Ani Mose Yeee Ewiemɔ Nɔ?

HAOMƆ ni ji nɛɛhu lɛ​—duŋ kpii ni ba gbii etɛ sɔŋŋ​—sɛɛ lɛ, Farao kɛɛ Mose akɛ: “Jee minɔ ni oya! Kwɛ ohe ni ahi, ni okaba mihiɛ dɔŋŋ; shi gbi nɔ ni ooona mihiɛ lɛ, ooogbo.” (2 Mose 10:28) Bɔni 2 Mose 10:29 tsɔɔ lɛ, Mose ha hetoo akɛ:

“Ojogbaŋŋ; mibaŋ ohiɛ dɔŋŋ!”

Shi yɛ yitso ni tsa nɔ yɛ Mose wolo ni ji enyɔ lɛ mli kukuji 4 kɛyashi 8 lɛ mli lɛ, wɔkaneɔ amanehulu ni ji 10 ni Mose kɛ Farao wieɔ he Iɛ he sane. Ani Mose kpale yɛ ewiemɔ lɛ sɛɛ? Dabi, jeee nakai sane lɛ ji. Eka shi faŋŋ akɛ esani wɔbu Mose wolo ni ji enyɔ 11:​1-3 lɛ akɛ enɔtsamɔ. Nohewɔ lɛ beni Mose kɛɛ akɛ: “mibaŋ ohiɛ dɔŋŋ” lɛ, ekpaaa wiemɔ, shi ekɛ amanehulu ni ji 10 lɛ hu he sane tsa nɔ. Agbɛnɛ tamɔ bɔni nɔni aŋma afɔ shi lɛ tsɔɔ lɛ, Mose “kɛ mlila je Farao ŋɔɔ kɛtee.”​—2 Mose 11:⁠8.

Akɛni Mose le akɛ amanehulu ni ji 10 lɛ baafee naagbeenɔ̃ hewɔ lɛ, enyɛ ekɛɛ Farao akɛ ekaaa akɛ eeeba ehiɛ dɔŋŋ. Kɛ jeee nakai kulɛ, ebaafee nɔni ejaaa akɛ Mose aaakpɛlɛ nɔ ko ni ekolɛ ekɛ Yehowa suɔmɔnaanii kpaaa gbee lɛ nɔ. Wiemɔ ni jeɔ kpo yɛ Mose wolo ni ji enyɔ 11:​1-3 lɛ feɔlɛ faŋŋ akɛ Mose le akɛ amanehulu ni ji 10 lɛ baafee naagbeenɔ̃, ni nakai wiemɔ lɛ hu ha Israelbii lɛ le nɔni sa akɛ amɛfee yɛ be mli ni nakai amanehulu lɛ eba Mizraimbii lɛ anɔ lɛ.​—Kɛ 2 Mose 11:​2, 3 ato 2 Mose 12:​35, 36 he.

Bɔni nibii balɛ naa lɛ, Farao tsu ni ayatsɛ Mose kɛ Aaron kɛba. Beni amanehulu ni ji 10 lɛ eha gbeyei amɔlɛ lɛ, Farao kɛɛ amɛ akɛ: “Nyɛtea shi nyɛjea mimaŋbii lɛ ateŋ nyɛyaa, nyɛ kɛ Israelbii lɛ, ni nyɛyasɔmɔa Yehowa, taakɛ bɔni nyɛkɛɛ lɛ. Ni asaŋ nyɛŋɔa nyɛtooi kɛ nyɛtsinai lɛ hu kɛyaa, taakɛ bɔni nyɛkɛɛ lɛ; ni nyɛjɔɔa mi hu.” (2 Mose 12:​31, 32) Mɛɛ tsakemɔ po nɛ! Farao ni kɛɛ Mose akɛ ebaagbo lɛ miibi akɛ ejɔɔlɛ. Kulɛ esumɔɔɔ ni Israelbii lɛ ashi Mizraim ni yɔɔ loomɔ shishi ni ataoɔ akɛ haomɔ kroko aba enɔ lɛ.