Yehowa La Okpɔŋɔi Kɛ La Shwiilii

Siria maŋtsɛ Ben-hadad kɛ esraafoi lɛ hãaa Israelbii lɛ ahe ajɔ amɛ kwraa. Shi be fɛɛ be ni amɛbaakpɛ amɛyiŋ akɛ amɛmiiba Israel lɛ, gbalɔ Elisha kɛɔ Israel maŋtsɛ lɛ, kɛkɛ lɛ maŋtsɛ lɛ ejo foi. No hewɔ lɛ, Ben-hadad tsu mɛi koni amɛyamɔ Elisha. Ená ele akɛ Elisha yɛ maŋ ko ni atsɛɔ lɛ Dotan lɛ mli. No hewɔ lɛ, etsu esraafoi lɛ kɛtee jɛmɛ.

Siriabii lɛ bashɛ Dotan gbɛkɛnaashi. Be ni Elisha tsulɔ lɛ te shi leebi lɛ, ena ni asraafoi pii ebɔle maŋ lɛ he kɛkpe. Etsui fã ni ebo akɛ: ‘Elisha, mɛni wɔbaafee?’ Elisha kɛɛ lɛ akɛ: “Mɛi ni kɛ wɔ yɔɔ lɛ ayi fa fe mɛi ni kɛ amɛ yɔɔ lɛ.” Nɔŋŋ ni Yehowa hã Elisha tsulɔ lɛ na la ta shwiilii kɛ okpɔŋɔi yɛ gɔji lɛ anɔ fɛɛ yɛ maŋ lɛ he fɛɛ.

Be ni Siria asraafoi lɛ ka akɛ amɛbaamɔ Elisha lɛ, esɔle ekɛɛ Yehowa akɛ: ‘Yehowa, ofainɛ, hã mɛi nɛɛ ashwila.’ Amrɔ nɔŋŋ lɛ, asraafoi lɛ leee he ni amɛyɔɔ lɛ dɔŋŋ, eyɛ mli akɛ amɛkã he amɛmiina nii. Elisha kɛɛ amɛ akɛ: ‘Jeee maŋ nɛɛ nɔ akɛɛ nyɛba lɛ. Nyɛnyiɛa misɛɛ ni mikɛ nyɛ baaya nuu ni nyɛtaoɔ lɛ ŋɔɔ.’ No hewɔ lɛ, amɛnyiɛ Elisha sɛɛ kɛtee Israel maŋtsɛ lɛ ŋɔɔ yɛ Samaria tɔ̃ɔ.

Be ni Siriabii lɛ na he ni ekɛ amɛ etee lɛ, ehiii amɛ nɔ ko feemɔ dɔŋŋ. Israel maŋtsɛ lɛ bi Elisha akɛ: ‘Migbe amɛ lo?’ Ani Elisha baahã afee mɛi nɛɛ ni kulɛ amɛmiitao amɛpila lɛ lɛ efɔŋ? Dabi. Ekɛɛ maŋtsɛ lɛ akɛ: ‘Kaagbe amɛ. Hã amɛ nɔ ko amɛye koni no sɛɛ lɛ ohã amɛya amɛmaŋ.’ No hewɔ lɛ maŋtsɛ lɛ hoo niyenii pii ehã amɛ ni amɛye. Kɛkɛ ni ehã amɛtee amɛmaŋ.