Yitso 29

Nitsumɔi Kpakpai Atsumɔ yɛ Hejɔɔmɔ Gbi lɛ Nɔ

AFI 31 Ŋ.B. lɛ agbiɛnaa be mli ni. Nyɔji fioo ko eho kɛjɛ be mli ni Yesu kɛ yoo lɛ wie yɛ Samaria nu bu lɛ he yɛ be mli ni enyiɛ gbɛ nɔ kɛjɛ Yudea kɛyaa Galilea lɛ.

Agbɛnɛ, beni etsɔɔ nii babaoo yɛ Galilea niiaŋ fɛɛ sɛɛ lɛ, Yesu shi jɛmɛ ekoŋŋ kɛtee Yudea, ni eyashiɛ yɛ kpee hei lɛ. Kɛ akɛ bɔ ni Biblia lɛ wieɔ Yesu sɔɔmɔ nitsumɔ yɛ Galilea lɛ he lɛ to bɔ ni ewieɔ enitsumɔ yɛ Yudea lɛ he lɛ, ewieɔ saji fioo pɛ yɛ nɛkɛ be nɛɛ mli kɛ nyɔji ni eye yɛ biɛ yɛ be ni nyiɛ Hehoo ni aye agbe naa nɔŋŋ lɛ sɛɛ lɛ he. Eka shi faŋŋ akɛ akpɛlɛɛɛ esɔɔmɔ nitsumɔ lɛ nɔ babaoo yɛ Yudea taakɛ afee yɛ Galilea lɛ.

Etsɛɛɛ kɛkɛ ni Yesu yiŋ kɛmiiya Yudea maŋtiase wulu fe fɛɛ, ni ji Yerusalem lɛ mli, koni eyaye afi 31 Ŋ.B. Hehoo lɛ. Kpaakpo ko ni atsɛɔ lɛ Betesda lɛ yɛ Tooi Agbo lɛ masɛi, ni helatsɛmɛi, shwilafoi kɛ obubuafoi pii baa jɛmɛ. Amɛheɔ amɛyeɔ akɛ kɛ ata nu lɛ mli ni gbɔmɛi lɛ yagbee mli lɛ, abaanyɛ atsa amɛhelai lɛ.

Hejɔɔmɔ Gbi nɔ nɛ, ni Yesu na nuu ko yɛ kpaakpo lɛ naa ni ehe eye afii 38 sɔŋŋ. Akɛni Yesu le afii abɔ ni nuu lɛ he kɛye lɛ hewɔ lɛ, ebi lɛ akɛ: “Oosumɔ ni ohe awao lo?”

Ni eha Yesu hetoo akɛ: “Nuŋtsɔ, mibɛ mɔ ko ni kɛ abata nu lɛ mli ni eeewo mi eyawo kpaakpo lɛ mli; shi kɛ miiya lɛ, mɔ kroko tsɔɔ mihiɛ eyagbeɔ mli.”

Ni Yesu kɛɛ lɛ akɛ: “Tee shi, wo osaa lɛ, ni onyiɛ!” Ni amrɔ lɛ nɔŋŋ kɛkɛ ni nuu lɛ he wa lɛ yɛ gbɔmɔtsoŋ, ni ewo esaa lɛ, ni ebɔi nyiɛmɔ!

Shi beni Yudafoi lɛ na nuu lɛ, amɛkɛɛ akɛ: “Hejɔɔmɔ Gbi nɛ, obɛ hegbɛ ni otereɔ osaa.”

Ni nuu lɛ ha amɛ hetoo akɛ: “Mɔ ni tsa mi lɛ, lɛ nɔŋŋ ekɛɛ mi akɛ: ‘Wo osaa lɛ ni onyiɛ.’ ”

Ni amɛbi akɛ: “Namɔ ji mɔ ni kɛɛo akɛ: ‘Wo osaa lɛ ni onyiɛ’ lɛ?” Yesu etsɔ ehiɛ ewo afa yɛ gbɔmɛi asafo babaoo lɛ hewɔ, ni nuu ni atsa lɛ lɛ leee Yesu gbɛi. Shi kɛlɛ, yɛ sɛɛ mli lɛ, Yesu kɛ nuu lɛ kpe yɛ sɔlemɔ we lɛ, ni nuu lɛ na ele mɔ ni tsa lɛ lɛ.

No hewɔ lɛ nuu ni atsa lɛ lɛ yatao Yudafoi lɛ koni ekɛɛ amɛ akɛ Yesu ji mɔ ni ha ehe wa lɛ. Beni Yudafoi lɛ na amɛle lɛ, amɛtee Yesu ŋɔɔ. Yɛ mɛɛ yiŋtoo hewɔ? Koni amɛyabi lɛ gbɛ nɔ ni etsɔɔ efeɔ nɛkɛ naakpɛɛ nibii nɛɛ? Dabi. Shi moŋ koni amɛyatao tɔmɔ yɛ ehe ejaakɛ eefee nɛkɛ nibii kpakpai nɛɛ yɛ Hejɔɔmɔ Gbi lɛ nɔ. Ni amɛje shishi akɛ amɛaawa lɛ yi! Luka 4:44; Yohane 5:1-16.

▪ Aaafee bei enyiɛ nɛ ni Yesu tee eyasara Yudea nɔ ni ji naagbee nɔ?

▪ Mɛni hewɔ ni ale kpaakpo ni atsɛɔ lɛ Betesda lɛ jogbaŋŋ nakai lɛ?

▪ Mɛɛ naakpɛɛ nɔ ko Yesu fee yɛ kpaakpo lɛ he, ni te Yudafoi lɛ fee amɛnii yɛ he amɛha tɛŋŋ?