SANEBIMƆI KƐHÃ MƐI NI MIITAO NI ABAPTISI AMƐ
Fã 1: Nibii Ni Kristofoi Heɔ Amɛyeɔ
Biblia lɛ ni Yehowa Odasefoi kɛ bo ekase lɛ ehã ole anɔkwale lɛ. Ekã shi faŋŋ akɛ, nɔ ni okase lɛ ehã wekukpaa kpakpa ebakã okɛ Nyɔŋmɔ teŋ, ni ehã oná hiɛnɔkamɔ akɛ obaahi shi kɛya naanɔ be ni shikpɔŋ lɛ etsɔ paradeiso ni obaaná jɔɔmɔi ni Nyɔŋmɔ Maŋtsɛyeli lɛ kɛbaaba lɛ mli gbɛfaŋnɔ. Hemɔkɛyeli ni oyɔɔ yɛ Nyɔŋmɔ Wiemɔ lɛ mli lɛ mli ewa, ni Kristofoi asafo lɛ ni okɛbɔɔ lɛ hewɔ lɛ, oná jɔɔmɔi babaoo momo. Onu bɔ ni Yehowa kɛ ewebii lɛ yeɔ ehãa ŋmɛnɛ lɛ shishi.—Zak. 8:23.
Amrɔ nɛɛ ni oosaa ohe kɛhã baptisimɔ lɛ, asafoŋ onukpai lɛ kɛ bo baasusu Biblia mli tsɔɔmɔi ni esa akɛ ole klɛŋklɛŋ lɛ ahe ekoŋŋ, ni obaaná he sɛɛ. (Heb. 6:1-3) Yehowa aya nɔ ajɔɔ mɔdɛŋ ni obɔɔ koni ole lɛ jogbaŋŋ lɛ nɔ, ni ehã bo jweremɔnɔ ni ewo he shi lɛ.—Yoh. 17:3.
1. Mɛni hewɔ oosumɔ ni abaptisi bo?
2. Namɔ ji Yehowa?
• “Yehowa ji anɔkwa Nyɔŋmɔ ni yɔɔ ŋwɛi shɔŋŋ kɛ shikpɔŋ ni yɔɔ shishi lɛ nɔ lɛ. Esɛɛ lɛ, nyɔŋmɔ ko bɛ.”—5 Mo. 4:39.
• “Bo ni ogbɛ́i ji Yehowa lɛ, bo okome too ji Mɔ Ni Nɔ Kwɔ Fe Fɛɛ yɛ shikpɔŋ lɛ nɔ fɛɛ.”—Lala 83:18.
3. Mɛni hewɔ ehe miihia ni okɛ Nyɔŋmɔ gbɛ́i lɛ atsu nii?
• “No hewɔ lɛ, nyɛsɔlea yɛ nɛkɛ gbɛ nɔ: ‘Wɔ-Tsɛ ni yɔɔ ŋwɛi, ogbɛ́i lɛ he atse.’”—Mat. 6:9.
• “Mɔ fɛɛ mɔ ni boɔ tsɛɔ Yehowa gbɛ́i lɛ, abaahere eyiwala.”—Rom. 10:13.
4. Mɛni ji nibii komɛi ni awie yɛ Biblia lɛ mli ni hãa wɔleɔ mɔ ni Yehowa ji?
• “Yehowa, mɔ ni bɔ shikpɔŋ lɛ naagbeehei lɛ, eji Nyɔŋmɔ ni hiɔ shi kɛyaa naanɔi anaanɔ.”—Yes. 40:28.
• “Wɔ-Tsɛ ni yɔɔ ŋwɛi.”—Mat. 6:9.
• “Nyɔŋmɔ lɛ, suɔmɔ ji lɛ.”—1 Yoh. 4:8.
5. Mɛni obaanyɛ ofee ohã Yehowa Nyɔŋmɔ?
• “Suɔmɔ Yehowa, o-Nyɔŋmɔ lɛ, kɛ otsui muu fɛɛ kɛ osusuma muu fɛɛ kɛ ojwɛŋmɔ muu fɛɛ kɛ onyɛmɔ fɛɛ.”—Mar. 12:30.
• “Yehowa, o-Nyɔŋmɔ lɛ, esa akɛ ojá, ni lɛ pɛ esa akɛ okɛ sɔɔmɔ krɔŋŋ ahã.”—Luka 4:8.
6. Mɛni hewɔ oosumɔ ni oye Yehowa anɔkwa?
• “Mibi, hã ohiɛ akã shi, ni ohã mitsui anya, koni maná nɔ ko makɛɛ mɔ ni wieɔ eshiɔ mi lɛ.”—Abɛi 27:11.
7. Namɔ esa akɛ wɔsɔle wɔhã? Ni namɔ gbɛ́i mli esa akɛ wɔsɔle yɛ?
• “Lɛɛlɛŋ, lɛɛlɛŋ, [mi Yesu] miikɛɛ nyɛ akɛ, kɛ́ nyɛbi Tsɛ lɛ nɔ ko lɛ, ekɛbaahã nyɛ yɛ migbɛ́i mli.”—Yoh. 16:23.
8. Mɛɛ nibii nɛkɛ wɔbaanyɛ wɔsɔle wɔbi?
• “No hewɔ lɛ, nyɛsɔlea yɛ nɛkɛ gbɛ nɔ: ‘Wɔ-Tsɛ ni yɔɔ ŋwɛi, ogbɛ́i lɛ he atse. O-Maŋtsɛyeli lɛ aba. Afee nɔ ni osumɔɔ yɛ shikpɔŋ lɛ nɔ, tamɔ bɔ ni afeɔ yɛ ŋwɛi lɛ. Ŋmɛnɛ lɛ, hã wɔ niyenii ni he hiaa wɔ kɛhã ŋmɛnɛ gbi nɛɛ; ni okɛ wɔnyɔji lɛ ake wɔ, tamɔ bɔ ni wɔ hu wɔkɛkeɔ mɛi ni hiɛ wɔ nyɔji lɛ. Ni okɛ wɔ akaya kaa mli, shi jiemɔ wɔ kɛje mɔ fɔŋ lɛ dɛŋ.’”—Mat. 6:9-13.
• “Enɛ ji ekãa ni wɔyɔɔ yɛ ehiɛ lɛ, akɛ nɔ fɛɛ nɔ ni wɔbiɔ ni kɛ esuɔmɔnaa nii kpãa gbee lɛ, eboɔ wɔ toi.”—1 Yoh. 5:14.
9. Mɛni hewɔ ekolɛ Yehowa boŋ mɔ ko sɔlemɔ toi?
• “Amɛbaabolɔ amɛtsɛ Yehowa kɛhã yelikɛbuamɔ, shi efoŋ amɛdaaŋ . . . yɛ amɛnifeemɔi fɔji lɛ ahewɔ.”—Mika 3:4.
• “Yehowa hiŋmɛii kã jalɔi ahe, ni kɛ́ amɛsɔle kɛ hiɛdɔɔ kɛkpa lɛ fai lɛ, ekɛ etoi boɔ amɛ toi, shi Yehowa jieɔ ehiɛ ekaa mɛi ni feɔ efɔŋ lɛ.”—1 Pet. 3:12.
10. Namɔ ji Yesu Kristo?
• “Simon Petro hã hetoo akɛ: ‘Bo ji Kristo lɛ, Nyɔŋmɔ hiɛkãalɔ lɛ Bi lɛ.’”—Mat. 16:16.
11. Mɛni hewɔ Yesu ba shikpɔŋ lɛ nɔ?
• “Gbɔmɔ Bi lɛ baaa koni asɔmɔ lɛ, shi eba sɔɔmɔ moŋ, koni ekɛ ewala ahã akɛ kpɔmɔnɔ kɛkpɔ̃ mɛi babaoo.”—Mat. 20:28.
• “Esa akɛ [mi Yesu] mayajaje Nyɔŋmɔ Maŋtsɛyeli lɛ he sane kpakpa lɛ matsɔɔ maji krokomɛi hu, ejaakɛ enɛ hewɔ atsu mi.”—Luka 4:43.
12. Mɛni obaanyɛ ofee kɛtsɔɔ akɛ ohiɛ esɔ Yesu yɛ ewala ni ekɛbashã afɔle lɛ hewɔ?
• “Egbo kɛhã mɛi fɛɛ koni mɛi ni hiɛ kãmɔ lɛ ahiɛ akakãmɔ kɛmiihã amɛ diɛŋtsɛ amɛhe dɔŋŋ, shi moŋ amɛhiɛ akãmɔ ahã mɔ ni gbo kɛhã amɛ ni atee lɛ shi lɛ.”—2 Kor. 5:15.
13. Mɛɛ hegbɛ Yesu yɔɔ?
• “Akɛ hegbɛ fɛɛ ehã mi yɛ ŋwɛi kɛ shikpɔŋ lɛ nɔ.”—Mat. 28:18.
• “Nyɔŋmɔ wó enɔ ni ehã lɛ gbɛhe ni nɔ kwɔ, ni ejɛ mlihilɛ mli ehã lɛ gbɛ́i ni ta gbɛ́i krokomɛi fɛɛ nɔ.”—Fip. 2:9.
14. Ani oheɔ oyeɔ akɛ Yehowa Odasefoi A-Gbɛtsɔɔmɔ Kuu lɛ ji “nyɔŋ anɔkwafo kɛ hiɛshikalɔ lɛ” ni Yesu ehala lɛ?
• “Namɔ tuuntu ji nyɔŋ anɔkwafo kɛ hiɛshikalɔ lɛ ni enuŋtsɔ lɛ kɛ lɛ eto ewebii lɛ anɔ koni ehã amɛ amɛniyenii yɛ be ni sa mli lɛ?”—Mat. 24:45.
15. Ani mumɔ krɔŋkrɔŋ lɛ, gbɔmɔ ni?
• “Bɔfo lɛ hã lɛ hetoo akɛ: ‘Mumɔ krɔŋkrɔŋ baaba onɔ, ni Mɔ Ni Nɔ Kwɔ Fe Fɛɛ lɛ hewalɛ lɛ baaha onɔ. No hewɔ lɛ, abaatsɛ mɔ ni abaafɔ lɛ lɛ akɛ krɔŋkrɔŋ, Nyɔŋmɔ Bi.’”—Luka 1:35.
• “No hewɔ lɛ, kɛji nyɛ, ni nyɛji mɛi fɔji po lɛ, nyɛle bɔ ni nyɛfeɔ nyɛkɛ nikeenii kpakpai hãa nyɛbii lɛ, enyiɛ nɔŋŋ Tsɛ ni yɔɔ ŋwɛi lɛ kɛ mumɔ krɔŋkrɔŋ hãŋ mɛi ni biɔ lɛ lɛ!”—Luka 11:13.
16. Mɛni kɛ mɛni Yehowa kɛ emumɔ krɔŋkrɔŋ lɛ etsu?
• “Yehowa wiemɔ naa afee ŋwɛi, ni edaaŋ mumɔ lɛ naa afee nibii fɛɛ ni yɔɔ amɛmli lɛ.”—Lala 33:6.
• “Kɛ́ mumɔ krɔŋkrɔŋ lɛ ba nyɛnɔ lɛ, nyɛbaaná hewalɛ, ni nyɛbaatsɔmɔ midasefoi . . . kɛyashi shikpɔŋ lɛ nɔ hei ni jekɛ waa lɛ.”—Bɔf. 1:8.
• “Ŋmalɛ mli gbalɛ ko gbalɛ ko jɛɛɛ gbɔmɔ ko niiamlitsɔɔmɔ mli. Ejaakɛ gbalɛ ko bako yɛ gbɔmɔ suɔmɔ naa pɛŋ, shi moŋ mumɔ krɔŋkrɔŋ lɛ tsirɛ gbɔmɛi ni amɛwie wiemɔi ni jɛ Nyɔŋmɔ ŋɔɔ.”—2 Pet. 1:20, 21.
17. Mɛni ji Nyɔŋmɔ Maŋtsɛyeli?
• “Nyɔŋmɔ ni yɔɔ ŋwɛi lɛ baato maŋtsɛyeli ko ni anyɛŋ hiɛ akpãtã lɛ shishi. Ni ashiŋ maŋtsɛyeli nɛɛ ahãŋ maŋ ko maŋ ko. Ebaajwara maŋtsɛyelii nɛɛ fɛɛ ni ebaakpãtã amɛhiɛ, ni lɛ pɛ ebaadamɔ shi kɛya naanɔ.”—Dan. 2:44.
18. Mɛɛ gbɛ nɔ obaaná Nyɔŋmɔ Maŋtsɛyeli lɛ he sɛɛ?
• “Ebaatsumɔ amɛhiŋmɛiiaŋ yaafonui fɛɛ, ni gbele bɛ dɔŋŋ, ni mɔ ko yeŋ awerɛho dɔŋŋ, ni mɔ ko woŋ yara ko hu dɔŋŋ, ni mɔ ko hu piŋŋ dɔŋŋ. Tsutsu nibii lɛ eho etee.”—Kpo. 21:4.
19. Mɛni hewɔ oheɔ oyeɔ akɛ etsɛŋ Nyɔŋmɔ Maŋtsɛyeli lɛ kɛ jɔɔmɔi baaba lɛ?
• “Kaselɔi lɛ pɛ ba emasɛi amɛbabi lɛ akɛ: ‘Kɛɛmɔ wɔ, mɛɛ be nibii nɛɛ baaba mli, ni mɛni baafee be ni oba lɛ kɛ je lɛ naagbee gbii lɛ he okadi lɛ?’ Yesu hã amɛ hetoo akɛ: ‘. . . Jeŋmaŋ baate shi awo jeŋmaŋ, ni maŋtsɛyeli baate shi awo maŋtsɛyeli, ni hɔmɔ kɛ shikpɔŋhosomɔi baaba yɛ heihei. Ni abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase, ni no sɛɛ lɛ naagbee lɛ baaba.’”—Mat. 24:3, 4, 7, 14.
• “Naagbee gbii lɛ amli lɛ, bei krɛdɛi ni mli shihilɛ wa baaba. Ejaakɛ gbɔmɛi baatsɔmɔ hesuɔlɔi, shikasuɔlɔi, shwãlɔi, henɔwolɔi, mɛi ni wieɔ wiemɔi fɔji, fɔlɔi anɔ toigbolɔi, mɛi ni hiɛ esɔɔɔ nii, mɛi ni yeee anɔkwa, mɛi ni bɛ suɔmɔ kɛhã amɛweku mli bii, mɛi ni anyɛɛɛ akɛ amɛ afee kpaŋmɔ, mɛi ni wieɔ mɛi krokomɛi ahe efɔŋ, mɛi ni nyɛɛɛ amɛhe nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, mɛi ni jieɔ mɛi amɛhãa, kuɛŋtilɔi, mɛi ni naa amɛhe tsɔ, mɛi ni sumɔɔ shwɛmɔ-kɛ-ŋɔɔmɔ moŋ fe Nyɔŋmɔ, mɛi ni anaa amɛ akɛ amɛsumɔɔ Nyɔŋmɔjamɔ shi amɛhãaa ená amɛnɔ hewalɛ.”—2 Tim. 3:1-5.
20. Mɛni ofeɔ kɛtsɔɔ akɛ Maŋtsɛyeli lɛ kã otsui nɔ?
• “Nyɛyaa nɔ nyɛtaoa Maŋtsɛyeli lɛ kɛ Nyɔŋmɔ jalɛ lɛ klɛŋklɛŋ.”—Mat. 6:33.
• “Yesu kɛɛ ekaselɔi lɛ akɛ: ‘Kɛ́ mɔ ko miisumɔ akɛ enyiɛ misɛɛ lɛ, ekwa ehe ni ewó epiŋmɔ tso lɛ ni eya nɔ enyiɛ misɛɛ.’”—Mat. 16:24.
21. Namɔ ji Satan, ni namɛi ji daimonioi lɛ?
• “Nyɛjɛ nyɛtsɛ ni ji Abonsam lɛ mli . . . Nakai mɔ lɛ gbɔmɔgbelɔ ji lɛ be ni eje shishi lɛ.”—Yoh. 8:44.
• “Ashɛ drako kpeteŋkpele lɛ afɔ̃, blema onufu lɛ, ni atsɛɔ lɛ Abonsam kɛ Satan lɛ, mɔ ni lakaa shikpɔŋ muu lɛ fɛɛ lɛ; ashɛ lɛ afɔ̃ shikpɔŋ, ni ashɛrɛ ebɔfoi lɛ hu ashwie afata ehe.”—Kpo. 12:9.
22. Mɛni Satan ewie eshi Yehowa kɛ mɛi ni jáa lɛ lɛ?
• “Yoo lɛ kɛɛ onufu lɛ akɛ: ‘Wɔbaanyɛ wɔye abɔɔ lɛ mli tsei lɛ ayibii lɛ eko. Shi Nyɔŋmɔ wie tso ni ma abɔɔ lɛ teŋ lɛ nɔ yibii lɛ he akɛ: “Nyɛkayea eko, dabi, nyɛkataa he; kɛjeee nakai lɛ nyɛbaagboi.”’ Kɛkɛ ni onufu lɛ kɛɛ yoo lɛ akɛ: ‘Nyɛgboiŋ kɔkɔɔkɔ. Ejaakɛ Nyɔŋmɔ le akɛ gbi tuuntu nɔ ni nyɛbaaye eko lɛ, nyɛhiŋmɛii baagbele, ni nyɛbaatsɔmɔ tamɔ Nyɔŋmɔ, nyɛbaale ekpakpa kɛ efɔŋ.’”—1 Mo. 3:2-5.
• “Satan hã Yehowa hetoo akɛ: ‘Akɛ hewolo hãa yɛ hewolo najiaŋ. Gbɔmɔ kɛ nɔ fɛɛ nɔ ni eyɔɔ baahã yɛ ewala hewɔ.’”—Hiob 2:4.
23. Mɛni obaanyɛ ofee kɛtsɔɔ akɛ nɔ ni Satan wie lɛ ji amale?
• “Okɛ otsui muu fɛɛ asɔmɔ [Nyɔŋmɔ].”—1 Kro. 28:9.
• “Miŋmɛŋ minɔkwayeli lɛ he kɛyashi magbo!”—Hiob 27:5.
24. Mɛni hewɔ adesai gboiɔ?
• “Gbɔmɔ kome nɔ esha tsɔ kɛba je lɛ mli, ni gbele tsɔ esha nɔ kɛba, ni no hã gbele tsɛŋe gbɔmɛi fɛɛ, ejaakɛ amɛ fɛɛ amɛfee esha.”—Rom. 5:12.
25. Kɛ́ mɔ ko gbo lɛ, mɛɛ shihilɛ mli eyajeɔ?
• “Mɛi ni hiɛ kamɔ lɛ le akɛ amɛbaagboi, shi mɛi ni egboi lɛ leee nɔ ko nɔ ko kwraa.”—Jaj. 9:5.
26. Mɛɛ hiɛnɔkamɔ yɔɔ kɛhã mɛi ni egboi lɛ?
• “Abaatee jalɔi kɛ mɛi ni ejaaa fɛɛ shi.”—Bɔf. 24:15.
27. Mɛi enyiɛ baaya ŋwɛi ni amɛyafata Yesu he kɛye nɔ?
• “Naa! Gwantɛŋbi lɛ damɔ Zion Gɔŋ lɛ nɔ, ni mɛi 144,000 ni aŋma egbɛ́i kɛ e-Tsɛ gbɛ́i yɛ amɛhiɛnai fata ehe.”—Kpo. 14:1.