Maŋtsɛyeli Jajelɔi Bɔ Amaniɛ

Yehowa Odasefoi Shiɛɔ Trukaa ni Nibii Kpakpai Jɛɔ Mli Baa

MƐI pii yɛ ni amɛnu Biblia mli anɔkwale lɛ he klɛŋklɛŋ kwraa beni Yehowa Odasefonyo ko shiɛ tsɔɔ amɛ trukaa. Odasefoi lɛ nyiɛɔ Yesu kristo nɔkwɛmɔ nɔ lɛ sɛɛ yɛ enɛ mli, mɔ ni shiɛ trukaa etsɔɔ Samaria yoo ko yɛ nu bu ko he beni yoo lɛ ba nushamɔ lɛ. (Yohane, yitso 4) Yɛ Afrika Bokagbɛ lɛ, Yehowa Odasefonyo ko shiɛ trukaa etsɔɔ Katolek osɔfo yoo ko. Buu Mɔɔ Asafo lɛ nitsumɔ he nine lɛ gba nɔ ni jɛ mli ba:

◻ Gbi ko leebi maaŋkpa beni eyaa maŋ lɛ mli lɛ, Odasefonyo yoo nɛɛ kɛ Katolek osɔfo yoo ko kpe. Ni eŋɔ hegbɛ lɛ ni ekɛbi osɔfo yoo lɛ akɛ: “Nɛgbɛ oyaa leebi maaŋkpa benɛ?” Ni eha lɛ hetoo akɛ: “Miiya miyasɔle maha mi-Nyɔŋmɔ lɛ.” Kɛkɛ ni nyɛmiyoo lɛ bi osɔfo yoo lɛ akɛ: “Ani ole o-Nyɔŋmɔ lɛ gbɛi?” Ni eha lɛ hetoo akɛ, “Ani jeee egbɛi ji Nyɔŋmɔ?” Ni Odasefonyo lɛ kɛɛ lɛ akɛ ebaaba eshia nakai shwane lɛ ni amɛbagba Nyɔŋmɔ gbɛi he sane. Yɛ sanegbaa lɛ sɛɛ lɛ, osɔfo yoo lɛ tee esɔlemɔ lɛ ni eyabi osɔfoi lɛ ateŋ mɔ kome kɛji ele nɔ ni “Yehowa” damɔ shi kɛha. Hetoo ni eha lɛ ji, “Nyɔŋmɔ gbɛi ni.” Efee osɔfo yoo lɛ naakpɛɛ akɛ osɔfo lɛ le enɛ, shi etsɔko lɛ nakai da.

Odasefonyo lɛ tee yoo lɛ shia kɛtsara nɔ shii nɛɛhu ni etsɔɔ lɛ anɔkwale ni kɔɔ Triniti, susuma, hɛl la, kɛ hiɛnɔkamɔ ni yɔɔ kɛha gbohii lɛ he saji. Yoo lɛ kpɛlɛ fɛɛ nɔ ni ebi Odasefonyo lɛ ni eha lɛ be fioo ko ni ekɛsusu nɛkɛ tsɔɔmɔi heei ni ekase nɛɛ ahe. Otsii enyɔ sɛɛ lɛ, etee Odasefonyo lɛ ŋɔɔ ekoŋŋ ni ebi ni amɛgba nibii krokomɛi ahe sane amɛfata he. No mli lɛ, osɔfo yoo nɛɛ ekpɛ eyiŋ momo akɛ ebaashi sɔlemɔ lɛ, ni efite emagai, ashinao ni ekɛsɔleɔ, kɛ ekrɔs lɛ fɛɛ momo. Osɔfo lɛ bɔ mɔdɛŋ ni etsɔ osɔfo yoo lɛ yiŋ ni eku esɛɛ eba, shi ekpɛ eyiŋ akɛ ebaanyiɛ anɔkwale lɛ sɛɛ. Yɛ sɛɛ mli lɛ abaptisi lɛ, ni ekɛ nyɔji babaoo esɔmɔ akɛ daa gbɛgbalɔi awalɔ yɛ egbɔmɔtsoŋ helai kɛ dalɛ mli naagbai ni enaa lɛ fɛɛ sɛɛ.

Akɛni eshia lɛ da hewɔ lɛ, ekɛha asafo lɛ ni akɛtsu nii akɛ Maŋtsɛyeli Asa. Nyɛmimɛi lɛ jie tsu lɛ yiteŋ fɛɛ ni amɛwo lɛ ehee, ni amɛkumɔ teŋ gbogboi lɛ, ni amɛtsake tsu lɛ fa agbo ko amɛfee lɛ kpee he fɛfɛo ko. Nɛkɛ tsutsu Katolek osɔfo yoo nɛɛ hiɔ tsu ko mli yɛ asa lɛ sɛɛ. Eyɛ miishɛɛ waa akɛ ekɛ yelikɛbuamɔ ni tamɔ nɛkɛ aaaha kɛha Yehowa jamɔ.

◻ Niiashikpamɔ kroko ni tsɔɔ nilee ni yɔɔ trukaa odaseyeli mli lɛ ba kɛjɛ Kampala, yɛ Uganda. Beni amɛnyiɛ gbɛ nɔ kɛmiiya amralofoi anitsumɔ he ko lɛ, Odasefonyo maŋsɛɛ sanekpakpa shiɛlɔ ko kɛ mɛi ni fata ehe yɛ tsɔne ni woɔ amɛ kɛyaa ŋwɛitsu nɔ lɛ mli lɛ wie. Nuu ko, Ow. L, tsɔɔ mli akɛ eyɛ he miishɛɛ akɛ eeeŋɔ woji ni ekɛha lɛ lɛ, shi jeee yɛ nakai be lɛ mli nɔŋŋ. No hewɔ lɛ ekɛ egbɛi kɛ enitsumɔ he adrɛs ha maŋsɛɛ sanekpakpa shiɛlɔ lɛ. Yɛ sɛɛ mli lɛ, maŋsɛɛ sanekpakpa shiɛlɔ lɛ tee jɛmɛ ni eyabi Ow. L shi. Atsɛ lɛ kɛba, shi nɔ ni fee maŋsɛɛ sanekpakpa shiɛlɔ lɛ naakpɛɛ ji akɛ, mɔ kroko kwraa ba lɛ. Mɛi enyɔ yɔɔ nakai nitsumɔ he lɛ ni atsɛɔ amɛ nakai. Kɛkɛ ni eye Ow. L ni ji enyɔ lɛ hu odase kuku, ni lɛ hu ena wiemɔ lɛ he miishɛɛ waa diɛŋtsɛ. Eyɛ mli akɛ klɛŋklɛŋ Ow. L miishɛɛ lɛ sɛɛ fo moŋ, shi akɛ Ow. L ni ji enyɔ lɛ je Biblia mli nikasemɔ shishi. Amrɔ nɛɛ ebatsɔ Odasefonyo ni abaptisi lɛ, ni eŋa kɛ ebinuu hu miiya amɛhiɛ waa kɛmiishɛ baptisimɔ he.

Yesu Kristo ji Tookwɛlɔ Kpakpa lɛ, ni ele mɛi ni tamɔ gwantɛŋi ni tsuii hi kɛha jalɛ nifeemɔ lɛ. Nɛkɛ niiashikpamɔi nɛɛ tsɔɔ faŋŋ akɛ etsɔɔ esɛɛnyiɛlɔi lɛ agbɛ kɛyaa nɛkɛ gbɔmɛi nɛɛ aŋɔɔ. Trukaa shiɛmɔ nyɛɔ ewoɔ yibii kpakpai!​—Yohane 10:⁠14.