Yitso 32

Mɛni Mla Ŋmɛɔ Gbɛ yɛ Hejɔɔmɔ Gbi lɛ Nɔ?

YESU tee kpeehe ko yɛ Galilea Ŋshɔ lɛ masɛi yɛ Hejɔɔmɔ Gbi kroko nɔ. Nuu ko yɛ jɛmɛ ni eninejurɔ egbo. Woloŋmalɔi lɛ kɛ Farisifoi lɛ miikwɛ Yesu waa akɛ ebaatsa nuu lɛ lo. Yɛ naagbee lɛ amɛbi lɛ akɛ: “Ani eja gbɛ akɛ atsaa mɔ yɛ hejɔɔmɔ gbi lɛ nɔ?”

Yudafoi ajamɔ mli hiɛnyiɛlɔi lɛ heɔ yeɔ akɛ ja wala eyaje oshara mli pɛ dani mla ŋmɛɔ gbɛ ni atsa mɔ yɛ Hejɔɔmɔ Gbi lɛ nɔ. Akɛ nɔkwɛmɔ nɔ lɛ, amɛtsɔɔ akɛ mla eŋmɛɛɛ gbɛ ni ajaje wú loo talɔ ni eshane aloo ni afi fala nɔ po yɛ Hejɔɔmɔ Gbi lɛ nɔ. No hewɔ lɛ woloŋmalɔi lɛ kɛ Farisifoi lɛ miibi Yesu saji ni amɛkɛmiibɔ mɔdɛŋ ni amɛna nɔ ko amɛkɛfolɔ enaa.

Shi kɛlɛ, Yesu le amɛjwɛŋmɔi lɛ. Yɛ nakai beaŋ nɔŋŋ lɛ, eyoo hu akɛ amɛkɔ shishinumɔ ko ni yɔɔ shɛii ni damɔɔɔ ŋmalɛi lɛ anɔ yɛ nɔ ni feɔ Hejɔɔmɔ Gbi lɛ yeli ni tsiɔ nitsumɔ gbɛ lɛ mlikuu he. No hewɔ lɛ Yesu fee klalo akɛ ekɛ amɛ baakpe hiɛ kɛ hiɛ, ni ekɛɛ nuu ni nine egbo lɛ akɛ: “Tee shi ni obadamɔ teŋ!”

Agbɛnɛ, Yesu tsɔ ehiɛ eha woloŋmalɔi lɛ kɛ Farisifoi lɛ ni ebi amɛ akɛ: “Nyɛteŋ namɔ ni yɔɔ too kome, ni kɛji eyagbee bu mli yɛ hejɔɔmɔ gbi lɛ nɔ lɛ, ni emɔŋ emli ni ejie lɛ?” Akɛni tookwɛmɔ damɔ shi kɛha nitsumɔ ko ni akɛ shika ewo mli hewɔ lɛ, amɛshiŋ lɛ yɛ bu lɛ mli kɛyashi enɔ jetsɛremɔ, koni ekolɛ hela amɔ lɛ ni no aha amɛbɔ nyɔmɔ. Kɛfata he lɛ, Ŋmalɛi lɛ kɛɔ akɛ: “Jalɔ nuɔ he ehaa eshia kooloo tete.”

Ni Yesu tee nɔ ni ekɛto he akɛ: “Ani gbɔmɔ jara waaa babaoo fe too? No hewɔ lɛ eja gbɛ akɛ afeɔ ejurɔ yɛ hejɔɔmɔ gbi lɛ nɔ.” Jamɔ mli hiɛnyiɛlɔi lɛ nyɛɛɛ amɛku nɛkɛ sane shishitsɔɔmɔ ni mli ka shi faŋŋ ni mlijɔlɛ yɔɔ mli hu nɛɛ naa, kɛkɛ ni amɛfee dioo.

Ni Yesu kwɛ ehe kɛkpe kɛ mlifu kɛ dɔlɛ babaoo hu yɛ tsuiwalɛ ni amɛkɛtsɔɔ amɛkwashiafeemɔ lɛ hewɔ. Kɛkɛ ni ekɛɛ nuu lɛ akɛ: “Kpã onine lɛ mli!” Ni ekpã mli ni atsa enine lɛ.

Ni amɛaana miishɛɛ akɛ atsa nuu lɛ nine lɛ ekoŋŋ moŋ lɛ, Farisifoi lɛ je kpo amrɔ nɔŋŋ ni amɛkɛ Herode kuu lɛ mlibii lɛ tee Yesu yinɔ apãm koni amɛgbe lɛ. Eka shi faŋŋ akɛ nɛkɛ maŋkwramɔŋ kuu nɛɛ mlibii lɛ ateŋ mɛi komɛi ji Sadukifoi Nyɔŋmɔ jalɔi lɛ hu. Yɛ amɛ daa gbi shihilɛ mli lɛ, nɛkɛ maŋkwramɔŋ kuu nɛɛ kɛ Farisifoi lɛ teɔ shi woɔ amɛhe yɛ faŋŋ mli, shi amɛfee ekome waa yɛ shi ni amɛteɔ amɛwoɔ Yesu lɛ mli. Mateo 12:9-14; Marko 3:1-6; Luka 6:6-11; Abɛi 12:10; 2 Mose 20:8-10.

▪ Mɛni Yesu fee ni ekɛsaa ehe kɛha kpe ni ekɛ Yudafoi jamɔ mli hiɛnyiɛlɔi lɛ baakpe lɛ?

▪ Mɛni Yudafoi ajamɔ mli hiɛnyiɛlɔi lɛ heɔ yeɔ yɛ tsamɔ ni atsaa mɔ yɛ Hejɔɔmɔ Gbi lɛ nɔ lɛ he?

▪ Mɛɛ mfonirifeemɔ ko Yesu kɛtsu nii ni ekɛku amɛsusumɔi ni ejaaa lɛ anaa?