Yesu Naagbee Gbɛkɛ Niyeli Lɛ

Yudafoi lɛ yeɔ Hehoo lɛ yɛ Nisan nyɔɔŋ lɛ gbi ni ji 14 lɛ nɔ daa afi. Gbi jurɔ nɛɛ kai amɛ bɔ ni Yehowa jie amɛ kɛje nyɔŋyeli mli yɛ Ejipt ni ekɛ amɛ ba Shiwoo Shikpɔŋ lɛ nɔ lɛ. Yɛ afi 33 Ŋ.B. lɛ, Yesu kɛ ebɔfoi lɛ ye Hehoo lɛ yɛ ŋwɛitsu ko nɔ yɛ Yerusalem. Be ni amɛye nii amɛgbe naa lɛ, Yesu kɛɛ amɛ akɛ: ‘Nyɛteŋ mɔ kome baajie mi ahã.’ Bɔfoi lɛ anaa kpɛ amɛhe ni amɛbi Yesu akɛ: ‘Wɔteŋ namɔ baafee nakai lɛ?’ Yesu wie akɛ: ‘Mɔ ni mikɛ blodo lɛ baahã lɛ.’ Kɛkɛ ni ekɛ blodo kuku ni ehiɛ lɛ hã Yuda Iskariot. Amrɔ nɔŋŋ ni Yuda te shi ni eje kpo kɛjɛ tsũ lɛ mli.

No sɛɛ lɛ, Yesu sɔle, ekɔ blodo ni ekumɔ mli, ni ekɛhã bɔfoi ni eshwɛ lɛ. Ekɛɛ amɛ akɛ: ‘Nyɛyea blodo nɛɛ. Edamɔ shi kɛhã migbɔmɔtso lɛ ni mikɛbaahã yɛ nyɛhewɔ lɛ.’ Kɛkɛ ni ewó wain hu ni esɔle ni ekɛhã amɛ. Ekɛɛ amɛ akɛ: ‘Nyɛnua wain nɛɛ. Edamɔ shi kɛhã milá ni mikɛbaahã koni akɛ eshai ake lɛ. Miiwo nyɛ shi akɛ, nyɛbaafata mihe yɛ ŋwɛi kɛye nɔ akɛ maŋtsɛmɛi. Nyɛfea enɛ daa afi ni nyɛkɛkaia mi.’ Kɛbashi ŋmɛnɛ lɛ, daa afi kɛ́ eshɛ nakai gbi lɛ gbɛkɛ lɛ, Yesu sɛɛnyiɛlɔi kpeɔ. Amrɔ nɛɛ, atsɛɔ kpee nɛɛ akɛ Nuŋtsɔ Lɛ Gbɛkɛ Niyeli.

Be ni amɛye nii lɛ amɛgbe naa lɛ, bɔfoi lɛ bé yɛ mɔ ni he hiaa fe fɛɛ yɛ amɛteŋ lɛ he. Shi Yesu kɛɛ amɛ akɛ: ‘Mɔ ni naa ehe akɛ mɔ bibioo loo mɔ ni he ehiaaa kwraa yɛ nyɛteŋ lɛ, lɛ ji mɔ ni da fe fɛɛ yɛ nyɛteŋ.

‘Minanemɛi ji nyɛ. Mikɛɔ nyɛ nɔ fɛɛ nɔ ni mi-Tsɛ taoɔ ni makɛɛ nyɛ lɛ. Etsɛŋ, mashi nyɛ ni maya mi-Tsɛ ŋɔɔ yɛ ŋwɛi. Kɛ́ nyɛsumɔɔ nyɛhe lɛ, no mɛi kɛbaale akɛ mikaselɔi ji nyɛ. Esa akɛ nyɛsumɔ nyɛhe tamɔ bɔ ni mi hu misumɔɔ nyɛ lɛ.’

Naagbee lɛ, Yesu sɔle ni ekɛɛ Yehowa ni ebu kaselɔi lɛ fɛɛ ahe. Ekɛɛ lɛ ni eye ebua amɛ koni amɛfee ekome kɛtsu nii yɛ toiŋjɔlɛ mli. Esɔle koni atse Yehowa gbɛ́i lɛ he. Kɛkɛ ni ekɛ ebɔfoi lɛ lá lalai kɛjie Yehowa yi, ni amɛje kpo. No mli lɛ, eshwɛ fioo ni abaamɔ Yesu.