FÃ ETƐ
Kɛ́ Omli Efu Mɔ Ko—‘Kɛ́ Wɔyɛ Sane ko Wɔshi Mɔ Ko’
“Nyɛmi yoo ko ni yɔɔ wɔsafo lɛ mli lɛ folɔ minaa akɛ miju eshika. Mɛi krokomɛi ni yɔɔ wɔsafo lɛ mli lɛ nu sane lɛ he ni amɛyafi esɛɛ. Sɛɛ mli lɛ, nyɛmi yoo nɛɛ kɛɛ mi akɛ sane ko ni ahã ele etsɛko lɛ tsɔɔ akɛ jeee mi miju shika lɛ. Eyɛ mli akɛ ekpa mi fai moŋ, shi minu he akɛ minyɛŋ majɛ mitsui mli mikɛ nɔ ni efee mi lɛ ake lɛ kɔkɔɔkɔ.”—Linda.
ANI onaanyo héyelilɔ ko efee bo nɔ ko ni yɔɔ dɔlɛ waa, tamɔ eba lɛ yɛ Linda gbɛfaŋ lɛ? Mɔbɔ sane ji akɛ, nyɛmimɛi komɛi ehã nyɛmimɛi krokomɛi anifeemɔi egba amɛnaa aahu akɛ, etɔ̃tɔ amɛnaji. Ani bo hu afee bo nɔ ko ni yɔɔ dɔlɛ?
Namɔ Baanyɛ “Atse Wɔ Kɛje Nyɔŋmɔ Suɔmɔ” lɛ He?
Bei komɛi lɛ, ebaanyɛ ewa kɛhã wɔ akɛ wɔkɛ wɔnaanyo héyelilɔ ko ni efee wɔ nɔ ko ni yɔɔ dɔlɛ lɛ he baake lɛ, ejaakɛ wɔle akɛ esaaa akɛ Kristofoi kɛ amɛhe yeɔ yɛ nakai gbɛ nɔ. (Yohane 13:34, 35) Kɛ́ wɔnaanyo héyelilɔ ko fee wɔ nɔ ko lɛ, ebaanyɛ egba wɔnaa waa.—Lala 55:13.
Biblia lɛ hãa wɔleɔ akɛ, bei komɛi lɛ, Kristofoi baafee nibii komɛi ni yɔɔ dɔlɛ amɛshi amɛhe. (Kolosebii 3:13) Fɛɛ sɛɛ lɛ, kɛ́ nyɛmi ko fee wɔ dɔlɛ nii lɛ, ebaanyɛ ewa kɛhã wɔ akɛ wɔkɛbaake lɛ. Ani nɔ ko yɛ ni baanyɛ aye abua wɔ yɛ shihilɛ ni tamɔ nakai mli? Hɛɛ nɔ ko yɛ. Susumɔ Biblia mli shishitoo mlai etɛ ni nyiɛ sɛɛ nɛɛ ahe okwɛ:
Wɔ-Tsɛ ni yɔɔ ŋwɛi lɛ le nɔ fɛɛ nɔ. Yehowa naa nɔ fɛɛ nɔ. No hewɔ lɛ, kɛ́ mɔ ko ye wɔ sane ni ejaaa, ni no hã wɔna nɔ lɛ, enaa. (Hebribii 4:13) Kɛfata he lɛ, kɛ́ Yehowa na ni wɔmiina amane lɛ, ehaoɔ lɛ. (Yesaia 63:9) Ehãŋ “amanehulu loo hejaramɔ,” loo etsulɔ ko ‘atse wɔ kɛje esuɔmɔ lɛ he’ kɔkɔɔkɔ. (Romabii 8:35, 38, 39) No hewɔ lɛ, ani esa akɛ wɔ wɔhã nɔ ko loo mɔ ko atse wɔ kɛje esuɔmɔ lɛ he?
Kɛ́ wɔkɛ mɛi ahe ke amɛ lɛ, no etsɔɔɔ akɛ wɔsumɔɔ nɔ ni amɛfee lɛ. Kɛ́ mɔ ko tɔ̃ wɔnɔ, ni wɔkɛke lɛ lɛ, no etsɔɔɔ akɛ wɔnyaa nɔ ni efee lɛ he loo wɔbuɔ lɛ akɛ ejeee nɔ ko, ni asaŋ etsɔɔɔ akɛ nɔ ni efee lɛ hi. Kaimɔ akɛ, Yehowa nyaaa esha he, kɛ̃lɛ, kɛ́ mɔ ko fee esha ni etsake etsui lɛ, ekɛkeɔ lɛ. (Lala 103:12, 13; Habakuk 1:13) No hewɔ lɛ, kɛ́ Yehowa kɛɛ wɔ akɛ wɔkɛ mɛi atɔmɔi ake amɛ lɛ, eewo wɔ hewalɛ ni wɔkase lɛ. “Ebɛɛɛ mɔ ewooo emli kɛyaaa naanɔ.”—Lala 103:9; Mateo 6:14.
Kɛ́ wɔkɛ mɛi atɔmɔi ke amɛ lɛ, wɔ diɛŋtsɛ wɔnáa he sɛɛ. Yɛ mɛɛ gbɛ nɔ? Feemɔ shihilɛ ni nyiɛ sɛɛ nɛɛ he mfoniri okwɛ. Ŋɔɔ lɛ akɛ ohiɛ tɛ ko ni etsiii tsɔ yɛ odɛŋ, ni okpã onine mli. Ekã shi faŋŋ akɛ, kɛ́ ohiɛ lɛ nakai be kukuoo ko pɛ lɛ, etɔŋ bo. Shi kɛji ohiɛ lɛ nakai be kplaŋŋ hu, tamɔ ekolɛ minitii 30, ŋmɛlɛtswaa kome, loo nɔ ni fe nakai hu? Onine baashɔ̃ bo! Tɛ lɛ diɛŋtsɛ tsiimɔ tsakeŋ, shi akɛni ohiɛ lɛ be kplaŋŋ hewɔ lɛ, obaanu he tamɔ nɔ ni emli etsii, ejaakɛ etɔ onine. Nakai nɔŋŋ ebaa lɛ kɛji mɛi tɔ̃ wɔnɔ ni wɔbɛ amɛ wɔwo wɔmli, loo wɔkɛkeee amɛ. Be ni be shwieɔ mli lɛ, sane lɛ baadɔ wɔ waa fe tsutsu lɛ, ekɔɔɔ he eko nɔ sane ni eji. No hewɔ Yehowa woɔ wɔ hewalɛ ni wɔkabɛ mɛi wɔwo wɔmli lɛ. Anɔkwa, kɛ́ wɔkɛ mɛi atɔmɔi ke amɛ lɛ, wɔ diɛŋtsɛ wɔnáa he sɛɛ.—Abɛi 11:17.
Kɛ́ wɔkɛ mɛi atɔmɔi ke amɛ lɛ, wɔ diɛŋtsɛ wɔnáa he sɛɛ
“Minu He Tamɔ Nɔ ni Yehowa Diɛŋtsɛ Kɛ Mi Miiwie”
Mɛni ye ebua Linda koni ekabɛ nyɛmi yoo ni fee lɛ nii lɛ ewo emli? Nɔ kome ni ye ebua lɛ ji akɛ, ejwɛŋ ŋmalɛi ni tsɔɔ nɔ hewɔ ni esa akɛ wɔkɛ tɔmɔi ake lɛ anɔ. (Lala 130:3, 4) Ŋmalɛ lɛ mli sane ko ni ta etsuiŋ waa ji akɛ, kɛ́ wɔkɛ mɛi atɔmɔi ke amɛ lɛ, Yehowa hu kɛ wɔtɔmɔi baake wɔ. (Efesobii 4:32–5:2) Enɛ ná enɔ hewalɛ waa. Ewie akɛ: “Minu he tamɔ nɔ ni Yehowa diɛŋtsɛ kɛ mi miiwie.”
Sɛɛ mli lɛ, Linda nyɛ eŋmɛɛ sane lɛ he. Ekɛ nyɛmi yoo lɛ he ke lɛ kwraa, ni amrɔ nɛɛ eji enaanyo kpakpa. Linda kpaaa Yehowa sɔɔmɔ. Ná nɔmimaa akɛ, Yehowa miisumɔ ni eye ebua bo koni onyɛ okɛ mɛi atɔmɔi ake amɛ.