Krɔɔs Lɛ​—Ani Eji Kristojamɔ He Okadi?

AFII ohai abɔ nɛ ni gbɔmɛi babaoo ekpɛlɛ krɔɔs loo sɛŋmɔtso lɛ nɔ akɛ Kristojamɔ he okadi. Shi nakai eji diɛŋtsɛ? Mɛi pii ni kɛ anɔkwayeli ehe enɛ amɛye lɛ anaa ekpɛ amɛhe akɛ amɛaale akɛ krɔɔs lɛ jeee nɔ ni ale yɛ Kristendom pɛ. Nɔ ni tamɔɔɔ nakai lɛ, akɛtsu nii yɛ jamɔi ni jeee Kristofoi anɔ mli yɛ jeŋ fɛɛ.

Akɛ nɔkwɛmɔ nɔ lɛ, yɛ afii 1500 lɛ shishijee mli, beni Hernán Cortés kɛ e-“Kristofoi” ata lɛ saa amɛhe koni amɛyatutua Aztek Maŋtsɛyeli lɛ, amɛhiɛ aflaŋaai ni aŋmala yɛ nɔ akɛ, “Nyɛhaa wɔnyiɛa Krɔɔs Krɔŋkrɔŋ lɛ sɛɛ yɛ anɔkwa hemɔkɛyeli mli, ejaakɛ nɛkɛ okadi nɛɛ shishi wɔɔye kunim yɛ.” Ekolɛ amɛnaa baakpɛ amɛhe akɛ amɛaana akɛ amɛhenyɛlɔi wɔŋjalɔi lɛ hu jaa krɔɔs ni esorooo no yɛ amɛnɔ lɛ he. Wolo, Great Religions of the World lɛ kɛɔ akɛ: “Cortés kɛ esɛɛnyiɛlɔi lɛ she gbeyei yɛ gbɔmɛi ni Aztekbii lɛ kɛ amɛ shaa afɔle lɛ kɛ nɔ ni tamɔ satan niŋmalamɔi ni yɔɔ ŋmɔlɔ ni kɔɔ Kristojamɔ he lɛ hewɔ: . . . ni amɛmiija kɔɔyɔɔ kɛ nugbɔnɛmɔ nyɔŋmɔi lɛ ahe okadii ni tamɔ krɔɔs.”

Niŋmalɔ José Alberto Furque tsɔɔ yɛ adafitswaa wolo, La Nación lɛ fa ni aŋmalaa saji titrii yɛ jɛmɛ lɛ mli akɛ “ŋwanejee ko ni naa wa waa te shi yɛ gbɔmɔ shɔɔ kɛ esu he nilelɔi lɛ kɛ blema nibii ataomɔ he nilelɔi lɛ ateŋ yɛ krɔɔs he okadii sɔrɔtoi ni anaa lɛ shishijee kɛ nɔ ni etsɔɔ lɛ he,” kɛjɛ afii ohai 18 lɛ teŋgbɛ kɛyaa ni amɛnaa babaoo yɛ Amerika Teŋgbɛ kɛ Wuoyigbɛ hewɔ lɛ he. Eka shi faŋŋ akɛ akɛni mɛi komɛi ahe miitswa shi koni amɛbaa gbɛhe mli ni krɔɔs lɛ ebaje lɛ yi akɛ “Kristofoi” akadimɔ nii ko ni ekaaa hewɔ lɛ, amɛka amɛyiŋ amɛkɛ susumɔ lɛ ba akɛ ashiɛ sanekpakpa lɛ yɛ Amerika maji lɛ amli momo yɛ gbɛ ko nɔ dani Columbus fã egbɛ ni he gbɛi lɛ! Esa akɛ ashɛ susumɔ ni tamɔ nɛkɛ lɛ afɔ akɛ amale.

Yɛ be ni sa mli lɛ, nibii ni atee nɔ ana yɛ nɛkɛ sane nɛɛ he lɛ kɛ ŋwanejeei lɛ fɛɛ ba naagbee. Furque wie akɛ: “Akɛma shi faŋŋ yɛ wolo ko ni Smithsonian Institution lɛ ŋma yɛ 1893 lɛ mli akɛ aaja krɔɔs lɛ momo . . . jeeŋmɔ dani klɛŋklɛŋ Europabii lɛ bashɛ Amerika Kooyigbɛ, ni enɛ maa sane ni atsɔɔ akɛ . . . okadi ni tamɔ nɛkɛ je kpo yɛ akutsei fɛɛ mli akɛ jamɔ ni akɛhaa hewalɛi ni jeɔ wala shishilɛ fa lɛ nɔ mi.”

Biblia lɛ tsɔɔ akɛ, Yesu gbooo yɛ krɔɔs loo sɛŋmɔtso ni akɛ tso kome ebele ekroko mli lɛ nɔ kwraa, shi moŋ yɛ tso ni ma shi jaŋŋ loo stau-ros’ nɔ. Nɛkɛ Hela wiemɔ ni jeɔ kpo yɛ Mateo 27:40 nɛɛ shishi ji tso ni ma shi jaŋŋ, tamɔ tsei ni akɛmaa tsũ. No hewɔ lɛ krɔɔs lɛ damɔɔɔ shi kɛhaaa anɔkwa Kristojamɔ. Yesu Kristo tsɔɔ nɔ ni ji anɔkwa Kristojamɔ “kadimɔ nii” loo okadi diɛŋtsɛ lɛ beni ekɛɛ esɛɛnyiɛlɔi lɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.​—Yohane 13:⁠35.