Sane Mlitsɔɔmɔ ni Kɔneɔ Mɔ Yiŋ

KƐ́ OKƐƐ nɔ ko lɛ, otoibolɔi lɛ yɛ hegbɛ akɛ amɛbiɔ akɛ: “Mɛni hewɔ enɛ ji anɔkwale? Mɛni ji odaseyeli ni tsɔɔ akɛ esa akɛ akpɛlɛ nɔ ni wielɔ lɛ wieɔ lɛ nɔ?” Ákɛ tsɔɔlɔ lɛ, sɔ̃ kã onɔ akɛ oha nakai sanebimɔi lɛ ahetoo loo oye obua otoibolɔi lɛ ni amɛtao hetooi lɛ. Kɛ́ sane ni owie lɛ he miihia waa lɛ, kwɛmɔ koni oha otoibolɔi lɛ yiŋtoo ni mli wa ni amɛaadamɔ nɔ amɛkpɛlɛ nɔ. Enɛ baaye abua koni owiemɔ lɛ akɔne mɔ yiŋ.

Bɔfo Paulo kɛ saji ni tsɔɔ mɔ yiŋ tsu nii. Kɛtsɔ naataamɔ ni yɔɔ faŋŋ, saji ahesusumɔ ni shishinumɔ yɔɔ mli, kɛ nibimɔ ni jɛ tsuiŋ ni ekɛtsu nii lɛ nɔ lɛ, enyɛ etsake mɛi ni ekɛwieɔ lɛ ajwɛŋmɔ. Efee nɔkwɛmɔnɔ fɛfɛo efɔ shi eha wɔ. (Bɔf. 18:4; 19:8) Eji anɔkwale akɛ, mɛi komɛi ni naa tse lɛ kɛ yiŋtsɔmɔ tsuɔ nii ni amɛkɛlakaa mɛi. (Mat. 27:20; Bɔf. 14:19; Kol. 2:4) Amɛnyɛɔ amɛkɛ susumɔi gbohii jeɔ shishi, ni amɛkɛ amɛhe fɔ̃ɔ saji ni shishinumɔ bɛ mli nɔ, ni amɛkɛ naataamɔi ni bɛ faŋŋ haa, ni amɛkuɔ amɛhiɛ amɛshwieɔ anɔkwalei ni kɛ amɛsusumɔi kpãaa gbee lɛ anɔ, loo amɛkɛɔ saji ni asumɔɔ babaoo fe saji ni esa akɛ aha asusu he. Esa akɛ wɔkwɛ jogbaŋŋ koni wɔtsi wɔhe kɛjɛ gbɛ̀i nɛɛ fɛɛ he.

Ha Sane lɛ Adamɔ Nyɔŋmɔ Wiemɔ lɛ Nɔ Diɛŋtsɛ. Esaaa akɛ nɔ ni wɔtsɔɔ lɛ jɛɔ wɔ diɛŋtsɛ wɔjwɛŋmɔ mli. Wɔbɔɔ mɔdɛŋ ni wɔgba mɛi krokomɛi nɔ ni wɔkase kɛjɛ Biblia lɛ mli lɛ. Yɛ enɛ gbɛfaŋ lɛ, tsulɔ anɔkwafo kɛ nilelɔ kuu lɛ woji lɛ eye ebua wɔ waa diɛŋtsɛ. Woji nɛɛ woɔ wɔ hewalɛ koni wɔpɛi Ŋmalɛi lɛ amli jogbaŋŋ. Ni wɔ hu wɔtsɔɔ mɛi krokomɛi Biblia lɛ mli saji, jeee ni wɔkɛtsɔɔ akɛ wɔja, shi moŋ ni wɔjɛ heshibaa mli wɔha amɛ diɛŋtsɛ amɛna nɔ ni ekɛɔ lɛ. Wɔkɛ Yesu Kristo, ní kɛɛ e-Tsɛ yɛ sɔlemɔ mli akɛ: “Owiemɔ lɛ anɔkwaleŋ” lɛ kpãa gbee. (Yoh. 17:17) Hegbɛ ko bɛ ni nɔ kwɔ fe Yehowa Nyɔŋmɔ, ŋwɛi kɛ shikpɔŋ Bɔlɔ lɛ. Bɔ ni wɔ naataamɔi lɛ mli kã shi faŋŋ lɛ damɔ bɔ ni wɔhaa edamɔɔ e-Wiemɔ lɛ nɔ lɛ nɔ.

Bei komɛi lɛ, okɛ mɛi ni leee Biblia lɛ loo mɛi ni ekpɛlɛɛɛ nɔ akɛ eji Nyɔŋmɔ Wiemɔ lɛ baagba sane. Esa akɛ okɛ jwɛŋmɔ kpakpa atsu nii yɛ be ni ehe baahia ni okɛ Biblia lɛ atsu nii loo gbɛ ni esa akɛ otsɔ nɔ okɛtsu nii lɛ mli. Shi esa akɛ obɔ mɔdɛŋ ni ogbala amɛjwɛŋmɔ kɛba hegbɛ ni ji nakai sane lɛ jɛɛhe lɛ nɔ oya.

Ani esa akɛ omu sane naa akɛ ŋmalɛ mli wiemɔ ni okɛbaatsu nii kɛkɛ lɛ baaku ŋwanejee ko naa? Jeee nakai doo. Ekolɛ ehe baahia ni ogbala jwɛŋmɔ kɛba sane ni kɔɔ he lɛ nɔ koni okɛtsɔɔ akɛ ŋmalɛ lɛ fiɔ nɔ ni okɛɔ lɛ sɛɛ lɛɛlɛŋ. Kɛ́ okɛ shishitoo mla ko ni yɔɔ ŋmalɛ ko mli miitsu nii kɛkɛ, shi emli sane lɛ kɔɔɔ nakai saneyitso lɛ he lɛ, no lɛ ekolɛ odaseyeli babaoo he baahia. Ekolɛ ehe baahia ni okɛ ŋmalɛi krokomɛi ni kɔɔ sane lɛ he lɛ atsu nii bɔni afee ni otoibolɔi lɛ ana akɛ nɔ ni okɛɔ lɛ damɔ Ŋmalɛi lɛ anɔ diɛŋtsɛ.

Kaawo nɔ ni ŋmalɛ ko kɛɔ lɛ he. Kanemɔ lɛ jogbaŋŋ. Ekolɛ ŋmalɛ lɛ kɔɔ sane ni nyɛsusuɔ he lɛ fɛɛ he. Ni kɛlɛ, bɔni afee ni onaataamɔ lɛ atsɔ mɔ yiŋ lɛ, esa akɛ otoibolɔ lɛ anu odaseyeli ni tsɔɔ akɛ nɔ ni okɛɔ lɛ ji anɔkwale lɛ shishi.

Okɛ Odaseyeli Kroko Ama Nɔ Mi. Yɛ shihilɛi komɛi amli lɛ, ehe baahia ni okɛ odaseyeli ni akɛ he fɔ̃ɔ nɔ ni jɛɛɛ Biblia lɛ mli atsu nii ní okɛye obua mɛi ni amɛnu shishinumɔ ni yɔɔ Ŋmalɛi lɛ amli lɛ shishi.

Ákɛ nɔkwɛmɔnɔ lɛ, obaanyɛ okɛ jeŋ muu fɛɛ ni wɔnaa lɛ atsɔɔ akɛ odaseyeli ní tsɔɔ akɛ Bɔlɔ ko yɛ. Obaanyɛ ogbala jwɛŋmɔ kɛba adebɔɔ mli mlai, tamɔ nigbalamɔ hewalɛ nɔ, ni otsɔɔ akɛ shihilɛ mli ní nakai mlai lɛ yɔɔ lɛ tsɔɔ akɛ Mlawolɔ ko yɛ. Ebaaha osane lɛ afee anɔkwale, kɛji ekɛ nɔ ni Nyɔŋmɔ Wiemɔ lɛ kɛɔ lɛ kpãa gbee. (Hiob 38:31-33; Lala 19:2; 104:24; Rom. 1:20) Odaseyeli ni tamɔ nɛkɛ yeɔ ebuaa ejaakɛ etsɔɔ akɛ nɔ ni Biblia lɛ kɛɔ lɛ kɛ anɔkwalei ni anaa lɛ kpãa gbee.

Ani oobɔ mɔdɛŋ ni oye obua mɔ ko ni ena akɛ Biblia lɛ ji Nyɔŋmɔ Wiemɔ lɛɛlɛŋ? Ani okɛ woloŋlelɔi ni ekɛɛ akɛ eji anɔkwale, shi amɛbɛ odaseyeli ko lɛ awiemɔi baatsu nii? Nakai wiemɔi ni okɛbaatsu nii lɛ baaye abua mɛi ni buɔ nakai woloŋlelɔi lɛ kɛkɛ. Ani obaanyɛ okɛ jeŋ nilee atsu nii ni okɛtsɔɔ akɛ Biblia lɛ ji anɔkwale? Kɛ́ okɛ jeŋ nilelɔi ni yeee emuu lɛ asusumɔi tsu nii akɛ hegbɛ ni oyɔɔ lɛ, no lɛ ooto shishi yɛ nɔdaamɔ nɔ ni waaa nɔ. Yɛ gbɛ kroko nɔ lɛ, kɛ́ okɛ Nyɔŋmɔ Wiemɔ lɛ je shishi, ni agbɛnɛ ogbala jwɛŋmɔ kɛba nɔ ni jeŋ nilelɔi ena ni maa nɔ mi akɛ Biblia lɛ ja lɛ nɔ lɛ, no lɛ ooto onaataamɔi lɛ ashishi yɛ nɔdaamɔ nɔ kpakpa nɔ.

Nɔ fɛɛ nɔ ni obɔɔ mɔdɛŋ ni otsɔɔ lɛ, okɛ ehe odaseyeli ni fá saŋŋ aha. Odaseyeli falɛ ni he baahia lɛ baadamɔ otoibolɔi lɛ anɔ. Ákɛ nɔkwɛmɔnɔ lɛ, kɛ́ oowie naagbee gbii ni atsɔɔ mli yɛ 2 Timoteo 3:1-5 lɛ he lɛ, obaanyɛ ogbala otoibolɔi lɛ ajwɛŋmɔ kɛba adafitswaa mli amaniɛbɔɔ ní ale jogbaŋŋ, ni tsɔɔ akɛ gbɔmɛi “edɔɔɔ mɔ he” lɛ nɔ. Ekolɛ nakai nɔkwɛmɔnɔ kome lɛ baafee nɔ ni fá ni okɛbaatsɔɔ akɛ nɛkɛ naagbee gbii lɛ ahe okadi lɛ fã nɛɛ miiná emlibaa bianɛ.

Bei pii lɛ, mfonirifeemɔ wiemɔ—nibii enyɔ ni je amɛhe ni akɛtoɔ nii ahe—lɛ baanyɛ aye abua. Mfonirifeemɔ wiemɔ lɛ diɛŋtsɛ etsɔɔɔ sane ko mli; esa akɛ okɛ bɔ ni esa lɛ ato nɔ ni Biblia lɛ diɛŋtsɛ kɛɔ lɛ he. Shi mfonirifeemɔ wiemɔ lɛ baanyɛ aye abua mɔ ko koni ena shishinumɔ ni yɔɔ susumɔ ko mli. Ákɛ nɔkwɛmɔnɔ lɛ, abaanyɛ akɛ mfonirifeemɔ wiemɔ ní tamɔ nakai atsu nii beni atsɔɔ akɛ Nyɔŋmɔ Maŋtsɛyeli lɛ ji nɔyeli lɛ mli lɛ. Obaanyɛ otsɔɔ akɛ, taakɛ adesai anɔyelii ji lɛ, Nyɔŋmɔ Maŋtsɛyeli lɛ yɛ nɔyelɔi, shishibii, mlai, mla gbɛjianɔtoo, kɛ tsɔsemɔ he gbɛjianɔtoo.

Bei pii lɛ, obaanyɛ okɛ shihilɛ mli niiashikpamɔi ni ba diɛŋtsɛ atsu nii ni okɛtsɔɔ akɛ nilee yɛ mli akɛ akɛ Biblia ŋaawoo lɛ aaatsu nii. Obaanyɛ okɛ bo diɛŋtsɛ oshihilɛ mli niiashikpamɔi hu atsu nii ni okɛfi wiemɔi ni owieɔ lɛ asɛɛ. Ákɛ nɔkwɛmɔnɔ lɛ, kɛ́ ootsɔɔ mɔ ko akɛ ehe miihia ni ekane Biblia lɛ ni ekase lɛ, obaanyɛ otsɔɔ lɛ bɔ ni nakai feemɔ eha oshihilɛ etee hiɛ eha. Bɔni afee ni bɔfo Petro awo enyɛmimɛi lɛ hewalɛ lɛ, egbala jwɛŋmɔ kɛtee tsakemɔ lɛ, ni ekɛ ehiŋmɛii na lɛ nɔ. (2 Pet. 1:16-18) Paulo hu wie lɛ diɛŋtsɛ eniiashikpamɔ he. (2 Kor. 1:8-10; 12:7-9) Shi kɛlɛ, esaaa akɛ ofɔɔ bo diɛŋtsɛ oniiashikpamɔi ahe wiemɔ, bɔni afee ni okagbala jwɛŋmɔ kɛmiiba onɔ bɔ ni esaaa.

Akɛni esoro he ni mɔ fɛɛ mɔ jɛ kɛ bɔ ni esusuɔ nii ahe ehaa hewɔ lɛ, odaseyeli ni baakɔne mɔ ko yiŋ lɛ yeŋ ebuaŋ mɔ kroko lɛ. No hewɔ lɛ, susumɔ nɔ ni otoibolɔi lɛ jwɛŋɔ he lɛ he beni osusuɔ naataamɔi ni okɛbaatsu nii kɛ bɔ ni obaawie he oha lɛ he lɛ. Abɛi 16:23 kɛɔ akɛ: “Nilelɔ tsui tsɔ̃ɔ edaa nii, ni ehaa enaabu nitsɔɔmɔ lɛ fáa.”