Yitso 9
Yesu Mra Mli Weku Shihilɛ
BENI Yesu daa yɛ Nazaret lɛ, no mli lɛ, eji maŋ bibioo ko ni he ehiaaa tsɔ. Eyɛ gɔji ashikpɔŋ ko nɔ yɛ he ko ni atsɛɔ jɛi akɛ Galilea, ni ekɛ Yezreel Jɔɔ fɛfɛo lɛ jɛkɛɛɛ.
Beni Yosef kɛ Maria kɛ Yesu, ni ekolɛ eye afii enyɔ lɛ jɛ Mizraim kɛba biɛ lɛ, no mli lɛ eka shi faŋŋ akɛ lɛ pɛ ji Maria bi. Shi enɛ sɛɛ etsɛɛɛ. Yɛ be ni sa mli lɛ, afɔ Yakobo, Yosef, Simon, kɛ Yudas, ni Maria kɛ Yosef fɔ biyei hu. Yɛ naagbee lɛ, kɛ hoo lɛ, Yesu yɛ nyɛmimɛi hii kɛ yei bibii ekpaa.
Yesu yɛ wekumɛi krokomɛi hu. Wɔle enyɛkwɛ binuu Yohane ni ye lɛ onukpa, ni yɔɔ Yudea ni ekɛ lɛ teŋ kɛjɛ waa lɛ momo. Shi Salome, ni eka shi faŋŋ akɛ eji Maria nyɛmiyoo lɛ yɛ Galilea ni ekɛ amɛ teŋ jɛkɛɛɛ. Salome kɛ Zebedeo ebote gbalashihilɛ mli, no hewɔ lɛ amɛbihii enyɔ, Yakobo kɛ Yohane ji Yesu nyɛkwɛ̃ bihii. Wɔleee akɛ Yesu kɛ nɛkɛ gbekɛbii enyɔ nɛɛ hi shi yɛ be kakadaŋŋ mli yɛ be mli ni amɛdaraa lɛ moŋ, shi yɛ sɛɛ mli lɛ amɛtsɔmɔ nanemɛi ni bɛŋkɛ amɛhe kpaakpa.
Esa akɛ Yosef atsu nii waa koni enyɛ ekwɛ eweku ni daa lɛ. Kapintɛfonyo ji lɛ. Yosef tsɔse Yesu akɛ lɛ diɛŋtsɛ ebinuu, no hewɔ lɛ atsɛɔ Yesu akɛ “ŋaalɔ lɛ bi lɛ.” Yosef tsɔɔ Yesu nii koni lɛ hu etsɔ kapintɛfonyo, ni ekase jogbaŋŋ hu. No hewɔ ni sɛɛ mli lɛ gbɔmɛi wie Yesu he akɛ, “Ŋaalɔ lɛ nɛ” lɛ.
Atswa Yosef weku lɛ shihilɛ adamɔ Yehowa Nyɔŋmɔ jamɔ nɔ. Yɛ Nyɔŋmɔ Mla lɛ nɔyeli mli lɛ, Yosef kɛ Maria kɛ mumɔŋ tsɔsemɔ ha amɛbii lɛ, ‘beni amɛtara shi yɛ amɛshia, beni amɛnyiɛ gbɛ nɔ, beni amɛkamɔ shi, kɛ beni amɛte shi fɛɛ.’ Kpeehe ko yɛ Nazaret, ni wɔyɛ nɔmimaa akɛ Yosef kɛ eweku lɛ fɛɛ yaa jɛmɛ koni amɛyaja yɛ jɛmɛ. Shi ŋwanejee ko bɛ he akɛ nɔ ni amɛnaa he miishɛɛ fe fɛɛ ji gbɛ ni amɛfaa be fɛɛ be kɛyaa Yehowa sɔlemɔwe ni yɔɔ Yerusalem lɛ mli lɛ. Mateo 13:55, 56; 27:56; Marko 15:40; 6:3; 5 Mose 6:6-9.
▪ Kɛ hoo kwraa lɛ, nyɛmimɛi hii kɛ yei bibii enyiɛ Yesu yɔɔ, ni mɛni ji amɛteŋ mɛi komɛi agbɛi?
▪ Namɛi ji Yesu nyɛkwɛ bihii etɛ ni ale amɛ jogbaŋŋ lɛ?
▪ Mɛɛ heloonaa nitsumɔ ko Yesu kase yɛ naagbee kwraa, ni mɛni hewɔ?
▪ Mɛɛ tsɔsemɔ ni he hiaa waa Yosef kɛha eweku lɛ?