Hemɔkɛyeli Diɛŋtsɛ He Wolo
BIBLIA lɛ jeee ŋwanejee wolo, shi moŋ hemɔkɛyeli wolo. Eteee sanebimɔi tamɔ, Ani Nyɔŋmɔ yɛ? Aloo, Ani Biblia lɛ ji e-Wiemɔ lo? lɛ ashi. Nɔ ni tamɔɔɔ enɛ lɛ, ejeɔ shishi akɛ: “Shishijee mli lɛ Nyɔŋmɔ bɔ.” Ni Biblia lɛ kɛɔ diɛŋtsɛ akɛ: “Ejaakɛ gbalɛ ko bako yɛ gbɔmɔ suɔmɔ naa pɛŋ, shi mumɔ krɔŋkrɔŋ lɛ tsirɛɔ Nyɔŋmɔ gbɔmɛi krɔŋkrɔŋi lɛ ni amɛwieɔ.”—1 Mose 1:1; 2 Petro 1:21.
Yɛ anɔkwale mli lɛ, Biblia lɛ mli wiemɔi pii yɛ kukuji, no hewɔ lɛ Biblia lɛ ekɛŋ wɔ nɔ fɛɛ nɔ ni wɔsumɔɔ ni wɔle yɛ be fɛɛ mli. Shi ekɛ amaniɛbɔɔ ni Nyɔŋmɔ le akɛ ehe baahia wɔ bɔni afee ni wɔnu je lɛ mli haomɔi lɛ ashishi, koni wɔha wɔshihilɛ kɛ esuɔmɔnaa nii akpa gbee ni wɔnine ashɛ eduromɔ kɛ naanɔ wala nikee nii lɛ nɔ haa wɔ. Mɛni baanyɛ afee nɔ ni sɛɛnamɔ yɔɔ he babaoo fe enɛ? Biblia lɛ mli baafai lɛ ashishijee mli tɔɔ wɔkase akɛ ŋwɛibɔfo atuatselɔ ko tswa jeŋ muu fɛɛ nɔyelɔ ni Nyɔŋmɔ ji yɛ gbɛ ni ja nɔ lɛ mpoa. Shi ajie lɛ kpo hu akɛ “seshi” ko baaba ni ekɛ nakai atuatsemɔ lɛ aba naagbee, ni ebu Yehowa Nyɔŋmɔ bem akɛ Je Muu Fɛɛ Maŋtsɛ. (1 Mose 3:1-15; Hiob 1:6-12) Biblia lɛ kɛ wekukpaa ni nakai “seshi” lɛ baatsɔ nɔ aba lɛ ha—kɛtsɔ hii ni yɔɔ hemɔkɛyeli tamɔ Abraham, Isak, Yakob kɛ David nɔ.—1 Mose 26:4, 5; 2 Samuel 7:12, 13; Mateo 1:1-16; Luka 3:23-38.
Nɛkɛ wolo ni yɔɔ naakpɛɛ nɛɛ gbaa wɔ nakai “seshi” lɛ mli mɔ titri, Yesu Kristo, fɔmɔ, eshihilɛ, gbele kɛ gbohiiashitee he sane. Etsɔɔ wɔ bɔ ni Yesu jie eŋwɛi Tsɛ lɛ gbɛi Iɛ kpo, ni ekɛ kpɔmɔ nɔ ha adesai toibolɔi.—Galatabii 3:16; Yohane 17:6-8, 26; Mateo 20:28.
Biblia lɛ wieɔ naanɔ wala hu he, ewieɔ gbohii lɛ ashitee he ni etswaa “ŋwɛi hee kɛ shikpɔŋ hee” ni yɔɔ naakpɛɛ ni “jalɛ hiɔ mli” lɛ he adafi. (2 Petro 3:13; Yohane 3:36; 5:28, 29) Shi, etsɔɔ hu akɛ nɛkɛ naakpɛɛ jɔɔmɔi nɛɛ hu ebɛŋkɛ kwraa, ni akɛ mɛi pii ni yɔɔ wala mli bianɛ lɛ baaje ŋmɛnɛŋmɛnɛ jeŋ naagbai lɛ amli ni amɛyana enɛ!—Mateo 24:3-14, 32-34.
Yibii Lɛ Amli Nɔ Ni Hi Fe Fɛɛ!
Yesu kɛɛ akɛ “tso fɛɛ tso ni ji ekpakpa lɛ woɔ yibii kpakpai.” (Mateo 7:15-20) Hɛɛ, obaanyɛ otsɔ gbɔmɛi ni ja lɛ ayibii ni amɛwoɔ lɛ nɔ oyoo amɛ. Ojogbaŋŋ, Biblia mli tsɔɔmɔi yeɔ buaa gbɔmɛi ni anyɛɔ atsɔɔ amɛ nii lɛ koni amɛwo yibii ni hi fe fɛɛ. Wolo nɛɛ kɛ nilee haa, etswaa hemɔkɛyeli emaa shi, ni ekɛ sanesɛɛkɔmɔ hu haa mɛi. (Yohane 17:3; Abɛi 1:1-4) Ehaa wɔ shishitoo mlai kpakpai ni wɔbaanyɛ wɔdamɔ nɔ wɔto yiŋ ni baasa wɔshihilɛ he.—Romabii 12:2; Kolosebii 3:9, 10.
Agbɛnɛ, Biblia lɛ taa tsuii ahe. Ekanyaa gbɔmɛi ni amɛha amɛshihilɛ kɛ Nyɔŋmɔ gbɛi akpa gbee ni amɛsɔmɔ lɛ. Etsɔɔmɔi lɛ kɛ tsui ni nyɔɔ mɔ mli baa, shihilɛi ni miishɛɛ yɔɔ emli, gbɔmɔtsoŋ hewalɛ, jeŋbai ni nɔ kwɔlɔ kɛ gbalashihilɛ mli hefatalɔi kɛ fɔlɔi kɛ gbekɛbii kpakpai. Mɛi fɛɛ ni amɛkase Ŋmalɛi lɛ ni amɛnyiɛɔ sɛɛ hu lɛ ebatsɔ jeŋ muu fɛɛ nyɛmifeemɔ kuu ko ni yɔɔ suɔmɔ ni kɛ Yesu wiemɔi nɛɛ kpaa gbee: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”—Yohane 13:35.
Sɛɛnamɔ ni yɔɔ Biblia lɛ he lɛ jeɔ kpo yɛ mɛi ni kɛ eshishitoo mlai lɛ tsuɔ nii lɛ ashihilɛi amli daa gbi. Mɛni hewɔ esa akɛ mɔ ko aje emli shiwooi lɛ ahe ŋwane? Taakɛ wɔbaana yɛ sane ni nyiɛ sɛɛ nɛɛ mli lɛ, wɔbaanyɛ wɔdamɔ shi shiŋŋ yɛ hemɔkɛyeli mli, ni wɔjeŋ ŋwane kwraa.