‘Nyɔŋmɔ kɛ Yesu he Nilee ni Aaana’
“ENƐ ji naanɔ wala lɛ, akɛ amɛaana bo anɔkwa Nyɔŋmɔ koome lɛ, kɛ mɔ ni otsu lɛ kɛba lɛ, Yesu Kristo he nilee.” (Yohane 17:3, New World Translation) Nɛkɛ Yesu kɛɛ eŋwɛi Tsɛ lɛ yɛ sɔlemɔ mli, ni yɛ nɛkɛ gbɛ nɔ lɛ, etsɔɔ taomɔ nii ko ni he hiaa waa kɛha naanɔ wala namɔ. Shi, mɛni hewɔ ni New World Translation lɛ tsɔɔ nɛkɛ kuku nɛɛ shishi akɛ ‘aaana Nyɔŋmɔ . . . he nilee’ moŋ fe ‘ale . . . Nyɔŋmɔ,’ taakɛ Biblia shishitsɔɔmɔi pii ŋmaa lɛ?—Kwɛmɔ shishigbɛ niŋmaa kɛha Yohane 17:3 lɛ hu.
Hela wiemɔ ni atsɔɔ shishi yɛ biɛ akɛ ‘ana nilee’ aloo “ale nii” lɛ ji feemɔ-wiemɔ gi·noʹsko henɔ ko. Ni akɛ bɔ ni atsɔɔ shishi aha yɛ New World Translation lɛ mli lɛ tsu nii bɔni afee ni nakai wiemɔ lɛ shishinumɔ lɛ aje kpo jogbaŋŋ bɔ ni aaanyɛ. Gi·noʹsko klɛŋklɛŋ shishinumɔ ji ni “ale nii,” shi Hela wiemɔ lɛ yɛ shishinumɔi sɔrɔtoi babaoo. Kadimɔ shishitsɔɔmɔi ni nyiɛ sɛɛ nɛɛ:
“GINŌSKŌ (γινώσκω) tsɔɔ ná ni aaana nilee, ni ana ale nii, ayoo nii, anu shishi, aloo ni anu shishi jogbaŋŋ kɛmɔ shi.” (Expository Dictionary of New Testament Words, W. E. Vine) Enɛ hewɔ lɛ, gi·noʹsko ni atsɔɔ shishi akɛ ‘ana nilee’ lɛ jeee ‘Biblia lɛ tsakemɔ,’ taakɛ bɔ ni mɛi ni wieɔ shiɔ New World Translation lɛ ekɛɛ lɛ. Beni ewieɔ shishinumɔi sɔrɔtoi ni wiemɔ lɛ baanyɛ ana lɛ he lɛ, wiemɔi komekomei ahe nilelɔ James Hope Moulton ni ale lɛ jogbaŋŋ le wie akɛ: “Wiemɔ lɛ amrɔ be mlitsɔɔmɔ, γινώσκειν, heɔ be ni sɛɛ tsɛɔ, ‘ni aaaya nɔ ana nilee.’”—A Grammar of New Testament Greek.
A Grammatical Analysis of the Greek New Testament tsɔɔ gi·noʹsko mli taakɛ ejeɔ kpo yɛ Yohane 17:3 lɛ akɛ “etsɔɔ nifeemɔ ni yaa nɔ be kakadaŋŋ.” Nɛkɛ Hela wiemɔ nɛɛ he wiemɔ kroko hu jeɔ kpo yɛ Word Studies in The New Testament, ni Marvin R. Vincent fee lɛ mli. Enɛ kɛɔ akɛ: “Naanɔ wala baa kɛjeɔ nilee mli, aloo yɛ gbɛ kroko nɔ lɛ, nilee sɛɛtiumɔ mli, ejaakɛ wiemɔ lɛ amrɔ be mlitsɔɔmɔ lɛ tsɔɔ nifeemɔ ni yaa nɔ, niyɔsemɔ ni yaa hiɛ.” [Lɛ etsɔmɔ wiemɔi lɛ.] A. T. Robertson wolo Word Pictures in the New Testament lɛ woɔ ŋaa akɛ esa akɛ atsɔɔ wiemɔ lɛ shishi akɛ “esa akɛ aya nɔ ale nii.”
No hewɔ lɛ, yɛ shishijee Hela wiemɔ mli lɛ, Yesu wiemɔi ni yɔɔ Yohane 17:3 lɛ tsɔɔ mɔdɛŋbɔɔ ni yaa nɔ be fɛɛ be ni akɛtaoɔ ale anɔkwa Nyɔŋmɔ lɛ kɛ e-Bi, Yesu Kristo, ni ahaa enɛ jeɔ kpo jogbaŋŋ yɛ bɔ ni New World Translation lɛ etsɔɔ shishi lɛ mli. Wɔnaa nɛkɛ nilee nɛɛ kɛtsɔɔ Nyɔŋmɔ Wiemɔ lɛ kasemɔ kɛ mɔdɛŋbɔɔ kɛ agbɛnɛ wɔshihilɛ ni wɔɔha ekɛ emli shishitoo mlai lɛ akpa gbee yɛ toiboo mli lɛ nɔ. (Okɛto Hoshea 4:1, 2; 8:2; 2 Timoteo 3:16, 17 he.) Mɛɛ nyɔmɔwoo fɛfɛo mɛɔ mɛi ni bɔɔ mɔdɛŋ ni amɛleɔ Nyɔŋmɔ su kɛ ebaŋ kɛ agbɛnɛ e-Bi lɛ hu nɔ, ní no sɛɛ lɛ amɛbɔɔ mɔdɛŋ ni amɛkase amɛ lɛ? Naanɔ wala!