Ani Abaanyɛ Atsu Nitsumɔi Kpakpai yɛ Hejɔɔmɔ Gbi Nɔ?

Yesu etsu nii babaoo yɛ shiɛmɔ he ta ni efã yɛ Galilea lɛ mli. Shi kɛɛmɔ ni Yesu kɛɛ akɛ, “Esa akɛ mayajaje Nyɔŋmɔ Maŋtsɛyeli lɛ he sane kpakpa lɛ matsɔɔ maji krokomɛi hu” lɛ, tsɔɔ akɛ jeee Galilea pɛ etaoɔ eshiɛ yɛ. No hewɔ lɛ, eyatsa “eshiɛmɔ lɛ nɔ yɛ Yudea kpeehei lɛ.” (Luka 4:43, 44) Nilee yɛ mli akɛ efee nakai, ejaakɛ eshɛ March loo April, ni eshwɛ fioo abaaye gbi jurɔ ko yɛ Yerusalem.

Sanekpakpai lɛ ewieee nɔ ko tsɔ yɛ Yesu shiɛmɔ yɛ Yudea lɛ he kɛ́ wɔkɛto nɔ ni wɔkaneɔ yɛ eshiɛmɔ yɛ Galilea lɛ he lɛ. Kɛji Yudeabii lɛ booo Yesu toi po lɛ, no hãaa ekpa shiɛmɔ kɛ nitsumɔi kpakpai ni etsuɔ yɛ he fɛɛ he ni eyaa lɛ.

Etsɛŋ ni Yesu baaya Yudea maŋtiase wulu, ni ji Yerusalem lɛ kɛhã afi 31 Ŋ.B. Hehoo lɛ. Yɛ Gwantɛŋi Agbó ni dekã bɛ jɛmɛ kwraa lɛ masɛi lɛ, kpaakpo wulu ko kɛ ehe akulashiŋi pii yɛ jɛmɛ ni atsɛɔ lɛ Betesda. Helatsɛmɛi, shwilafoi, kɛ akpakei babaoo baa kpaakpo nɛɛ he. Mɛni hewɔ? Ejaakɛ mɛi heɔ yeɔ akɛ, kɛ́ ata nu lɛ mli ni amɛyagbee mli lɛ, amɛhe baawa amɛ.

Yesu na nuu ko ni hela eye lɛ afii 38 yɛ kpaakpo lɛ he yɛ Hejɔɔmɔ Gbi lɛ nɔ. Yesu bi lɛ akɛ: “Oosumɔ ni ohe awa bo?” Nuu lɛ hã lɛ hetoo akɛ: “Onukpa, mibɛ mɔ ko ni kɛ́ ata nu lɛ mli lɛ, ebaawó mi ewo mli, shi kɛ́ miiba lɛ, mɔ kroko tsɔɔ mihiɛ ebagbeɔ mli.”​—Yohane 5:6, 7.

Yesu wie nɔ ko ni ekolɛ ebaahã nuu lɛ kɛ mɔ fɛɛ mɔ ni baanu lɛ hiɛ afee lɛ yaa. Ewie akɛ: “Tee shi! Wó osaa lɛ ni onyiɛ.” (Yohane 5:8) Ni nakai pɛpɛɛpɛ nuu lɛ fee. Nuu ni atsa lɛ lɛ wó esaa lɛ amrɔ nɔŋŋ, ni ebɔi nyiɛmɔ!

Yɛ nɔ najiaŋ ni Yudafoi lɛ baaná miishɛɛ yɛ naakpɛɛ nii ni tee nɔ nɛɛ he lɛ, be ni amɛna nuu lɛ, amɛwie amɛshi lɛ akɛ: “Hejɔɔmɔ Gbi nɛ, ni mla eŋmɛɛɛ gbɛ akɛ owóɔ saa lɛ.” Nuu lɛ kɛɛ amɛ akɛ: “Mɔ tuuntu ni hã mihe wa mi lɛ kɛɛ mi akɛ, ‘Wó osaa lɛ ni onyiɛ.’” (Yohane 5:10, 11) Yudafoi nɛɛ miiwie amɛmiishi mɔ ko ni miitsa mɛi yɛ Hejɔɔmɔ Gbi lɛ nɔ.

Amɛbi nuu lɛ akɛ: “Namɔ ji mɔ ni kɛɛ bo akɛ, ‘Wó osaa lɛ ni onyiɛ’ lɛ?” Mɛni hewɔ amɛbi nuu lɛ nakai lɛ? Ejaakɛ Yesu “ebote asafoku . . . lɛ teŋ,” ni nuu ni atsa lɛ lɛ hu leee Yesu gbɛ́i. (Yohane 5:12, 13) Shi nuu nɛɛ kɛ Yesu baakpe ekoŋŋ. Sɛɛ mli lɛ, nuu lɛ kɛ Yesu kpe yɛ sɔlemɔwe lɛ, ni ená ele mɔ tuuntu ni tsa lɛ yɛ kpaakpo lɛ he lɛ.

Nuu ni atsa lɛ lɛ yana Yudafoi ni bi lɛ mɔ ni tsa lɛ lɛ he sane lɛ. Ekɛɛ amɛ akɛ, Yesu ni. Be ni Yudafoi lɛ ná le enɛ lɛ, amɛtee Yesu ŋɔɔ. Ani amɛtee koni amɛyakwɛ nɔ ni hãa Yesu nyɛɔ etsuɔ naakpɛɛ nii ni tamɔ nakai lɛ? Dabi. Moŋ lɛ, amɛtee koni amɛyatao tɔ̃mɔ yɛ Yesu he, yɛ nibii kpakpai ni efeɔ yɛ Hejɔɔmɔ Gbi lɛ nɔ lɛ hewɔ. Ni amɛbɔi lɛ haomɔ po!