Wiemɔi ní Awieɔ ní Emli Tseɔ

BƆNI afee ni owiemɔ afee nɔ ni mɔɔ shi lɛ, esa akɛ owie ni emli atse. Nɔ ni otaoɔ ni okɛɛ lɛ baanyɛ afee nɔ ni yɔɔ miishɛɛ, ekolɛ nɔ ni he hiaa po, shi kɛji anuuu owiemɔi lɛ ashishi jogbaŋŋ lɛ, no lɛ babaoo efeŋ faŋŋ.

Wiemɔi ni gbɔmɛi nuuu shishi jogbaŋŋ lɛ kanyaaa amɛ. Eyɛ mli akɛ mɔ ko baanyɛ ahiɛ gbee ni wa ni abaanyɛ anu jogbaŋŋ moŋ, shi kɛji ewiemɔi lɛ amli tseee lɛ, etsirɛŋ mɛi krokomɛi ni amɛtsu he nii. Ebafeɔ tamɔ nɔ ni eewie maŋsɛɛ wiemɔ, ni shishinumɔ ko bɛ he kɛha toibolɔ lɛ. (Yer. 5:15) Biblia lɛ kaiɔ wɔ akɛ: “Kɛji tɛtɛrɛmantɛrɛ egbɛɛɛ gbɛɛmɔ ni yɔɔ faŋŋ lɛ, namɔ aaasaa ehe ato ta? Nakai nɔŋŋ kɛ̃ ji nyɛ hu yɛ lilɛi gbɛfaŋ: kɛji nyɛwieee wiemɔ ni shishi yɔɔ faŋŋ lɛ, te aaafee tɛŋŋ ni aaale nɔ ni akɛɔ lɛ? Ejaakɛ nyɛtamɔ mɛi ni wieɔ tsɔɔ kɔɔyɔɔ.”—1 Kor. 14:8, 9.

Mɛni Haa Wiemɔ Feɔ Nɔ ni Mli Tseee? Ebaanyɛ efee daaŋ ní agbɛɛɛ jogbaŋŋ bɔ ni sa. Kadaa faji ni eshɔ̃ kɛ naabu ní tsiii ehe lɛ baanyɛ aha wiemɔ gbɛɛmɔ lɛ afee nɔ ni mli tseee.

Wiemɔ ní aaawie oyayaayai lɛ hu baanyɛ aha wiemɔ afee nɔ ni wa akɛ aaanu shishi. Etamɔ nɔ ni ootswa wiemɔ ko oyayaayai fe bɔ ni ato he gbɛjianɔ akɛ tsɔne lɛ atswa. Wiemɔi lɛ yɛ mli, shi sɛɛnamɔ ni yɔɔ he lɛ mli babaoo laajeɔ.

Yɛ shihilɛi komɛi amli lɛ, wiemɔ ni mli tseee lɛ jɛɔ gbɔmɔtso lɛ he nii ní akɛwieɔ lɛ ahe gbɛjianɔtoo ni efite lɛ hewɔ. Shi mɛi ni sa akɛ amɛkpee nakai naagba lɛ naa lɛ po baanyɛ aya hiɛ babaoo kɛji amɛkɛ ŋaawoi ni akɛha yɛ nikasemɔ nɛɛ mli lɛ tsu nii.

Shi kɛlɛ, bei pii lɛ wiemɔi ni egbɛɛɛ faŋŋ lɛ jɛɔ wiemɔi ni mli tseee lɛ hewɔ—wiemɔi ni awieɔ ni amiii sɛ̃ŋ nu ni no hewɔ lɛ ehaa ewaa akɛ aaanu shishi. Naagba lɛ baanyɛ akɔ wiemɔ shikome tsɛmɔ loo niŋmaa okadii ni sa kadimɔ ní ahuruɔ loo wiemɔi anaagbee ni ashiɔ lɛ he. Kɛ́ mɔ ko wie wiemɔi ni emiii esɛ̃ŋ nu lɛ, no lɛ etoibolɔi lɛ baanyɛ amɛnu susumɔi komɛi kɛ wiemɔi kukuji komɛi kɛkɛ, shi esa akɛ amɛka amɛyiŋ yɛ ekrokomɛi ahe. Kɛji mɔ ko ewieee ni emli atse lɛ, ebaanyɛ etsĩ bɔ ni enitsɔɔmɔ mɔɔ shi ehaa lɛ naa.

Bɔ ni Afeɔ Awieɔ ní Emli Tseɔ. Gbɛ̀i titrii ni akɛwieɔ wiemɔi ni mli tse lɛ ateŋ ekome ji ni onu bɔ ni atoɔ wiemɔi ahe gbɛjianɔ yɛ bo diɛŋtsɛ owiemɔ mli lɛ shishi. Yɛ maji anɔ wiemɔi babaoo mli lɛ, wiemɔi komekomei lɛ yɛ fãi bibii ní akɛjaraa mli ní akɛtsɛɔ. Wiemɔ gbɛɛmɔ fãi nɛɛ ji niŋmaa okadi kome loo babaoo ni abua naa ni atsɛɔ kɛ gbɛɛmɔ kome. Yɛ nakai maji anɔ wiemɔi lɛ amli lɛ, wiemɔ gbɛɛmɔ fãi nɛɛ eko fɛɛ eko gbɛɛɔ kɛji owie, eyɛ emli akɛ jeee kɛ nɔmimaa gbee kome moŋ. Kɛji ootao ní owiemɔ mlitselɛ aya hiɛ lɛ, no lɛ ŋmɛɛ otsui shi ni obɔ mɔdɛŋ waa ni otsɛ wiemɔ gbɛɛmɔ fãi lɛ fɛɛ ekomekome. Klɛŋklɛŋ lɛ, ekolɛ enɛ baafee tamɔ nɔ ni aama nɔ mi tsɔ, shi beni oyaa nɔ ofeɔ lɛ, fiofio lɛ, obaabɔi wiemɔi atsɛmɔ yɛ gbɛ ni ja nɔ. Naatselɛ hewɔ lɛ, ŋwanejee ko bɛ he akɛ obaawie wiemɔi komɛi ni omiii osɛ̃ŋ nu, shi esa akɛ atsĩ enɛ naa kɛji eeenyɛ eba akɛ ebaatsĩ shishinumɔ ni yɔɔ wiemɔi lɛ asɛɛ lɛ naa.

Naa ŋaawoo ko: Onaatselɛ ní otaoɔ lɛ hewɔ lɛ, ekolɛ ofɔɔ wiemɔ kɛ nikanemɔ yɛ gbɛ ni maa nii anɔ mi fe nine. Shi kaaha no miifee gbɛ ni otsɔɔ nɔ owieɔ daa gbi. Ebaafee tamɔ nɔ ni okwa oofee lɛ nakai, ni jeee adebɔɔ naa.

Kɛ́ etamɔ nɔ ni owiemɔ gbɛɛmɔ lɛ mli tseee lɛ, kasemɔ bɔ ni awóɔ yitso nɔ, koni otsɛŋ akasa otsitsi he. Kɛji ookane nii kɛmiijɛ Biblia lɛ mli lɛ, wó wolo lɛ nɔ kɛya ŋwɛi bɔ ni sa bɔni afee ni ohiɛ jiemɔ kɛmiijɛ toibolɔi lɛ anɔ kɛya Biblia lɛ nɔ lɛ afee oyi shi maa fioo ko kɛkɛ. Enɛ baaha owiemɔi lɛ aje kpo faŋŋ ní anu jogbaŋŋ.

Kasemɔ ni oookase bɔ ni afeɔ tswãa lɛ hu baanyɛ aha owiemɔ aya hiɛ. Ale jogbaŋŋ akɛ kpɛŋŋfeemɔ ní baa ohiɛ faji loo faji ní kudɔɔ omumɔ lɛ amli lɛ baanyɛ aná owiemɔ gbɛjianɔtoo lɛ nɔ hewalɛ waa. Nakai kpɛŋŋfeemɔ lɛ náa gbeekpamɔ ni esa akɛ ehi ojwɛŋmɔ mli lɛ, ogbɔmɔtso lɛ he nii ní kudɔɔ ogbee, kɛ omumɔ kudɔmɔ teŋ lɛ nɔ hewalɛ—nifeemɔ ni esa akɛ eya lɛ tɔrɔmɔɔ yɛ adebɔɔ naa lɛ.

Ehe miihia ni kadaa faji lɛ agbɔjɔ amɛhe bɔni afee ni amɛhere gbɛtsɔɔmɔ ni jwɛŋmɔ lɛ kɛbaaha lɛ nɔ amrɔ nɔŋŋ. Esa akɛ naabu lɛ hu agbɔjɔ ehe. Esa akɛ kadaa faji lɛ afee klalo akɛ amɛbaalɛɛ ni amɛbɛ oyayaayai bɔni afee ni amɛjie gbɛɛmɔi babaoo ni jɛɔ naabu kɛ sɛ̃ lɛ mli kɛbaa lɛ kpo jogbaŋŋ. Kɛ́ kadaa kɛ naabu lɛ fee kpɛŋŋ lɛ, no lɛ naabu lɛ nyɛŋ agbele jogbaŋŋ ni ebaanyɛ̃ gbɛɛmɔ lɛ nɔ ni etsɔ nyanyɔji lɛ ateŋ. Enɛ kɛ wiemɔ basabasa ní egbɛɛɛ, ní mli tseee baaba. Shi kɛlɛ, gbɔjɔmɔ ní ooogbɔjɔ okadaa kɛ onaabu lɛ etsɔɔɔ akɛ ofee anyagba yɛ bɔ ni otsĩɔ nibii atã lɛ mli. Esa akɛ oha enɛ kɛ bɔ ni atoɔ gbɛɛmɔi ahe gbɛjianɔ lɛ aŋmɛ pɛpɛɛpɛ bɔni afee ni owiemɔ lɛ mli atse.

Kɛ́ opɛi oshihilɛ lɛ mli lɛ, ekolɛ obaana akɛ ebaaye ebua akɛ oookane nii waa. Kwɛmɔ bɔ ni okɛ gbɔmɔtso he nii ni yɔɔ naakpɛɛ ni yeɔ ebuaa wiemɔ lɛ tsuɔ nii ohaa lɛ jogbaŋŋ. Ani ogbɛɔ odaaŋ bɔ ni sa bɔni afee ni gbɛɛmɔ lɛ aje kpo ni nɔ ko etsiii naa? Esa akɛ okai akɛ, jeee lilɛi lɛ pɛ ji gbɔmɔtso lɛ he nɔ ko ní akɛwieɔ, shi kɛlɛ eji nibii ni bɛ dekã lɛ ateŋ ekome. Kuɛ lɛ, kadaa lɛ, naabu lɛ, kɛ hiɛ faji lɛ, kɛ sɛ̃ŋ faji lɛ fɛɛ tsuɔ gbɛfaŋ nɔ ko he nii. Kɛji oowie lɛ, ani etamɔ nɔ ni ofeɔ nakai ni ohiɛ su tsakeee? Kɛ́ ofeɔ nakai lɛ, no lɛ eeenyɛ efee diɛŋtsɛ akɛ owiemɔ egbɛɛɛ faŋŋ.

Kɛji oyɛ tsɔne ni akɛtswaa kasɛt lɛ, no lɛ mɔ bo diɛŋtsɛ owiemɔi ni owieɔ daa taakɛ okɛ mɔ ko baawie beni oyɔɔ shiɛmɔ nitsumɔ lɛ mli lɛ owo nɔ. Okɛ minitii babaoo amɔmɔ sanegbaa wiemɔi. Nakai wiemɔi ní omɔmɔ lɛ toi ní ooobo lɛ baanyɛ aye abua bo koni ona naagba ní ekolɛ oyɔɔ yɛ wiemɔi komɛi agbɛɛmɔ ni oooha emli atse lɛ mli. Taomɔ hei ní wiemɔi lɛ amli tseee, gbɛɛmɔ lɛ ba shi, loo ofolɔ wiemɔi lɛ anɔ kukuji lɛ, ni obɔ mɔdɛŋ ni otao nɔ ni kɛba. Bei pii lɛ, anyɛɔ atsuɔ gbɔjɔmɔ lɛ he nii kɛji akɛ otii ni asusu he yɛ ŋwɛigbɛ nɛɛ tsu nii.

Ani oyɛ wiemɔ mli naagba ko? Fɔɔ odaaŋ gbɛɛ waa fioo fe bɔ ni ofeɔ tsutsu lɛ, ni obɔ mɔdɛŋ ni owie ni emli atse waa. Gbalamɔ kɔɔyɔɔ owo oflufla lɛ mli obɔ kɛji oomu, ni owie blɛoo. Enɛ feemɔ eha mɛi babaoo ni yɔɔ wiemɔ mli naagba lɛ enyɛ ewie kɛ mlitselɛ. Kɛ́ otsɛɔ wiemɔ tamɔ gbekɛ tsɛɔ wiemɔ lɛ, no lɛ kaaha olilɛi miisa ohiɛgbɛ nyanyɔji lɛ ahe kɛji ootsĩ s kɛ z gbɛɛmɔi atã yɛ wiemɔi amli lɛ. Eyɛ mli onaagba lɛ fɛɛ baŋ naagbee kwraa moŋ, shi kaaha onijiaŋ miije wui. Kaimɔ akɛ Yehowa hala Mose, nuu ni ekolɛ enaa tseee lɛ koni ekɛ shɛɛ saji ni he hiaa ayaha Israelbii lɛ kɛ Farao ni yeɔ Mizraim nɔ lɛ fɛɛ. (2 Mose 4:10-12) Kɛji oosumɔ lɛ, ekɛ bo hu baatsu nii, ni ebaajɔɔ osɔɔmɔ nitsumɔ lɛ nɔ ni obaaye omanye.