Wolo Ni Jɛ Gbɛtsɔɔmɔ Kuu Lɛ Dɛŋ

Suɔmɔ Nyɛmimɛi:

Yehowa tsuji ji wɔ, ni no hewɔ lɛ, wɔsumɔɔ e-Wiemɔ lɛ, ni ji Biblia lɛ. Wɔle faŋŋ akɛ, blema saji ni yɔɔ mli lɛ ja, gbɛtsɔɔmɔi ni ekɛhãa yɛ bɔ ni wɔhi shi wɔhã lɛ he lɛ anɔ bɛ, ni ehãa wɔnaa akɛ Yehowa sumɔɔ adesai asane. (Lala 119:105; Luka 1:3; 1 Yohane 4:19) Wɔmiisumɔ waa ni wɔtsɔɔ mɛi anɔkwalei ni jara wala ni yɔɔ Nyɔŋmɔ Wiemɔ lɛ mli lɛ. No hewɔ lɛ, eŋɔɔ wɔnaa waa akɛ wɔbaahã nyɛnine ashɛ wolo nɛɛ ni yitso ji, “Kasemɔ Nii Kɛjɛ Biblia Lɛ Mli” lɛ nɔ. Nyɛhãa wɔgbaa nyɛ wolo nɛɛ he sane fioo.

Gbekɛbii titri ahewɔ afee wolo nɛɛ. Shi abaanyɛ akɛye abua onukpai ni miitao ale Biblia lɛ mli saji jogbaŋŋ lɛ hu. Nyɔŋmɔ hã aŋma Biblia lɛ ahã wɔ fɛɛ, no hewɔ lɛ nibii ni wɔkaseɔ yɛ mli lɛ baanyɛ aye abua wɔ waa, ni ehã wɔná anɔkwa miishɛɛ.

Wolo nɛɛ gbaa wɔ adesai ayinɔsane kɛjɛ be ni abɔ je lɛ, ni emli saji lɛ fɛɛ damɔ Biblia lɛ nɔ. Wɔbɔ mɔdɛŋ waa akɛ wɔkɛ wiemɔi ni shishinumɔ waaa baatsu nii. Agba saji lɛ bɔ ni baahã amɛkanemɔ aŋɔɔ, ni ato amɛnaa yɛ bɔ ni amɛba lɛ amɛhã lɛ naa.

Wolo nɛɛ kanemɔ ejieŋ bo. Mfonirii ni yɔɔ mli lɛ, kɛ bɔ ni agba Biblia mli saji lɛ ahã lɛ, hãa onuɔ he tamɔ nɔ ni oyɛ jɛmɛ ni saji lɛ ba, ni onyɛɔ onaa bɔ ni mɛi srɔtoi ni awie amɛhe lɛ nu he amɛhã.

Wolo nɛɛ hãa wɔnaa akɛ, mɛi ashihilɛ he sane titri ni yɔɔ Biblia lɛ mli. Mɛi nɛɛ ateŋ mɛi komɛi bo Yehowa toi, shi amɛteŋ mɛi komɛi hu booo lɛ toi. Wolo lɛ yeɔ ebuaa wɔ koni wɔkase nii kɛjɛ mɛi srɔtoi nɛɛ ahe saji ni aŋmala lɛ amli. (Romabii 15:4; 1 Korintobii 10:6) Wolo nɛɛ hiɛ fãi 14. Yɛ fãi lɛ eko fɛɛ eko shishijee lɛ, atsɔɔ nibii ni wɔbaanyɛ wɔkase yɛ mli lɛ ekomɛi.

Kɛ́ fɔlɔ ji bo lɛ, obaanyɛ okɛ obi lɛ akane nikasemɔ lɛ eko ni nyɛgba mfonirii ni yɔɔ mli lɛ ahe sane. No sɛɛ lɛ, obaanyɛ okɛ lɛ afee ekome ni nyɛkane ŋmalɛi ni nikasemɔ lɛ damɔ nɔ lɛ. Ye obua obi lɛ ni ena akɛ, nibii ni nyɛkase lɛ fɛɛ damɔ Biblia lɛ nɔ. Nakai nɔŋŋ obaanyɛ ofee kɛ́ okɛ mɔ ko ni eda ni miitao ale Biblia lɛ he sane lɛ miigba sane.

Wɔsɔlemɔ ji akɛ, wolo nɛɛ baaye abua mɛi fɛɛ ni yɔɔ tsui krɔŋŋ lɛ, onukpai jio, gbekɛbii jio, ni amɛkase nii kɛjɛ Nyɔŋmɔ Wiemɔ lɛ mli ni amɛkɛtsu nii yɛ amɛshihilɛ mli. Enɛ ni amɛbaafee lɛ baahã amɛbafata Yehowa weku ni esumɔɔ waa lɛ he, ní amɛkɛ emli bii lɛ afee ekome kɛjá lɛ.