Awuiyeli Yɛ Basabasa Jeŋ Ko Mli

AWUIYELI jeee ŋmɛnɛŋmɛnɛ beaŋ nifeemɔ. Agbe gbɔmɔ klɛŋklɛŋ kwraa afii akpei abɔ ni eho nɛ beni Kain gbe enyɛminuu Habel lɛ. Atsiɔ kaabonaatoo kɛ hii ni kɛ hii naa bɔlɛ hu ta yɛ blema Hebri Ŋmalɛi lɛ amli. (1 Mose 3:8; 19:​4, 5; 34:​1-4) Ni atutuaa mɛi ni akɛtswaa amɛ ojo yɛ Ŋmɛnɛŋmɛnɛ Beaŋ klɛŋklɛŋ afii oha lɛ mli, taakɛ Samarianyo kpakpa lɛ he abɛbua lɛ tsɔɔ lɛ. (Luka 10:​29-37) Shi sɔrɔtofeemɔ yɛ mli ŋmɛnɛ.

Bɔ ni mɛi nuɔ nii ahe amɛhaa yɛ je lɛŋ maŋtiasei wuji lɛ babaoo amli, kɛji New York, London, Calcutta, aloo Bogotá amɛyɔɔ jio lɛ ji akɛ awuiyeli egbɛ eshwa he fɛɛ he ni eewo shihilɛ he gbeyei waa. Amaniɛbɔɔ ko ni yɔɔ India Today lɛ mli lɛ hiɛ yitso ko ni ji: “He ni Atuu Aha Basabasafeemɔ” ni ewie yɛ mli akɛ: “Naagba ko ni miiya nɔ ni eewo jeŋba kɛ shihilɛ kpakpa ni he hiaa waa ni haa maŋ muu fɛɛ hiɔ shi kɛ ekomefeemɔ ni mli wa lɛ mligbalamɔ he gbeyei ji womɔ ni awo awuiyeli, atuatsemɔ ni akɛbuuu mɔ, kɛ mlakwamɔ nɔ kɛshɛ he ni eetsɔ nifeemɔ ko ni atuu he aha lɛ.” Ni kɛ polisifoi miiku awuiyeli naa lɛ, bei komɛi lɛ shihilɛ lɛ nyɛɔ amɛnɔ ni amɛfeɔ fe bɔ ni mla he nitsumɔ ŋmɛɔ gbɛ, ni amɛ diɛŋtsɛ po amɛkɛ awuiyeli gbɛi komɛi tsuɔ nii. Amaniɛbɔɔ ni tsɔ hiɛ ni jɛ India lɛ kɛɔ akɛ: “Gboimɔ ni agboiɔ yɛ polisifoi adɛŋ lɛ miiya nɔ babaoo.” Ni enɛ ji anɔkwale yɛ maji krokomɛi amli.

Nibii ni haa mɔ ko bajeɔ awuiyeli shishi lɛ miiya nɔ eefite kwraa. Amaniɛbɔɔ ko ni jɛ United States lɛ tsɔɔ akɛ “awuiyeli loo juu sa Amerika shiai ejwɛ mli ekome he yɛ 1988.” Kɛfata he lɛ, gbekɛbii pii kɛ amɛhe miiwo awuiyeli mli waa. Latin Amerika wolo tɛtrɛɛ ni atsɛɔ lɛ Visión lɛ wieɔ akɛ “sicario [mɛi ni awoɔ amɛ nyɔmɔ ni amɛgbe gbɔmɛi] nyɔŋma fɛɛ nyɔŋma mli nɛɛhu ji gbekɛbii ‘Gbekɛbii’ [ji amɛ] yɛ fɔmɔ naa kɛ agbɛnɛ yɛ mla hebuu mli hu.” Agbɛnɛ hu, gbekɛbii ni kɛ amɛhe woɔ awuiyeli mli lɛ ji nɔ ko ni miiya nɔ yɛ jeŋ fɛɛ.

Biblia lɛ gba efɔ shi nɔ ni miihe ashɛ afii 2,000 nɛ akɛ: “Shi ná enɛ ole akɛ naagbee gbii lɛ anɔ lɛ jaramɔ bei baaba. Ejaakɛ gbɔmɛi aaatsɔmɔ hesuɔlɔi, shika suɔlɔi, . . . mɛi ni he tseee, mɛi ni edɔɔɔ mɔ he, . . . mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi . . . Shi gbɔmɛi fɔji kɛ shishiulɔi aaawo wu yɛ efɔŋ mli; amɛlakaa mɛi ni amɛ hu alakaa amɛ.”​—2 Timoteo 3:​1-4, 13.

Kɛjɛ 1914 kɛbaa nɛɛ, odaseyeli ni tsɔɔ akɛ nakai jaramɔ bei lɛ amli wɔyɔɔ nɛɛ lɛ fa babaoo. Ni akɛni je lɛ ena amanehulu kɛjɛ jeŋ tai enyɔ kɛ tai wuji krokomɛi amli hewɔ lɛ, ebatsɔ nɔ ni anyɛɛɛ nɔ aye dɔŋŋ yɛ gbɛi pii anɔ, basabasa jeŋ. Awuiyeli efa babaoo. Awuiyelɔi lɛ miikudɔ nibii, yɛ maŋtiasei pii amli, ni amɛha maŋbii ni yeɔ mla nɔ lɛ po ashihilɛ etsake. Taakɛ U.S. Amerika maŋ onukpa ko ni ale lɛ waa lɛ kɛɛ lɛ: “Nibii babaoo yɛ ni esa akɛ wɔsusu he waa diɛŋtsɛ bianɛ, nibii ni be ko lɛ wɔsheee he gbeyei. Bei komɛi lɛ, wɔsheɔ gbeyei aahu akɛ ehaa wɔtsɔmɔɔ mɛi ni awo amɛ tsuŋ yɛ be mli ni mɛi ni esa akɛ amɔmɔ amɛ awo tsuŋ lɛ moŋ eye amɛhe kɛnyiɛ.”

Nɔ ni ejɛ mli eba ji akɛ, ŋmɛnɛ gbɔmɛi kɛ nibii ni afii 20 loo 30 ni eho nɛ lɛ, ehe ehiaaa lɛ fɛɛ miibu amɛhe. Akɛ samfelei enyɔ loo etɛ po miiwo shinai anaa, ni asaa akɛ dadei hu woɔ mli ni emli awa. Gbɔmɛi babaoo ji mɛi ni hiɛɔ shika pii koni kɛ ojotswalɔi komɛi aaafo amɛ lɛ, ni esa amɛhiɛ ni amɛkayi amɛ yɛ shika ni amɛhiɛɛɛ ni amɛkɛaaha julɔi nɛɛ hewɔ. Gbɛjegbɛi pii yɛ ni kɛ duŋ wo lɛ anyiɛɛɛ nɔ, ja mɛi ni leee nɔ ko nɔ ko, kɛ mɛi ni jeɔ buulu ekaa, kɛ mɛi ni shihilɛ komɛi ahewɔ ni anaa amɛ yɛ jɛmɛ lɛ pɛ​—ni amɛtsɔmɔɔ mɛi ni awuiyelɔi ni kpaa shi yɛ maŋtiasei amli awuiyeli hei nɛɛ anine shɛɔ amɛnɔ yɛ gbɛ ni yɔɔ mlɛo nɔ.

No hewɔ lɛ, mɛni wɔbaanyɛ wɔfee ni wɔkatsɔmɔ mɛi ni awuiyelɔi anine shɛɔ amɛnɔ yɛ basabasa kɛ awuiyeli jeŋ nɛɛ mli? Mɛɛ gbɛ nɔ wɔɔtsɔ wɔkpee naa?