Kpɔmɔ Nɔ ni Akɛtsake Aha Mɛi Pii

YƐ MARCH 31, 1970 mli lɛ, ashɔ kɔɔyɔŋ lɛlɛ wulu ko ekaa naa yɛ he ko ni bɛŋkɛ Mount Fuji, yɛ Japan. Kuu ko ni ale amɛ akɛ Japanese Red Army Faction lɛ mlibii nɛɛhu mɔ gbɛfalɔi kɛ kɔɔyɔŋ lɛlɛ lɛ mli nitsulɔi fe 120 amɛto ekaa naa, ni amɛbi ni akɛ amɛ aya North Korea shweshweeshwe.

Beni kɔɔyɔŋ lɛlɛ lɛ yashɛ Seoul, Republic of Korea lɛ, Japan maŋsɔɔlɔ nukpa ni kwɛɔ gbɛfaa nɔ lɛ sɛɛ mɔ, Shinjiro Yamamura, kɛ ehe ha akɛ ekɛ ewala baawo oshara mli eha mɛi ni amɔmɔ amɛ ekaa naa nɛɛ. Akɛni mɛi ni mɔmɔ mɛi ekaa nɛɛ kpɛlɛ nɔ kɛha amɛ diɛŋtsɛ amɛ yibaamɔ nɔmimaa hewɔ lɛ, gbɔmɛi nɛɛ ŋmɛɛ mɛi ni amɛmɔmɔ amɛ lɛ fɛɛ he ja mɛi ni kudɔɔ kɔɔyɔŋ lɛlɛ lɛ pɛ. Kɛkɛ ni amɛfa kɛtee Pyongyang, ni amɛkɛ amɛhe ha North Korea nɔyelɔi lɛ. Yɛ sɛɛ mli lɛ Owura Yamamura kɛ kɔɔyɔŋ lɛlɛ kudɔlɔi lɛ ku amɛsɛɛ kɛtee Japan ni ayeee amɛ awui.

Yɛ enɛ mli lɛ, gbɔmɔ kome sɔmɔ akɛ mɔ ni akɛ lɛ tsake gbɔmɛi fe 120 lɛ awala. Enɛ baanyɛ aye abua wɔ ni wɔna bɔ ni gbɔmɔ kome baanyɛ ekɛ ewala aha akɛ kpɔmɔ nɔ ni ekatsakɛ mɛi pii anɔ. Shi bɔni afee ni wɔnu Biblia mli tsɔɔmɔ ni ji kpɔmɔ nɔ lɛ shishi lɛ, esa akɛ wɔpɛi nɛkɛ sane nɛɛ mli jogbaŋŋ wɔkwɛ.

Nɔ kome ji akɛ, ehe miihia ni wɔtao ni wɔle bɔ ni fee ni esha je shishi. Biblia lɛ tsɔɔ mli akɛ: “Gbɔmɔ kome nɔ esha tsɔ kɛba je lɛŋ, ni gbelɛ tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha.” (Romabii 5:12) Te fee tɛŋŋ ni enɛ ba? Gbɔmɔ ni atsi eta yɛ biɛ lɛ ji Adam, klɛŋklɛŋ adesa ni abɔ lɛ. Obaanyɛ okane ebɔɔ he yinɔsane kɛ bɔ ni fee ni egba afa kɛjɛ Nyɔŋmɔ mla he lɛ. Enɛ jeɔ kpo yɛ Biblia mli wolo ni ji 1 Mose lɛ klɛŋklɛŋ yitsei etɛ lɛ mli.

Sane lɛ jieɔ lɛ kpo faŋŋ akɛ mɔ ko yɛ ni hɔ nifeemɔ ni ha Adam fee esha klɛŋklɛŋ kwraa lɛ sɛɛ ni anaaa lɛ. Bɔni efee ni etsu hewalɛ he akɔnɔ ni ena lɛ he nii lɛ, mɔ ni woɔ nibii amli wu nɛɛ tsɔ ŋaa koni eye Adam kɛ eshwiei fɛɛ ni eeena lɛ anɔ. Nɛkɛ mɔ nɛɛ ji Satan Abonsam. Atsɛɔ lɛ “shishijee onufu” hu, ejaakɛ ekɛ onufu tsu nii ni ekɛnyiɛ Adam hiɛ kɛtee eshɛ mli. (Kpojiemɔ 12:⁠9) Eyɛ mli akɛ adesai a-Bɔlɔ ni yɔɔ suɔmɔ lɛ ekɛɛ Adam akɛ ekɛ bulɛ aha hegbɛ ni E-yɔɔ ni ekɛaakpɛ eyiŋ yɛ nɔ ni hi kɛ nɔ ni ehiii he moŋ, shi onufu lɛ laka Adam ŋa Hawa koni ekabo Nyɔŋmɔ toi. Kɛkɛ ni elaka ewu hu koni ekafee toiboo. Adam tsɔ nakai gbɛ nɔ etsɔɔ akɛ eye ehe kɛjɛ Nyɔŋmɔ he, ejɛ esuɔmɔ mli etsɔ eshafeelɔ, ni nɔ ni ebaanyɛ efee pɛ ji ni ekɛ nakai shihilɛ lɛ aha eshwiei.

Nɔ ni jɛ mli ba lɛ miipiŋ wɔ lolo. Yɛ mɛɛ gbɛ nɔ? Ojogbaŋŋ, Bɔlɔ lɛ ewie yɛ gbɛ ni ja nɔ akɛ kɛ Adam kɛ Hawa je gbɛ amɛhala toigbele lɛ, nɔ ni baajɛ mli aba baafee gbele. No hewɔ lɛ akɛni Adam fee esha hewɔ lɛ, ehɔɔ adesai fɛɛ ewo esha kɛ gbelɛ nyɔŋyeli mli.​—1 Mose 2:​17; 3:​1-7.

Te aaafee tɛŋŋ akpɔ adesai kɛjɛ nakai eshafeemɔ shihilɛ lɛ mli? Yesu Kristo ba shikpɔŋ nɔ ni “eŋɔ esusuma lɛ eha yɛ mɛi pii akpɔmɔ hewɔ,” ni enɛ gbele gbɛ koni ahere adesai ayiwala.​—Mateo 20:⁠28.

Enɔhaa kɛ Heŋmɛɛmɔ

Biblia lɛ tsɔɔ akɛ adesai akpɔmɔ kɔɔ nifeemɔi enyɔ he: (1) ehemɔ ekoŋŋ kɛ (2) heŋmɛɛmɔ. Yɛ Hela wiemɔ (lyʹtron) ni atsɔɔ shishi akɛ “kpɔmɔ nɔ” lɛ he lɛ, Biblia he nilelɔ Albert Barnes ŋma akɛ: “Wiemɔ kpɔmɔ nɔ lɛ tsɔɔ nyɔmɔ ni awoɔ koni akɛkpɔ nyɔji diɛŋtsɛ. Yɛ tawuu mli lɛ, kɛ henyɛlɔ lɛ ŋɔ gboklɛfoi lɛ, atsɛɔ shika ni abiɔ dani aŋmɛɛ amɛhe lɛ akɛ kpɔmɔ nɔ; ni tsɔɔ akɛ no ji nɔ ni atsɔɔ nɔ ahaa amɛyeɔ amɛhe. No hewɔ lɛ, atsɛɔ nɔ fɛɛ nɔ ni haa aŋmɛɛɔ mɔ ko he kɛjɛɔ toigbalamɔ, loo piŋmɔ, loo esha mli lɛ akɛ kpɔmɔ nɔ.”

Hɛɛ, abaanyɛ atsɛ “nɔ fɛɛ nɔ ni haa aŋmɛɛɔ mɔ ko he” lɛ akɛ lyʹtron. No hewɔ lɛ nɛkɛ Hela wiemɔ nɛɛ maa heŋmɛɛmɔ nifeemɔ lɛ nɔ mi.a

Bɔfo Paulo kɛ wiemɔ an·tiʹly·tron ni bɛŋkɛ wiemɔ lɛ tsu nii ni ekɛma nyɔmɔ ni awo akɛ kpɔmɔ nɔ lɛ jarawalɛ nɔ mi. Eŋma yɛ 1 Timoteo 2:6 (NW) akɛ: “[Yesu] ŋɔ ehe eha akɛ kpɔmɔ nɔ ni yeɔ egbɔ eha mɛi fɛɛ.” Beni Parkhurst Greek and English Lexicon to the New Testament lɛ wieɔ he lɛ, ekɛɛ: “Etsɔɔ nɔ jara ni atsɔɔ nɔ akpɔɔ nyɔji kɛjɛɔ henyɛlɔ lɛ dɛŋ; kɛ nakai tsakemɔ ni emli ni akɛ mɔ ko wala kpɔɔ mɔ kroko lɛ nɔ lɛ.” Nɔ ni amaa nɔ mi yɛ biɛ ji bɔ ni kpɔmɔ nɔ jara ni awoɔ lɛ kɛ nɔ ni akpɔɔ lɛ jara loo ehilɛ yɛɔ egbɔ ha koni eha jalɛsaneyeli nsɛnii lɛ aŋmɛ pɛpɛɛpɛ. Te aaafee tɛŋŋ ni aaabu Yesu kpɔmɔ afɔleshaa lɛ akɛ “kpɔmɔ nɔ ni yeɔ egbɔ” lɛ?

Kpɔmɔ Nɔ ni Yeɔ Egbo

Adam hɔɔ adesai fɛɛ, ni wɔ hu wɔfata he ewo esha kɛ gbele mli. Jara, loo nyɔmɔ, ni ewo lɛ ji ewala akɛ adesa ni yeɔ emuu lɛ, kɛ naanɔ shihilɛ he hegbɛ ni eyɔɔ lɛ fɛɛ. Bɔni afee ni aha enɛ nɔ lɛ,​—ehe bahia ni awo adesa wala kroko ni yeɔ emuu he nyɔmɔ​—kpɔmɔ nɔ ni yeɔ egbɔ. Shi mɔ ko mɔ ko bɛ gbɔmɛi ni yeee emuu ni afɔ amɛ lɛ ateŋ ni baanyɛ ekɛ adesa wala ni yeɔ emuu ni he hiaa lɛ aha. (Hiob 14:4; Lala 51:⁠7) Shi Nyɔŋmɔ jɛ enilee mli eje gbɛ ko kɛjɛ fimɔ nɛɛ mli. Ejie e-Bi koome lɛ wala ni yeɔ emuu lɛ kɛjɛ ŋwɛi kɛbawo obalayoo fro ko musuŋ, ni eha afɔ lɛ akɛ gbɔmɔ ni yeɔ emuu. (Luka 1:​30-38; Yohane 3:​16-18) Nɛkɛ tsɔɔmɔ ni kɔɔ Yesu ni obalayoo fro fɔ lɛ nɛɛ he lɛ jeee blema adesa ko ni aka yiŋ awie koni akɛwo jamɔ ko shishitolɔ nɔ. Shi moŋ, etsɔɔ sane naatsɔɔmɔ ni jwɛŋmɔ yɔɔ mli ni ha Nyɔŋmɔ kɛ kpɔmɔ nɔ lɛ ha lɛ mli.

Bɔni afee ni agbe kpɔmɔ nɛɛ naa lɛ, ehe bahia ni Yesu ahi shi akɛ mɔ ni he tse yɛ eshikpɔŋ nɔ shihilɛ be lɛ fɛɛ mli. Ni efee nakai. Kɛkɛ ni egbo afɔleshaa gbele. Nɛkɛ gbɛ nɔ Yesu tsɔ ewo ewala akɛ adesa ni yeɔ emuu akɛ kpɔmɔ nɔ lɛ jara ni ekɛha koni ekɛjie adesai lɛ. (1 Petro 1:19) No hewɔ lɛ wɔbaanyɛ wɔkɛɛ yɛ gbɛ ni ja nɔ akɛ “mɔ kome gbo mɛi fɛɛ yi gbele.” (2 Korintobii 5:14) Hɛɛ, “taakɛ bɔ ni Adam mli ni mɛi fɛɛ gboiɔ yɛ lɛ, nakai nɔŋŋ kɛ Kristo mli ni amɛ fɛɛ amɛyi aaana wala yɛ.”​—1 Korintobii 15:⁠22.

Gbɔmɔ Kome ni Akɛ lɛ Tsake Mɛi Pii

Anaa yɛ kɔɔyɔŋ lɛlɛ ni ashɔ yɛ ekaa naa ni atsi ta kɛtsɔ hiɛ lɛ mli akɛ mɛi ni amɔmɔ amɛ lɛ bɛ gbɛ ko ni amɛaatsɔ nɔ amɛye amɛhe kɛ amɛji niiatsɛmɛi po. Yelikɛbuamɔ ni jɛ sɛɛ he miihia, ni esa akɛ ana taomɔ nii komɛi yɛ mɔ ni kɛ ehe baaha ni ekɛtsake amɛ lɛ hɛ. Nakai nɔŋŋ eji anɔkwale yɛ gbɛ ni da ni yaa shɔŋŋ nɔ yɛ kpɔmɔ nɔ ni he hiaa ni ekɛaakpɔ adesai lɛ he. Lalatsɛ ko ŋma akɛ: “Amɛshwaa amɛfɔɔ amɛnii ni amɛna babaoo lɛ nɔ. Mɔ ko mɔ ko nyɛŋ enyɛmi ekpɔ, loo ni eeeha Nyɔŋmɔ eyi nii, (ejaakɛ amɛsusuma kpɔmɔ nii lɛ jara wa tsɔ, ni ehaa eŋmɛɔ he kwraa).” (Lala 49:​7-9) Yelikɛbuamɔ ni jɛ sɛɛ he miihia adesai lɛlɛŋ. Gbɔmɔ kome wala baafa aha adesai fɛɛ jiemɔ kɛji akɛ aaana taomɔ nii ni baaha Nyɔŋmɔ jalɛsaneyeli nsɛnii lɛ aŋmɛ pɛpɛɛpɛ yɛ ehe. Yesu Kristo pɛ ji gbɔmɔ ni yeɔ emuu ni ana taomɔ nii lɛ yɛ ehe.

Yehowa Nyɔŋmɔ eto gbɛjianɔ kɛha adesai akpɔmɔ kɛtsɔ kpɔmɔ nɔ ni Yesu Kristo wo lɛ jara lɛ nɔ. Shi Nyɔŋmɔ efee babaoo. Ebu Satan Abonsam, mɔ ni nyiɛ adesai ahiɛ kɛtee esha mli lɛ gbele fɔ. (Kpojiemɔ 12:​7-9) Etsɛŋ ni Yehowa baamɔ nakai nɔtɔlɔ lɛ ni ebaakpata ehiɛ kwraa kɛtsɔ ‘la kpaakpo ni tsoɔ kɛ swɔɔ lɛ ni eeeshɛ lɛ efɔ mli’ lɛ nɔ, ni enɛ feɔ enaanɔ hiɛkpatamɔ he okadi. (Kpojiemɔ 20:​1-3, 7-10, 14) Kɛ ajie mumɔŋ bɔɔ nɔ fɔŋ nɛɛ ni akɛ kpɔmɔ nɔ lɛ bɔi nitsumɔ lɛ, adesai baana heyeli mli ŋɔɔmɔ, ni jeee kɛmiijɛ esha kɛ gbele dɛŋ kɛkɛ, shi kɛmiijɛ Satan hewalɛ fɔŋ lɛ hu shishi. Beni amɛna heyeli nɛkɛ ni akɛ Kristo kpɔmɔ afɔleshaa lɛ etsu amɛhe nii kɛmɔ shi lɛ, adesai toibolɔi baashwere kɛya emuuyeli mli.

Kpɔmɔ Nɔ Gbɛjianɔtoo lɛ kɛ Bo

Beni mɛi ni yɔɔ Bokagbɛ lɛ ateŋ mɛi pii kase Yesu Kristo kpɔmɔ afɔleshaa lɛ he nii lɛ, amɛhiɛ sɔ nɔ ni Nyɔŋmɔ efee kɛha amɛ lɛ waa. Kazuo ji nɔkwɛmɔ nɔ. Efũɔ tsofa ko ni akɛfutuɔ pente mli ni haa efeɔ tseretsere lɛ, ni ehaa efeɔ tamɔ mɔ ko ni etɔ dãa. Kɛ eekudɔ tsɔne ni etɔ nɛkɛ lɛ, efiteɔ etsɔnei lɛ shiiabɔ. Enanemɛi lɛ ateŋ mɛi etɛ gbe amɛhe beni amɛna akɛ amɛfite amɛshihilɛ nɛkɛ lɛ. Kazuo hu bɔ mɔdɛŋ ni egbe ehe. Yɛ sɛɛ mli lɛ, ebɔi Biblia lɛ kasemɔ. Akɛni anɔkwale ni ekase lɛ tsirɛ lɛ hewɔ lɛ, ekpɛ eyiŋ akɛ ebaatsake eshihilɛ. Epele ehe waa yɛ nɛkɛ tsofa ni akɛfutuɔ pɛnte ni ekɛfiteɔ egbɔmɔtso nɛɛ heŋmɛɛmɔ he, ni eshɛɔ be ni eyeee mli omanye. Enaaa nɔ ni efeɔ, ejaakɛ eheloo akɔnɔ lɛ kɛ bɔ ni eshweɔ akɛ eeefee nɔ ni ja lɛ fɛɛ miigbala lɛ. Kwɛ miishɛɛ ni ena akɛ enyɛ esɔle eha Nyɔŋmɔ kɛha eshaifaa kɛtsɔ Yesu Kristo kpɔmɔ afɔleshaa lɛ jara lɛ nɔ! Kɛtsɔ sɔlemɔ kɛ yelikɛbuamɔ ni enine shɛ nɔ kɛjɛ enanemɛi Kristofoi adɛŋ lɛ nɔ lɛ, Kazuo ye nɔ fɔŋ nɛɛ nɔ kunim ni eesɔmɔ Yehowa bianɛ akɛ sɔɔlɔ ni yɔɔ miishɛɛ ni yɔɔ henilee ni mli tse keŋkeŋ.

Ani okaiɔ Chisako, ni atsi eta yɛ sane ni tsɔ enɛ hiɛ lɛ shishijee lɛ? Kɛtsɔ Biblia lɛ kasemɔ nɔ lɛ, lɛ hu ebanu kpɔmɔ nɔ lɛ he gbɛjianɔtoo ni suɔmɔ yɔɔ mli lɛ shishi. Beni ekase akɛ Nyɔŋmɔ kɛ e-Bi lɛ ha koni akɛjie adesai kɛjɛ esha mli lɛ, ena enɔ hewalɛ waa. Chisako jɔɔ ewala nɔ eha Yehowa. Amrɔ nɛɛ po, ni eye afi 77 lɛ, ekɛ ŋmɛlɛtswaa 90 tsuɔ nii daa nyɔŋ nɔ ekɛgbaa gbɔmɛi Yehowa suɔmɔ kɛ emɔbɔnalɛ kpele ni ejieɔ kpo etsɔɔ lɛ he sane.

Esa akɛ kpɔmɔ nɔ lɛ afee nɔ ni he hiaa bo hu. No nɔ Nyɔŋmɔ baatsɔ agbele gbɛ ni kɛ mɔ yaa anɔkwa heyeli mli aha adesai​—heyeli kɛmiijɛ esha kɛ gbele mli. Naanɔ wala yɛ shikpɔŋ nɔ paradeiso he wɔsɛɛ be ni yɔɔ nyam ka mɛi ni kpɛlɛɔ Yesu Kristo kpɔmɔ afɔleshaa lɛ nɔ lɛ hiɛ. Ofainɛ taomɔ Yehowa Odasefoi ni bo diɛŋtsɛ opɛi bɔ ni ooonyɛ ona heyeli kɛmiijɛ esha kɛ gbele mli kɛtsɔ kpɔmɔ nɔ he gbɛjianɔtoo ni suɔmɔ yɔɔ mli lɛ nɔ lɛ mli oha ohe.

[Shishigbɛ niŋmai]

[He ni Mfoniri ni yɔɔ baafa 5 lɛ Jɛ]

Courtesy of the Mainichi Shimbun