Maŋtsɛyeli Jajelɔi Bɔ Amaniɛ

Yesu Tooi lɛ Boɔ Egbee Toi

BENI shiɛmɔ nitsumɔ lɛ mli lɛɛɔ kɛyaa shikpɔŋ lɛ nɔ hei fɛɛ lɛ, Yehowa tsɔɔ ebɔfoi lɛ anɔ ni ekudɔɔ etsuji kɛyaa mɛi ni tamɔ gwantɛŋi lɛ aŋɔɔ. Amɛnuɔ Yesu gbee ni amɛkaseɔ bɔ ni amɛaafee amɛsɔmɔ lɛ kɛha naanɔ wala namɔ. Yesu wie yɛ Yohane 10:​27, 28 akɛ: “Mitooi lɛ nuɔ migbee, ni mile amɛ, ni amɛnyiɛɔ misɛɛ, ni mi nɔŋŋ mihaa amɛ naanɔ wala.” Kadimɔ bɔ ni mɛi ni yɔɔ tsui krɔŋŋ ni yɔɔ Madagascar lɛ ebo Yesu gbee toi.

Yehowa Odasefonyo ko kɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ kɛ Your Youth​—Getting the Best Out Of lt woji lɛ eko ha datrɛfonyo ni ba koni ebakwɛ etsɛ ni he yeɔ lɛ.

Protestantnyo ji datrɛfonyo lɛ, ni esumɔɔɔ Odasefoi asane kwraa, shi ekane wolo lɛ ni ekwɛ ŋmalɛi ni atsɛ lɛ hu fɛɛ yɛ lɛ diɛŋtsɛ e-Biblia mli. Eŋa, ni lɛ hu eji Katoleknyo kɛ datrɛfonyo lɛ hu kane Youth wolo lɛ shii abɔ ejaakɛ yoo nɛɛ wie akɛ etamɔ nɔ ni lɛ ehewɔ titri aŋma nakai wolo lɛ. Bɔ ni Asafo lɛ damɔ Biblia lɛ nɔ egbala bɔ ni afi 1914 he hiaa ha lɛ mli jogbaŋŋ lɛ sa amɛhiɛ waa. Ewu tee eyana Odasefonyo ni kɛ woji lɛ ha lɛ lɛ. Ni Odasefonyo lɛ ha lɛ Life​—How Did it Get Here? By Evolution or by Creation? wolo lɛ eko ni ekɛ lɛ to gbɛjianɔ akɛ ebaasara ekɛ eŋa fɛɛ koni eha amɛsanebimɔi lɛ ahetoo. Beni etee amɛŋɔɔ lɛ, ekɛ hefatalɔi enyɔ nɛɛ je daa Biblia mli nikasemɔ shishi kɛ amɛbii etɛ lɛ hu. Amɛtee amɛhiɛ oyayaayai yɛ Biblia lɛ shishinumɔ mli.

Klɛŋklɛŋ nikasemɔ lɛ sɛɛ lɛ, weku muu lɛ fɛɛ bɔi kpeeiyaa yɛ Maŋtsɛyeli Asa lɛ nɔ, ni no sɛɛ etsɛɛɛ nɔŋŋ ni amɛŋmala amɛgbɛi yɛ Teokrase Sɔɔmɔ Skul lɛ mli. Gbekɛbii lɛ bana subaŋ kpakpa waa diɛŋtsɛ. Amɛkase kɛjɛ Biblia mli nikasemɔ lɛ mli akɛ fɔmɔgbii kɛ jamɔ mli gbijuji komɛi ni ayeɔ lɛ jeee Kristofoi anifeemɔ; no hewɔ lɛ, amɛkɛ amɛhe wooo mli dɔŋŋ. Wu lɛ kpoo akɛ ejieee ela ehaŋ ewekunyo ko ni he yeɔ lɛ, eyɛ mli akɛ amɛsusuko nakai saneyitso lɛ he yɛ amɛ Biblia mli nikasemɔ lɛ mli; etsɛɛɛ nɔŋŋ ni atade ni ewoɔ kɛfeɔ karate lɛ laaje yɛ etadei atoo he lɛ. Ekɛtee eyaha nikpɛlɔ ni ekɛkpɛ atadei eha ebii lɛ. Eloo ewoji tɛtrɛbii kɛ woji wuji fɛɛ ni kɔɔ ŋulamiiaŋkwɛmɔ he lɛ ni eshã. Beni amɛbɔi nikasemɔ lɛ sɛɛ nyɔji etɛ pɛ mli lɛ, wu lɛ kɛ ŋa lɛ fɛɛ yafolɔ amɛgbɛi amli kɛjɛ amɛsɔlemɔi ni amɛyaa lɛ mli, ni amɛtsɔɔ akɛ amɛmiisumɔ ni amɛkɛ amɛhe awo shiɛmɔ nitsumɔ lɛ mli. Amrɔ nɛɛ abaptisi amɛ.

Yoo ko ni yɔɔ Thailand lɛ miitao anɔkwale lɛ. Eyɛ mli akɛ Buddha jalɔ ji lɛ moŋ, shi etuuko ehe ehako ejamɔ lɛ da, ejaakɛ enaa osatofeemɔ kɛ hiɛjoomɔ babaoo yɛ mli. Ni kɛfata he lɛ, kusumii babaoo yɛ ni esusuɔ akɛ amɛjeee ekpakpa. No hewɔ lɛ enɛɛmɛi fɛɛ ha eje etsine.

Kɛkɛ ni enaanyo ko wo lɛ ŋaa akɛ eka Kristofoi hu ekwɛ, ni ekɛ lɛ tee Pentekost sɔlemɔ lɛ. Shi, beni afeɔ sɔlemɔ lɛ, yoo lɛ nu he waa akɛ esa akɛ eshi sɔlemɔ tsu lɛ mli ni eya shia yɛ bolɔmɔ hoo lɛ hewɔ, ejaakɛ mɔ fɛɛ mɔ miisɔle kɛ gbee ni wa waa. No ji naagbee nɔ kwraa ni ekɛtee nakai sɔlemɔ lɛ.

Sɛɛ mli lɛ, eka Roma Katolek sɔlemɔ lɛ hu. Shi beni etee no hu shii abɔ sɛɛ lɛ, esaa ebana osatofeemɔ kɛ hiɛjoomɔ lɛ ekoŋŋ, kɛ agbɛnɛ ninamɔ shihilɛ ni osɔfo lɛ yɔɔ mli lɛ. No hu baje etsine ni ekpa jɛmɛ hu yaa kwraa. Osɔfo lɛ basumɔ waa akɛ ebaale nɔ hewɔ ni eshi amɛ lɛ. Beni ebana ele eyiŋtoo lɛ, ekɛ hefɛoyeli wie akɛ: “Kɛ ootao ayafata mɛi ni yɔɔ shiŋŋ diɛŋtsɛ ahe lɛ, no lɛ yaafata Yehowa Odasefoi ahe.” Ni yoo lɛ bi lɛ akɛ: “Nɛgbɛ amɛyɔɔ?” Ni osɔfo lɛ ha hetoo akɛ: “Amɛbɛŋkɛ he ni nu he nitsulɔi lɛ yɔɔ lɛ.” Enɔ jetsɛremɔ lɛ, eyatao amɛ aahu, shi enaaa amɛ. Enijiaŋ je wui, shi kɛlɛ etee nɔ esusu Yehowa Odasefoi ahe be fɛɛ be.

Gbi ko lɛ enu ni ekuuŋbii lɛ eko kɛ hefɛoyeli miikɛɛ mɔ kroko akɛ: “Etsɛŋ ni obaatsɔ Yehowa Odasefoi lɛ ateŋ mɔ kome!” Beni enu nakai lɛ, yoo lɛ tee ekuuŋnyo ni wie nakai lɛ ŋɔɔ oya ni ebi lɛ akɛ: “Ani Yehowa Odasefoi yɛ akutso nɛɛ mli he ko?” Ni eha lɛ hetoo akɛ: “Hɛɛ. Mɛi komɛi baaba akutso nɛɛ mli amɛbaashiɛ yɛ shia kɛ shia. Obaanyɛ oyoo amɛ kɛtsɔ amɛhesaamɔ ni he tse kɛ amɛhe ni amɛhiɛɔ falefale lɛ nɔ.” Enɛ hewɔ lɛ ekɛ foi je kpo akɛ eeya eyatao amɛ. Klɛŋklɛŋ lɛ enaaa amɛ, shi beni ekuɔ esɛɛ kɛbaa eshia lɛ, ena yei enyɔ komɛi ni amɛsaa amɛhe jogbaŋŋ diɛŋtsɛ ni amɛkɛ mɔ ko miigba sane. Etee amɛŋɔɔ ni eyabi amɛ akɛ ani Yehowa Odasefoi ji amɛ lo. Beni amɛkɛɛ lɛ akɛ hɛɛ lɛ, ekpa amɛ fai akɛ: “Nyɛfainɛ nyɛbaa mishia lɛ. Miitao mikɛ nyɛ awie.”

Akɛ lɛ je Biblia kasemɔ shishi, ni yɛ shitee-kɛ-woo kɛ hefɛoyeli ni jɛ ewekumɛi aŋɔɔ lɛ fɛɛ sɛɛ lɛ, obalayoo nɛɛ bɔi kpeei baa ni ebɔi ewekumɛi lɛ hu odaseyeli.

Yesu le etooi lɛ lɛlɛŋ ni eebua amɛnaa kɛmiiba egbɛjianɔtoo lɛ mli kɛha yiwalaheremɔ kɛmiiya ejalɛ jeŋ hee lɛ mli.