Bɔ ni Ooofee Ona Ŋwɛi Toiŋjɔlɛ ni Mɔɔ Shi Babaoo
“Oo eji ooobo mikitai otoi kulɛ otoiŋjɔlɛ aaatamɔ faa, ojalɛ hu aaatamɔ ŋshɔkei.”—YESAIA 48 :18, New World Translation
1. Mɛni he hiaa kɛji akɛ wɔɔna toiŋjɔlɛ babaoo mli ŋɔɔmɔ kɛmɔ shi?
MƐI ni kɛ asafo lɛ kaseɔ Biblia lɛ kɛtsɔɔ nɛkɛ wolo tɛtrɛɛ nɛɛ yelikɛbuamɔ nɔ lɛ yɔseɔ bɔ ni jata ni toiŋjɔlɛ ni Nyɔŋmɔ kɛhaa lɛ jara wa ha lɛ, ni amɛmiisumɔ nakai toiŋjɔlɛ lɛ. Ŋwanejee ko bɛ he akɛ amɛteŋ mɛi ni fa ji mɛi ni naa mli ŋɔɔmɔ. Shi jeee mɔ fɛɛ mɔ naa mli ŋɔɔmɔ babaoo bɔ ni sa. Mɛni hewɔ? Yehowa kɛɔ yɛ mɛi ni baana ŋwɛi toiŋjɔlɛ lɛ he akɛ: “Bɔ ni Yehowa, okpɔlɔ lɛ kɛ Israel mɔ krɔŋkrɔŋ lɛ kɛɛ nɛ: Miji Yehowa, o-Nyɔŋmɔ lɛ, mɔ ni tsɔɔ bo nii ni hi hao, mɔ ni tsɔɔ bo gbɛ ni otsɔ nɔ lɛ. Eji ooobo mikitai lɛ atoi kulɛ, otoiŋjɔlɛ aaatamɔ faa ni Ojalɛ hu aaatamɔ ŋshɔkei.”—Yesaia 48:17,18.
2. (a) Wiemɔ ‘boɔ toi’ lɛ tsɔɔ mɛni? (b) Nyɔŋmɔ kitai lɛ enyiɛ esa akɛ wɔbo toi? (1 Yohane 5 : 3)
2 Eka shi faŋŋ akɛ mɔ fɛɛ mɔ baanyɛ ana kpeei ni ayaa ni wɔsusuɔ Biblia lɛ he yɛ jɛmɛ lɛ he sɛɛ. Shi mɛi ni feɔ toiboo amɛhaa Yehowa kitai lɛ, ni amɛkɛtsuɔ nii yɛ amɛshihilɛ mli ni amɛhiɔ shi yɛ naa lɛ pɛ naa ŋwɛi toiŋjɔlɛ mli ŋɔɔmɔ diɛŋtsɛ. Ani hei komɛi yɛ ni ehe baahia ni ofee enɛ jogbaŋŋ yɛ? (2 Petro 1:2) Akɛ wɔɔbo Nyɔŋmɔ taomɔ nii fioo ko lɛ atoi ni agbɛnɛ wɔtsi wɔhe kɛjɛ nɔ ni wɔnaa akɛ ehiii haaa wɔ aloo enɔyeli wa kɛha wɔ lɛ ahe lɛ pɛ kɛkɛ faaa. Beni Abonsam bɔ mɔdɛŋ ni elaka Yesu Kristo kɛya epɛsɛmkunya susumɔ lɛ he lɛ, Yesu fee shiŋŋ ni ekɛha lɛ hetoo nɛkɛ: “Aŋma akɛ: ‘Jeee aboloo kɛkɛ haa mɔ yi naa wala; shi moŋ wiemɔ fɛɛ wiemɔ ni jɛɔ Nyɔŋmɔ daaŋ lɛ.’”—Mateo 4:4.
3. Kɛji akɛ wɔɔna toiŋjɔlɛ babaoo diɛŋtsɛ lɛ, belɛ wɔshihilɛ mli mɛni esa akɛ wɔha ekɛ Nyɔŋmɔ gbɛi akpa gbee lɛ?
3 Nyɔŋmɔ kitai lɛ saa wɔshihilɛ mli nibii fɛɛ he. Klɛŋklɛŋ kwraa lɛ, amɛkɔɔ wekukpaa ni ka wɔkɛ Yehowa tɛŋ lɛ he. Agbɛnɛ hu amɛnaa bɔ ni wɔsusuɔ aloo wɔjwɛŋɔ egbɛjianɔtoo ni anaa lɛ kɛ Kristofoi asɔɔmɔ nitsumɔ lɛ he, bɔ ni wɔkɛ wɔweku lɛ mli bii lɛ yeɔ haa, kɛ bɔ ni wɔkɛ gbɔmɛi ni yɔɔ je lɛŋ Iɛ yeɔ haa lɛ nɔ hewalɛ. Mɛi ni kɛ hiɛdɔɔ boɔ Yehowa kitai atoi yɛ nɛkɛ saji nɛɛ fɛɛ mli lɛ ji mɛi ni akɛ toiŋjɔlɛ babaoo ejɔɔ amɛ. Nyɛhaa wɔsusua nibii fioo ko ni baaye abuɔ wɔ koni wɔ diɛŋtsɛ lɛ wɔnine ashɛ enɛ nɔ lɛ he.
Ani Ehe Miihia Ni Osusu Saji Nɛɛ Ekomɛi Ahe?
4. (a.) Mɛni hewɔ Biblia mli nikasemɔ ni wɔyɔɔ aloo Maŋtsɛyeli Asa lɛ nɔ ni wɔɔya lɛ etsɔɔɔ akɛ belɛ toiŋjɔlɛ ka wɔkɛ Nyɔŋmɔ teŋ lɛ? (b) Mɛni fata Yesu Kristo mli hemɔkɛyeli ni wɔɔna lɛ he?(Yohane 3:36)
4 Ani oje shishi okɛ Yehowa Odasefoi miikase Biblia lɛ nyɛsɛɛ nɛɛ? Aloo okɛ ohe ebɔ asafo lɛ he nyɔji aloo afii babaoo po nɛ? Kɛji nakai ni lɛ, belɛ ŋwanejee ko bɛ he akɛ ona miishɛɛ yɛ Nyɔŋmɔ yiŋtoi ni agbele nɔ atsɔɔ bo yɛ Biblia lɛ mli lɛ ahe nilee ni ona lɛ hewɔ. Shi yɛ anɔkwale ni eji akɛ mɔ ko naa Biblia lɛ kasemɔ mli ŋɔɔmɔ aloo enaa miishɛɛ yɛ Maŋtsɛyeli Asa lɛ nɔ ni eyaa lɛ etsɔɔɔ akɛ toiŋjɔlɛ ka ekɛ Nyɔŋmɔ teŋ. Afɔ wɔ fɛɛ yɛ esha mli, ni toiŋjɔlɛ baanyɛ aba wɔkɛ Nyɔŋmɔ teŋ kɛtsɔ Yesu Kristo nɔ. (Yesaia 53:5; Bɔfoi lɛ Asaji 10:36) Yesu mli hemɔkɛyeli fioo ko ni hoɔ kɛkɛ lɛ nyɛŋ ekɛ nakai toiŋjɔlɛ lɛ aba. Ehe miihia ni wɔ diɛŋtsɛ lɛ wɔyoo bɔ ni kpɔmɔ nɔ lɛ he hiaa wɔ lɛ, ni wɔna hemɔkɛyeli yɛ Yesu afɔleshaa lɛ jara lɛ mli, koni wɔye nakai hemɔkɛyeli lɛ he odase kɛtsɔ ekitai lɛ atoi ni wɔɔbo lɛ nɔ. (Yakobo 2:26) Kitai ni Yesu kɛha yɛ be mli ni eyɔɔ shikpɔŋ nɔ lɛ ateŋ ekome ji akɛ esa akɛ abaptisi mɛi ni batsɔmɔɔ ekaselɔi lɛ yɛ nu mli (Mateo 28: 19, 20) Ani abaptisi bo yɛ nu mli okɛfee ohenɔjɔɔmɔ kɛha Yehowa kɛtsɔ Yesu nɔ lɛ he okadi?
5. Mɛni hewɔ henɔjɔɔmɔ kɛ baptisimɔ he hiaa kɛha toiŋjɔlɛ ni aaaba wɔkɛ Nyɔŋmɔ teŋ lɛ?
5 Ani nɔ ko yɛ oshihilɛ mli ni haaa anyɛ abaptisi bo? Kɛji akɛ ole akɛ nɔ ko yɛ, aloo yɛ onikasemɔ lɛ mli lɛ, óyoo akɛ nɛkɛ ji bɔ ni sane lɛ ji lɛ, kaashashao shi yɛ saji ni ooojaje amɛ lɛ mli. Kaimɔ akɛ subaŋ fɛɛ subaŋ loo jeŋba ni haŋ mɔ ko afee mɔ ni sa kɛha baptisimɔ lɛ hu baanyɛ atsi lɛ gbɛ koni toiŋjɔlɛ akaba ekɛ Nyɔŋmɔ teŋ. No hewɔ lɛ, beni be yɔɔ lolo lɛ, okɛ hehiamɔ atsu nii. Taakɛ atsɔɔ mli yɛ 1 Petro 3:21 lɛ, mɛi ni Yehowa Nyɔŋmɔ haa amɛnaa henilee kpakpa lɛ jɔɔ amɛhe nɔ amɛhaa lɛ klɛŋklɛŋ kwraa kɛtsɔɔ hemɔkɛyeli ni ámɛna yɛ Kristo afɔleshaa lɛ mli lɛ hewɔ, amɛhaa abaptisiɔ amɛ amɛkɛfeɔ nakai henɔjɔɔmɔ lɛ he okadi, amɛfeɔ Nyɔŋmɔ suɔmɔnaa nii. Kɛkɛ lɛ toiŋjɔlɛ ni fataa henilee kpakpa he baa akɛni amɛna shidaamɔ kpakpa yɛ Nyɔŋmɔ hiɛ lɛ batsɔɔ amɛ nɔ; ni enyɛŋ etsɔ gbɛ ko gbɛ ko nɔ eba. Shi eji shishijee kɛkɛ.
6. Mɛni hewɔ subaŋ ni wɔhiɛ yɛ asafoŋ kpeei ahe lɛ kɔɔ toiŋjɔlɛ ni wɔɔna mli ŋɔɔmɔ lɛ he lɛ?
6 Agbɛnɛ, susumɔ bɔ ni oyaa asafoŋ kpeei daa kɛ bɔ ni okɛ ohe woɔ mli bɔ ni ooonyɛ lɛ he. Ani nɛkɛ kpeei nɛɛ yɛ gbɛhe ko yɛ oshihilɛ mli, ni yɛ no hewɔ lɛ, oŋmɛɛɛ gbɛ ni je lɛ nitsumɔi komɛi ni bo diɛŋtsɛ osumɔɔ atsi amɛ gbɛ? Ani osaa ohe ohaa kpee lɛ ni obuɔ lɛ akɛ hegbɛ ni ona akɛ okɛ ohe aaawo mli? Nɛkɛ nibii nɛɛ hu naa hewalɛ aloo ekɔɔ miishɛɛ ni mɔ ko aaana mli ŋɔɔmɔ lɛ he diɛŋtsɛ. Mɛni hewɔ? Ejaakɛ Nyɔŋmɔ mumɔ lɛ yɛ ewebii ni amɛbua amɛhe naa lɛ anɔ, ni toiŋjɔlɛ ji nakai mumɔ lɛ yibii lɛ eko. (Galatabii 5: 22) Nɛkɛ kpeei nɛɛ ashishi ayeɔ abuaa wɔ yɛ, ni wɔnuɔ Yehowa taomɔ nii ashishi, ni enɛ he miihia wɔ bɔni fee ni wɔnyɛ wɔfee nɔ ni sa yɛ ehiɛ. Agbɛnɛ hu wɔkaseɔ bɔ ni wɔɔfee ni wɔha toiŋjɔlɛ aba bɔ ni wɔkɛ wɔnanemɛi gbɔmɛi yeɔ haa lɛ mli—yɛ asafo lɛ mli, yɛ shia, yɛ skul, yɛ wɔnitsumɔ he. Wɔkpeei lɛ ji gbɛi titri ni Yehowa tsɔɔ nɔ etsɔɔ wɔ nii lɛ ekome, ni taakɛ ŋmalɛ lɛ tsɔɔ lɛ, mɛi ni Yehowa tsɔɔ amɛ nii lɛ ji mɛi ni amɛtoiŋjɔlɛ fa babaoo.—Yesaia 54:13.
7. Mɛni nibii ni wɔsusuɔ he yɛ wɔ asafoŋ kpeei ashishi ehe hiaa ni wɔdi sɛɛ lɛ?
7 Sane titri ko ni kɔɔ enɛ he ni esa akɛ wɔsusu he jogbaŋŋ ji, nɔ ni wɔkaseɔ lɛ ni wɔkɛaatsu nii yɛ wɔshihilɛ mli kɛya hiɛ. Wɔsumɔŋ ni wɔtamɔ nakai Israelbii lɛ ni Yehowa kɛɛ akɛ ‘amɛbaanu nɛ moŋ, shi amɛnuŋ shishi lɛ.’ (Yesaia 6:9) Agbɛnɛ hu, ani wɔmiisumɔ ni wɔtamɔ nakai gbɔmɛi lɛ ni Yehowa tsɔɔ bɔ ni amɛji lɛ mli eha Ezekiel—gbɔmɛi ni baabo Yehowa gbalɔ lɛ toi shi amɛteŋ nɔ ni ekɛɔ lɛ, ejaakɛ amɛmiisumɔ ni amɛtsu amɛ akɔnɔi ni he tseee loo pɛsɛmkunya nibii asɛɛdii lɛ he nii lɛ? (Ezekiel 33:31, 32) Nɔ ni tamɔɔɔ enɛ lɛ, mɛi ni baabua amɛhe naa yɛ Yehowa we lɛ yɛ wɔgbii nɛɛ amli ni baana enɔkpɛlɛmɔ lɛ ji mɛi ni átsɔɔ akɛ amɛmiiwie nɛkɛ lɛ: “Nyɛbaa ni wɔyakwɔa Yehowa gɔŋ lɛ kɛya Yakob Nyɔŋmɔ lɛ we lɛ, koni etsɔɔ wɔ egbɛi lɛ, ni wɔnyiɛ etempɔŋi lɛ anɔ.” (Mika 4:2) Kɛji akɛ wɔkɛ tsɔsemɔ wiemɔi ni wɔnine shɛɔ nɔ yɛ wɔkpeei ashishi lɛ to wɔtsui mli diɛŋtsɛ, kɛji akɛ yɛ kpee fɛɛ kpee shishi lɛ, kɛ hooo lɛ wɔmɔ sane oti kome ko ni he hiaa wɔ diɛŋtsɛ lɛ mli ni wɔtsu he nii lɛ, wɔbaawo toiŋjɔlɛ yibii babaoo. Taakɛ Yesu kɛɛ yɛ Luka 11:28 (NW) lɛ: “Miishɛɛ ji mɛi ni nuɔ Nyɔŋmɔ wiemɔ Iɛ ni amɛyeɔ nɔ lɛ!”
8. Yɛ mɛɛ gbɛ nɔ sɔɔmɔ nitsumɔ lɛ mli gbɛfaŋnɔ ni wɔɔna babaoo bɔ ni wɔshihilɛi baaŋmɛ wɔ gbɛ lɛ he baanyɛ aba sɛɛnamɔ aha wɔ diɛŋtsɛ?
8 Nibii ni ama nɔ mi yɛ wɔkpeei ashishi lɛ ateŋ ekome ji bɔ ni ehe hiaa akɛ wɔkɛ wɔhe aaawo Nyɔŋmɔ Maŋtsɛyeli lɛ jajemɔ mli babaoo ni wɔye wɔbua mɛi krokomɛi ni amɛbatsɔmɔ kaselɔi. (Mateo 24:14; 28:19) Nɛkɛ nitsumɔi nɛɛ jeɔ kpo babaoo yɛ oshihilɛ mli yɛ mɛɛ gbɛ nɔ? Kɛji akɛ obo nɔ ni Yehowa kɛɔ wɔ kɛtsɔ e-Wiemɔ lɛ kɛ agbɛnɛ kɛtsɔ egbɛjianɔtoo lɛ nɔ lɛ toi jogbaŋŋ lɛ, belɛ wɔle akɛ enɛ ji nitsumɔ ni he hiaa fe fɛɛ eko ni atsuɔ yɛ shikpɔŋ nɔ ŋmɛnɛ lɛ. (Kpojiemɔ 14:6, 7) Ni ale jogbaŋŋ akɛ mɛi ni yɔɔ be fɛɛ sɔɔmɔ lɛ mli—kɛ agbɛnɛ mɛi ni eyɛ mli akɛ amɛnyɛŋ amɛtsɔmɔ gbɛgbalɔi moŋ, shi amɛfeɔ ekaa diɛŋtsɛ yɛ sɔɔmɔ nitsumɔ lɛ mli lɛ—ji mɛi ni yɔɔ miishɛɛ diɛŋtsɛ yɛ gbɛ ni ekaaa nɔ. Toiŋjɔlɛ ni amɛnaa mli ŋɔɔmɔ lɛ tamɔɔɔ nu kuli kome kɛkɛ, shi moŋ taakɛ Yehowa kɛɛ lɛ, ebatsɔɔ “tamɔ faa.” (Yesaia 48:18) Ani enɛ ji nɔ ni onine shɛɔ nɔ? Wɔ fɛɛ wɔbaanyɛ wɔna eko.
9. Mɛni baanyɛ aye ebua wɔ ni wɔmɔ toiŋjɔlɛ ni Nyɔŋmɔ kɛha wɔ lɛ mli, yɛ be mli ni wɔkɛ shihilɛi ni mli wawai miikpe po?
9 Shi, nɛkɛ haomɔi nɛɛ fɛɛ toi ni wɔɔbo lɛ haaa wɔye wɔhe kɛjɛ shihilɛ mli nɔnyɛɛ ni yɔɔ ŋmɛnɛŋmɛnɛ nibii agbɛjianɔtoo nɛɛ mli lɛ he. Shi bɔ fɛɛ bɔ ni shihilɛ lɛ mli waa haa lɛ, Nyɔŋmɔ maa esuɔmɔ mli ni ebaajɛ eye ebua wɔ kɛ́ wɔku sɛɛ wɔtee eŋɔɔ lɛ nɔ mi ehaa wɔ. (1 Petro 5:6, 7) Ani wɔkase bɔ ni ataoɔ Yehowa dɛŋ yelikɛbuamɔ kɛ egbɛtsɔɔmɔ yɛ nɔ fɛɛ nɔ ni wɔfeɔ lɛ mli, ni ani wɔtsɔɔ wɔhe kɛyaa eŋɔɔ yɛ sɔlemɔ mli, yɛ be mli ni wɔfee nɔ ni wɔɔnyɛ yɛ shihilɛ ni mli wawai ashishi, ni wɔshɛɔ wɔjatsu lɛ wɔfɔɔ Yehowa Nyɔŋmɔ nɔ, ni wɔkɛ hekɛnɔfɔɔ shiɔ fɛɛ wɔhaa lɛ? (Abɛi 3:5, 6; Lala 55:23) Akɛ miishɛɛ woɔ wɔ hewalɛ yɛ Filipibii 4:6. 7 akɛ: “Nyɛkahaoa yɛ nɔ ko nɔ ko he, shi moŋ, nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ ata yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo mli!” Mɛɛ gbɛjianɔtoo ni yɔɔ naakpɛɛ enɛ ji nɛkɛ! Ani okase ole bɔ ni anaa Nyɔŋmɔ dɛŋ toiŋjɔlɛ nɛɛ he sɛɛ babaoo?
Yaa Nɔ Otiu Toiŋjɔlɛ
10. Yɛ be mli ni wɔtiu toiŋjɔlɛ sɛɛ lɛ, mɛni he hiaa yɛ wɔgbɛfaŋ?
10 Kɛ wɔnine shɛ toiŋjɔlɛ ni tamɔ nɛkɛ nɔ lɛ, wɔnyɛŋ wɔfee mɛi ni enɛ he sane ko kɔɔɔ wɔhe. Ebiɔ mɔdɛŋbɔɔ diɛŋtsɛ dani anyɛ ahiɛ mli. No hewɔ lɛ 1 Petro 3:10, 11 (NW) kɛɔ akɛ: “Shi mɔ ni taoɔ akɛ etsɛ yɛ jeŋ ni ena gbii kpakpai lɛ . . . etao toiŋjɔlɛ ni enyiɛ no sɛɛ.” Beni mɔ ko edi oti ko sɛɛ ni agbɛnɛ enine eshɛ nɔ lɛ, mɔ lɛ baafee buulu akɛ eeebu nɛkɛ oti nɛɛ fɛlɛfɛlɛ. Yɛ be mli ni wɔtao ni wɔnine eshɛ toiŋjɔlɛ nɔ lɛ sɛɛ lɛ, esa akɛ wɔkwɛ wɔhe nɔ jogbaŋŋ yɛ nibii ni baanyɛ afite lɛ lɛ he. Nɔ ni fe nakai, esa akɛ wɔkɛ ekaa atiu nibii ni kɛ toiŋjɔlɛ baa.
11. (a) Mɛɛ subaŋ baanyɛ afite wekukpaa ni ka wɔkɛ Yehowa teŋ lɛ? (b) Mɛɛ be mli esa akɛ wɔbi Nyɔŋmɔ dɛŋ yelikɛbuamɔ diɛŋtsɛ yɛ kaai ashishi? (Mateo 6:13)
11 Kɛji akɛ wɔnine eshɛ toiŋjɔlɛ ni Nyɔŋmɔ kɛhaa kɛtsɔɔ gbɛjianɔ ni eto lɛ nɔ lɛ, belɛ ehe miihia ni wɔkwɛ jogbaŋŋ ni wɔkafite nakai wekukpaa lɛ kɛtsɔ eshafeemɔ su ni wɔɔku wɔsɛɛ kɛaaya he ekoŋŋ lɛ nɔ. Shi, akɛni wɔ fɛɛ wɔyeee emuu hewɔ lɛ, wɔ fɛɛ wɔfeɔ esha. Shi oshara yɛ kɛji akɛ mɔ ko aaabu sui kɛ nifeemɔi ni Nyɔŋmɔ buɔ amɛ fɔ lɛ bem yɛ lɛ diɛŋtsɛ emli. Wɔnyɛŋ wɔhole wɔkɔji anɔ kɛkɛ ni wɔkɛɛ akɛ, “Nakai ji bɔ ni miyɔɔ.” (Romabii 6:16, 17) Ehe miihia ni wɔtsake kɛjɛ nɔ fɔŋ feemɔ he moŋ fe ni wɔɔbu wɔhe bem yɛ mli, ni esa akɛ wɔkpa Nyɔŋmɔ fai ni ekɛke wɔ yɛ hemɔkɛyeli ni wɔyɔɔ yɛ Yesu afɔleshaa lɛ mli lɛ hewɔ. Agbɛnɛ ehe miihia ni wɔkase bɔ ni wɔɔfee wɔtsɔ wɔhe kɛya Nyɔŋmɔ ŋɔɔ kɛha yelikɛbuamɔ beni wɔkɛ nɔ fɔŋ feemɔ he kaa ekpe, fe ni wɔɔbɔ mɔdɛŋ ni wɔkome wɔwu ta lɛ, ni naagbee lɛ aye wɔnɔ, koni no sɛɛ lɛ, wɔkpa eshaifaa he fai. Yɛ Nyɔŋmɔ yelikɛbuamɔ naa lɛ, wɔbaanyɛ wɔye omanye yɛ “gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ” ni wɔɔwo lɛ mli—Efesobii 4:20-24.
12. (a) Bɔni afee ni wɔna toiŋjɔlɛ lɛ, mɛɛ wekukpaai krokomɛi he hiaa ni wɔgbala wɔjwɛŋmɔ kɛya nɔ? (b) Mɛni ebiɔ yɛ wɔgbɛfaŋ yɛ enɛ mli?
12 Toiŋjɔlɛ ni aaana mli ŋɔɔmɔ Iɛ hu kɔɔ wekukpaa ni ka okɛ mɛi krokomɛi ateŋ lɛ hu he. Anɔkwale Kristofoi sɔmɔɔ Nyɔŋmɔ akɛ gbɛjianɔtoo ko fa, amɛji “nyɛmimɛi anaanyobɔɔ” ko fa. (1 Petro 2:17, NW) Taakɛ Yesu wie akɛ ebaafee anɔkwale yɛ esɛɛnyiɛlɔi lɛ ahe lɛ, suɔmɔ ni amɛyɔɔ kɛha amɛhe lɛ ji nɔ ko ni ekaaa. (Yohane 13:35) Shi amɛteŋ mɔ ko yeee emuu. Yɛ emuu ni wɔ diɛŋtsɛ lɛ wɔkɛ mɛi krokomɛi hu yeee hewɔ lɛ, ehe baahia ni wɔsɔle waa yɛ shihilɛi komɛi ahe koni wɔtsu he nii waa ni wɔna tsabaa wɔha nakai naagbai lɛ. Hebribii 12:14 (NW) woɔ wɔ hewalɛ akɛ: “Nyɛtiua nyɛkɛ mɛi fɛɛ ateŋ toiŋjɔlɛ sɛɛ.” Ni yɛ wekukpaa ni kã wɔkɛ wɔnyɛmimɛi hii kɛ yei Kristofoi lɛ ateŋ hewɔ lɛ, ehe miihia waa ni wɔya nɔ wɔtiu toiŋjɔlɛ. 1 Tesalonikabii 5:13 (NW) kɛɔ yɛ faŋŋ mli akɛ: “Nyɛkɛ nyɛhe ahia shi yɛ toiŋjɔlɛ mli.” Enɛ etsɔɔɔ akɛ wɔtsi wɔhe kɛjɛ oweletɔɔ aloo najiaŋtoo he kɛkɛ, shi moŋ, wɔfee mɛi ni tiuɔ toiŋjɔlɛ diɛŋtsɛ, mɛi ni jeɔ toiŋjɔlɛ nifeemɔ shishi klɛŋklɛŋ ni wɔfee mɛi ni sumɔɔ akɛ wɔɔŋmɛɛ saji ahe yɛ toiŋjɔlɛ hewɔ.—Efesobii 4:1-3.
13. (a) Yɛ be mli ni wɔsumɔɔ ni toiŋjɔlɛ aba wɔkɛ mɛi ni heee yeee lɛ ateŋ lɛ, mɛni wɔbaanyɛ wɔfee, shi te wɔfeɔ tɛŋŋ wɔtsɔɔ akɛ toiŋjɔlɛ kɛ Nyɔŋmɔ lɛ baa klɛŋklɛŋ? (b) Te efeɔ tɛŋŋ ni wɔnyɛɔ wɔnaa toiŋjɔlɛ yɛ be mli ni haomɔi loo basabasafeemɔi ebɔle Wɔhe fɛɛ kɛkpe lɛ?
13 Shi jeee mɔ fɛɛ mɔ sumɔɔ ni efee mɔ ni sumɔɔ toiŋjɔlɛ yɛ asafo lɛ sɛɛ. No hewɔ lɛ, Romabii 12:18 woɔ ŋaa yɛ nilee mli akɛ: “Kɛ aaaho lɛ, nyɛgbɛfaŋ lɛ, nyɛkɛ gbɔmɛi fɛɛ ahia shi yɛ toiŋjɔlɛ mli.” Shi mɔdɛŋ ni wɔbɔɔ koni wɔtiu toiŋjɔlɛ sɛɛ lɛ etsɔɔɔ saji ahe ni wɔɔŋmɛɛ koni wɔkɛsaa yɛ Yehowa jalɛ taomɔ nii ahe. Wɔbaanyɛ wɔtsake bei amli kɛha nibii komɛi afeemɔ, shi wɔle akɛ ebaafee nɔ ni nilee bɛ mli akɛ wɔɔkpa asafoŋ kpee ni wɔɔya aloo wɔɔkpa sɔɔmɔ nitsumɔ lɛ mli ni wɔkɛ wɔhe aaawo bɔni afee ni toiŋjɔlɛ aba wɔgbalashihilɛ mli hefatalɔi aloo wɔwekumɛi ateŋ. Ni wɔle akɛ Yehowa ekpɛlɛŋ wɔhe ni wɔkɛaabɔ wɔnanemɛi nitsulɔi aloo skulbii ahe yɛ nifeemɔi komɛi ni Nyɔŋmɔ gbeyeishemɔ bɛ mli lɛ amli koni wɔna enɔkpɛlɛmɔ. Wɔyɔseɔ akɛ toiŋjɔlɛ diɛŋtsɛ yɛ kɛha mɛi pɛ ni naa amɛkɛ Nyɔŋmɔ teŋ toiŋjɔlɛ mli ŋɔɔmɔ lɛ, kɛha mɛi pɛ ni sumɔɔ Yehowa fe fɛɛ. (Lala 119:165) Eji anɔkwale akɛ basabasafeemɔi baanyɛ ebɔle wɔhe. Mɛi ni heee yeee lɛ baanyɛ aje ŋwane ni amɛkɛ amɛhe awu ta; ekolɛ amɛbaajɛ wɔ po yɛ wɔhemɔkɛyeli lɛ hewɔ. Shi wɔle bɔ ni Nyɔŋmɔ Wiemɔ lɛ etsɔɔ wɔ akɛ wɔba wɔjeŋ wɔha. Kɛ wɔtee nɔ wɔnyiɛ gbɛ ni kɛ Yehowa jalɛ gbɛi lɛ kpaa gbee lɛ nɔ lɛ, aheŋ toiŋjɔlɛ ni he hiaa wɔ babaoo lɛ kɛjɛŋ wɔdɛŋ.—Okɛto Lala 46:2, 3 he.
14. Eyɛ mli akɛ wɔ diɛŋtsɛ lɛ, wɔkɛ amanehului loo haomɔi kpeɔ moŋ, shi mɛni haa wɔnyɛɔ wɔyaa nɔ wɔtoɔ wɔtsui shi ni wɔnaa jwɛŋmɔ kpakpa yɛ mligbɛ lɛ?
14 Yɛ naagbee gbɛkɛ ni Yesu baagbo lɛ, ekɛɛ ebɔfoi anɔkwafoi lɛ akɛ: “Miikɛɛnyɛ nii nɛɛ koni nyɛwo nyɛtsui yɛ nyɛmli. Je lɛŋ lɛ, hejaramɔ nyɛnaa, shi kɛlɛ nyɛtsui anyɔa nyɛmli: miye je lɛ nɔ kunim.” (Yohane 16: 33) Hɛɛ, wɔkɛ hejaramɔ kpeɔ. Akɛ Kristofoi lɛ, wɔtsɔɔ yiwai sɔrɔtoi amli. Wɔkɛ jalɛsane ni ayeee baakpe ni wɔteŋ mɛi pii kɛ helai ni mli wawai kpeɔ. Shi ŋwɛi toiŋjɔlɛ baa wɔyi kɛtsɔɔ enɛɛmɛi fɛɛ amli. Akɛni Yehowa etsɔɔ wɔ nii hewɔ lɛ, wɔle nɔ hewɔ ni awaa Kristofoi ayi lɛ. Wɔyiŋ efeee wɔ kɔshikɔshi yɛ nɔ hewɔ ni ayeee jalɛsane kɛ nɔhewɔ ni wɔhe yeɔ lɛ he. Wɔle nɔ ni yɔɔ wɔsɛɛ be hu. Wɔle akɛ yɛ Yesu shihilɛ gbɛ yɛ anɔkwayeli mli kɛ efɔleshaa gbele lɛ hewɔ lɛ, yiwalaheremɔ baaba. Agbɛnɛ hu, yɛ naagbai ni wɔkɛkpeɔ ŋmɛnɛŋmɛnɛ lɛ sɛɛ lɛ, wɔbaanyɛ wɔtsɔ wɔhe kɛya Nyɔŋmɔ ŋɔɔ yɛ sɔlemɔ mli kɛ hekɛnɔfɔɔ akɛ ekɛ suɔmɔ kwɛɔ wɔ. Ni ebaatsɔ emumɔ lɛ nɔ ehi wɔmli—Romabii 8:38, 39.
15. Yɛ mɛɛ gbɛ nɔ eji anɔkwale akɛ toiŋjɔlɛ ni Nyɔŋmɔ kɛhaa lɛ tamɔɔɔ nɔ ni je lɛ kɛhaa lɛ?
15 No hewɔ lɛ, Yesu wie yɛ gbɛ ni ja nɔ yɛ Yohane 14:27 akɛ: “Hejɔlɛ mishiɔ mahanyɛ, hejɔlɛ ni ji minɔ lɛ miŋɔhaanyɛ, jeee bɔ ni je lɛ haa lɛ mihaanyɛ nɛɛ. Nyɛtsui akayea, ni asaŋ ekafaa.” Eji anɔkwale diɛŋtsɛ akɛ—je lɛ bɛ nɔ ko tamɔ toiŋjɔlɛ loo hejɔlɛ ni Nyɔŋmɔ kɛhaa kɛtsɔɔ Yesu Kristo nɔ lɛ. Eyeɔ ebuaa wɔ ni wɔhe waa yɛ shihilɛi ni baaha mɛi krokomɛi alaaje amɛhiɛnɔkamɔi fɛɛ lɛ mli.
16. (a) Mɛɛ gbɛkpamɔ yɔɔ kɛha mɛi ni buɔ toiŋjɔlɛ ni Nyɔŋmɔ kɛhaa lɛ jogbaŋŋ bianɛ lɛ? (b) Te wɔɔfee tɛŋŋ wɔjie enɛ kpo wɔtsɔɔ akɛ wɔbuɔ nakai toiŋjɔlɛ lɛ waa?
16 Mɛɛ wɔsɛɛ bɛ ni yɔɔ naakpɛɛ ka mɛi fɛɛ ni mɔɔ toiŋjɔlɛ ni Nyɔŋmɔ kɛhaa lɛ mli bianɛ ni agbɛnɛ amɛhaa eyeɔ gbɛhe ni nɔ kwɔ grɔŋŋ ni sa yɛ amɛshihilɛ mli lɛ ahiɛ nɛkɛ! Etsɛŋ ni jeŋ ni nyɛ̃ɛ ka ekɛ Nyɔŋmɔ teŋ lɛ baaho aya. Yɛ be ni sa mli lɛ bɔɔ nii lɛ fɛɛ kɛ Nyɔŋmɔ baabote toiŋjɔlɛ lɛ mli kɛtsɔ Jeŋ Muu Fɛɛ Maŋtsɛ lɛ jalɛ taomɔ nii anɔ. Eba akɛ hiɛsɔɔ ni wɔyɔɔ kɛha nɛkɛ gbɛkpamɔ ni yɔɔ nyam nɛɛ aaatsirɛ wɔ ni wɔkɛ enɛ atsu nii yɛ gbeekpamɔ mli kɛmɔ shi bianɛ. Eba akɛ wɔ fɛɛ wɔɔbo Yehowa famɔi atoi jogbaŋŋ ni wɔha ekitai lɛ afi shi shiŋŋ yɛ wɔtsui mli bɔni afee ni wɔsumɔ egbɛ̀i lɛ diɛŋtsɛ ni wɔfee nɔ ni etaoɔ. Taakɛ Abɛi 3:1, 2 kɛɔ lɛ: “Mibi, ohiɛ akakpa mimla lɛ nɔ, shi ha otsui ato mikitai lɛ! Ejaakɛ gbii asɛɛjɛkɛmɔ kɛ wala afii kɛ toiŋjɔlɛ abaaŋɔ afata he amɛhao.”
[Shishigbɛ niŋmai]
Ajie kɛjɛ March 15, 1987? Watchtower lɛ mli.
Sanebimɔi Ní Akɛtiɔ Mli
◻ Taakɛ Yesaia 48:18 tsɔɔ lɛ mɛni he hiaa kɛji akɛ wɔɔna toiŋjɔlɛ babaoo
◻ Mɛni nibii kɛ wɔfee lɛ ebaaha wɔna ŋwɛi toiŋjɔlɛ babaoo?
◻ Mɛni akpaa gbɛ yɛ wɔdɛŋ yɛ toiŋjɔlɛ ni wɔɔha ahi wɔnyɛmimɛi hii kɛ yei ateŋ lɛ mii?
◻ Te wɔɔfee tɛŋŋ wɔhiɔ toiŋjɔlɛ mli yɛ be mli ni mɛi ni heee yeee po ebɔle wɔhe kɛkpe?
[Mfoniri ni yɔɔ baafa 14]
Baptisimɔ
Kpeei ni ayaa daa
[Mfoniri ni yɔɔ baafa 15]
Nɔ ni wɔkaseɔ lɛ kɛ nitsumɔ
[Mfoniri ni yɔɔ baafa 16]
Sɔɔmɔ nitsumɔ lɛ mli ni wɔkɛ wɔhe aaawo babaoo
Wɔjatsui lɛ ni wɔkɛaafɔ Yehowa nɔ