Yitso 7

Yesu kɛ Ŋulamiaŋkwɛlɔi Lɛ

HII komɛi jɛ Bokagbɛ amɛba. Ŋulamiaŋkwɛlɔi ji amɛ—gbɔmɛi ni kɛɔ akɛ amɛtsɔɔ bɔ ni ŋulamii jeɔ haa lɛ mli. Beni amɛyɔɔ shia yɛ Bokagbɛ lɛ, amɛna ŋulami hee ko, ni amɛnyiɛ esɛɛ shitooi ohai abɔ kɛbashɛ Yerusalem.

Beni ŋulamiaŋkwɛlɔi lɛ shɛ Yerusalem lɛ, amɛbi akɛ: “Nɛgbɛ Yudafoi amaŋtsɛ ni afɔ lɛ yɔɔ? Shi wɔna eŋulami yɛ boka lɛ, ni wɔba lɛ jamɔ nɛɛ.”

Beni Maŋtsɛ Herode nu enɛ yɛ Yerusalem lɛ, egba enaa waa diɛŋtsɛ. No hewɔ lɛ etsɛ osɔfonukpai lɛ ni ebi amɛ he ni abaafɔ Kristo lɛ yɛ. Ni amɛdamɔ Ŋmalɛi lɛ anɔ amɛha lɛ hetoo akɛ: “Yɛ Betlehem.” Enɛ hewɔ lɛ, Herode ha akɛ ŋulamiaŋkwɛlɔi lɛ ba eŋɔɔ ni ekɛɛ amɛ akɛ: “Nyɛyaa ni nyɛyataoa abifao lɛ fitsofitso; shi kɛ nyɛna lɛ lɛ, nyɛbakɛa mi, koni mi hu maba ni mabaja lɛ.” Shi yɛ anɔkwale mli lɛ, Herode miitao ni ena abifao lɛ koni eha agbe lɛ!

Beni amɛshi jɛmɛ lɛ, naakpɛɛ nɔ ko ba. Ŋulami ni amɛna beni amɛyɔɔ Boka lɛ nyiɛ amɛhiɛ kɛtee. Eyɛ faŋŋ akɛ, jeee ŋulami folo ko kɛkɛ nɛ, shi moŋ eji nɔ pɔtɛɛ ko ni akɛha ni enyiɛ amɛhiɛ. Ni ŋulamiaŋkwɛlɔi lɛ tee nɔ amɛnyiɛ esɛɛ aahu kɛyashi be mli ni eyawa yɛ shia he ni Yosef kɛ Maria yɔɔ lɛ yiteŋ tuuŋtu.

Beni ŋulamiaŋkwɛlɔi lɛ bote shia lɛ mli lɛ, amɛna Maria kɛ abifao lɛ, Yesu. Kɛkɛ ni amɛkula shi amɛha lɛ. Ni amɛfɛ̃ne amɛnibii lɛ ni amɛjie shika kɛ krɔbɔɔ kɛ mire amɛke lɛ. Yɛ sɛɛ mli beni amɛsaa amɛhe koni amɛku sɛɛ kɛya ni amɛyakɛɛ Herode he ni gbekɛ lɛ yɔɔ lɛ, Nyɔŋmɔ bɔ amɛ kɔkɔ kɛtsɔ lamɔ mli akɛ amɛkafee nakai. No hewɔ lɛ amɛtsɔ gbɛ kroko kwraa kɛku amɛsɛɛ kɛtee amɛmaŋ.

Namɔ osusuɔ akɛ ekɛ ŋulami ni nyiɛ ŋwɛi ni kudɔ ŋulamiaŋkwɛlɔi nɛɛ ha? Kaimɔ akɛ, ŋulami lɛ enyiɛɛɛ amɛhiɛ tɛɛ kɛyaaa he ni Yesu yɔɔ lɛ yɛ Betlehem. Shi moŋ, enyiɛ amɛhiɛ kɛtee Yerusalem yɛ he ni amɛkɛ Maŋtsɛ Herode, mɔ ni taoɔ ni egbe Yesu lɛ kpe yɛ lɛ. Ni eji Nyɔŋmɔ kɛ ehe wooo mli ni eeebɔ ŋulamiaŋkwɛlɔi lɛ kɔkɔ ni amɛkatsɔɔɔ Herode he ni Yesu yɔɔ kɔkɔɔkɔ kulɛ, amɛbaafee nakai. Nyɔŋmɔ henyɛlɔ, Satan Abonsam ji mɔ ni taoɔ agbe Yesu lɛ, ni ekɛ nakai ŋulami lɛ tsu nii bɔni afee ni ekɛbɔ mɔdɛŋ ni ekɛtsu eyiŋtoo nɛɛ he nii. Mateo 2:1-12; Mika 5:2.

▪ Mɛni tsɔɔ akɛ ŋulami ni ŋulamiaŋkwɛlɔi lɛ na lɛ jeee ŋulami folo ko kɛkɛ?

▪ Nɛgbɛ Yesu yɔɔ beni ŋulamiaŋkwɛlɔi lɛ bana lɛ lɛ?

▪ Mɛni hewɔ wɔle akɛ Satan ji mɔ ni kɛ ŋulami lɛ ha koni enyiɛ ŋulamiaŋkwɛlɔi lɛ ahiɛ lɛ?