Gbɛkpamɔ ko ni Yɔɔ Sɔrɔto Kwraa!
“Mɔ fɛɛ mɔ ni hiɛ kã ni eheɔ minɔ eyeɔ lɛ, egboŋ gbi ko gbi ko kɛaatee naanɔ.”—YOHANE 11:26.
1. Abaatee akpekpei abɔ ni egboi bianɛ lɛ ashi kɛba mɛɛ shihilɛi amli?
KƐ ATÉE mɛi akpekpei abɔ shi yɛ gbohiiashitee lɛ mli lɛ, akɛ amɛ baŋ wala mli yɛ shikpɔŋ ni gbɔmɛi bɛ nɔ nɔ. (Bɔfoi lɛ Asaji 24:15) Amɛhiɛ baatsɛ̃ yɛ shihilɛi fɛfɛji ni aha etee hiɛ mli, ni amɛbaana akɛ asaa shihilɛhei, atadei, kɛ niyenii babaoo ato amɛ. Namɛi baasaa nɛkɛ nibii nɛɛ ato amɛ? Eka shi faŋŋ akɛ, esa akɛ gbɔmɛi ahi shi yɛ jeŋ hee lɛ mli dani shikpɔŋ nɔ gbohiiashitee lɛ aje shishi. Shi namɛi?
2-4. Mɛɛ gbɛkpamɔ ni yɔɔ sɔrɔto kwraa kã mɛi ni yɔɔ “naagbee gbii lɛ” amli lɛ ahiɛ?
2 Biblia gbalɛ mlibaa tsɔɔ akɛ wɔyɛ nibii agbɛjianɔtoo nɛɛ “naagbee gbii lɛ” amli.a (2 Timoteo 3:1) Etsɛŋ kwraa ni Yehowa Nyɔŋmɔ kɛ ehe baawo adesai asaji amli ni ebaajie efɔŋfeemɔ kɛjɛ shikpɔŋ lɛ nɔ kwraa. (Lala 37:10, 11; Abɛi 2:21, 22) Mɛni baaba mɛi ni kɛ anɔkwayeli sɔmɔɔ Nyɔŋmɔ lɛ anɔ yɛ nakai beaŋ?
3 Yehowa kpataŋ jalɔi lɛ ahiɛ efataŋ mɛi fɔji lɛ ahe. (Lala 145:20) Efeko nakai dã, ni efeŋ nakai beni eeejie efɔŋfeemɔ fɛɛ kɛjɛ shikpɔŋ lɛ nɔ lɛ. (Okɛto 1 Mose 18:22, 23, 26 he.) Yɛ anɔkwale mli lɛ, Biblia lɛ naagbee wolo lɛ wieɔ “asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli,” ni jɛ “amanehulu kpeteŋkpele lɛ mli” lɛ ahe. (Kpojiemɔ 7:9-14) Hɛɛ, gbɔmɛi asafo babaoo ko yi baaná wala kɛfo amanehulu kpeteŋkpele lɛ ni kɛ amrɔ nɛɛ nibii agbɛjianɔtoo lɛ baaba naagbee lɛ, ni amɛbaabote Nyɔŋmɔ jeŋ hee lɛ mli. Adesai toibolɔi lɛ baanyɛ aná Nyɔŋmɔ gbɛjianɔtoo ni yɔɔ naakpɛɛ ní ekɛbaaha adesai aye amɛhe kɛjɛ esha kɛ gbele mli lɛ he sɛɛ kɛmɔ shi yɛ jɛmɛ. (Kpojiemɔ 22:1, 2) Enɛ hewɔ lɛ, ehe ehiaaa ni “asafo babaoo” lɛ aná gbele mli niiashikpamɔ. Mɛɛ gbɛkpamɔ ni yɔɔ sɔrɔto kwraa nɛ!
4 Ani wɔbaanyɛ wɔná hiɛnɔkamɔ ni yɔɔ naakpɛɛ fe nine nɛɛ mli hekɛnɔfɔɔ? Hɛɛ, kɛ nɔmimaa! Yesu Kristo diɛŋtsɛ tsɔɔ akɛ be ko baashɛ ni gbɔmɛi baahi shi ni amɛgboiŋ dɔŋŋ. Beni eshwɛ be fioo ni ebaatee eshieŋtsɛ Lazaro shi lɛ, Yesu kɛɛ Marta akɛ: “Mɔ fɛɛ mɔ ni hiɛ kã ni eheɔ minɔ eyeɔ lɛ, egboŋ gbi ko gbi ko kɛaatee naanɔ.”—Yohane 11:26.
Bo Hu Obaanyɛ Ohi Shi Kɛya Naanɔ
5, 6. Kɛ́ ootao ni ohi shi kɛya naanɔ yɛ Paradeiso yɛ shikpɔŋ nɔ lɛ, mɛni esa akɛ ofee?
5 Ani oosumɔ ni ohi shi kɛya naanɔ yɛ Paradeiso yɛ shikpɔŋ nɔ? Ani ooshwe ni ona osuɔlɔi lɛ ekoŋŋ? No lɛ esa akɛ oná Nyɔŋmɔ suɔmɔnaa nii kɛ eyiŋtoi ahe anɔkwa nilee. Yesu kɛɛ Nyɔŋmɔ yɛ sɔlemɔ mli akɛ: “Enɛ ji naanɔ wala lɛ, akɛ amɛaaná bo, anɔkwa Nyɔŋmɔ kome pɛ lɛ, kɛ Yesu Kristo, mɔ ni otsu lɛ lɛ he nilee.”—Yohane 17:3, NW.
6 Nyɔŋmɔ suɔmɔnaa nii ji akɛ “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Timoteo 2:3, 4) Amrɔ nɛɛ ji be ni okɛaakase bɔ ni ooofee ni ofata mɛi krokomɛi akpekpei abɔ ni miifee Nyɔŋmɔ suɔmɔnaa nii momo lɛ ahe kɛhi shi kɛya naanɔ yɛ Paradeiso yɛ shikpɔŋ nɔ. Yehowa Odasefoi baaná he miishɛɛ akɛ amɛaaye amɛbua bo ní ole Nyɔŋmɔ kɛ etaomɔ nii ahe nibii babaoo. Mɛni hewɔ obɛŋkɛɛɛ amɛ yɛ Maŋtsɛyeli Asa ni bɛŋkɛ bo lɛ nɔ, loo oŋmaaa wolo kɛyaaa adrɛs ni atsɔɔ yɛ baafa ni tsa nɔ lɛ mli nɔ ni bɛŋkɛ bo fe fɛɛ?
[Shishigbɛ niŋmaa]
a Kwɛmɔ Nilee Ni Kɛ Mɔ Yaa Naanɔ Wala Mli, ni Watchtower Bible and Tract Society of New York, Inc. fee lɛ baafai 98-107.
[Mfoniri ni yɔɔ baafa 31]
Ehe ehiaaa ni “asafo babaoo” ko aná gbele mli niiashikpamɔ kɔkɔɔkɔ