Nikasemɔ 14

Bɔ ni Ato Yehowa Odasefoi Ahe Gbɛjianɔ Aha

Mɛɛ be Yehowa Odasefoi je shishi yɛ ŋmɛnɛŋmɛnɛ beaŋ? (1)

Te afeɔ Yehowa Odasefoi akpeei ahaa tɛŋŋ? (2)

Te afeɔ tɛŋŋ awoɔ nyɔmɔ ni abɔɔ lɛ? (3)

Namɔ nyiɛɔ hiɛ yɛ asafo fɛɛ asafo mli? (4)

Mɛɛ kpeei wuji afeɔ daa afi? (5)

Mɛni atsuɔ yɛ amɛ nitsumɔ he yitso lɛ kɛ eniji lɛ? (6)

1. Yehowa Odasefoi je shishi yɛ ŋmɛnɛŋmɛnɛ beaŋ yɛ 1870 afii lɛ amli. Tsutsu ko lɛ, atsɛɔ amɛ akɛ Biblia Kaselɔi. Shi yɛ 1931 lɛ amɛkpɛlɛ Ŋmalɛ naa gbɛi, Yehowa Odasefoi lɛ nɔ. (Yes. 43:10) Gbɛjianɔtoo lɛ je shishi bibioo ni amɛyi efa aahu kɛyashɛ Odasefoi akpekpei abɔ ni bɛ deka kwraa kɛ shiɛmɔ nitsumɔ lɛ yɛ shikpɔji fe 230 nɔ.

2. Yehowa Odasefoi asafoi babaoo kpeɔ shii etɛ daa otsi. Aafɔ bo nine ni oba emli eko fɛɛ eko. (Heb. 10:24, 25) Nɔ ni atsɔɔ lɛ fɛɛ jɛ Biblia lɛ mli. Akɛ sɔlemɔ jeɔ kpeei lɛ ashishi ni akɛgbeɔ naa. Alaa “mumɔŋ lalai” hu ni jɛ tsuiŋ yɛ kpeei lɛ babaoo shishi. (Efe. 5:18, 19) Awooo nyɔmɔ ko yɛ he, ni aheee shika.—Mat. 10:8.

3. Asafoi babaoo kpeɔ yɛ Maŋtsɛyeli Asa nɔ. Bei pii lɛ enɛɛmɛi ji tsũi ni bɛ hwanyaŋŋ ni Odasefoi ni kɛ amɛhe eha lɛ mamɔ. Onaŋ amagai, sɛŋmɔtso he okadii, loo nibii tamɔ enɛɛmɛi yɛ Maŋtsɛyeli Asa lɛ nɔ. Akɛ shika ni ajɛɔ suɔmɔ mli akɛhaa lɛ woɔ nyɔmɔ ni abɔɔ lɛ. Onia adeka yɛ kɛha mɛi ni miisumɔ ni amɛkɛ shika aye kɛbua lɛ.—2 Kor. 9:7.

4. Onukpai loo nɔkwɛlɔi yɛ asafo fɛɛ asafo mli. Amɛnyiɛɔ hiɛ yɛ asafo lɛ nitsɔɔmɔ mli. (1 Tim. 3:1-7; 5:17) Asafoŋ sɔɔlɔi yeɔ buaa amɛ. (1 Tim. 3:8-10, 12, 13) Aholeee hii nɛɛ anɔ yɛ asafoŋbii krokomɛi lɛ anɔ. (2 Kor. 1:24) Ahaaa amɛ sabalai krɛdɛɛi komɛi hu. (Mat. 23:8-10) Amɛsaaa amɛhe yɛ gbɛ ni esoro no yɛ mɛi krokomɛi anɔ he. Asaŋ awooo amɛ nyɔmɔ yɛ amɛ nitsumɔ lɛ hewɔ. Onukpai lɛ jɛɔ amɛ suɔmɔ mli amɛkwɛɔ asafo lɛ mumɔŋ hiamɔ nii anɔ. Amɛbaanyɛ amɛkɛ miishɛjemɔ kɛ gbɛtsɔɔmɔ aha yɛ haomɔ bei amli.—Yak. 5:14-16; 1 Pet. 5:2, 3.

5. Yehowa Odasefoi feɔ kpeei wuji hu daa afi. Yɛ bei ni tamɔ enɛɛmɛi amli lɛ, asafoi babaoo babuaa amɛhe naa kɛhaa Biblia mli nitsɔɔmɔ he gbɛjianɔtoo krɛdɛɛ. Kaselɔi heei abaptisimɔ ji kpee fɛɛ kpee he gbɛjianɔtoo lɛ fa ko ni afɔɔ feemɔ.—Mat. 3:13-17; 28:19, 20.

6. Yehowa Odasefoi ajeŋ fɛɛ nitsumɔ he yitso lɛ yɛ New York. Jɛmɛ ji he ni Nɔyeli Kuu, onukpai ni yɔɔ niiashikpamɔ lɛ akuu ni kudɔɔ nitsumɔ lɛ ni kwɛɔ asafoi ni yɔɔ jeŋ fɛɛ nɔ lɛ yɔɔ. Agbɛnɛ ayɛ nitsumɔ he niji ni fa fe 100 yɛ jeŋ fɛɛ. Mɛi ni kɛ amɛhe eha yeɔ amɛbuaa yɛ hei ni tamɔ nɛkɛ ni akalaa Biblia kasemɔ he woji ni akɛwoɔ lɛji amli akɛmajeɔ. Akɛ gbɛtsɔɔmɔ hu haa koni akɛto shiɛmɔ nitsumɔ lɛ he gbɛjianɔ. Mɛni hewɔ otooo gbɛjianɔ koni oyasara nitsumɔ he nine ni bɛŋkɛ bo fe fɛɛ lɛ?