Yitso 129

Etee Nɔ Ejie Ehe Kpo

KASELƆI lɛ awerɛ eho amɛhe lolo. Amɛnuuu nɔ hewɔ ni gbonyo bu lɛ ka shi efolo lɛ shishi, ni amɛheee amaniɛbɔi ni yei lɛ kɛba lɛ hu amɛyeee. No hewɔ lɛ sɛɛ mli yɛ Hɔgbaa lɛ, Kleopa kɛ kaselɔ kroko ko shi Yerusalem kɛmiiya Emao, ni jɛkɛmɔ aaafee shitoi kpawo.

Beni amɛnyiɛ gbɛ kɛyaa, ni amɛwieɔ nibii ni eba yɛ gbi lɛ mli lɛ he lɛ, gbɔ ko bafata amɛhe. Ni ebi amɛ akɛ: “Mɛɛ saji nyɛgbaa yɛ gbɛ lɛ nɔ ni nyɛfee mɔbɔmɔbɔ nɛɛ?”

Ni kaselɔi lɛ wa, ni amɛmamɔ amɛhiɛaŋ shi, ni Kleopa ha hetoo akɛ: “Ani okome pɛ ji gbɔ yɛ Yerusalem ni leee saji ni eba jɛi yɛ gbii nɛɛ amli lɛ?” Ni ebi akɛ: “Mɛɛ saji ni?”

Amɛha lɛ hetoo akɛ: “Yesu Nazarenyo lɛ . . . he saji. Wɔ osɔfonukpa lɛ kɛ wɔmaŋ onukpai lɛ ŋɔ lɛ ha ni abu lɛ gbele fɔ, ni asɛŋ lɛ. Shi wɔ lɛ wɔhiɛ ka nɔ akɛ kulɛ lɛ ji mɔ ni baakpɔ Israel lɛ.”

Kleopa kɛ ehafatalɔ lɛ gbala naakpɛɛ nibii ni ba yɛ gbi lɛ mli lɛ mli amɛtsɔɔ lɛ—naakpɛɛ nibii ni ji ŋwɛibɔfoi kɛ gbonyo bu folo ni ana lɛ he amaniɛbɔɔ lɛ—shi kɛlɛ amɛtsɔɔ bɔ ni amɛyiŋ efee amɛ yaa yɛ nibii ni ba nɛɛ ashishinumɔ he. Kɛkɛ ni gbɔ lɛ wie amɛhiɛ akɛ: “Oo kwashiai ni nyɛyɔɔ shɔɔ yɛ nyɛtsui mli akɛ nyɛaahe nii fɛɛ ni gbalɔ lɛ kɛɛ lɛ nyɛaaye! Ani jeee sa esa akɛ Kristo ana nɛkɛ amanehului nɛɛ ni ebote enunyam lɛ mli?” Kɛkɛ ni etsɔɔ amɛ wiemɔi ni jɛ ŋmalɛ krɔŋkrɔŋ lɛ mli ni kɔɔ Kristo lɛ he lɛ shishi.

Yɛ naagbee lɛ amɛbashɛ Emao masɛi, ni gbɔ lɛ fee tamɔ nɔ ni eeshi amɛ eya. Shi akɛni kaselɔi lɛ miitao amɛnu saji babaoo lolo hewɔ lɛ, amɛwo lɛ hewalɛ akɛ: “Okɛ wɔ ahi shi, ejaakɛ je miina ni eshɛ hiɛbulɛ eta.” No hewɔ lɛ ehi shi ni ekɛ amɛ ye nii. Beni esɔle ni ekumɔ aboloo lɛ ni ekɛha amɛ lɛ, kɛkɛ ni amɛyoo akɛ Yesu diɛŋtsɛ ni eŋɔ adesa gbɔmɔtso ji lɛ. Shi amrɔ nɔŋŋ kɛkɛ ni elaaje.

Agbɛnɛ amɛnu nɔ hewɔ ni gbɔ lɛ le nibii babaoo nɛkɛ lɛ shishi! Amɛbi akɛ: “Ani wɔtsui he edɔɔɔ la yɛ wɔmli beni ekɛ wɔ wieɔ yɛ gbɛ lɛ nɔ ni etsɔɔ wɔ Ŋmalɛi lɛ anaa lɛ?” No hewɔ lɛ amɛkɛ oyaiyeli te shi ni amɛyiŋ kɛku amɛsɛɛ kɛtee Yerusalem tɔɔ, ni amɛyana bɔfoi lɛ kɛ mɛi ni ebua amɛhe naa kɛfata amɛhe lɛ. Dani Kleopa kɛ ehefatalɔ lɛ baawie nɔ ko po lɛ, mɛi krokomɛi lɛ kɛ miishɛɛ bɔ amɛ amaniɛ akɛ: “Eyɛ mli akɛ Nuŋtsɔ lɛ ete shi, ni ejie ehe kpo etsɔɔ Simon!” Kɛkɛ ni mɛi enyɔ lɛ hu gba bɔ ni Yesu jie ehe kpo etsɔɔ amɛ lɛ. Enɛ gbeɔ yi feɔ shii ejwɛ ni ejie ehe kpo etsɔɔ ekaselɔi lɛ ateŋ mɛi sɔrɔtoi yɛ gbi lɛ mli.

Trukaa kɛkɛ ni Yesu bapue nɔ ni ji shii enumɔ nɔ. Eyɛ mli akɛ aŋamɔ shinaai lɛ ejaakɛ kaselɔi lɛ miishe Yudafoi lɛ gbeyei moŋ, shi ebote tsu lɛ mli, ni ebadamɔ amɛteŋ tuŋtu ni ekɛɛ amɛ akɛ: “Hejɔlɛ aha nyɛ!” Shi amɛshe gbeyei waa, ni amɛsusu akɛ amɛmiina mumɔ ko. No hewɔ lɛ, Yesu gbala mli etsɔɔ amɛ akɛ ejeee ninaa, ni ekɛɛ: “Mɛɛba nyɛtsui faa? Ni mɛɛ hewɔ hu ni ŋwanejee teɔ shi yɛ nyɛtsuii amli? Nyɛkwɛa miniji kɛ minaji akɛ mi diɛŋtsɛ ni; nyɛtaa mihe nyɛkwɛa; shi mumɔ ko bɛ heloo kɛ wui, tamɔ bɔ ni nyɛnaa akɛ miyɔɔ nɛɛ.” Shi kɛlɛ, amɛshashao shi akɛ amɛaahe amɛye.

Bɔni afee ni eye ebua amɛ ni amɛyoo akɛ lɛ ji Yesu diɛŋtsɛ lɛ, ebi amɛ akɛ: “Nyɛyɛ nɔ ko ni ayeɔ yɛ biɛ lo?” Yɛ be mli ni ehe loo ni ashi lɛ ni eye eta sɛɛ lɛ, ekɛɛ: “Enɛɛmɛi ji miwiemɔi ni mikɛ nyɛ wie beni mikɛ nyɛ yɔɔ lolo [dani migbo] lɛ, akɛ ja nibii fɛɛ ni aŋma yɛ Mose mla lɛ kɛ Gbalɔi lɛ kɛ Lalai lɛ amli yɛ mihewɔ lɛ na ba mli.”

Yɛ be mli ni eyaa nɔ yɛ nɔ ni tamɔ Biblia mli nikasemɔ nɛɛ mli lɛ, Yesu tsɔɔ amɛ akɛ: “Nɛkɛ aŋma, ni nɛkɛ esa akɛ Kristo ana amanehulu ni ete shi kɛjɛ gbohii ateŋ yɛ gbi ni ji gbi etɛ lɛ nɔ; ni ashiɛ tsuitsakemɔ kɛ eshaifaa yɛ egbɛi lɛ anɔ atsɔɔ maji fɛɛ, ni abɔi kɛjɛ Yerusalem. Ni nyɛji nɛkɛ nii nɛɛ ahe odasefoi.”

Yɛ nɔ̃ ko hewɔ lɛ, Toma bɛ nɛkɛ Hɔgbaa gbɛkɛnaashi kpee ni he hiaa nɛɛ shishi. No hewɔ lɛ, gbii ni nyiɛ sɛɛ lɛ amli lɛ, mɛi krokomɛi lɛ kɛ miishɛɛ kɛɛ lɛ akɛ: “Wɔna Nuŋtsɔ lɛ.”

Shi Toma wie eshi amɛ akɛ: “Ja mina edɛŋ plɛkoobii lɛ anajiaŋ, ni mikɛ miwao eta plɛkoobii lɛ anajiaŋ, ni mikɛ minine ehɔ eŋmawuiaŋ lɛ, dani mahe maye.”

Ojogbaŋŋ, gbii kpaanyɔ sɛɛ lɛ, kaselɔi lɛ bua amɛhe naa yɛ tsu mli ekoŋŋ. Yɛ be nɛɛ mli lɛ Toma fata amɛhe. Eyɛ mli akɛ aŋamɔ shinaai lɛ moŋ, shi Yesu badamɔ amɛteŋ ekoŋŋ ni ekɛɛ amɛ akɛ: “Hejɔlɛ aha nyɛ!” Kɛkɛ ni etsɔ ehiɛ eha Toma ni ekɛɛ lɛ akɛ: “Okɛ owao aba biɛ ni obakwɛ midɛ lɛ, ni okɛ onine abahɔ miŋmawuiaŋ lɛ, ni okaje ŋwane, shi moŋ ohe oye.”

Kɛkɛ ni Toma bo akɛ: “Mi-Nuŋtsɔ kɛ mi-Nyɔŋmɔ!”

Yesu bi lɛ akɛ: “Ni ona mi lɛ hewɔ ni ohe oye lɛ? Miishɛɛ ji mɛi ni enaaa ni kɛlɛ amɛheɔ amɛyeɔ lɛ.” (NW) Luka 24:11, 13-48; Yohane 20:19-29.

▪ Mɛɛ saji gbɔ ko babibii kaselɔi enyɔ lɛ beni amɛnyiɛ gbɛ nɔ kɛyaa Emao lɛ?

▪ Mɛni gbɔ lɛ wie ni eha kaselɔi lɛ atsuii ahe dɔ la waa yɛ amɛmli lɛ?

▪ Mɛɛ gbɛ nɔ kaselɔi lɛ tsɔ amɛyoo mɔ ni gbɔ lɛ ji?

▪ Beni Kleopa kɛ ehefatalɔ lɛ ku amɛsɛɛ kɛtee Yerusalem lɛ, mɛɛ amaniɛbɔɔ ko ni yɔɔ miishɛɛ amɛyanu?

▪ Mɛɛ gbɛ nɔ Yesu jie ehe kpo etsɔɔ ekaselɔi lɛ nɔ ni ji shii enumɔ nɔ yɛ, ni mɛni ba yɛ nakai be lɛ mli?

▪ Mɛni ba yɛ be mli ni Yesu ejie ehe kpo nɔ ni ji shii enumɔ nɔ lɛ sɛɛ gbi ni ji kpaanyɔ lɛ nɔ, ni mɛɛ gbɛ Toma tsɔ nɔ ehe eye yɛ naagbee kwraa akɛ Yesu yɛ wala mli?