Sanebimɔi ni jɛ Kanelɔi Adɛŋ

◼ Hiob 33:24 wieɔ “kpatamɔ nii” (kpɔmɔ nii) ni ana aha Hiob, ni ha ejo gbele naa foi lɛ he. Namɔ baafee nakai kpatamɔ nii lɛ kɛha Hiob?

Akɛ adesa kpatamɔ loo kpɔmɔ afɔleshaa ko haaa kɛha Hiob yɛ no be lɛŋ, shi Nyɔŋmɔ ha Hiob tɔmɔ nɔ, loo ekɛke lɛ.

Satan kɛ haomɔi pii ba Hiob nɔ, ni nɔ ni fata he ji “asanei ni jaraa [ni] tsɛrɛ Hiob kɛjɛ enaneshi aahu kɛyashi eyiteŋ pampam.” Shihilɛ mli ni Hiob baje lɛ ehiii kwraa akɛ eha eŋa wo lɛ hewalɛ akɛ, “kwa Nyɔŋmɔ koni ogbo.” Hiob po susu bɔ ni gbele hi fe piŋmɔ ni tamɔ nɛkɛ Iɛ he.​—Hiob 2:​7-9; 3:⁠11.

Beni efee tamɔ akɛ Hiob baagbo lɛ, Elihu ŋmɛ shihilɛ ni wa ni Hiob yɔɔ mli lɛ ekwɛ ni ekɛ shishitoo kɛha hiɛnɔkamɔ ha, akɛ: “Etaa loo ni ehiii kwɛmɔ . . . Ni esusuma bɛŋkɛɔ laajemɔ bu lɛ, ni ewala hu bɛŋkɛɔ gbele bɔfoi lɛ. Agbɛnɛ kɛji bɔfo ko ni ji mlidamɔlɔ ko yɛ ha lɛ, mɔ kome yɛ mɛi akpe teŋ, ni eeejaje nɔ ni ja etsɔɔ gbɔmɔ lɛ, ni ena lɛ mɔbɔ ni ekɛɛ: ‘Jiemɔ Iɛ kɛjɛ laajemɔ bu lɛŋ yaa mli; mina kpatamɔ nii lɛ! No Iɛ eheloo lɛ aaatsɔ efɔɔ fe gbekɛ nɔ.’”​—Hiob 33:​21-25.

Wɔle akɛ Yesu Kristo kɛ egbɔmɔtso akɛ adesa ni yeɔ emuu lɛ ha akɛ kpɔmɔ nɔ ni yeɔ egbɔ kɛha adesai ni yeee emuu. Efɔleshaa lɛ kɛ nɔ ni Adam laaje lɛ ŋmɛ pɛpɛɛpɛ, ewo nyɔmɔ ni he hiaa ni kɛ jiemɔ kɛmiijɛ esha mli baaba lɛ. (Romabii 5:​12-19; 1 Timoteo 2:​5, 6) Shi jeee enɛ pɛ ji wiemɔ “kpɔmɔ nɔ” Iɛ kɛ nitsumɔ yɛ Biblia lɛ mli. Hebri wiemɔ ni anaa yɛ Hiob 33:24 lɛ tsɔɔ “aha nɔ.” (2 Mose 26:17) Beni Nyɔŋmɔ kɛ blema Israel yeɔ lɛ, eto gbɛjianɔ ko ni aha, loo akpata aha, eshai​—afɔleshai ni haa eshai anɔ, ni jajeɔ adesai kɛ Nyɔŋmɔ teŋ saji.​—2 Mose 29:36: 3 Mose 16:​11, 15, 16; 17:⁠11.

Shi Nyɔŋmɔ etsɔ hiɛ yɛ mra mli akɛ eeekpɛlɛ afɔleshai akɛ shidaai Ioo eshaifaa bimɔ kɛ nɔkpɛlɛmɔ nɔ. (1 Mose 4:​3, 4; 8:​20, 21; 12:7; 31:54) Hiob nu jara ni nɛkɛ afɔleshai nɛɛ yɔɔ lɛ shishi. Wɔkaneɔ akɛ: “Eteɔ shi leebi maaŋkpa, ni eshaa shaa afɔlei ehaa amɛ tɛɛ yɛ [ebihii lɛ] amɛyibɔ lɛ naa; ejaakɛ Hiob kɛɔ akɛ. ‘Benɛ mibihii lɛ efee esha ko, ni amɛkwa Nyɔŋmɔ yɛ amɛtsuiiaŋ!’ Nakai Hiob feɔ daa nɛɛ.” (Hiob 1:⁠5) Akɛni ebɔ mɔdɛŋ ni esa Nyɔŋmɔ hiɛ, ni eyɔɔ tsui ni he jɔ hewɔ lɛ, efɔleshaai lɛ jara wa yɛ Nyɔŋmɔ hiɛ.​—Lala 32:​1, 2; 51:⁠19.

Shi yɛ sɛɛ mli Iɛ Hiob he baye ni enɛ wo ewala he gbeyei. Agbɛnɛ hu ehiɛ jwɛŋmɔ ni ejaaa yɛ jalɔ ni eji Iɛ he, no hewɔ lɛ ehe miihia ni ajaje lɛ, ni Elihu fee nakai. (Hiob 32:6; 33:​8-12; 35:​2-4) Elihu kɛɛ akɛ ehe ehiaaa ni Hiob ahi awerɛho shihilɛ nɛɛ mli aahu kɛyashi gbele kɛ bu (Sheol, loo adesai akwamaŋ gbonyobu) mli. Kɛ Hiob aaatsake etsui lɛ, abaana “kpatamɔ” aha lɛ.​—Hiob 33:​24-28.

Ehe ehiaaa ni wɔsusu akɛ kɛ aawie “kpatamɔ” loo kpɔmɔ he Iɛ belɛ Elihu miitsɔɔ gbɔmɔ ko ni yɔɔ nakai be lɛ mli ni baagbo aha Hiob. Yɛ afɔlei ni anɔkwa jalɔi le ni amɛshaa Iɛ hewɔ lɛ, nɔ kpatamɔ loo kpɔmɔ ni Elihu wieɔ he yɛ Hiob sane Iɛ mli lɛ baanyɛ afee kooloo afɔleshaa. Nɔ ni yɔɔ miishɛɛ ji akɛ, yɛ sɛɛ mli lɛ Nyɔŋmɔ kɛɛ Hiob nanemɛi etɛ ni wieɔ shiɔ lɛ lɛ akɛ: “Nyɛyashaa shaa afɔlei nyɛhaa nyɛhe, ni mitsulɔ Hiob akpa fai aha nyɛ.” (Hiob 42:⁠8) Bɔ fɛɛ bɔ ni kpatamɔ loo kpɔmɔ nɔ Iɛ ji ha lɛ, Elihu wiemɔ Iɛ mli sane titri ji akɛ abaanyɛ aha Hiob tɔmɔ lɛ nɔ koni enine ashɛ sɛɛnamɔi ni jɛɔ mli baa Iɛ anɔ.

Nakai ebalɛ. Hiob ‘tsake etsui yɛ sũ kɛ lamlu mli.’ Kɛkɛ ni mɛni? “Yehowa jie Hiob kɛjɛ tsuŋwoo Iɛ mli . . . Ni Yehowa jɔɔ Hiob sɛɛkpee be lɛ fe etsutsu be lɛ . . . Ni enɛ sɛɛ Iɛ Hiob saa ye afii oha kɛ nyɔŋmai ejwɛ ekoŋŋ, ni ena ebii kɛ enabii kɛyashi yinɔ ni ji ejwɛ lɛ nɔ.” Wɔkpɛlɛ nɔ po akɛ nakai kpatamɔ loo kpɔmɔ lɛ haaa Hiob aye ehe kɛjɛ esha mli, no hewɔ lɛ yɛ be ni sa mli lɛ egbo. Kɛlɛ, ewala sɛɛ ni aha ekɛ lɛ yeɔ odase akɛ, eji anɔkwale akɛ, ‘eheloo tsɔ efɔɔ fe gbekɛ nɔ, ni ebote ebalahiiaŋ hewalɛ mli ekoŋŋ.’​—Hiob 33:​25; 42:​6, 10-17.

Nakai jɔɔmɔi ni jɛ kpɔmɔ nɔ loo kpatamɔ fioo ni akɛtsu Hiob he nii Iɛ mli ba lɛ feɔ jɔɔmɔi babaoo ni adesai ni heɔ yeɔ Iɛ anine baashɛ nɔ yɛ jeŋ hee lɛ mli Iɛ he mfoniri. No mli lɛ, Yesu kpɔmɔ afɔleshaa lɛ mli sɛɛnamɔi lɛ fɛɛ baahi shi, ni ebaajie amanehulu ni jɛ esha kɛ emuu ni ayeee mli ba Iɛ kɛya kwraa. Mɛɛ yiŋtoo po wɔɔna ni wɔdamɔ nɔ “wɔnya” nɛkɛ, taakɛ Elihu tsi ta lɛ!​—Hiob 33:⁠26.