Maŋtsɛyeli Jajelɔi Bɔ Amaniɛ
Biblia Mli Anɔkwale Ha Osɔfo Yoo ko Ye Ehe yɛ Bolivia
GBƆMƐl ni yɔɔ tsui krɔŋŋ lɛ ateŋ mɛi pii mijo foi kɛmiijɛ apasa jamɔ mli, amɛmiikase Biblia mli anɔkwale lɛ, ni amɛmiija Yehowa, anɔkwa Nyɔŋmɔ lɛ. Gbɔmɛi fe 7,600 efee nakai yɛ Bolivia, kɛ osɔfo yoo mɔ kome shihilɔ ko hu.
Beni eye afii nɛɛhu pɛ, ni M——kɛ Yehowa Odasefoi ateŋ mɔ ko kpe klɛŋklɛŋ kwraa. Lɛ eyahere shinaa naa ŋmɛlɛ lɛ nɔ beni Odasefonyo lɛ ba amɛshia lɛ, ni no ji klɛŋklɛŋ be mli kwraa ni enu ni aatsɛ Nyɔŋmɔ gbɛi Yehowa. Ehi ejwɛŋmɔ mli aahu ni ehiɛ kpaaa nɔ afii babaoo.
Akɛni lɛ pɛ ji gbekɛyoo ni yɔɔ weku lɛ mli hewɔ lɛ, akpɛ yiŋ akɛ esa akɛ efee osɔfo yoo mɔ kome shihilɔ. M——wie akɛ: “Kwɛ bɔ ni mina miishɛɛ miha akɛ mikɛ mihe miiwo Nyɔŋmɔ sɔɔmɔ mli—kɛ hoo kwraa lɛ, nakai ji bɔ ni misusu.” Shi emiishɛɛ lɛ tsɔ yiŋfutumɔ beni ena jalɛsane ni ayeee kɛ hiɛaŋkwɛmɔ ni yaa nɔ yɛ osɔfo yei ashihilɛ he lɛ. Ewie akɛ: “Ekolɛ mihiɛ kpaŋ nakai jwɛŋmɔŋ nɔnyɛɛ shihilɛi kɛ gbɔmɔtsoŋ kɛ mumɔŋ yii fɛɛ ni haa miwerɛ hoɔ mihe aahu akɛ, ehaa mibuɔ Nyɔŋmɔ akɛ Mɔ ko ni waa mɛi ayi waa ni enaaa mɔ mɔbɔ, shi jeee Mɔ ko ni yɔɔ suɔmɔ lɛ nɔ kɔkɔɔkɔ.”
Etee nɔ akɛ: ‘Beni mitsɔ osɔfo yoo mɔ kome shihilɔ lɛ, kɛbashi nakai beaŋ fɛɛ lɛ mitao gbɛi Yehowa lɛ yɛ Biblia lɛ mli fɛɛ, shi minaaa. Minaa ‘Yahweh’ pɛ, ni no ha minaa kpɛ mihe waa. Gbi ko lɛ mije kpo po akɛ miiya miyatao nakai gbɔmɛi ni wieɔ Yehowa he lɛ, shi miyanaaa amɛ.
‘Be saŋŋ ho, ni gbi ko beni minyiɛ gbɛ nɔ ni miiya wɔweku shia lɛ, mina okadi ko, ‘Yehowa Odasefoi a-Maŋtsɛyeli Asa.’ Miitao ni makɛɛ amɛ akɛ amale gbalɔi ji amɛ, shi mɔ ko mɔ ko bɛ asa lɛ nɔ. Miku misɛɛ mitee jɛmɛ ekoŋŋ enɔ Hɔgbaa. No mli lɛ aafee kpee, ni mɛi saŋŋ ahiɛ fee amɛ yaa akɛ amɛaana osɔfo yoo ni ewo esɔfo atade kɛta amɛteŋ. Ni akpa kpee lɛ, mibɔ mɔdɛŋ akɛ maje kpo oya. Shi yɛ fɛɛ sɛɛ lɛ, Odasefoi lɛ ateŋ mɔ kome ŋa mi, no hewɔ lɛ mibi yoo nɛɛ akɛ, ‘Mɛni hewɔ nyɛkɔ Mɔ Krɔŋkrɔŋ lɛ gbɛi ni nyɛkɛbɔɔ musu lɛ?’ Mi-sanebimɔ lɛ batsɔ Biblia mli sanegbaa, ni mito gbɛjianɔ ni ebasara mi yɛ wɔweku shia lɛ. Mifɔlɔi shwie lɛ kɛjɛ shia lɛ mli beni eba lɛ. Shi, wɔkpe ekoŋŋ yɛ nyɔji enyɔ sɛɛ, ni efɔ mi nine kɛtee lɛ diɛŋtsɛ eshia kɛha Biblia mli nikasemɔ. Saji ni eha mile lɛ ha mina miishɛɛ waa diɛŋtsɛ, ni ema nɔ mi akɛ esa akɛ Kristofoi kɛ Nyɔŋmɔ gbɛi atsu nii. Nakai odaseyeli lɛ ha mi hewalɛ ni he hiaa lɛ ni mikɛkpoo nibii gbohii fɛɛ ni atsɔɔ mi beni miji osɔfo yoo lɛ.
“Mikai mishihilɛ mli nibii pii beni miyɔɔ osɔfo yei ashia lɛ. Akɛ nɔkwɛmɔ nɔ lɛ, be ko lɛ, niyenii babaoo he bahia mi waa diɛŋtsɛ. No hewɔ lɛ miŋma wolo ni mikɛɛ mifɔlɔi ni amɛkɛ niyenii amaje mi, ní miyooo akɛ akwɛɔ woji fɛɛ amli yɛ osɔfo yei ashihilɛ he nɛɛ. Beni eshɛ niyeli be lɛ, akɛ bodobodo agbo kɛ koko pii bama mihiɛ, ni anyɛ minɔ ni miye niyenii falɛ nɛɛ fɛɛ. Agbɛnɛ aha mi niyenii babaoo fe nine. Mitsi ta mitsɔɔ minanemɛi lɛ, ni amɛteŋ mɔ kome wo mi ŋaa akɛ mikumɔ bodobodo ni minyɛɛɛ maye lɛ ni mikɛshwã shikpɔŋ. Beni mifee nakai lɛ nɔŋŋ pɛ kɛkɛ ni osɔfo yei lɛ ekome mɔ mi ni etsi miyisɛɛ kɛyagbee shikpɔŋ, kɛ famɔ shɛii akɛ mikɛ mililɛi alɛmɔ shikpɔŋ lɛ fɛɛ keŋkeŋ. Tsu lɛ mli da waa. Beni miyeɔ famɔ ni ekɛha mi nɛɛ nɔ lɛ, minu ni aawie bibii ni aaŋmɔ hu—shi anaaa mi mɔbɔ bibioo kwraa po.
“Amrɔ nɛɛ minaa bɔ ni eyɔɔ miishɛɛ ha akɛ wɔɔye wɔhe kɛjɛ enɛɛmɛi fɛɛ mli. Taakɛ abaanyɛ akpa gbɛ lɛ, nɛkɛ heyeli nɛɛ biɔ afɔleshai. Nɔ kome ji akɛ, mitsɛ shwie mi kwraa kɛjɛ shia. Shi yɛ fɛɛ sɛɛ lɛ, dani mashi osɔfo yei ashihilɛ he lɛ, mina hegbɛ akɛ maye mabua osɔfoi yei krokomɛi hu ni amɛbale anɔkwale lɛ. Minaa miishɛɛ akɛ makɛɛ akɛ wɔteŋ mɛi komɛi ejɔɔ wɔwala nɔ wɔha Yehowa Nyɔŋmɔ!
“Beni mishi osɔfo yei ashihilɛ he lɛ sɛɛ lɛ, mitsɛ nuuu nɔ hewɔ ni misumɔɔɔ nitsumɔ ni awoɔ mɔ nyɔmɔ babaoo, shi eheɔ mɔ be fɛɛ lɛ shishi kwraa. Shi, miitao be babaoo kɛha Nyɔŋmɔ sɔɔmɔ. Amrɔ nɛɛ miisɔmɔ akɛ daa gbɛgbalɔ, kɛ shihilɛ ni bɛ haŋtsii, shi kɛlɛ nyɔmɔwoo babaoo yɔɔ mli. Ni nɔ ni ŋɔɔ minaa fe fɛɛ lɛ, minyɛ kɛ minyɛmimɛi hii onukpai lɛ ebafata mihe yɛ Yehowa sɔɔmɔ mli.”
Lɛlɛŋ, Biblia mli anɔkwale lɛ haa mɔ yeɔ ehe kɛjɛɔ je nɛŋ apasa jamɔ gbɛjianɔtoo lɛ he, ni ekɛ mliflimɔ kɛ miishɛɛ ni hiɔ shi daa baa.—Yohane 8:32.