Saji Ni Akɛ Mɔ Ni Akpɛlɛ Enɔ Akɛ Abaptisi Lɛ Lɛ Baasusu He

Bei pii lɛ, abaptisiɔ mɛi yɛ Yehowa Odasefoi akpokpaa nɔ kpeei kɛ kpeei wuji ashishi. Kɛ́ ahã baptisimɔ wiemɔ lɛ agbe naa lɛ, mɔ ni hãa wiemɔ lɛ baabi ni mɛi ni abaabaptisi amɛ lɛ ate shi adamɔ shi ni amɛkɛ gbee ni wa ahã sanebimɔi ni nyiɛ sɛɛ nɛɛ ahetoo:

1. Ani otsake otsui yɛ ohe eshai lɛ ahe, ni ojɔɔ ohe nɔ ohã Yehowa, ni okpɛlɛ nɔ akɛ Yesu Kristo nɔ etsɔɔ ehereɔ mɛi ayiwala?

2. Ani onuɔ shishi akɛ obaptisimɔ lɛ baahã ale bo akɛ Yehowa Odasefonyo ni kɛ Yehowa gbɛjianɔtoo lɛ bɔɔ?

Kɛ́ mɛi ni abaabaptisi amɛ lɛ hã sanebimɔi nɛɛ ahetoo akɛ “hɛɛ” lɛ, no tsɔɔ akɛ ‘amɛjaje amɛtsɔɔ’ akɛ amɛyɛ hemɔkɛyeli yɛ kpɔmɔnɔ lɛ mli ni amɛjɔɔ amɛhe nɔ kwraa amɛhã Yehowa. (Rom. 10:9, 10) Esa akɛ mɛi ni abaabaptisi amɛ lɛ atsɔ hiɛ asɔle ni amɛjwɛŋ nakai sanebimɔi lɛ anɔ koni amɛjɛ amɛtsuiŋ amɛhã hetoo.

Ani ojɔɔ ohe nɔ ohã Yehowa yɛ sɔlemɔ mli, ni owo lɛ shi akɛ obaajá lɛ pɛ, ni obaahã esuɔmɔnaa nii ni obaafee lɛ he ahia bo fe nɔ fɛɛ nɔ yɛ oshihilɛ mli?

Ani okpɛlɛɔ nɔ kɛ otsui fɛɛ amrɔ nɛɛ akɛ abaptisi bo kɛ́ hegbɛ lɛ gbele nɔŋŋ?

Mɛɛ atade ji nɔ ni sa kɛhã baptisimɔ? (1 Tim. 2:9, 10; Yoh. 15:19; Fip. 1:10)

Esa akɛ wɔkɛ “hiɛ ni gboɔ nɔ kɛ hiɛshikamɔ” asaa wɔhe, koni no atsɔɔ akɛ “Nyɔŋmɔ jálɔi” ji wɔ. No hewɔ lɛ, esaaa akɛ mɛi ni abaabaptisi amɛ lɛ woɔ atade ni akɛwuɔ nu ni baahã ana amɛgbɔmɔtso lɛ fãi komɛi ni esaaa akɛ anaa lɛ, loo nɔ ni aŋmala saji loo sablai yɛ mli. Esa akɛ amɛwo atade ni he tse, ni yɔɔ hiŋmɛi nɔ, ni sa kɛhã nifeemɔ lɛ.

Kɛ́ ayaabaptisi mɔ ko lɛ, te esa akɛ efee enii ehã tɛŋŋ? (Luka 3:21, 22)

Bɔ ni Yesu fee enii be ni ayaabaptisi lɛ lɛ ji nɔkwɛmɔnɔ kɛhã Kristofoi fɛɛ ŋmɛnɛ. Enu shishi akɛ, baptisimɔ ji nifeemɔ ko ni yɔɔ hiɛdɔɔ, ni ana enɛ yɛ bɔ ni efee enii ehã lɛ mli. No hewɔ lɛ, esaaa akɛ ayeɔ fɛo ni esaaa, ashwɛɔ, awuɔ nu, loo afeɔ nɔ kroko ni hãŋ ana hiɛdɔɔ ni yɔɔ baptisimɔ nifeemɔ lɛ he lɛ yɛ he ni abaptisiɔ mɛi lɛ yɛ lɛ; nakai nɔŋŋ esaaa akɛ Kristofonyo ni abaptisi lɛ lɛ feɔ enii tamɔ nɔ ni eye kunim kpele ko. Eyɛ mli akɛ baptisimɔ ji miishɛɛ sane moŋ, shi esa akɛ ajie miishɛɛ ni tamɔ nakai lɛ kpo yɛ gbɛ ni bulɛ yɔɔ he lɛ nɔ.

Mɛni hewɔ kɛ́ otee asafoŋ kpeei daa, ni okɛ asafo lɛ bɔ lɛ, no baahã ohi shi akɛ mɔ ni ejɔɔ ehe nɔ ehã Yehowa be fɛɛ be lɛ? Mɛni hewɔ kɛ́ abaptisi bo atã po lɛ, esa akɛ oya nɔ oto gbɛjianɔ kpakpa kɛfee aŋkro nikasemɔ ni okɛ ohe awo shiɛmɔ nitsumɔ lɛ mli daa lɛ?

GBƐTSƆƆMƆI KƐHÃ ASAFOŊ ONUKPAI

Kɛ́ shiɛlɔ ko ni abaptisiko lɛ lɛ hã ale akɛ eetao ni abaptisi lɛ lɛ, esa akɛ ahã ekase sane ni ji “Sanebimɔi Kɛhã Mɛi Ni Miitao Ni Abaptisi Amɛ” ni yɔɔ baafa 185-207 lɛ jogbaŋŋ. Esa akɛ ahã ekane sane ni ji “Nɔ Ko Ni Esa Akɛ Shiɛlɔ Ni Abaptisiko Lɛ Lɛ Akadi,” ni yɔɔ baafa 182 lɛ. Nakai sane lɛ gbálaa bɔ ni esa akɛ esaa ehe kɛhã sanebimɔi ni asafoŋ onukpai lɛ kɛ lɛ baasusu he lɛ mli. Tamɔ bɔ ni atsɔɔ yɛ nakai sane lɛ mli lɛ, mɔ ni miitao ni abaptisi lɛ lɛ baanyɛ ekwɛ wolo ni eŋmala otii komɛi yɛ mli lɛ mli, ni ekwɛ Gbɛjianɔ wolo nɛɛ mli hu be ni akɛ lɛ susuɔ sanebimɔi lɛ ahe lɛ. Shi, ehe ehiaaa ni mɔ ko atsɔ hiɛ ekɛ lɛ asusu sanebimɔi lɛ ahe dani asafoŋ onukpai lɛ kɛ lɛ akpe kɛsusu he.

Esa akɛ mɔ fɛɛ mɔ ni miitao ni abaptisi lɛ lɛ ahã onukpai akuu lɛ saji ahe gbɛjianɔtolɔ lɛ ale. Kɛ́ mɔ ni miitao ni abaptisi lɛ lɛ kase sane ni ji, “Sanebimɔi Kɛhã Mɛi Ni Miitao Ni Abaptisi Amɛ” lɛ egbe naa lɛ, onukpai akuu lɛ saji ahe gbɛjianɔtolɔ lɛ baabi mɔ lɛ kɛji ejɔɔ ehe nɔ ehã Yehowa yɛ sɔlemɔ mli ni ekɛɛ Yehowa akɛ ebaafee esuɔmɔnaa nii. Kɛ́ mɔ lɛ ejɔɔ ehe nɔ lɛ, no lɛ, onukpai akuu lɛ saji ahe gbɛjianɔtolɔ lɛ baato gbɛjianɔ koni asafoŋ onukpai enyɔ kɛ mɔ lɛ asusu “Sanebimɔi Kɛhã Mɛi Ni Miitao Ni Abaptisi Amɛ” lɛ ahe. Esa akɛ ahã onukpai srɔtoi kɛ mɔ lɛ asusu fãi enyɔ lɛ ateŋ eko fɛɛ eko he; esaaa akɛ ahãa onukpa kome kɛ mɔ lɛ susuɔ fãi enyɔ lɛ fɛɛ he. Ehe ehiaaa ni amɛ kɛyashi abaatswa adafi akɛ abaaya kpokpaa nɔ kpee loo kpee wulu ko dani ato gbɛjianɔ ni akɛ mɛi lɛ asusu sanebimɔi nɛɛ ahe.

Bei pii lɛ, abaanyɛ akɛ ŋmɛlɛtswaa kome asusu fãi enyɔ lɛ ateŋ eko fɛɛ eko he, shi kɛ́ ehe fe nakai hu lɛ, naagba ko bɛ he. Esa akɛ asɔle kɛje fã fɛɛ fã shishi, ni kɛ́ agbe naa hu lɛ asɔle. Esaaa akɛ akɛ oyaiyeli susuɔ sanebimɔi lɛ ahe. Esa akɛ asafoŋ onukpai ni kɛ mɔ lɛ baasusu saji lɛ ahe lɛ ana enɛ akɛ nɔ ko ni he hiaa waa, ni amɛteŋ mɔ fɛɛ mɔ ato gbɛjianɔ jogbaŋŋ kɛtsu he nii.

Bei pii lɛ, ehi akɛ akɛ mɛi ni miisumɔ ni abaptisi amɛ lɛ ateŋ mɔ fɛɛ mɔ asusu sanebimɔi lɛ ahe aŋkroaŋkro moŋ fe ni akɛ amɛ baasusu he kutuu. Kɛ́ asafoŋ onukpai lɛ hã mɔ ni miisumɔ ni abaptisi lɛ lɛ hã sanebimɔi lɛ eko fɛɛ eko hetoo lɛ, no baaye abua amɛ ni amɛna kɛji mɔ lɛ nuɔ nɔ ni Biblia lɛ tsɔɔ lɛ shishi jogbaŋŋ. No baahã amɛna kɛji mɔ lɛ sa kɛhã baptisimɔ loo esaaa. Kɛfata he lɛ, kɛ́ akɛ mɛi ni miisumɔ ni abaptisi amɛ lɛ susu saji lɛ ahe aŋkroaŋkro lɛ, no baaye abua amɛteŋ mɔ fɛɛ mɔ ni enyɛ egbála saji amli jogbaŋŋ. Shi abaanyɛ akɛ mɔ kɛ eŋa akpe kutuu kɛsusu saji nɛɛ ahe.

Kɛ́ mɔ ni miitao ni abaptisi lɛ lɛ ji yoo lɛ, esa akɛ mɔ ni kɛ lɛ baasusu saji lɛ ahe lɛ kɛ lɛ ata he ko ni mɛi baana amɛ shi anuŋ saji ni amɛsusuɔ he lɛ. Kɛ́ ehe miihia ni asafoŋ onukpa lɛ aná mɔ ko afata ehe lɛ, esa akɛ mɔ lɛ afee asafoŋ onukpa loo asafoŋ sɔɔlɔ, ni enɛ baadamɔ fã ni abaafee lɛ nɔ, tamɔ bɔ ni atsɔɔ yɛ kuku ni nyiɛ sɛɛ lɛ mli lɛ.

Yɛ asafoi ni asafoŋ onukpai lɛ ayi faaa lɛ amli lɛ, abaanyɛ ahã asafoŋ sɔɔlɔi ni sa ni kɛ sɛɛyoomɔ kɛ hiɛshikamɔ tsuɔ nii lɛ kɛ mɛi ni miitao ni abaptisi amɛ lɛ asusu “Fã 1−Nibii Ni Kristofoi Heɔ Amɛyeɔ” lɛ he. Esa akɛ asafoŋ onukpai pɛ kɛ mɛi lɛ asusu “Fã 2−Bɔ Ni Esa Akɛ Kristofoi Ahi Shi Ahã” lɛ he. Kɛ́ asafoŋ onukpai kɛ asafoŋ sɔɔlɔi ni yɔɔ asafo lɛ mli lɛ ayi faaa lɛ, amɛbaanyɛ amɛna kpokpaa nɔkwɛlɔ lɛ koni ekwɛ akɛ ebaanyɛ ená mɔ ko yɛ asafo kroko mli ni ebaye ebua amɛ lo.

Kɛ́ mɔ ni abaabaptisi lɛ lɛ ji gbekɛ yɛ mla naa lɛ, no lɛ, esa akɛ efɔlɔ loo efɔlɔi ni ji Odasefoi lɛ afata he be ni akɛ lɛ susuɔ sanebimɔi lɛ ahe lɛ. Kɛ́ fɔlɔ loo fɔlɔi lɛ nyɛŋ afata he lɛ, no lɛ, esa akɛ asafoŋ onukpai enyɔ (loo asafoŋ onukpa kome kɛ asafoŋ sɔɔlɔ kome, kɛ́ eji fã ni asafoŋ sɔɔlɔ baanyɛ afata he lɛ) kɛ lɛ asusu saji lɛ ahe.

Esa akɛ asafoŋ onukpai lɛ aná nɔmimaa akɛ mɔ ni miisumɔ ni abaptisi lɛ lɛ nuɔ Biblia mli tsɔɔmɔi ni esa akɛ ale klɛŋklɛŋ lɛ ashishi bɔ ni sa. Kɛfata he lɛ, esa akɛ amɛna hu akɛ mɔ ni miisumɔ ni abaptisi lɛ lɛ nyaa anɔkwale lɛ he waa ni eyɛ bulɛ ni mli kwɔ kɛhã Yehowa asafo lɛ. Kɛ́ asafoŋ onukpai lɛ na akɛ mɔ lɛ nuuu Biblia mli tsɔɔmɔi ni esa akɛ ale klɛŋklɛŋ lɛ ashishi lɛ, esa akɛ amɛto gbɛjianɔ koni aye abua lɛ ni efee mɔ ni sa kɛhã baptisimɔ be kroko. Yɛ mɛi krokomɛi agbɛfaŋ lɛ, ehe baahia ni ahã amɛ be fioo koni amɛkɛtsɔɔ akɛ amɛhiɛ dɔɔ shiɛmɔ nitsumɔ lɛ he loo amɛkɛ gbɛtsɔɔmɔi ni Yehowa asafo lɛ kɛhãa lɛ tsuɔ nii. Eji asafoŋ onukpai lɛ asɔ̃ akɛ amɛkɛ hiɛshikamɔ baatsu nii kɛna sanebimɔi lɛ ateŋ nɔ ni ebaabi ni amɛye be yɛ he yɛ ŋmɛlɛtswaa kome loo nɔ lɛ mli, koni amɛnyɛ amɛna kɛji mɔ lɛ sa baptisimɔ. Eyɛ mli akɛ abaanyɛ aye be babaoo yɛ sanebimɔi lɛ ekomɛi ahe fe ekrokomɛi moŋ, shi esa akɛ asusu sanebimɔi lɛ fɛɛ ahe.

Kɛ́ akɛ mɔ lɛ susu fã ni ji enyɔ lɛ he agbe naa lɛ, asafoŋ onukpai ni kɛ mɔ lɛ susu saji lɛ ahe lɛ baakpe koni amɛkwɛ akɛ mɔ lɛ sa baptisimɔ lo. Be ni asafoŋ onukpai lɛ kpɛɔ yiŋ yɛ enɛ he lɛ, esa akɛ amɛhã shihilɛ mli ni mɔ lɛ jɛ, enyɛmɔi, kɛ saji krokomɛi ni kɔɔ ehe lɛ ahi amɛjwɛŋmɔŋ. Mɛi ni esa akɛ abaptisi ji mɛi ni kɛ amɛtsui fɛɛ ehã Yehowa ni amɛnu Biblia mli tsɔɔmɔi ni esa akɛ ale klɛŋklɛŋ lɛ ashishi. Kɛ́ nyɛjɛ suɔmɔ mli nyɛye nyɛbua mɛi ni miisumɔ ni abaptisi amɛ lɛ, no baahã amɛfee mɛi ni asaa ato jogbaŋŋ koni amɛtsu nitsumɔ ni he hiaa ni akɛwo amɛdɛŋ, ni ji sane kpakpa lɛ shiɛmɔ lɛ.

No sɛɛ lɛ, asafoŋ onukpai enyɔ lɛ ni kɛ mɔ lɛ susu sanebimɔi lɛ ahe lɛ ateŋ mɔ kome loo mɛi enyɔ lɛ fɛɛ kɛ mɔ lɛ baakpe koni amɛhã ele kɛji esa baptisimɔ loo esaaa. Kɛ́ mɔ lɛ sa lɛ, esa akɛ asafoŋ onukpai lɛ kɛ lɛ asusu “Saji Ni Akɛ Mɔ Ni Akpɛlɛ Enɔ Akɛ Abaptisi Lɛ Lɛ Baasusu He” ni yɔɔ baafa 206-207 lɛ he. Kɛ́ akɛ mɔ lɛ ekaseko Oyi Aná Wala Kɛya Naanɔ! wolo lɛ agbeko naa lɛ, esa akɛ asafoŋ onukpai lɛ awo lɛ hewalɛ ni ehã akɛ lɛ agbe naa yɛ ebaptisimɔ lɛ sɛɛ. Esa akɛ ahã mɔ ni abaabaptisi lɛ lɛ ale akɛ, kɛ́ abaptisi lɛ lɛ, abaaŋma gbi ni abaptisi lɛ lɛ awo Asafo Lɛ Shiɛlɔ He Saji fɔm ni egbɛ́i yɔɔ nɔ lɛ nɔ. Kaimɔ lɛ akɛ, ehe saji ni asafoŋ onukpai lɛ heɔ lɛ yeɔ ebuaa asafo lɛ ni enyɛɔ ekwɛɔ nitsumɔ ni Yehowa Odasefoi tsuɔ yɛ jeŋ fɛɛ lɛ nɔ. Agbɛnɛ hu, no hãa enáa hegbɛ ni ekɛ ehe woɔ Nyɔŋmɔjamɔ nifeemɔi amli, ni anyɛɔ ayeɔ abuaa lɛ koni eya nɔ esɔmɔ Nyɔŋmɔ. Kɛfata he lɛ, asafoŋ onukpai lɛ baakai shiɛlɔi hei akɛ, Bɔ Ni Yehowa Odasefoi Feɔ Amɛbuɔ Mɛi Ahe Saji Ni Amɛhiɛ Lɛ Ahe Yɛ Jeŋ Fɛɛ lɛ ni baakudɔ bɔ ni akɛ amɛhe saji ni amɛkɛhãa lɛ baatsu nii ahã, ni akɛ, agbála enɛ mli yɛ jw.org lɛ nɔ. Esaaa akɛ sanegbaa nɛɛ heɔ fe minitii nyɔŋma.

Kɛ́ abaptisi shiɛlɔ lɛ, enɔ afi lɛ, esa akɛ asafoŋ onukpai enyɔ kɛ lɛ akpe ni amɛwo lɛ hewalɛ ni amɛwo lɛ ŋaa ni sa. Esa akɛ amɛteŋ mɔ kome afee mɔ lɛ kuu nɔkwɛlɔ. Kɛ́ mɔ lɛ ji gbekɛ yɛ mla naa lɛ, esa akɛ ahã efɔlɔ loo efɔlɔi ni ji Odasefoi lɛ ata kpee nɛɛ mli. Esa akɛ shitamɔ nɛɛ afee nɔ ko ni yɔɔ miishɛɛ ni tswaa mɔ emaa shi. Asafoŋ onukpai lɛ kɛ lɛ baasusu bɔ ni etee ehiɛ yɛ hemɔkɛyeli lɛ mli ehã lɛ he, ni amɛbaawo lɛ ŋaa ni eya nɔ efee aŋkro nikasemɔ, ekane Biblia lɛ daa gbi, efee weku jamɔ daa otsi, eba asafoŋ kpeei daa ni ekɛ ehe awo mli, ni agbɛnɛ hu, eya shiɛmɔ daa otsi. (Efe. 5:15, 16) Kɛ́ akɛ lɛ ekaseko Oyi Aná Wala Kɛya Naanɔ! wolo lɛ agbeko naa lɛ, esa akɛ asafoŋ onukpai lɛ ato gbɛjianɔ koni mɔ ko kɛ lɛ akase. Esa akɛ asafoŋ onukpai lɛ ajie eyi waa. Bei pii lɛ, ŋaa ni abaawo lɛ yɛ nɔ kome loo enyɔ ko he lɛ kɛkɛ fa.