Etee nɔ Esɔmɔ Nyɔŋmɔ yɛ Sane Fɔŋ ni Aye Mɛi lɛ Fɛɛ Sɛɛ

ELIA kɛ otsii abɔ enyiɛ. Ewo kooyigbɛ etere kɛjɛ Horeb Gɔŋ lɛ he tɔ̃ɔ kɛbatsɔ Yordan Jɔɔ lɛ he ni amrɔ nɛɛ ebashɛ Israel ni ji ejakumaŋ lɛ. Eena akɛ nibii etsake yɛ jɛmɛ. Bɔ ni nuhɔmɔ be ni sɛɛ kɛ lɛ ha jɛmɛ fite lɛ ebɔi hii fiofio. Gbo nugbɔ lɛ ebɔi nɛmɔ, ni okwaafoi miihu amɛŋmɔji. Ekolɛ enɛ ha gbalɔ lɛ tsui nyɔ emli fioo, shi maŋbii lɛ asane ji nɔ ni gbaa enaa fe fɛɛ. Amɛsako wekukpãa ni kã amɛ kɛ Yehowa teŋ lɛ. Baal jamɔ ehe shi yɛ jɛmɛ lolo, no hewɔ lɛ Elia yɛ nitsumɔ babaoo ni ebaatsu.a

Elia na ni aahu ŋmɔ agbo ko yɛ Abel-mehola maŋ lɛ masɛi. Akɛ tsinai ntatai nyɔŋma kɛ enyɔ miihu ŋmɔ lɛ, ni kui nyɔŋma kɛ enyɔ lɛ fɛɛ miihu shi kome. Nuu ni kɛ naagbee nta lɛ huɔ lɛ ji mɔ ni Elia taoɔ lɛ. Egbɛ́i ji Elisha, ni lɛ ji mɔ ni Yehowa ehala akɛ mɔ ni baaye Elia sɛɛ. Be ko lɛ, Elia nu he akɛ lɛ pɛ ji mɔ ni eshwɛ ni kɛ anɔkwayeli miisɔmɔ Nyɔŋmɔ, no hewɔ lɛ ekã shi faŋŋ akɛ eyɛ he miishɛɛ waa akɛ ekɛ Elisha aaakpe.​—1 Maŋtsɛmɛi 18:22; 19:14-19.

Ani egba Elia naa akɛ ekɛ sɔ̃i kɛ hegbɛi ni eyɔɔ lɛ eko aaaha mɔ ko, loo akɛ be baashɛ ni mɔ kroko baaye enajiaŋ? Wɔlé; ni wɔnyɛŋ wɔkɛɛ hu akɛ susumɔi ni tamɔ nɛkɛ nyɛŋ aba ejwɛŋmɔŋ. Ejaakɛ eji “gbɔmɔ adesa tamɔ wɔ nɔŋŋ.” (Yakobo 5:17) Fɛɛ mli lɛ, Biblia lɛ kɛɔ wɔ akɛ: “Beni Elia hoɔ [Elisha] he lɛ, eshɛ etade yuu lɛ efɔ enɔ.” (1 Maŋtsɛmɛi 19:19) Eeenyɛ efee akɛ too hewolo ji nɔ ni akɛfee atade yuu lɛ. Ni atade yuu nɛɛ ni ewoɔ lɛ tsɔɔ akɛ Yehowa kɛ nitsumɔ krɛdɛɛ ko ewo edɛŋ. No hewɔ lɛ, shɛ ni Elia shɛ etade yuu lɛ efɔ Elisha nɔ lɛ ji okadi ko ni shishinumɔ yɔɔ he waa. Elia jɛ etsuiŋ ekpɛlɛ fãmɔ ni Yehowa kɛha lɛ akɛ ehala Elisha akɛ esɛɛyelɔ lɛ nɔ. Elia kɛ ehe fɔ e-Nyɔŋmɔ lɛ nɔ ni ebo lɛ toi.

Elisha ni ji oblanyo lɛ miisumɔ ni eye ebua gbalɔ Elia ni efɔ̃ nɔ yɛ afii amli lɛ. Elisha ebayeee Elia sɛɛ amrɔ nɔŋŋ. Moŋ lɛ, eba ehe shi ni ekɛ gbalɔ ni efɔ̃ nɔ yɛ afii amli lɛ nyiɛ ni eye ebua lɛ aaafee afii ekpaa, ni sɛɛ mli lɛ abale lɛ akɛ mɔ ni “fɔse nu shwie Elia niji anɔ.” (2 Maŋtsɛmɛi 3:11) Kwɛ bɔ ni Elia mii baashɛ ehe eha akɛ ená tsulɔ kɛ yelikɛbualɔ ni sa! Ekã shi faŋŋ akɛ mɛi enyɔ lɛ batsɔmɔ nanemɛi ni bɛŋkɛ kpaakpa. Ŋwanejee ko bɛ he akɛ, bɔ ni amɛwowoo amɛhe hewalɛ lɛ ye ebua amɛ ni amɛtee nɔ amɛsɔmɔ Yehowa yɛ sane fɔŋ ni ehiii kwraa ni amɛna ni aaye mɛi babaoo yɛ Israel lɛ fɛɛ sɛɛ. Mɔ ni fee mɛi yiwalɛ nii waa ji Ahab, ni ji Israel maŋtsɛ lɛ, ni enɔfɔŋfeemɔ lɛ mli wo wu be fɛɛ be.

Ani aye bo sane fɔŋ? Aye wɔteŋ mɛi pii sane fɔŋ yɛ jeŋ ni ekpɔtɔ nɛɛ mli. Kɛ́ oná naanyo ko ni sumɔɔ Nyɔŋmɔ lɛ, ebaanyɛ eye ebua bo koni onyɛ odamɔ naa. Kɛfata he lɛ, Elia hemɔkɛyeli lɛ ni oookase lɛ baanyɛ aye abua bo koni onyɛ odamɔ sane fɔŋ ni ayeɔ bo lɛ naa.

‘TEE SHI NI OKPELEKE SHI OKƐ AHAB AYAKPE’

Elia kɛ Elisha bɔ mɔdɛŋ waa ni amɛye amɛbua maŋbii lɛ ni amɛsaa amɛ kɛ Yehowa teŋ. Eeenyɛ efee akɛ, ato nɔ ko tamɔ skul he gbɛjianɔ aha gbalɔi krokomɛi lɛ, ni ekã shi faŋŋ akɛ Elia kɛ Elisha ji mɛi titrii ni tsɔse amɛ. Shi sɛɛ mli lɛ, Yehowa ha Elia nitsumɔ kroko, ekɛɛ lɛ akɛ: “Tee shi ni okpeleke shi okɛ Ahab, Israel maŋtsɛ lɛ ni yɔɔ Samaria lɛ, ayakpe.” (1 Maŋtsɛmɛi 21:18) Mɛni Ahab efee?

Maŋtsɛ lɛ ekwa Yehowa sɔɔmɔ momo, ni kɛbashi eyinɔ lɛ, Israel maŋtsɛ ko efeko efɔŋ tamɔ lɛ. Ekɛ Yezebel bote gbalashihilɛ mli ni eha Baal jamɔ he shi yɛ maŋ lɛ mli, ni maŋtsɛ lɛ tete kɛ ehe wo mli. (1 Maŋtsɛmɛi 16:31-33) Nibii ni afeɔ yɛ Baal jamɔ mli lɛ ekomɛi ji fɔmɔ he kusumii, ajwamaŋbɔɔ, kɛ gbekɛbii ni akɛshãa afɔle yɛ la mli. Kɛfata he lɛ, etsɛko tsɔ ni Ahab gbo fãmɔ ni Yehowa kɛha lɛ akɛ egbe Aram maŋtsɛ Ben-hadad ni yitsoŋ wa lɛ nɔ toi. Ekolɛ shika ni Ahab baaná lɛ hewɔ egbo Yehowa nɔ toi lɛ. (1 Maŋtsɛmɛi, yitso 20) Kɛlɛ, amrɔ nɛɛ, he ni Ahab kɛ Yezebel hiɛkɔ̃ɔ, heloonaa nibii asɛɛdii, kɛ yiwalɛ nifeemɔi lɛ eshɛ lɛ naa wa waa.

Ahab ema maŋtsɛwe ko ni da naakpa yɛ Samaria. Ni eyɛ maŋtsɛwe kroko hu yɛ Yezreel, ni kɛ Samaria teŋ jekɛmɔ aaafee kilomitai 37. Weintrom ko kã shĩa nɛɛ masɛi kpaakpa. Ahab hiɛ kɔ̃ trom bibioo nɛɛ, ni nɔtsɛ ji nuu ko ni atsɛɔ lɛ Nabot lɛ nɔ. Etsu ni ayatsɛ Nabot kɛba ni ekɛɛ lɛ akɛ ebaahe etrom lɛ kɛ shika loo ebaaha lɛ ekroko eto najiaŋ. Shi Nabot kɛɛ lɛ akɛ: “Yehowa akaha enɛ miigbale mi fɔ̃ɔfɔ̃ akɛ maŋɔ mitsɛmɛi agboshinii lɛ mahao.” (1 Maŋtsɛmɛi 21:3) Ani nɔ ni Nabot fee lɛ tsɔɔ akɛ ekuɛŋ ti ni ebuuu ewala? Mɛi pii susuɔ akɛ nakai eji. Yɛ anɔkwale mli lɛ, nɔ ni efee lɛ tsɔɔ akɛ eebo Yehowa Mla ni ekɛha Israelbii lɛ toi. Mla lɛ kɛɔ akɛ akahɔɔ weku shikpɔŋ ni akɛha akɛ gboshinii lɛ kwrakwra. (3 Mose 25:23-28) Yɛ Nabot gbɛfaŋ lɛ, nilee bɛ mli akɛ aaakũ Nyɔŋmɔ Mla mli. Eyɛ hemɔkɛyeli kɛ ekãa, ejaakɛ ele akɛ mɔ ni booo Ahab toi lɛ, ekɛ ewala miiwo oshara mli.

Ahab ebuuu Yehowa Mla lɛ fɛi. Etee ewe ni “efee gblinii ni emli ewo la” yɛ bɔ ni nibii tee lɛ eha lɛ hewɔ. Biblia lɛ kɛɔ akɛ: “Eho ekã esaa nɔ, ni etsɔ ehiɛ eto afã, ni ekpɛlɛɛɛ niyeli.” (1 Maŋtsɛmɛi 21:4) Beni Yezebel na bɔ ni ewu efu enaabu tamɔ gbekɛ ko ni mli efu lɛ nɔŋŋ kɛkɛ ni etsɔ̃ ŋaa fɔŋ ko ni baaha akpãta Nabot weku lɛ hiɛ bɔni afee ni Ahab nine anyɛ ashɛ nɔ ni etaoɔ lɛ nɔ.

Mɔ fɛɛ mɔ ni kaneɔ ŋaa ni Yezebel tsɔ̃ lɛ he sane lɛ biɔ ehe akɛ, “Ei, yoo yitsoŋ wa nɛkɛ?” Maŋnyɛ Yezebel le akɛ yɛ Nyɔŋmɔ Mla lɛ naa lɛ, anyɛŋ abu mɔ ko esha ko ni yɔɔ hiɛdɔɔ lɛ he fɔ ja aná odasefoi enyɔ anaa wiemɔ dã. (5 Mose 19:15) No hewɔ lɛ, Yezebel ŋma woji yɛ Ahab gbɛ́i amli emaje Yezreel maŋ lɛŋ onukpai ni abuɔ waa lɛ, akɛ amɛtao hii enyɔ ni baaye odase amɛshi Nabot akɛ ebɔ musu, koni agbe lɛ. Mɔbɔ sane ji akɛ ŋaa fɔŋ ni Yezebel tsɔ̃ lɛ ye omanye. “Hii yakagbɔmɛi enyɔ” komɛi ye odase amɛshi Nabot, ni no ha atswia lɛ tɛi ni egbo. Shi jeee Nabot pɛ agbe; agbe ebihii lɛ hu!b (1 Maŋtsɛmɛi 21:5-14; 3 Mose 24:16; 2 Maŋtsɛmɛi 9:26) No hewɔ lɛ, Ahab kwa hegbɛ ni eyɔɔ akɛ wekuyitso lɛ, ni eha eŋa lɛ ye etsui naa sane ni ekpãta mɛi ni efeko nɔ ko lɛ ahiɛ.

Feemɔ bɔ ni Elia baanu he eha beni Yehowa ha ele nɔ ni maŋtsɛ lɛ kɛ maŋnyɛ lɛ efee lɛ he mfoniri okwɛ. Kɛ́ efee tamɔ nɔ ni mɛi fɔji lɛ eye mɛi ni efeko nɔ ko lɛ anɔ kunim lɛ, ehaa mɔ nijiaŋ jeɔ wui waa. (Lala 73:3-5, 12, 13) Ŋmɛnɛ lɛ, ewaaa akɛ wɔbaana ni aaye mɛi sane ni ehiii kwraa, ni bei komɛi po lɛ, mɛi ni feɔ nibii ni tamɔ nakai lɛ ji mɛi ni abuɔ waa ni tsɛɔ amɛhe Nyɔŋmɔ najiaŋdamɔlɔi. Bɔ ni Nabot sane lɛ naa yakpa ha lɛ baanyɛ ashɛje wɔmii. Biblia lɛ haa wɔnaa akɛ anyɛŋ akɛ nɔ ko atee Yehowa. Enaa nɔ fɛɛ nɔ. (Hebribii 4:13) Ni kɛ́ ena ni aafee yiwalɛ nii lɛ, mɛni efeɔ yɛ he?

‘MƆ OBAMƆ MI NƐƐ, MIHENYƐLƆ!’

Yehowa tsu Elia Ahab ŋɔɔ. Nyɔŋmɔ wie kɛ hiɛdɔɔ, ekɛɛ Elia akɛ: “Naa, eyɛ Nabot weintrom lɛ mli.” (1 Maŋtsɛmɛi 21:18) Beni Yezebel kɛɛ Ahab akɛ enine eshɛ weintrom lɛ nɔ pɛ ni ete shi etee ni eyakwɛ ebɔɔ hee ni ená lɛ. Ebaaa ejwɛŋmɔŋ kwraa akɛ Yehowa miikwɛ nɔ ni yaa nɔ lɛ fɛɛ. Feemɔ bɔ ni Ahab kɛ miishɛɛ sharaa shi yɛ weintrom lɛ mli ni eesusu bɔ ni ebaafee jɛmɛ abɔɔ fɛfɛo lɛ he mfoniri okwɛ. Shi nɔŋŋ beni eyaakwɛ lɛ, naa Elia! Amrɔ nɔŋŋ ni Ahab hiɛ tsake ni miishɛɛ lɛ fɛɛ laaje yɛ ehiɛ, emli fu waa ni ekɛɛ Elia akɛ: ‘Mɔ obamɔ mi nɛɛ, mihenyɛlɔ!’​—1 Maŋtsɛmɛi 21:20.

Ahab wiemɔ lɛ haa wɔnaa akɛ kwashia ji lɛ yɛ gbɛi enyɔ anɔ. Klɛŋklɛŋ lɛ, Ahab kɛɛ Elia akɛ, “Mɔ obamɔ mi nɛɛ,” ni tsɔɔ akɛ esusuko Yehowa he. Yehowa ‘emɔ’ lɛ momo. Beni Ahab kɛ heyeli ni Yehowa kɛha lɛ lɛ tsuɔ nii yɛ gbɛ fɔŋ nɔ, ni enáa yibii gbohii ni jɛ Yezebel ŋaatsɔɔ lɛ mli kɛba lɛ mli ŋɔɔmɔ lɛ, Yehowa na fɛɛ. Nyɔŋmɔ na Ahab tsuiŋ tɔ̃ɔ, ni ena akɛ suɔmɔ ni eyɔɔ kɛha trom lɛ haaa ena mɔbɔ, eye jalɛsane, loo emusuŋ atsɔ lɛ. Nɔ ni ji enyɔ lɛ, Ahab tsɛ Elia akɛ, ‘Mihenyɛlɔ!’ Enɛ haa wɔnaa akɛ, Ahab he tsɛ̃ɔ Elia, ni ji Yehowa Nyɔŋmɔ naanyo ni kulɛ ebaanyɛ eye ebua lɛ ni etsake kɛjɛ efɔŋ ni efeɔ lɛ mli lɛ.

Eba akɛ wɔbaakase nii kɛjɛ Ahab kwashiafeemɔ lɛ mli. Esa akɛ wɔha ehi wɔjwɛŋmɔŋ daa akɛ Yehowa Nyɔŋmɔ naa nɔ fɛɛ nɔ. Akɛ Tsɛ ni yɔɔ suɔmɔ lɛ, kɛ́ wɔfee efɔŋ lɛ, enaa, ni eesumɔ ni wɔtsake. Bei pii lɛ, etsɔɔ enanemɛi anɔ eyeɔ ebuaa wɔ. Enanemɛi nɛɛ ji adesai anɔkwafoi ni ekɛ ewiemɔ lɛ tsɔɔ amɛnɔ kɛyahaa mɛi, tamɔ bɔ ni ekɛ Elia tsu nii eha lɛ pɛpɛɛpɛ. Kwɛ mɔbɔ sane ni ebaaji nɛkɛ akɛ wɔɔbu Nyɔŋmɔ nanemɛi lɛ akɛ wɔhenyɛlɔi!​—Lala 141:5.

Feemɔ Elia he mfoniri ni eeha Ahab hetoo, ni eekɛɛ lɛ akɛ: “Mimɔo.” Emɔ Ahab akɛ eji julɔ, gbɔmɔgbelɔ, kɛ mɔ ko ni tseɔ Yehowa Nyɔŋmɔ hiɛ atua. Kwɛ ekãa ni ebi ni Elia aná dani enyɛ edamɔ nakai nuu yitsoŋwalɔ lɛ hiɛ! Elia tee nɔ ni ejaje Nyɔŋmɔ kojomɔ lɛ eshwie Ahab nɔ. Yehowa le nɔ ni yaa nɔ lɛ fɛɛ, eena akɛ Ahab weku lɛ nɔfɔŋfeemɔ lɛ miitsɛŋe maŋbii lɛ. No hewɔ lɛ Elia kɛɛ Ahab akɛ Nyɔŋmɔ eto eyiŋ akɛ ‘ebaabɛɛ lɛ eshwie,’ ni tsɔɔ akɛ ebaabule nakai odehei aweku lɛ shishi kwraa. Ni abaagbe Yezebel hu.​—1 Maŋtsɛmɛi 21:20-26.

Eji Elia yasusu akɛ mɛi baanyɛ aye awui ni amɛye mɛi sane fɔŋ yakatswaa kulɛ, elaka ehe. Ŋmɛnɛ lɛ, ewaaa akɛ mɛi aaasusu akɛ Nyɔŋmɔ efeŋ awuiyelɔi nɔ ko. Biblia mli sane ni wɔsusu he nɛɛ kaiɔ wɔ akɛ, jeee akɛ Yehowa Nyɔŋmɔ naa nibii fɔji ni yaa nɔ lɛ pɛ kɛkɛ, shi moŋ ebaafee he nɔ ko hu yɛ be ni sa mli. Ewiemɔ lɛ haa wɔleɔ akɛ, etsɛŋ ebaafo efɔŋfeemɔ fɛɛ sɛɛ shi kome nyɔŋlo! (Lala 37:10, 11) Shi ekolɛ obaabi akɛ: ‘Ani Nyɔŋmɔ gbalaa mɛi atoi kɛkɛ ni enaaa mɔbɔ?’

‘ANI ONA BƆ NI AHAB BAA EHE SHI NƐƐ?’

Ekolɛ bɔ ni Ahab fee enii eha yɛ Nyɔŋmɔ kojomɔ lɛ he lɛ ha Elia hiɛ fee lɛ yaa. Wɔkaneɔ yɛ Biblia lɛ mli akɛ: “Shi eba mli akɛ, beni Ahab nu nɛkɛ wiemɔi nɛɛ, egbala etadei ni ebu kpekpe, ni ehi ŋmaa, ni ekɛ kpekpe lɛ wɔ, ni kɛ́ enyiɛ lɛ, enyiɛɔ kpookpoo.” (1 Maŋtsɛmɛi 21:27) Ani nɔ ni Ahab fee nɛɛ tsɔɔ akɛ etsake etsui?

Wɔle akɛ Ahab fee tsakemɔi komɛi yɛ ejeŋba mli. Ahab ba ehe shi, ni ekã shi faŋŋ akɛ enaaa enɛ feemɔ mlɛo, ejaakɛ eji mɔ ko ni woɔ ehe nɔ. Shi ani etsake etsui lɛɛlɛŋ? Ha wɔkɛ enifeemɔi lɛ ato Maŋtsɛ Manase ni ye awui waa lɛ nifeemɔi lɛ ahe wɔkwɛ. Beni Yehowa gbala Manase toi lɛ, Manase ba ehe shi ni ekpa Yehowa fai koni eye ebua lɛ. Shi ekɛwaaa jɛmɛ. Etsake eshihilɛ kwraa ni ejie amagai ni emamɔ lɛ, emia ehiɛ akɛ eeesɔmɔ Yehowa, ni ewo emaŋbii lɛ hewalɛ ni amɛ hu amɛfee nakai. (2 Kronika 33:1-17) Ani nakai wɔna ni Ahab fee lɛ? Dabida.

Ani Yehowa kadi bɔ ni Ahab eha maŋ fɛɛ ena akɛ efee mɔbɔmɔbɔ lɛ? Yehowa kɛɛ Elia akɛ: “Ani ona bɔ ni Ahab baa ehe shi yɛ mihiɛ nɛɛ? No hewɔ lɛ akɛni ebaa ehe shi yɛ mihiɛ hewɔ lɛ, mihãŋ efɔŋ lɛ aba yɛ eyinɔ nɛɛ; shi ebi lɛ yinɔ moŋ mahã efɔŋ lɛ aba ewe lɛ nɔ yɛ.” (1 Maŋtsɛmɛi 21:29) Ani enɛ tsɔɔ akɛ Yehowa kɛ Ahab he eshai lɛ efa lɛ? Dabi, Ahab ejieee anɔkwa heshwamɔ kpo, no hewɔ lɛ Nyɔŋmɔ kɛfaaa lɛ. (Ezekiel 33:14-16) Shi akɛni Ahab jie heshwamɔ fioo ko kpo hewɔ lɛ, Yehowa hu na lɛ mɔbɔ fioo. Yehowa haaa ekɛ ehiŋmɛii akwɛ eweku lɛ hiɛkpatamɔ lɛ.

Kɛlɛ, Yehowa tsakeee kojomɔ ni ekɛfɔ̃ Ahab nɔ lɛ. Sɛɛ mli lɛ, Yehowa kɛ ebɔfoi lɛ tee ajina ni amɛtao gbɛ ni hi fe fɛɛ ni amɛaatsɔ nɔ amɛlaka Ahab koni ekɛ ehe ayawo ta ko ni abaagbe lɛ yɛ mli lɛ mli. No sɛɛ etsɛɛɛ lɛ, atsu kojomɔ ni Yehowa kɛfɔ̃ Ahab nɔ lɛ he nii. Apila Ahab yɛ ta lɛ mli, ni la ho lɛ aahu kɛyashi egbo yɛ eshwiilii lɛ mli. Beni Biblia lɛ gbaa wɔ nɔ ni tee nɔ lɛ, ebɔ nɔ ko ni yɔɔ musuŋshaa ni tee nɔ lɛ he amaniɛ, akɛ: Beni afɔɔ maŋtsɛ lɛ shwiilii lɛ mli lɛ, gbeei komɛi balɛmɔ ela lɛ. Yehowa wiemɔ lɛ ba mli yɛ mɛi fɛɛ ahiŋmɛiiaŋ, nɔ ni ekɛtsɔ Elia nɔ ekɛha Ahab akɛ: “Hegbɛ ni gbeei lɛmɔ Nabot la yɛ lɛ, jɛi nɔŋŋ gbeei aaalɛmɔ bo hu ola yɛ.”​—1 Maŋtsɛmɛi 21:19; 22:19-22, 34-38.

Bɔ ni Ahab naagbee ba lɛ eha lɛ ha Elia, Elisha, kɛ Nyɔŋmɔ webii anɔkwafoi krokomɛi fɛɛ na akɛ, Yehowa hiɛ kpaaa ekãa kɛ hemɔkɛyeli ni Nabot jie kpo lɛ nɔ. Kɛ́ tsɛ etsɛ jio, mra efee jio lɛ, Nyɔŋmɔ ni yeɔ jalɛsane lɛ haŋ efɔŋfeelɔi aye amɛhe kɔkɔɔkɔ; ni asaŋ ejieɔ mɔbɔnalɛ kpo yɛ ekojomɔi amli, kɛ́ nɔdaamɔnɔ kpakpa ko yɛ hewɔ ni esa akɛ efee nakai. (4 Mose 14:18) Elia kɛ afii babaoo emia ehiɛ yɛ nakai nɔyelɔ ni yitsoŋ wa lɛ nɔyeli shishi, ni kwɛ bɔ ni ekase nii waa kɛjɛ nɔ ni tee nɔ lɛ mli! Ani aye bo sane fɔŋ? Ani ooshwe ni Nyɔŋmɔ aye osane aha bo? Belɛ, kasemɔ Elia hemɔkɛyeli lɛ. Elia kɛ enaanyo anɔkwafo Elisha tee nɔ amɛshiɛ Nyɔŋmɔ sane lɛ yɛ sane fɔŋ ni aye mɛi lɛ fɛɛ sɛɛ!