Ani Obaasumɔ ni Ole Biblia lɛ Mli Saji Babaoo?
Mɛni Hewɔ Esa akɛ Okane Biblia Lɛ?
BIBLIA lɛ tamɔɔɔ woji krokomɛi—gbɛtsɔɔmɔ ni suɔmɔ yɔɔ mli ni jɛ Nyɔŋmɔ ŋɔɔ ji nɔ ni yɔɔ mli. (1 Tesalonikabii 2:13) Kɛ okɛ nɔ ni Biblia lɛ tsɔɔ lɛ tsu nii lɛ, obaaná he sɛɛ waa diɛŋtsɛ. Suɔmɔ ni oyɔɔ kɛha Nyɔŋmɔ lɛ baaya hiɛ ni obaabɛŋkɛ lɛ, mɔ ni ji “duromɔ nii kpakpai fɛɛ kɛ nikeenii ni hi kɛwula shi fɛɛ” Halɔ lɛ. (Yakobo 1:17) Obaaná obale bɔ ni ooofee obɛŋkɛ lɛ yɛ sɔlemɔ mli. Beni okɛ shihilɛ ni haoɔ mɔ ekpe lɛ, obaanyɛ oná Nyɔŋmɔ dɛŋ yelikɛbuamɔ. Kɛ oha oshihilɛ kɛ tɛi ni afolɔ ashwie shi yɛ Biblia lɛ mli lɛ kpã gbee lɛ, Nyɔŋmɔ baaha bo naanɔ wala.—Romabii 6:23.
Anɔkwalei ni haa mɔ nilee ji nɔ ni yɔɔ Biblia lɛ mli. Mɛi ni náa Biblia mli nilee lɛ eye amɛhe kɛjɛ jwɛŋmɔ ni ejaaa ni náa mɛi akpekpei abɔ ashihilɛ nɔ hewalɛ lɛ he. Ákɛ nɔkwɛmɔnɔ lɛ, anɔkwale ni wɔɔle ni kɔɔ nɔ ni baa beni wɔgboi lɛ he lɛ haa wɔyeɔ wɔhe kɛjɛɔ gbeyei ni asheɔ ákɛ gbohii lɛ baanyɛ aye wɔ awui aloo wɔ wekumɛi kɛ nanemɛi ni egboi lɛ miina amanehulu lɛ mli. (Ezekiel 18:4) Gbohiiashitee lɛ he tsɔɔmɔ ni yɔɔ Biblia lɛ mli lɛ kɛ miishɛjemɔ haa mɛi ni amɛ suɔlɔi egboi lɛ. (Yohane 11:25) Anɔkwa sane ni wɔɔle yɛ ŋwɛibɔfoi yiwalɔi lɛ ahe lɛ haa wɔhiɛ hiɔ wɔhe nɔ yɛ osharai ni yɔɔ mumɔi atsɛmɔ mli lɛ ahe ni eyeɔ ebuaa wɔ koni wɔnu nɔ hewɔ ni naagbai babaoo yɔɔ shikpɔŋ nɔ lɛ shishi.
Nyɔŋmɔ jamɔ mli shishitoo mlai ni yɔɔ Biblia lɛ mli lɛ tsɔɔ wɔ bɔ ni wɔɔfee wɔhi shi yɛ gbɛ ni baaha wɔná he sɛɛ yɛ gbɔmɔtsoŋ lɛ mli. Ákɛ nɔkwɛmɔnɔ lɛ, ‘ni mɔ aaaha ehiɛ akã shi’ lɛ haa anáa gbɔmɔtsoŋ hewalɛ kpakpa. (1 Timoteo 3:2) Kɛ ‘wɔtsuu wɔhe kɛjɛ heloo kɛ mumɔ fɛɛ he muji mli’ lɛ, wɔbáa wɔ gbɔmɔtsoŋ hewalɛnamɔ yi. (2 Korintobii 7:1) Biblia mli ŋaawoo ni Nyɔŋmɔ kɛha ni akɛaatsu nii lɛ hu haa miishɛɛ baa gbalashihilɛ mli, ni ehaa mɔ náa bulɛ kɛhaa ehe.—1 Korintobii 6:18.
Kɛ okɛ Nyɔŋmɔ Wiemɔ lɛ tsu nii lɛ, obaafee gbɔmɔ ni yɔɔ miishɛɛ waa. Biblia mli nilee yeɔ ebuaa wɔ koni wɔná mligbɛ toiŋjɔlɛ kɛ miishɛɛ, ni ehaa wɔnáa hiɛnɔkamɔ. Eyeɔ ebuaa wɔ koni wɔná sui kpakpai tamɔ mɔbɔnalɛ, suɔmɔ, miishɛɛ, hejɔlɛ, tsuishitoo kɛ hemɔkɛyeli. (Galatabii 5:22, 23; Efesobii 4:24, 32) Sui ni tamɔ nɛkɛ yeɔ ebuaa wɔ ni wɔtsɔmɔɔ wu loo ŋa kpakpa, tsɛ loo nyɛ kpakpa, binuu loo biyoo kpakpa.
Ani osusu wɔsɛɛ shihilɛ lɛ he pɛŋ? Biblia mli gbalɛi tsɔɔ wɔ akɛ, wɔyɛ be ni he hiaa waa yɛ adesai ashihilɛ mli lɛ mli. Jeee akɛ nɛkɛ gbalɛi nɛɛ tsɔɔ shihilɛ mli ni je lɛ yɔɔ ŋmɛnɛ lɛ kɛkɛ shi etsɔɔ hu akɛ etsɛŋ ni Nyɔŋmɔ baatsake shikpɔŋ lɛ ní efee lɛ paradeiso.—Kpojiemɔ 21:3, 4.
Yelikɛbuamɔ ni Akɛhaa Koni Anu Biblia lɛ Shishi
Ekolɛ obɔ mɔdɛŋ akɛ obaakane Biblia lɛ shi ewa kɛha bo akɛ obaanu shishi. Ekolɛ olé he ni obaakwɛ yɛ o-Biblia lɛ mli koni okɛtao osanebimɔi lɛ ahetoo. Kɛji nakai ji sane lɛ, jeee okome pɛ okɛ naagba ni tamɔ nɛkɛ ekpe. Ehe miihia ni aye abua wɔ fɛɛ koni wɔnu Nyɔŋmɔ Wiemɔ lɛ shishi. Yehowa Odasefoi ni yɔɔ shikpɔji aaafee 235 nɔ lɛ kɛ Biblia mli tsɔsemɔ haa mɛi akpekpei abɔ ni aheee nɔ ko. Ebaafee miishɛɛ sane kɛha amɛ akɛ amɛaaye amɛbua bo hu.
Bei pii lɛ ehi jogbaŋŋ akɛ oookase Biblia lɛ fiofio, ní okɛ shishijee tsɔɔmɔi lɛ aje shishi. (Hebribii 6:1) Yɛ be mli ni oyaa nɔ ofeɔ nakai lɛ, onine obaanyɛ ashɛ “niyenii kpakpa”—ni ji anɔkwalei ni mli kwɔlɔ lɛ anɔ. (Hebribii 5:14) Biblia lɛ ji wiemɔ ni anyɛɔ akɛ he fɔ̃ɔ nɔ jogbaŋŋ. Biblia he woji, tamɔ wolo bibioo ni ji Mɛni Nyɔŋmɔ Taoɔ yɛ Wɔdɛŋ? lɛ baaye ebua bo ni onu Ŋmalɛ naa saji ni kɔɔ saji srɔtoi babaoo he lɛ shishi.
Ani Obaasumɔ ni Oto Be Daa Otsi Koni Okɛkase Biblia Lɛ?
Bei pii lɛ abaanyɛ ato Biblia mli nikasemɔ he gbɛjianɔ yɛ be pɔtɛɛ ko mli kɛ he ni baahi jogbaŋŋ kɛha bo. Mɛi babaoo kaseɔ nii yɛ teemɔŋ yɛ amɛ diɛŋtsɛ amɛshia. Mɛi komɛi po kaseɔ nii yɛ tɛlifoŋ nɔ. Nikasemɔ gbɛjianɔtoo lɛ jeee nikasemɔ ni akɛ gbɔmɛi babaoo ni ebua amɛhe naa yɛ hekome feɔ, shi eji nɔ ni akɛ mɔ lɛ pɛ toɔ he gbɛjianɔ ni atsakeɔ mli koni ekɛ bo diɛŋtsɛ oshihilɛi akpã gbee, ni nɔ ni fata he ji bɔ ni onilee kɛ owoloŋlee yɔɔ ha. Afeee niŋmaa kaai, ni ashwieŋ ohiɛ shi. Abaaha Biblia mli saji ni obiɔ lɛ hetoo, ni obaakase bɔ ni ooofee obɛŋkɛ Nyɔŋmɔ.
Ehe ehiaaa ni owo Biblia mli nikasemɔ ni tamɔ nɛkɛ he nyɔmɔ. (Mateo 10:8) Akɛhaa jamɔŋ bii fɛɛ kɛ mɛi ni bɛ jamɔ ko mli shi amɛyɛ he miishɛɛ waa akɛ amɛaaná Nyɔŋmɔ Wiemɔ lɛ mli nilee babaoo lɛ, ni aheee nɔ ko hu.
Namɛi baanyɛ amɛkɛ amɛhe awo sanegbaa lɛ mli? Oweku muu lɛ fɛɛ. Nanemɛi fɛɛ ni osumɔɔ ni ofɔ̃ amɛ nine kɛba lɛ hu baanyɛ aná mli gbɛfaŋnɔ. Aloo kɛ́ oosumɔ lɛ, abaanyɛ akɛ bo okome too agba sane lɛ.
Mɛi babaoo toɔ ŋmɛlɛtswaa kome daa otsi kɛhaa Biblia lɛ kasemɔ. Kɛ obaanyɛ okɛ be babaoo atsu nii loo be fioo ko pɛ onáa daa otsi lɛ, Odasefoi lɛ kɛ amɛhe baaha koni amɛye amɛbua bo.
Aafɔ̃ Bo Nine Koni Okase
Wɔmiifɔ bo nine koni oyana Yehowa Odasefoi. Gbɛ kome ni oootsɔ nɔ ofee enɛ ji ni oŋma kɛtsɔ adrɛs ni atsɔɔ yɛ shishigbɛ lɛ nɔ. Kɛkɛ lɛ abaato gbɛjianɔ koni mɔ ko kɛ bo afee shia Biblia mli nikasemɔ ni aheee nɔ ko.
□ Nyɛfainɛ nyɛkɛ wolo bibioo ni ji Mɛni Nyɔŋmɔ Taoɔ yɛ Wɔdɛŋ? lɛ eko amaje mi.
□ Nyɛfainɛ, nyɛkɛ mi abafea shia Biblia mli nikasemɔ ni aheee nɔ ko.
Kɛ okadi ko etsɔɔɔ lɛ, belɛ Biblia mli ŋmalɛi ni atsɛ lɛ fɛɛ jɛ Ga Biblia lɛ mli.