Kasemɔ Amɛhemɔkɛyeli Lɛ
1. Kɛjɛ October 19 otsi lɛ mli kɛyaa lɛ, mɛɛ wolo wɔbaakase yɛ Asafoŋ Biblia Nikasemɔ lɛ shishi?
1 Kɛjɛ October 19, 2015 otsi lɛ mli kɛyaa lɛ, wɔbaakase wolo ni ji Kasemɔ Amɛhemɔkɛyeli Lɛ yɛ Asafoŋ Biblia Nikasemɔ lɛ shishi. Wolo nɛɛ gbaa wɔ hii kɛ yei ni atsĩtsĩi amɛtã yɛ Biblia lɛ mli ni jie hemɔkɛyeli kpo lɛ ateŋ 14 ahe saji. Aŋmala mɛi nɛɛ ahe saji yɛ gbɛ ni baahã wɔfee amɛhe mfoniri yɛ wɔjwɛŋmɔ mli, ni eyeɔ ebuaa wɔ ni wɔnaa akɛ mɛi nɛɛ hi shi lɛɛlɛŋ, ni amɛkɛ naagbai kpe be ni amɛsɔmɔɔ Yehowa lɛ. Wolo lɛ hu tsɔɔ wɔ nibii ni wɔbaanyɛ wɔkase kɛjɛ amɛhe saji lɛ amli koni wɔna bɔ ni wɔɔfee wɔkase amɛ ŋmɛnɛ.—Heb. 6:12.
2. Tsɔɔmɔ nibii komɛi ni yɔɔ Kasemɔ Amɛhemɔkɛyeli Lɛ wolo lɛ mli.
2 Nibii ni Yɔɔ Mli: Map yɛ wolo lɛ mli ni hãa wɔnaa hei ni mɛi ni aŋmala amɛhe saji lɛ ateŋ mɔ fɛɛ mɔ hi, ni yɛ map lɛ shishi hu lɛ atsɔɔ bei ni amɛteŋ mɔ fɛɛ mɔ hi shi. Kɛfata he lɛ, akrabratsa ko ni yitso ji “Sanebimɔi Kɛhã Enɔ Jwɛŋmɔ . . .” yɛ wolo lɛ mli yitso fɛɛ yitso mli, ni enɛ baaye abua wɔ koni wɔjwɛŋ saji lɛ anɔ, ní wɔkɛ nibii ni wɔbaakase yɛ mli lɛ atsu nii. Atao nii amli jogbaŋŋ, ni adamɔ no nɔ atɛŋ mfonirii fɛfɛji yɛ wolo lɛ mli koni eye ebua wɔ ni wɔfee saji lɛ ahe mfoniri yɛ wɔjwɛŋmɔ mli.
3. Mɛni wɔbaanyɛ wɔfee koni wɔná wolo nɛɛ kasemɔ he sɛɛ jogbaŋŋ?
3 Bɔ ni Ooofee Oná Hesɛɛ: Yɛ wolo ni Gbɛtsɔɔmɔ Kuu lɛ ŋma kɛkpa wolo lɛ hiɛ lɛ mli lɛ, akɛ wiemɔi nɛɛ wo wɔ ŋaa akɛ: “Feemɔ nibii ni okaneɔ lɛ ahe mfoniri yɛ ojwɛŋmɔŋ; feemɔ onii tamɔ oyɛ jɛmɛ ni nibii lɛ ba. Bɔɔ mɔdɛŋ ni onu nii ahe tamɔ mɛi ni Biblia lɛ wie amɛhe lɛ nu he lɛ, ni ona nibii hu ni amɛna lɛ. Okɛ bɔ ni amɛfee amɛnii yɛ shihilɛi komɛi ni ba lɛ ahe lɛ ato bɔ ni kulɛ obaafee onii oha lɛ he.” Kɛ́ akɛɛ wɔfee nibii ni wɔkaneɔ lɛ ahe mfoniri yɛ wɔjwɛŋmɔ mli lɛ, no etsɔɔɔ akɛ wɔbaaka wɔyiŋ wɔfee nibii ni nɔmimaa bɛ he lɛ ahe mfoniri, moŋ lɛ, esa akɛ wɔfee saji ni ŋmalɛ lɛ wie yɛ amɛhe lɛ ahe mfoniri, ni wɔkɛ wɔhe awo amɛshihilɛi hu amli. Enɛ biɔ ni wɔná be kɛkane wolo lɛ, ni wɔjwɛŋ nibii ni wɔkaneɔ lɛ anɔ. (Neh. 8:8) Kɛ́ nikasemɔ lɛ eko baaje shishi yɛ yitso ko teŋ lɛ, esa akɛ nɔkwɛlɔ lɛ kɛ sɛkɛnsii 30 kɛmiimɔ 60 atĩ otii ni je kpo yɛ otsi ni tsɔ hiɛ lɛ mli lɛ mli. Kɛ́ fã ni ji, “Sanebimɔi Kɛhã Enɔ Jwɛŋmɔ . . .” lɛ fataaa nɔ ni abaakase lɛ he lɛ, abaanyɛ abi sane kome loo enyɔ kɛmu nikasemɔ lɛ naa.
4. Mɛni hewɔ ehe hiaa akɛ wɔkase wolo ni ji Kasemɔ Amɛhemɔkɛyeli Lɛ?
4 Wɔkɛ shihilɛi ni baanyɛ afite wɔhemɔkɛyeli lɛ loo egbɔjɔ lɛ lɛ kpeɔ daa gbi. Adamɔ saji komɛi ni jeɔ kpo yɛ Buu-Mɔɔ lɛ mli daa nyɔji etɛ lɛ nɔ afee wolo nɛɛ. Wolo nɛɛ kɛ nakai saji ni jeɔ kpo yɛ Buu-Mɔɔ lɛ mli lɛ ji nikeenii ni jɛ Yehowa dɛŋ ní ekɛyeɔ ebuaa wɔ koni wɔhemɔkɛyeli lɛ mli awa. (Yak. 1:17) Nyɛhãa wɔbɔa mɔdɛŋ wɔhia Asafoŋ Biblia Nikasemɔ lɛ shishi daa, ni wɔbɔ mɔdɛŋ wɔhã saji ahetoo bɔ ni be baaŋmɛ wɔ gbɛ koni wɔná nikeenii nɛɛ he sɛɛ!