Yitso 132

Yɛ Nyɔŋmɔ Ninejurɔ Nɔ

MUMƆ krɔŋkrɔŋ lɛ ni afɔse ashwie shi yɛ Pentekoste lɛ ji odaseyeli ni tsɔɔ akɛ Yesu eyashɛ ŋwɛi. Ninaa ni etsɛɛɛ ni akɛha kaselɔ Stefano lɛ hu yeɔ odase akɛ E-yashɛ jɛmɛ. Beni atswiaa Stefano tɛi yɛ odase ni eye yɛ anɔkwayeli mli lɛ hewɔ lɛ, ebo akɛ: “Naa, miina ŋwɛi naa ni egbele, kɛ gbɔmɔ Bi lɛ ni edamɔ Nyɔŋmɔ ninejurɔ nɔ.”

Beni eyɔɔ Nyɔŋmɔ ninejurɔ nɔ lɛ, no mli lɛ Yesu miimɛ famɔ ni jɛ e-Tsɛ lɛ ŋɔɔ nɛɛ: “Ye lumɔ yɛ ohenyɛlɔi lɛ ateŋ.” Shi dani enɛ aaaba, dani eeete shi ewo ehenyɛlɔi lɛ, mɛni Yesu feɔ? Eyeɔ ekaselɔi ni afɔ amɛ mu lɛ anɔ lumɔ loo maŋtsɛ, ekudɔɔ amɛ yɛ amɛshiɛmɔ nitsumɔ lɛ mli, ni eesaa amɛ koni amɛtsɔ shitee lɛ nɔ amɛbafee enanemɛi maŋtsɛmɛi yɛ e-Tsɛ Maŋtsɛyeli lɛ mli.

Akɛ nɔkwɛmɔ nɔ lɛ, Yesu hala Saul (ni akɛ e-Roma gbɛi lɛ bale lɛ jogbaŋŋ yɛ sɛɛ mli akɛ Paulo lɛ) koni enyiɛ kaselɔ-feemɔ nitsumɔ lɛ hiɛ yɛ maji krokomɛi anɔ. Saul feɔ ekaa yɛ Nyɔŋmɔ Mla lɛ he, ni kɛlɛ Yudafoi ajamɔ mli hiɛnyiɛlɔi lɛ kudɔ lɛ yɛ gbɛ ni ejaaa nɔ. Nɔ ni jɛ mli ba ji akɛ, jeee akɛ Saul kpɛlɛ gbe ni agbe Stefano lɛ nɔ kɛkɛ, shi moŋ ekɛ woji ni jɛ osɔfonukpa Kaiafa ŋɔɔ ni haa lɛ hewalɛ akɛ eya Damasko ni eyamɔmɔ hii kɛ yei ni eeena yɛ jɛmɛ ni ji Yesu sɛɛnyiɛlɔi lɛ kɛba Yerusalem lɛ tee jɛmɛ. Shi, beni Saul nyiɛ gbɛ kɛyaa lɛ, la ni kpɛɔ kaŋkaŋ kpɛ trukaa kɛjɛ ŋwɛi kɛbabɔle lɛ ni egbee shikpɔŋ.

Gbee ko ni jɛ jɛɛhe ko ni anaaa jɛmɛ lɛ bi akɛ, “Saul, Saul, mɛɛba owaa mi yi?” Kɛkɛ ni Saul bi akɛ, “Bo namɔŋ, Nuŋtsɔ?”

Hetoo ko ba akɛ, “Miji Yesu, mɔ ni owaa lɛ yi lɛ.”

Yesu kɛɛ Saul ni naakpɛɛ la lɛ eshwila lɛ lɛ akɛ, eya Damasko ni eyamɛ nɔ ni abaafa lɛ akɛ efee lɛ. Kɛkɛ ni Yesu jie ehe kpo yɛ ninaa mli etsɔɔ Anania, ekaselɔi lɛ ateŋ mɔkome. Yesu kɛɛ Anania yɛ Saul he akɛ: “Mɔ nɛɛ ji midɛŋdade ni ahala aha mi, koni ehiɛ migbɛi lɛ kɛya jeŋmaji kɛ maŋtsɛmɛi kɛ Israelbii lɛ hu ahiɛ.”

Yɛ anɔkwale mli lɛ, yɛ Yesu sɛɛfimɔ hewɔ lɛ, Saul (ni ale lɛ amrɔ nɛɛ akɛ Paulo) kɛ sanekpakpa shiɛlɔi krokomɛi ye omanye babaoo yɛ amɛ shiɛmɔ kɛ nitsɔɔmɔ nitsumɔ lɛ mli. Yɛ anɔkwale mli lɛ, beni Yesu ejie ehe kpo etsɔɔ lɛ yɛ Damasko gbɛ lɛ nɔ lɛ sɛɛ afii 25 lɛ, Paulo ŋma akɛ “ashiɛ” “sanekpakpa lɛ” yɛ ‘bɔɔnii ni yɔɔ ŋwɛi shishi nɛɛ fɛɛ mli.’

Beni afii pii eho sɛɛ lɛ, Yesu kɛ ninaai ni tsara nɔ ha ebɔfo ni esumɔɔ esane lɛ, Yohane. Yohane tsɔ ninaai ni etsɔɔ mli yɛ Biblia mli wolo ni ji Kpojiemɔ lɛ mli lɛ nɔ ena Yesu ni eku esɛɛ eba Maŋtsɛyeli hewalɛ mli lɛ. Yohane kɛɛ akɛ atsɔ “mumɔ mli” akɛ lɛ tee hiɛ yɛ beebuu mli yɛ “Nuŋtsɔ lɛ gbi lɛ nɔ.” Mɛni ji nɛkɛ “gbi” nɛɛ?

Biblia mli gbalɛi akasemɔ jogbaŋŋ, ni Yesu gbalɛ ni kɔɔ naagbee gbii lɛ ahe lɛ fata he lɛ jieɔ lɛ kpo akɛ “Nuŋtsɔ lɛ gbi lɛ” je shishi yɛ afi 1914 ni fee yinɔsane lɛ mli, hɛɛ, yɛ nɛkɛ yinɔ nɛɛ mli! No hewɔ lɛ 1914 mli ni Yesu ku esɛɛ ni anaaa lɛ, ni gbɔmɛi kɛ hoofeemɔ yooo enɛ, ni etsuji anɔkwafoi lɛ pɛ yɔse nɛkɛ esɛɛkuu nɛɛ. Nakai afi lɛ mli ni Yehowa kɛ famɔ ha Yesu akɛ eya nɔ eye lumɔ yɛ ehenyɛlɔi lɛ ateŋ!

Yɛ e-Tsɛ lɛ famɔ lɛ toiboo mli lɛ, Yesu shwie Satan kɛ edaimonioi lɛ kɛjɛ ŋwɛi ni ekɛtsuu ŋwɛi he, ni eshɛrɛ amɛ eshwie shikpɔŋ nɔ. Beni ena bɔ ni enɛ ba yɛ ninaa mli lɛ sɛɛ lɛ, Yohane nu ŋwɛi gbee ko ni miijaje akɛ: “Agbɛnɛ yiwalaheremɔ lɛ kɛ hewalɛ kɛ maŋtsɛyeli lɛ etsɔ wɔ-Nyɔŋmɔ lɛ nɔ, ni akɛ hegbɛ lɛ eha e-Kristo lɛ!” Hɛɛ, 1914 mli ni Kristo je nɔyeli shishi akɛ Maŋtsɛ!

Mɛɛ sanekpakpa enɛ ji kɛha Yehowa jalɔi ni yɔɔ ŋwɛi lɛ nɛkɛ! Awo amɛ ekãa akɛ: “Nyɛ ŋwɛii kɛ nyɛ mɛi ni nyɛyɔɔ jɛmɛ nyɛnaa tsuijurɔ!” Shi te shihilɛ lɛ yɔɔ tɛŋŋ kɛha mɛi ni yɔɔ shikpɔŋ nɔ lɛ? Gbee ni jɛ ŋwɛi lɛ tee nɔ akɛ: “Kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ, ejaakɛ Abonsam lɛ ekpeleke shi kɛba nyɛŋɔɔ, egri naakpa, ni ele akɛ be fioo kɛkɛ eyɔɔ.”

Wɔyɛ nakai be fioo lɛ mli bianɛ. Aagbala gbɔmɛi amli koni amɛbote Nyɔŋmɔ jeŋ hee lɛ mli aloo ni akpata amɛhiɛ. Anɔkwale lɛ ji akɛ, bɔ ni ohereɔ Nyɔŋmɔ Maŋtsɛyeli lɛ he sanekpakpa lɛ ni ashiɛɔ yɛ shikpɔŋ lɛ fɛɛ nɔ yɛ Kristo gbɛtsɔɔmɔ shishi lɛ nɔ ohaa lɛ tsɔɔ nɔ ni baaba onɔ yɛ wɔsɛɛ.

Kɛ agbe gbɔmɛi lɛ amligbalamɔ lɛ naa lɛ, Yesu Kristo baatsu nii akɛ Nyɔŋmɔ Najiaŋdamɔlɔ, koni ejie Satan nibii agbɛjianɔtoo lɛ fɛɛ kɛ mɛi fɛɛ ni fiɔ sɛɛ lɛ kɛjɛ shikpɔŋ lɛ nɔ kwraa. Yesu baatsu nɛkɛ efɔŋfeemɔ fɛɛ ni ajieɔ kɛyaa nɛɛ he nii yɛ ta ni atsɛɔ lɛ Har–Magedon loo Armagedon lɛ mli. Yɛ no sɛɛ lɛ, Yesu, Mɔ ni fe fɛɛ yɛ jeŋ muu fɛɛ ni baa yɛ Yehowa Nyɔŋmɔ diɛŋtsɛ sɛɛ lɛ, baamɔ Satan kɛ edaimonioi lɛ, ni ebaafimɔ amɛ afii akpe yɛ “bu kwɔŋkwɔŋ” ko mli, ni ji akɛ, yɛ shihilɛ ni tamɔ gbele ni anyɛɛɛ nɔ ko afee yɛ mli lɛ mli. Bɔfoi lɛ Asaji 7:55-60; 8:1-3; 9:1-19; 16:6-10; Lala 110:1, 2; Hebribii 10:12, 13; 1 Petro 3:22; Luka 22:28-30; Kolosebii 1:13, 23; Kpojiemɔ 1:1, 10; 12:7-12; 16:14-16; 20:1-3; Mateo 24:14; 25:31-33.

▪ Beni Yesu kwɔ kɛtee ŋwɛi lɛ sɛɛ lɛ, nɛgbɛ eyahi, ni mɛni emɛɔ?

▪ Namɛi anɔ maŋtsɛ Yesu ye yɛ be mli ni ekwɔ kɛtee ŋwɛi lɛ sɛɛ, ni enɔyeli lɛ jeɔ kpo yɛ mɛɛ gbɛ nɔ?

▪ Mɛɛ be “Nuŋtsɔ lɛ gbi lɛ” je shishi, ni mɛni ba yɛ eshishijee mli?

▪ Mɛɛ mligbalamɔ nitsumɔ ni yaa nɔ bianɛ saa wɔteŋ mɔ fɛɛ mɔ he diɛŋtsɛ, ni mɛni nɔ adamɔɔ agbalaa mɛi amli lɛ?

▪ Kɛ agbe mligbalamɔ nitsumɔ lɛ naa lɛ, mɛni nibii baanyiɛ sɛɛ aba?