Sanebimɔi ni jɛ Kanelɔi Adɛŋ
◼ Kɛji akɛ Kristofonyo ko nyɛŋ aba Nuŋtsɔ Iɛ Gbɛkɛnaashi Niyenii Iɛ shishi lɛ, mɛni esa okɛ efee?
Ehe miihia ni Kristofoi aya daa afi Nuŋtsɔ lɛ Gbɛkɛnaashi Niyenii lɛ shishi, ejaakɛ Yesu kɛɛ yɛ be mli ni etoɔ enɛ he gbɛjianɔ lɛ akɛ: “Nyɛfea enɛ ni nyɛŋɔkai mi.” (Luka 22:19) Klɛŋklɛŋ Kristofoi lɛ fee nakai. No hewɔ lɛ bɔfo Paulo baanyɛ aŋma yɛ Korinto nyɛmimɛi lɛ ni yeɔ daa efi ‘akɛ asafo’ ‘aloo amɛkpeɔ kutuu’ kɛhaa Yesu afɔleshaa gbele lɛ Kaimɔ lɛ yeli lɛ ahe. (1 Korintobii 11:20, The New English Bible; NW) Shi mɛni ji nɔ ni kulɛ amɛbaanyɛ amɛfee yɛ Kaimɔ lɛ he yɛ jaramɔ bei amli? Akɛ nɔkwɛmɔ nɔ lɛ, mɛni ji nɔ ni Paulo diɛŋtsɛ fee yɛ afii ni awo lɛ tsuŋ (ni eyɔɔ buu shishi loo ekolɛ awo lɛ kɔsɔŋkɔsɔ) yɛ Kaisarea lɛ?—Bɔfoi lɛ Asaji 23:35; 24:26, 27.
Yɛ bɔ ni Yesu famɔ lɛ mli ka shi faŋŋ hewɔ lɛ, kɛji akɛ Paulo eyaje he ko banee yɛ Nuŋtsɔ lɛ gbɛkɛnaashi Niyenii lɛ be lɛ mli lɛ, ebaati Ŋmalɛi ni kɔɔ nii ni ba nɛɛ he lɛ mli. Akɛni eji Kristofonyo ni akɛ mumɔ efɔ lɛ mu hewɔ lɛ, ebaabɔ mɔdɛŋ fɛɛ ni eeenyɛ koni ekɛ nibii ni sa ni enine aaashɛ nɔ lɛ atsu nii kɛha Kaimɔ lɛ. Wein ji daa ko ni esɛ̃ɛɛ he, no hewɔ lɛ yɛ gboklɛfonyo ni eji lɛ fɛɛ sɛɛ lɛ, Paulo baanyɛ ana wein ko kɛ aboloo ko hu ni ekɛtsu nii. Ebaanyɛ efee nakai babaoo po yɛ be mli ni awo lɛ tsuŋ yɛ Roma, he ni aŋmɛ lɛ gbɛ koni mɛi krokomɛi abasra lɛ yɛ lɛ. Ekolɛ nyɛmimɛi ni jɛ Roma lɛ bɔ mɔdɛŋ koni ‘amɛba enɔɔ akɛ kuu’ koni amɛkɛ lɛ abaye Nuŋtsɔ lɛ gbɛkɛnaashi Niyenii lɛ.—Bɔfoi lɛ Asaji 28:30.
Ŋmɛnɛ, Yehowa Odasefoi ni yɔɔ shikpɔŋ lɛ nɔ he fɛɛ he lɛ kpeɔ yɛ be ni kɛ Nisan 14 yeɔ egbɔ lɛ nɔ, koni amɛye Kristo gbele lɛ Kaimɔ lɛ. Shi yɛ bei komɛi amli lɛ gbɛtsii nii komɛi ni ekaaa teɔ shi. Be yɛ ni ahum tswaa ni mi afuai ni baa tsiɔ asafo lɛ naa aloo emlibii lɛ ekomɛi anaa ni amɛnyɛɛɛ amɛkpe taakɛ ato he gbɛjianɔ lɛ. Hei fioo ko yɛ ni asraafoi anɔyeli mla akɛtsuɔ nii yɛ jɛmɛ ni asraafoi ni hiɛ tawuu nii tsiɔ maŋbii agbɛ koni amɛkaje kpo gbɛkɛ. Kristofoi krokomɛi nyɛɛɛ ni amɛkɛ asafo lɛ akpe kɛ a nɛkɛ gbi jurɔ nɛɛ yeli yɛ helatsamɔ hei ni amɛkamɔ aloo akɛni amɛhe miiye waa hewɔ. Mɛni abaanyɛ afee yɛ shihilɛi ni tamɔ nɛkɛ mli?
Yɛ be mli ni esa akɛ asafo muu lɛ fɛɛ kpeɔ yɛ ekomefeemɔ mli kɛha nɛkɛ nifeemɔ ni he hiaa nɛɛ, shihilɛi komɛi tamɔ nɔ ni atsi ta yɛ yiteŋgbɛ nɛɛ haŋ anyɛ afee anyɛ afee nakai. Kɛji akɛ kɔɔyɔŋ tsakemɔ ni ehiii kwraa eloo adebɔɔ mli oshara ko ba ni etsi weku loo esafo muu lɛ fã naa ni amɛnyɛɛɛ amɛkɛ asafoŋ bii krokomɛi ni eshwɛ lɛ akpe lɛ, mɛi ni nibii etsi amɛ bɛ nɛɛ baanyɛ ekpe ni amɛsusu ŋmalɛi ni kɔɔ enɛ he, tamɔ nɔ ni anaa yɛ Luka 22:7-23, 28-30 kɛ 1 Korintobii 11:20-31 lɛ he kɛ agbɛnɛ nɔ ni nakai he lɛ tsɔɔ lɛ he susumɔ ni amɛbaana. Nakai nɔŋŋ hu kɛji akɛ mla ko ni awo eŋmɛɛɛ gbɛ ni asafo lɛ akpe kutuu kɛha nakai gbɛkɛ ni sa lɛ, kpeei yɛ Asafo Woloŋ Nikasemɔ kui emli eloo akutseiaŋ kui baanyɛ afee nɔ ni fe fɛɛ ni amɛbaanyɛ, ni kɛ ebua nɛkɛ kui bibii nɛɛ anaa lɛ, abaanyɛ abu naa ákɛ mɛi ni ba Kaimɔ lɛ shishi yɛ asafo lɛ mli. Abaa nyɛ aha wiemɔ kuku kɛji akɛ nyɛminuu ko ni sa ni ejɔɔ ehe nɔ yɛ kuu lɛ mli. Ehe ehiaaa ni agba he naa tsɔ akɛ anaaa aboloo aloo wein ni sa koni akɛfee enɛ yɛ bei abɔ ni mɔ ko bɛ hei ni oshara eba yɛ nɛɛ ni yeɔ aboloo lɛ eko ni enuɔ wein lɛ eko yɛ tsutsu akɛ Kristofonyo ni afɔ lɛ mu lɛ.
Nyɔmɔ mla ni ekɛha Israel lɛ yɛ gbɛjianɔtoo krɛdɛɛ ko kɛha mɔ ni nyɛŋ aye Hehoo lɛ yɛ gbi ni ayeɔ lɛ nɔ; nakai mɔ aŋkro lɛ baanyɛ afee nakai yɛ nyɔŋ kome (gbii 30) sɛɛ. (4 Mose 9:10, 11; 2 Kronika 30:1-3, 15)Kɛ akɛto he lɛ, yɛ shihilɛi ni mli wa waa shishi lɛ, mumɔŋ Israelnyo ni nyɛŋ aya ni eyaye niyenii nɛɛ eko yɛ Nisan 14 lɛ baanyɛ aye kɛ nuu loo yoo yɛ gbii 30 sɛɛ. Enɛ baaka Kristofonyo ni afɔ lɛ mu ni eyɔɔ famɔ akɛ eye aboloo lɛ ni enu wein lɛ eko lɛ pɛ he.—Galatabii 6:16.
Yɛ April 4, 1985, yɛ be mli ni hulu enyɔ shi lɛ sɛɛ lɛ, anɔkwale Kristofoi asafoi ni yɔɔ je lɛŋ he fɛɛ he lɛ baabua amɛhe naa yɛ Yesu famɔ nɛɛ toiboo mli: “Nyɛfea enɛ ni nyɛŋɔkai mi.” Wɔmiifɔ bo nine ni okɛ amɛ akpe.—1 Korintobii 11:25.
MARCH Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)