Hemɔkɛyeli Tsamɔ​—Etsɛɔ Mɛi Kɛyaa Mɛni He?

Sɔlemɔ lɛ jijeɔ kɛ kpaasaŋkui, tɛtɛrɛmantɛrɛ, obonui, fabii kɛ ŋmɛji ni gbɛɔ. Hii, yei, kɛ gbekɛbii joɔ ni amɛlaa kɛ yiŋkamɔ kɛ miishɛɛ. Be Iɛ hi kɛha helatsamɔi ashishijee.

Hemɔkɛyeli tsalɔ lɛ, ni ewo atade yɛŋ wuyaa lɛ jeɔ shishi ekɛ eniji shwieɔ obubuafo ni wamɔɔ kɛnyiɛɔ shikpɔŋ Iɛ nɔ. Mɔ ni nyiɛ sɛɛ ji shwilafo, ni ekɛ hiŋmɛi glase diŋ ewo ni haaa ana ehiŋmɛi ni enaaa nii lɛ. Mɛi ni kwɛɔ nɔ ni yaa nɔ lɛ bolɔɔ akɛ, “Naakpɛɛ sane!” yɛ be mli ni obubuafo Iɛ jeɔ shishi enyiɛɔ ni shwilafo lɛ jeɔ shishi enaa nii Iɛ . . .

NIBII ni tamɔ nɛkɛ fa babaoo diɛŋtsɛ yɛ Afrika hemɔkɛyeli tsamɔi asɔlemɔi amli. Yɛ anɔkwale mli lɛ, hemɔkɛyeli tsalɔi asɛɛnyiɛlɔi babaoo yɛ Afrika kɛ maji krokomɛi anɔ yɛ nɔ ni amɛkɛɔ akɛ amɛbaanyɛ amɛtsa naagbai sɔrɔtoi fɛɛ kɛtsɔ sɔlemɔ kɛ Nyɔŋmɔ mli hemɔkɛyeli nɔ lɛ hewɔ. No hewɔ lɛ, mɛi komɛi kɛ shika mli naagbai baa hemɔkɛyeli tsalɔi aŋɔɔ. Ni akɛni yɛ Afrika lɛ kɛ mɔ ko yɛ ni efɔɔɔ lɛ, eji hiɛgbele sane hewɔ lɛ, mɛi komɛi baa hemɔkɛyeli tsalɔi lɛ aŋɔɔ kɛ hiɛnɔkamɔ akɛ amɛbaanyɛ amɛtsa kene ni amɛji lɛ.

Shi, gbɔmɔtsoŋ hewalɛnamɔ he naagbai ji nɔ ni hemɔkɛyeli tsalɔi lɛ tsuɔ he nii fe fɛɛ. Eyɛ mli akɛ tsofai sɔrɔtoi egbɛ eshwa je lɛŋ he fɛɛ he ni aabɔ mɔdɛŋ waa diɛŋtsɛ koni ana tsabaa ko aha mɛi ni he yeɔ lɛ moŋ, shi gbɔmɔ nyiɛ shɔŋŋ diɛŋtsɛ yɛ tsabaa ni eeena eha helai sɔrɔtoi amli naagbai lɛ mli. Helatsɛmɛi nɛɛ ateŋ mɛi pii efite shika babaoo diɛŋtsɛ amɛkɛtao tsabaa, shi nɔ ko nɔ ko jɛɛɛ mli baa. Belɛ, ŋwanejee ko bɛ he akɛ yɛ hehiamɔ hewɔ lɛ, amɛteŋ mɛi pii tsɔɔ amɛhe kɛyaa hemɔkɛyeli tsalɔi aŋɔɔ!

Mɛi komɛi nuɔ he akɛ hemɔkɛyeli tsamɔ eye ebua amɛ ni amɛna sɔrɔtofeemɔ ko yɛ enɛ kɛ Kristo jamɔ teŋ. Yɛ anɔkwale mli lɛ, akɛni tsalɔi lɛ ateŋ mɛi pii kɛɔ akɛ amɛtsuɔ amɛnitsumɔ lɛ yɛ Yesu gbɛi amli hewɔ lɛ, ejeee nɔ ni efɔɔɔ kaa akɛ amɛsɛɛnyiɛlɔi lɛ baafee sɔlemɔi wuji lɛ amli bii ni yɛ nakai beaŋ nɔŋŋ lɛ amɛfee hemɔkɛyeli tsamɔ sɔlemɔ lɛ mli bii. Shi ani Nyɔŋmɔ anɔkwa jalɔ lɛ baanyɛ ni ekɛ ehe aha hemɔkɛyeli tsamɔ ni tamɔ nɛkɛ? (Yohane 4:23) Ni ani tsamɔi komɛi ni gbɔmɛi ni tamɔ nɛkɛ kɛaaba lɛ baanyɛ afee nɔ ni jɛ Nyɔŋmɔ ŋɔɔ?