Eshai Ni Ajajeɔ Atsɔɔ​—Ani Nɔ Ko Ejaaa?

“Eshai ni ajajeɔ atsɔɔ lɛ ji mumɔŋ hetsuumɔ, gbɛ ni atsɔɔ nɔ akɛjeɔ nɔ ko shishi ekoŋŋ, gbɛ ni atsɔɔ nɔ akɛtsumɔɔ tao lɛ nɔ fɛfɛo. Misumɔɔ Eshai ni ayaa Ayajajeɔ Atsɔɔ, mihe eshai ni mijajeɔ mitsɔɔ osɔfo lɛ, kɛ bɔ ni ekɛkeɔ mi kɛ mlifilimɔ ni nyiɛɔ sɛɛ lɛ.” Nɛkɛ ji bɔ ni Katoleknyo ko ni etuu ehe eha lɛ kɛɔ.​—Bless Me, Father, for I Have Sinned.

Taakɛ New Catholic Encyclopedia lɛ tsɔɔ lɛ, “osɔfo lɛ pɛ Kristo kɛ hewalɛ ni akɛfiɔ ni akɛfɛneɔ, akɛkeɔ ni ahiɛɔ” esha “mli” lolo lɛ ha. Nakai wolo lɛ nɔŋŋ kɛɔ akɛ yiŋtoo ni yɔɔ eshai ni ajajeɔ daa lɛ sɛɛ ji “ni aku sɛɛ akɛ krɔŋkrɔŋ ni wala ji ni esha ni mli wa ha alaaje lɛ lɛ aba ekoŋŋ, koni . . . atsuu mɔ lɛ henilee he.” Ni kɛlɛ, jeŋba ni yaa nɔ yɛ shikpɔji pii anɔ lɛ tsɔɔ akɛ eshai ni ajajeɔ daa lɛ haaa mɛi ni feɔ enɛ lɛ ‘awi efɔŋ ni amɛfee ekpakpa.’ (Lala 34:15) No hewɔ lɛ ani nɔ ko ejaaa?

Kusum-Nifeemɔ Ko Kɛkɛ Ni?

Eshai ajajemɔ baanyɛ aje shishi akɛ kusum-nifeemɔ ko kɛkɛ. Yɛ Ireland lɛ, klɛŋklɛŋ eshai ajajemɔ lɛ tsɔɔ klɛŋklɛŋ Nuŋtsɔ Niyenii lɛ hiɛ. Ni ani eyɛ naakpɛɛ mɔ akɛ gbekɛyoo ni eye afii kpawo lɛ baasusu ayemforo atade bibioo fɛfɛo ni ebaawo lɛ he babaoo moŋ fe ‘wala ni yɔɔ krɔŋkrɔŋ ni alaaje kɛtsɔ esha ni mli wa nɔ ni aaaku sɛɛ akɛba’ lɛ he?

Ramona, ni jaje eklɛŋklɛŋ eshai beni eye afii kpawo pɛ lɛ kɛɛ akɛ: “Nii ni fee mi fɛo fe fɛɛ ji atade lɛ, kɛfata shika ni mana kɛjɛ miwekumɛi aŋɔɔ lɛ he.” Etee nɔ akɛ, “mumɔŋ henumɔ ko bɛ gbekɛbii yei ni mile amɛ lɛ eko kwraa mli. Wɔteŋ mɔ ko mɔ ko susuuu Nyɔŋmɔ he po yɛ nakai be lɛ mli.”

Yɛ anɔkwale mli lɛ, nɔ ni baajɛ gbekɛbii ni aaanyɛ amɛnɔ ni amɛjaje eshai daa lɛ mli aba ji saji ni atãa tamɔ tsɔne. Michael, ni lɛ hu eje eshai ajajemɔ shishi beni eye afii kpawo lɛ kɛɛ: “Mitiɔ nakai wiemɔi lɛ nɔŋŋ mli shii abɔ.”

Saji ni Katolekbii komɛi wie ni jeɔ kpo yɛ wolo, Bless Me, Father, for I Have Sinned lɛ mli lɛ tsɔɔ akɛ eshai ni ajajeɔ lɛ he bɛ sɛɛnamɔ ko yɛ mumɔŋ yɛ be mli ni amɛdara po. Mɔ ko kpɛlɛ nɔ akɛ: “Eshai ajajemɔ tsɔɔ bo bɔ ni amaleɔ, ejaakɛ nibii komɛi yɛ ni onyɛŋ okɛɛ osɔfo lɛ kɔkɔɔkɔ.” Abaanya akɛ gbeekpamɔ ni bɛ osɔfoi lɛ ateŋ lɛ atsu nii ni akɛ toigbalamɔ fioo ko aha he. Mɛi komɛi tao osɔfo “kpakpa” ni boɔ eshai ni ajajeɔ lɛ toi koni amɛnine ashɛ ŋaawoo ni amɛsumɔɔ ni amɛnu lɛ nɔ. Obalayoo ko kɛɛ: “Beni mikpa shi aahu nyɔji etɛ sɛɛ lɛ, mina osɔfo ni majaje mihe eshai matsɔɔ lɛ lɛ. Minaa lɛ daa nyɔŋ nɔ, hiɛ kɛ hiɛ yɛ kpatamɔ tsu lɛ mli, ni ebɔɔ mɔdɛŋ waa.” Katoleknyo kroko kɛɛ: “Kɛ ohiɛ etɛ lɛ, obaana osɔfo ni nuuu Ŋleshi Blɔfo, ni enyɛɛɛ ewie hu, ja wiemɔi, ‘Ajie Maria Yi’ shii etɛ ko pɛ.”

Eka shi faŋŋ akɛ nɔ ko ejaaa yɛ eshai ni mɛi komɛi jajeɔ lɛ he. Shi Biblia lɛ tsɔɔ akɛ ehe miihia ni ajaje eshai, ejaakɛ ekɛɔ akɛ: “Mɔ ko mɔ ko bɛ ni tsimɔɔ ehe eshai anɔ ni eshwereɔ, shi mɔ fɛɛ mɔ ni jajeɔ ni ekpaa lɛ, anaa lɛ mɔbɔ.”​—Abɛi 28:​13, The New Jerusalem Bible.

Ani enɛ tsɔɔ akɛ esa akɛ Kristofonyo lɛ ajaje ehe eshai fɛɛ? Kɛji nakai ni lɛ, namɔ esa akɛ ejaje etsɔɔ? Sane ni nyiɛ sɛɛ lɛ baapɛi nɛkɛ sanebimɔi nɛɛ amli.