Adesai Ni AFee Amɛ Ekome—Nɔ Ni Ebaatsɔɔ
“EKƆƆƆ he eko akɛ oji Hindunyo loo Katoleknyo, Yudanyo loo
1 Lutherannyo, Quakernyo, Buddhanyo, Amishnyo aloo Mormonnyo, kɛ wɔkɛ hetuu-kɛ-hamɔ kɛ hiɛdɔɔ babaoo wo mli akɛ wɔɔha miishɛɛ kpele ahi Shikpɔŋ lɛ diɛŋtsɛ nɔ tamɔ bɔ ni wɔmiaa wɔhiɛ ni wɔsa shihilɛ yɛ gbele sɛɛ lɛ, bo lɛ susumɔ je ni mli tse keŋkeŋ, ni awoko mli muji ni yɔɔ fɛo ni wɔbaahi shi yɛ mli lɛ he okwɛ.”
2 Nɛkɛ wiemɔi nɛɛ ji nɔ ni Amerika niŋmalɔ Mel Ellis kɛtsɔɔ nɔ ni mɛi babaoo shweɔ ŋmɛnɛ lɛ mli. Amɛmiitao je fɛfɛo mli amɛhi. Shi kɛlɛ amɛkã he amɛhiɛ amɛjamɔŋ, maŋkwramɔŋ, niiahelɛtemɔ gbɛjianɔtooi kɛ agwaseiaŋ shihilɛ he nibii ni gbalaa amɛmli lɛ mli—nibii pɔtɛɛ ni kɛ nyɛ̃ɛ, béi kɛ lashishwiemɔ babaoo eba yɛ yinɔsane mli lɛ.
3 Agbɛnɛ, abaanyɛ atsake shikpɔŋ lɛ waa kɛji akɛ gbɔmɛi lɛ fee ekome yɛ yiŋtoo mli. Nɔ ko ni baajɛ mli aba oya nɔŋŋ ji akɛ tai asɛɛ baafo. Kɛkɛ lɛ wiemɔi tamɔ “tawuu nibii afeemɔ he akaŋshii” kɛ “nuklea tawuu nii anaabuamɔ” lɛ baafee tsutsu nii. Ni adesa gbɔmɔtsei ni ejejee kpai kɛ jwɛŋmɔi afitemɔ yɛ ta mli lɛ baŋ dɔŋŋ. Wekui atsuii kumɔŋ dɔŋŋ yɛ amɛsuɔlɔi ni egboi yɛ ta mli lɛ hewɔ.
4 Shika ni afiteɔ yɛ tawuu nii kɛ esraafoi asaamɔ he bianɛ lɛ naa yashɛɔ Amerika dɔla akpekpei toi akpekpei 800 daa afi. Kɛji akɛ atuu enɛ fɛɛ aha ni akɛdi nibii ni kɛ toiŋjɔlɛ baa sɛɛ lɛ, mɛɛ tsakemɔ baaba nɛkɛ yɛ ŋmɛnɛŋmɛnɛ shihilɛi ni etɔ fa nɛɛ po mli! Susumɔ shiai ni he hiaa, helatsamɔ hei, nikasemɔ hei, nibii ni he hiaa titri kɛha falefalefeemɔ, nui ni mli tse kɛ nibii krokomɛi ni abaanyɛ akɛha lɛ he okwɛ. Ni enɛ fɛɛ kɛ nitsumɔ baaba oya aha mɛi ni feɔ nibii kɛhaa adesai asɛɛnamɔ lɛ. Kɛji akɛ adesa weku muu lɛ fɛɛ hu fee ekome kɛtsu nɔ ni hi kɛha mɛi fɛɛ ahe nii lɛ, niyenii baabu aha mɛi fɛɛ. Franse adafitswaa wolo ŋmalɔ André Fontaine jaje akɛ: “Nii ni fa yɛ kɛha mɔ fɛɛ mɔ kɛji akɛ wɔkɛbaatsu nii ni adesai ana he sɛɛ kɛkɛ.”
5 No hewɔ lɛ susumɔ nɔ ni adesa weku ni efee ekome lɛ baatsɔɔ lɛ he okwɛ. Ebaatsɔɔ yelikɛfuamɔ ni suɔmɔ yɔɔ mli yɛ akaŋshii ni yɔɔ gbeyei najiaŋ; mɔhedɔɔ yɛ hetsɛ̃ folo najiaŋ; toiŋjɔlɛ ni tswaa mɛi emaa shi yɛ awuyeli ni jwɛŋmɔ bɛ mli najiaŋ; mɔ kɛ mɔ teŋ bulɛ ni feɔ mɛi ekome yɛ maŋhedɔɔ ni gbalaa mɛi ateŋ najiaŋ.
Shi te aaafee tɛŋŋ ni atsu tsakemɔi ni tamɔ nɛkɛ he nii? Yɛ anɔkwale mli lɛ esa akɛ amɛje shishi yɛ gbɔmɛi ajwɛŋmɔi amli. Ni bɔni afee ni atsake jwɛŋmɔ lɛ, esa akɛ atsake jeŋba kɛ mumɔŋ tsɔsemɔ lɛ kwraa koni adesa aye ehe kɛjɛ hewalɛi ni gbalaa mɛi amli lɛ fɛɛ ahe. Shi nɛgbɛ obaana nɛkɛ tsɔsemɔ ni feɔ mɛi ekome nɛɛ kɛbaajɛ? Ani kɛbaajɛ je nɛŋ maŋkwramɔŋ, niiahelɛtemɔ, jamɔŋ aloo tsɔsemɔ gbɛjianɔtooi lɛ amli?
6 Biblia lɛ kɛ hetoo ni yɔɔ faŋŋ haa wɔ yɛ gbalɔ Yeremia wiemɔi nɛɛ amli: “Yehowa, mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enajifaamɔi eha Iɛ, ebɛ edɛŋ.”—Yeremia 10:23.
7 Mark Thee, International Peace Research Institute ni yɔɔ Norway lɛ nɔkwɛlɔ lɛ fiɔ nɛkɛ sanenaamuu nɛɛ sɛɛ. Ejaje akɛ: “Nɔ ni kadiɔ majimaji ateŋ shihilɛ ni yɔɔ ŋmɛnɛ lɛ ji tsakemɔ shihilɛ ko ni mli wa ni anaa kɛ hoo lɛ yɛ adesa shihilɛ mli nɔ fɛɛ nɔ mli: niiahelɛtemɔ kɛ agwaseaŋ shihilɛ, maŋkwramɔŋ kɛ asraafoi asaji, mumɔŋ kɛ jeŋba mli. Béi miifa, awuyeli miiya hiɛ ni nɔnyɛɛ ni akɛtsuɔ nii akɛ dɛŋdade yɛ yiŋtooi ahe nitsumɔ kɛ́ maŋ kɛ maŋ teŋ sharamɔ mli lɛ egbɛ eshwa. . . Gbɛ ni ka toiŋjɔlɛ kɛ ta teŋ lɛ he miiba oshara daa nɛɛ.”
8 Belɛ ani ebɛ faŋŋ mɔ akɛ adesai diɛŋtsɛ bɛ́ hetooi lɛ akɛni amɛbɛ ŋaa ni amɛkɛaajaje amɛ diɛŋtsɛ amɛnajifaamɔi kɛha shikpɔŋ kutruku nɛɛ ekomefeemɔ lɛ? Anɔkwale, mɛi komɛi baanu he akɛ aawo sane Iɛ he tsɔ ni akɛ adesai diɛŋtsɛ baatsɔ amɛgbɛ nɔ ni amɛkɛ ekomefeemɔ aba gbi ko. Shi kɛlɛ, mɛni ji nɔ ni saji ni aŋmala ashwie shi lɛ tsɔɔ? Ani ehaa wɔ nɔ ko ni wɔɔdamɔ nɔ wɔna hiɛnɔkamɔ akɛ je nɛɛ mli nibii lɛ eko loo ekomɛi baanyɛ afee hewalɛ nɔ kɛha jeŋ ekomefeemɔi? Kɛ jeee nakai lɛ, mɛni baanyɛ afee?
[Mfoniri ni yɔɔ baafa 4]
Susumɔ nɔ ni abaanyɛ afee bianɛ po Iɛ he kɛji akɛ akɛ shika fɛɛ ni afiteɔ yɛ tawuu nii ahe lɛ tsu nii kɛma toiŋjɔlɛ je ko lɛ!