wiemɔ akɛ Elisabet baafɔ bi lɛ eyeee lɛ. Ojogbaŋŋ, no hewɔ lɛ beni Zakaria bɔi wiemɔ lɛ, ekutsoŋbii lɛ fɛɛ anaa kpɛ amɛhe ni amɛbibii amɛhe akɛ: ‘Mɛni po gbekɛ nɛɛ baatsɔ?’

Kɛkɛ ni mumɔ krɔŋkrɔŋ ba Zakaria nɔ ni egba yɛ ebi lɛ he akɛ: ‘Aaatsɛ lɛ Ŋwɛi Flooflonyo lɛ gbalɔ, ni ebaanyiɛ Yehowa hiɛ ni eyasaa gbɛ eto lɛ. Ebaakɛɛ gbɔmɛi lɛ akɛ amɛha ahere amɛyiwala kɛtsɔ amɛhe eshai ni akɛaake amɛ lɛ nɔ.’

Yɛ nɛkɛ be nɛɛ mli lɛ, eka shi faŋŋ akɛ Maria ni efeee yoo ni ebote gbalashihilɛ mli lɛ eyashɛ Nazaret, emaŋ. Mɛni baaba enɔ kɛ ayoo akɛ ehiɛ musu lɛ? Luka 1:​56-80; 3 Mose 12:​2, 3.

◆ Be enyiɛ Yohane kɛye Yesu onukpa?

◆ Mɛni nibii ba beni Yohane ná gbii kpaanyɔ Iɛ?

◆ Mɛni nitsumɔ agba akɛ Yohane baatsu?