Saji Krokomɛi

Nɔ Ko Ni Esa Akɛ Fɔlɔi Ni Ji Kristofoi Lɛ Akadi:

Akɛ fɔlɔ lɛ, nɔ ni kã otsui nɔ ji ni oye obua obii lɛ koni amɛsumɔ Yehowa ni amɛjɔɔ amɛwala nɔ amɛhã lɛ. Mɛni obaanyɛ ofee kɛye obua amɛ ni amɛsaa amɛhe kɛhã baptisimɔ? Mɛɛ be esa akɛ amɛfee nifeemɔ ni he hiaa nɛɛ?

Yesu fã esɛɛnyiɛlɔi lɛ akɛ: “Nyɛyafea mɛi ni jɛ jeŋmaji lɛ fɛɛ amli lɛ kaselɔi, nyɛbaptisia amɛ.” (Mat. 28:19) Famɔ nɛɛ tsɔɔ akɛ, nɔ titri ni ataoɔ yɛ mɔ ko he dani abaptisi lɛ ji, ni etsɔ kaselɔ, ni ji mɔ ko ni nuɔ Kristo tsɔɔmɔi lɛ ashishi, eheɔ tsɔɔmɔi nɛɛ eyeɔ, ni ekɛtsuɔ nii yɛ eshihilɛ mli. Enɛ ji nɔ ko ni mɛi ni darako po baanyɛ afee.

Feemɔ nɔkwɛmɔnɔ kpakpa ohã obii lɛ, ni ojwɛŋ Yehowa tsɔɔmɔi lɛ anɔ otsɔɔ amɛ. (5 Mo. 6:6-9) Enɛ tsɔɔ akɛ okɛ saji ni yɔɔ Oyi Aná Wala Kɛya Naanɔ! wolo lɛ mli lɛ baatsɔɔ amɛ Biblia lɛ mli anɔkwalei ni esa akɛ ale klɛŋklɛŋ lɛ, ni oye obua amɛ ni amɛle bɔ ni akɛ Biblia mli shishitoo mlai tsuɔ nii. Ye obua obii lɛ koni amɛ diɛŋtsɛ amɛgbála nibii ni amɛheɔ amɛyeɔ lɛ amli amɛtsɔɔ mɛi. (1 Pet. 3:15) Nibii ni otsɔɔ amɛ kɛ hewalɛ ni owoɔ amɛ, kɛ agbɛnɛ hu, nibii ni amɛkaseɔ kɛjɛɔ aŋkro nikasemɔ ni amɛfeɔ, asafoŋ kpeei ni amɛyaa lɛ, kɛ mɛi kpakpai ni amɛkɛbɔɔ lɛ adɛŋ lɛ baaye abua amɛ ni amɛhã abaptisi amɛ ni amɛya amɛhiɛ hu. Hã amɛkɛ mumɔŋ otii amamɔ amɛhiɛ.

Abɛi 20:11 lɛ kɛɔ akɛ: “Gbekɛ po, enifeemɔi akɛyoɔ lɛ, akɛ ejeŋba he tse, ni efeɔ nɔ ni ja lo?” Mɛɛ nifeemɔi baahã ana akɛ gbekɛ ko ebatsɔ Yesu Kristo kaselɔ, ni eshɛ he ni abaanyɛ abaptisi lɛ?

Gbekɛ ni eshɛ baptisimɔ he lɛ boɔ efɔlɔ loo efɔlɔi ni sheɔ Nyɔŋmɔ gbeyei lɛ toi. (Bɔf. 5:29; Kol. 3:20) Be ni Yesu eye afii 12 lɛ, Biblia lɛ wie ehe akɛ: “Etee nɔ ebo [efɔlɔi toi].” (Luka 2:51, shn.) Eji anɔkwale akɛ obi lɛ yeee emuu. Shi mɔ ni miitao abaptisi lɛ lɛ baakase Yesu ni abaana akɛ eji mɔ ko ni boɔ efɔlɔi toi.

Agbɛnɛ hu, esumɔɔ ni ekase Biblia mli anɔkwalei lɛ. (Luka 2:46) Ani obi lɛ sumɔɔ ni eya asafoŋ kpeei, ni kɛ́ etee lɛ ehãa saji ahetoo? (Lala 122:1) Ani ekaneɔ Biblia lɛ daa gbi ni efeɔ aŋkro nikasemɔ?​—Mat. 4:4.

Gbekɛ ni eshɛ baptisimɔ he lɛ kɛ Nyɔŋmɔ Maŋtsɛyeli lɛ yeɔ klɛŋklɛŋ gbɛhe. (Mat. 6:33) Ele akɛ eji sɔ̃ ni kã enɔ akɛ egba mɛi nibii ni eheɔ eyeɔ lɛ. Ekɛ ehe woɔ shiɛmɔ nitsumɔ lɛ fãi lɛ fɛɛ amli, ni ehiɛ gbooo akɛ ebaahã etsɔɔlɔi kɛ eskulbii ale akɛ Yehowa Odasefonyo ji lɛ. Kɛ́ ahã lɛ nifeemɔ yɛ Wɔshiɛmɔ Kɛ Wɔshihilɛ Kpee lɛ shishi lɛ, esaa ehe jogbaŋŋ ni ebafeɔ hu.

Ekɛ mɛi ni esaaa ebɔɔɔ, ni ekɛ ehe wooo nifeemɔi ni esaaa amli hu koni ejeŋba he atse. (Abɛi 13:20; 1 Kor. 15:33) Anaa enɛ yɛ lalai ni eboɔ toi, sinii kɛ TV nɔ nifeemɔi ni ekwɛɔ, vidio gemisii ni etswaa, kɛ bɔ ni ekɛ Intanɛt lɛ tsuɔ nii ehãa lɛ mli.

Mɛi babaoo mɔ tsɔsemɔ kpakpa ni amɛfɔlɔi kɛhã amɛ lɛ mli, ni amɛkɛ nibii ni amɛkase yɛ anɔkwale lɛ he lɛ tsu nii ni amɛhã abaptisi amɛ yɛ amɛgbekɛbiiashi. Baptisimɔ ji nɔ ko ni he hiaa waa yɛ mɔ kɛ Yehowa teŋ wekukpaa mli. Yehowa ajɔɔ mɔdɛŋ ni obɔɔ kɛyeɔ obuaa obii lɛ koni amɛshɛ baptisimɔ he lɛ nɔ.

Nɔ Ko Ni Esa Akɛ Shiɛlɔ Ni Abaptisiko Lɛ Lɛ Akadi:

Eji hegbɛ kpele ni oná akɛ oosɔmɔ akɛ shiɛlɔ ni abaptisiko lɛ yɛ asafo lɛ mli. Osa yijiemɔ waa yɛ bɔ ni otee ohiɛ yɛ hemɔkɛyeli lɛ mli lɛ hewɔ. Nyɔŋmɔ Wiemɔ lɛ ni okaseɔ lɛ ehã obale lɛ ni okɛ onifeemɔi tsɔɔ akɛ oheɔ eshiwoi lɛ oyeɔ.​—Yoh. 17:3; Heb. 11:6.

Ekolɛ dani Yehowa Odasefoi kɛ bo baabɔi nikasemɔ lɛ, esoro jamɔ kuu ni oyɔɔ mli loo obɛ jamɔ kuu ko kwraa mli. Ekolɛ no mli lɛ, okɛ ohe woɔ nifeemɔ loo jeŋba ko ni kɛ Biblia mli shishitoo mlai kpãaa gbee lɛ mli. Shi amrɔ nɛɛ hemɔkɛyeli ni oná lɛ ehã otsake otsui, ni tsɔɔ akɛ oshwa ohe waa yɛ eshai ni ofee tsutsu lɛ ahe, ni okpale kɛje gbɛ fɔŋ ni onyiɛ nɔ lɛ nɔ, ni otswa ofai shi akɛ obaafee nibii ni sa yɛ Nyɔŋmɔ hiɛ.​—Bɔf. 3:19.

Aloo ekolɛ bo lɛ, “obifabiiaŋ ojɛ ole ŋmalɛi krɔŋkrɔŋi lɛ.” No hewɔ lɛ, okɛ ohe wooo jeŋba gbonyo mli ni ofeee esha ni yɔɔ hiɛdɔɔ. (2 Tim. 3:15) Ole bɔ ni afeɔ akpoɔ tipɛŋfoi anɔnyɛɛ kɛ nibii krokomɛi ni baanyɛ ahã ofee nɔ ko ni esaaa Yehowa hiɛ lɛ. Hemɔkɛyeli ni oyɔɔ lɛ ehã oohi shi yɛ anɔkwalei ni yɔɔ Biblia lɛ mli lɛ anaa, ni okɛ mɛi gbaa nibii ni oheɔ oyeɔ lɛ ahe sane. Atsɔɔ bo bɔ ni atsuɔ shiɛmɔ nitsumɔ lɛ ahãa. Amrɔ nɛɛ bo diɛŋtsɛ okpɛ oyiŋ akɛ obaasɔmɔ Yehowa akɛ shiɛlɔ ni abaptisiko lɛ.

Kɛ́ Yehowa Odasefoi ni kɛ bo kase Yehowa he nii jio, ofɔlɔi ni kɛ bo kase Yehowa he nii kɛjɛ obifabiiaŋ jio lɛ, ekolɛ amrɔ nɛɛ oosusu nibii enyɔ ni kɛ́ ofee lɛ, no baatsɔɔ akɛ ooya ohiɛ yɛ hemɔkɛyeli lɛ mli lɛ ahe. Nomɛi ji henɔjɔɔmɔ kɛ baptisimɔ. Kɛ́ okɛ Yehowa gba sane yɛ sɔlemɔ mli ni ojɛ osuɔmɔ mli owo lɛ shi akɛ obaajá lɛ pɛ kɛya naanɔ lɛ, no tsɔɔ akɛ ojɔɔ ohe nɔ ohã lɛ. (Mat. 16:24) No sɛɛ lɛ, obaahã abaptisi bo kɛtsɔɔ akɛ ojɔɔ ohe nɔ ohã Yehowa. (Mat. 28:19, 20) Kɛ́ ojɔɔ ohe nɔ, ni ohã abaptisi bo lɛ, obatsɔɔ Yehowa Nyɔŋmɔ sɔɔlɔ. Eji hegbɛ ni nɔ bɛ!

Shi tamɔ bɔ ni okase kɛjɛ Biblia lɛ mli lɛ, ekolɛ okɛ naagbai loo gbɛtsiinii srɔtoi baakpe. Kaimɔ akɛ be ni abaptisi Yesu sɛɛ etsɛɛɛ nɔŋŋ lɛ, “mumɔ lɛ ŋɔ Yesu kɛtee ŋa lɛ nɔ, ni jɛmɛ Abonsam ka lɛ yɛ.” (Mat. 4:1) Hã ehi ojwɛŋmɔ mli akɛ, kɛ́ ohã abaptisi bo akɛ Kristo kaselɔ lɛ, okɛ kai baakpe. (Yoh. 15:20) Kai lɛ baanyɛ aba yɛ gbɛi srɔtoi anɔ. Owekumɛi baanyɛ ate shi awo bo. (Mat. 10:36) Aloo ekolɛ oskulbii, mɛi ni okɛtsuɔ nii, loo mɛi ni okɛbɔɔ tsutsu lɛ baaye ohe fɛo. Be fɛɛ be lɛ, hã Yesu wiemɔi ni yɔɔ Marko 10:29, 30 lɛ ahi ojwɛŋmɔŋ, akɛ: “Lɛɛlɛŋ, miikɛɛ nyɛ akɛ, mɔ ko mɔ ko bɛ ni eshi shĩa loo nyɛmimɛi hii loo nyɛmimɛi yei loo emami loo epapa loo bii loo ŋmɔji yɛ mihewɔ kɛ sane kpakpa lɛ hewɔ ní amrɔ nɛɛ enáŋ shĩai, nyɛmimɛi hii, nyɛmimɛi yei, nyɛmɛi, bii, kɛ ŋmɔji toi 100, kɛ yiwai hu, yɛ be nɛɛ mli, kɛ naanɔ wala hu yɛ jeŋ ni baaba lɛ mli.” No hewɔ lɛ, feemɔ bɔ fɛɛ bɔ ni obaanyɛ koni oya nɔ ohi Yehowa masɛi kpaakpa ni ohi shi yɛ etaomɔ nii ni ja lɛ anaa.

Kɛ́ oosumɔ ni abaptisi bo lɛ, hã onukpai akuu lɛ saji ahe gbɛjianɔtolɔ lɛ ale. Asafoŋ onukpai lɛ kɛ bo baasusu sanebimɔi ni tsa saji nɛɛ anɔ lɛ ahe kɛkwɛ akɛ osa akɛ abaptisiɔ bo lo. Obaanyɛ obɔi sanebimɔi nɛɛ amlikwɛmɔ be ni ofeɔ aŋkro nikasemɔ daa lɛ.

Kɛ́ oosaa ohe kɛhã sanebimɔi nɛɛ ni asafoŋ onukpai lɛ kɛ bo baasusu he lɛ, kanemɔ ŋmalɛi fɛɛ ni atsɛ yisɛɛ lɛ ni ojwɛŋ nɔ. Obaanyɛ oŋmala otii ni oosumɔ ni okɛtsu nii lɛ yɛ Gbɛjianɔ wolo nɛɛ mli loo yɛ wolo kroko nɔ. Obaanyɛ okwɛ otii ni oŋmala lɛ amli be ni asafoŋ onukpa lɛ kɛ bo susuɔ sane lɛ he lɛ, ni obaanyɛ ogbele Gbɛjianɔ wolo lɛ ni okwɛ mli be ni nyɛsusuɔ sanebimɔi lɛ ahe lɛ. Kɛ́ onuuu sanebimɔ lɛ eko shishi lɛ, obaanyɛ obi mɔ ni kɛ bo kaseɔ nii lɛ loo asafoŋ onukpai lɛ ni amɛgbála mli amɛtsɔɔ bo.

Kɛ́ asafoŋ onukpai lɛ kɛ bo miisusu sanebimɔi lɛ ahe lɛ, kaanu he akɛ esa akɛ owie kakadaŋŋ loo ogbála saji amli babaoo be ni ohãa hetoo lɛ. Nɔ ni hi fe fɛɛ ji, ni obaahã sanebimɔ lɛ hetoo tɛ̃ɛ yɛ bo diɛŋtsɛ owiemɔ mli. Kɛfata he lɛ, kɛ́ oohã sanebimɔi lɛ ekomɛi ahetoo lɛ, ebaahi jogbaŋŋ akɛ obaatsɛ ŋmalɛ kome loo nɔ yisɛɛ kɛtsɔɔ ŋmalɛ ni ohetoo lɛ damɔ nɔ.

Kɛ́ ebafee faŋŋ akɛ oleko Biblia mli tsɔɔmɔi ni ebiɔ ni ole klɛŋklɛŋ lɛ jogbaŋŋ lɛ, asafoŋ onukpai lɛ baato gbɛjianɔ koni aye abua bo ni onyɛ ogbála Ŋmalɛ lɛ mli yɛ bo diɛŋtsɛ owiemɔ mli, koni be kroko lɛ ofee mɔ ni sa kɛhã baptisimɔ.

[Asafoŋ onukpai akadi: Nyɛbaana gbɛtsɔɔmɔi ni kɔɔ bɔ ni esa akɛ akɛ mɔ ko ni miitao ni abaptisi lɛ lɛ asusu saji ahe lɛ he yɛ baafa 208-212.]