KƐ́ OYAAJE SANEGBAA SHISHI
NIKASEMƆ 6
Kaahã Gbeyei Mɔ Bo
Shishitoo mla: “Nyɔŋmɔ hãaa wɔ gbeyeishemɔ mumɔ.”—2 Tim. 1:7.
Nɔ Ni Yesu Fee
1. Kwɛmɔ VIDIO lɛ, loo kanemɔ Luka 19:1-7. No sɛɛ lɛ, susumɔ sanebimɔi ni nyiɛ sɛɛ nɛɛ ahe:
Mɛni hewɔ ekolɛ mɛi komɛi baashe gbeyei akɛ amɛbaabɛŋkɛ Zakeo lɛ?
Mɛni tsirɛ Yesu ni fɛɛ sɛɛ lɛ, eshiɛ sane kpakpa lɛ ehã lɛ lɛ?
Mɛni Wɔkaseɔ Yɛ Nɔ Ni Yesu Fee Lɛ Mli?
2. Kɛ́ wɔhã gbeyei mɔ wɔ lɛ, wɔnyɛŋ wɔshiɛ Maŋtsɛyeli lɛ he sane lɛ wɔtsɔɔ mɔ fɛɛ mɔ.
Kasemɔ Yesu
3. Okɛ ohiɛ afɔ̃ Yehowa nɔ. Nyɔŋmɔ mumɔ lɛ ye ebua Yesu ni enyɛ eshiɛ, ni ebaanyɛ eye ebua bo hu. (Mat. 10:19, 20; Luka 4:18) Bi Yehowa ni ehã ofee ekãa ni oshiɛ otsɔɔ mɛi ni osheɔ gbeyei akɛ obaashiɛ otsɔɔ lɛ.—Bɔf. 4:29.
4. Kaamu sane naa oya akɛ mɔ lɛ boŋ bo toi. Ekolɛ bɔ ni onaa mɔ lɛ ohãa, hegbɛ ni mɔ lɛ yɔɔ, niiatsɛ ni eji, jeŋba mli ni eyɔɔ, loo jamɔ mli ni eyɔɔ lɛ baahã gbeyei amɔ bo akɛ obaashiɛ ohã lɛ. Shi kaimɔ akɛ:
Yehowa kɛ Yesu nyɛɔ amɛnaa mɔ ko tsui mli; shi wɔ lɛ, wɔnyɛɛɛ wɔna mɔ ko tsui mli.
Yehowa baanyɛ eye ebua mɔ ko ni etsake.
5. Feemɔ ekãa, wiemɔ yɛ bulɛ mli, ni okwɛ ohe nɔ jogbaŋŋ. (Mat. 10:16) Okɛ mɔ lɛ akataa saji anaa. Kɛ́ ona akɛ mɔ lɛ nyaaa sane lɛ he loo owala yɛ oshãra mli lɛ, jɛɛ bulɛ mli ofo sanegbaa lɛ sɛɛ ni oshi.—Abɛi 17:14.