Mɛɛ Gbɔmɛi Nɛkɛ Osumɔɔ Amɛ Waa?

“AATAO ŊA. Esa akɛ efee mɔ ni tsuɔ ni eyɔɔ bloblo, ni egbe univɛsiti naa loo mɔ ni etsa nɔ kɛtee hiɛ po. Esa akɛ efee mɔ ni jɛ weku kpakpa ní yɔɔ nii mli. Aasumɔ mɔ ni akɛ lɛ jɛ mligbalamɔ kuu kome mli.”

NƐKƐ ji bɔ ni afɔɔ gbalashihilɛ mlibotemɔ he adafitswaa ni akɛwoɔ India adafitswaa woji amli lɛ ŋmaa. Ekolɛ, obaanyɛ ona nɔ ko ni tamɔ nakai yɛ je lɛŋ hei sɔrɔtoi babaoo hu. Yɛ India lɛ, bei pii lɛ nuu lɛ fɔlɔi ji mɛi ni kɛ adafitswaa nɛɛ woɔ woji amli. Hetooi ni baaba lɛ ekomɛi baanyɛ afee mfoniri ni asha ni miitsɔɔ obalayoo ni wo sari tsuru ni kpɛlɛɔ kɛ shika jwinei babaoo. Kɛji gbekɛnuu lɛ weku kpɛlɛ enɔ lɛ, no lɛ abaaje ehe wiemɔ shishi kɛha gbalashihilɛ mlibotemɔ.

Nibii ni Afɔɔ Namɔ Akɛ Abuɔ Waa

Afɔɔ bɔ ni ataoɔ ŋa ni tsuɔ lɛ namɔ waa yɛ India. Enɛ jɛ hemɔkɛyeli ni ehe shi waa, ni tsɔɔ akɛ Hindubii amligbalamɔ ni baa shi fe fɛɛ lɛ ahewolo nɔ dĩɔ lɛ mli. Nyɛsɛɛ nɛɛ, India televishin nɔ sane ko ni je kpo lɛ wie gbekɛbii yei enyɔ komɛi ahe, mɔ kome tsuɔ ni mɔ kroko lɛ dĩɔ. Gbekɛyoo ni tsuɔ lɛ yitsoŋ wa ni ebuuu mɔ; gbekɛyoo ni dĩɔ lɛ mli hi ni ehe jɔ. Kɛkɛ ni ashwaiafeemɔŋ tsakemɔ ko ba, ni gbekɛyoo ni tsuɔ lɛ badĩ ákɛ etoigbalamɔ, ni gbekɛyoo ni dĩɔ lɛ batsu ákɛ enyɔmɔwoo. Eka shi faŋŋ akɛ oti ni yɔɔ sane nɛɛ mli ji, eyɛ mli akɛ yɛ naagbee lɛ ekpakpafeemɔ yeɔ kunim moŋ, shi hewolo tsuru ataoɔ.

Bei pii lɛ nɛkɛ hewolo nɔ su mligbalamɔ henumɔi nɛɛ yaa shɔŋŋ fe bɔ ni mɛi susuɔ. Akɛ nɔkwɛmɔ nɔ lɛ, ekolɛ Asianyo ko baaya Anaigbɛ bii amaŋ ko nɔ, ni eeewie akɛ akɛ lɛ yeee yɛ gbɛ kpakpa nɔ, yɛ ehewolonɔ su loo bɔ ni ehiŋmɛii yɔɔ sukusuku lɛ hewɔ. Nifeemɔi tamɔ nɛkɛ dɔɔ lɛ, ni enuɔ he akɛ asumɔɔɔ esane. Shi kɛ eku esɛɛ etee lɛ diɛŋtsɛ emaŋ lɛ, ekolɛ ekɛ gbɔmɛi ni jɛ hewolo nɔ sui krokomɛi amli lɛ baaye yɛ nakai gbɛ nɔŋŋ nɔ. Ni ŋmɛnɛ po, hewolo nɔ su kɛ weku mli ni mɔ ko jɛ lɛ ji nɔ titri ni mɛi damɔɔ nɔ amɛbuɔ gbɔmɛi krokomɛi akɛ mɛi ni nɔ kwɔlɔ.

Maŋtsɛ Salomo ni hi shi blema lɛ ŋma akɛ: “Shika feɔ nɔ fɛɛ nɔ.” (Jajelɔ 10:19) Kwɛ bɔ ni eji anɔkwale ha! Ninamɔ loo shika hu saa bɔ ni abuɔ mɛi ahaa lɛ he. Shi afɔɔɔ bɔ ni afee ana nii lɛ he susumɔ. Ani mɔ lɛ batsɔ niiatsɛ yɛ nii ni etsuɔ waa aloo yɛ enitsumɔ ni enyɛɔ ekwɛɔ nɔ jogbaŋŋ lɛ hewɔ, loo kɛtsɔ anɔkwa ni eyeee nɔ? No he ehiaaa tsɔ. Mɛi pii sumɔɔ ni amɛná mɛi ni yɔɔ nii lɛ ahiɛ duromɔ, yɛ nii ni amɛyɔɔ lɛ hewɔ, ni ekɔɔɔ he eko kɛ amɛtsɔ gbɛ fɔŋ loo gbɛ kpakpa nɔ amɛkɛna nii lɛ.

Abuɔ skulyaa ni etee hiɛ babaoo hu waa yɛ nɛkɛ akaŋshii je nɛɛ mli. Kɛji afɔ abifao nɔŋŋ lɛ, awoɔ efɔlɔi hewalɛ ni amɛbɔi shika babaoo naabuamɔ kɛha eskulyaa. Beni ebaana afii enyɔ loo afii etɛ lɛ, amɛbɔiɔ bɔ ni amɛaafee amɛna gbekɛbii akwɛmɔ loo abifabii askul ni hi ni amɛkɛ lɛ aaaya lɛ he susumɔ, ákɛ gbɛ kakadaŋŋ ni baagbe naa yɛ univɛsiti yijiemɔ wolo namɔ mli lɛ shishijee. Etamɔ nɔ ni mɛi komɛi po susuɔ akɛ yijiemɔ wolo ni hiɛnyamwoo yɔɔ he lɛ haa anaa duromɔ kɛ bulɛ kɛjɛɔ mɛi krokomɛi adɛŋ.

Hɛɛ, hewolo nɔ su, woloŋlee, shika, weku mli ni mɔ jɛ​—enɛɛmɛi ebatsɔmɔ nibii ni mɛi pii damɔɔ nɔ amɛkojoɔ mɛi krokomɛi, loo amɛtsɔɔ hiɛ amɛkojoɔ po dani amɛleɔ amɛ. Enɛɛmɛi ji nibii ni tsɔɔ mɛi ni amɛbaajie suɔmɔ kpo amɛtsɔɔ amɛ kɛ mɛi ni amɛjieŋ kpo amɛtsɔŋ. Shi bo hu? Namɛi asane osumɔɔ? Ani osusuɔ mɔ ko ni yɔɔ shika, ehewolo nɔ kã, aloo eskulyaa etee hiɛ waa lɛ he akɛ esa duromɔ kɛ bulɛ? Kɛji nakai lɛ, no lɛ esa akɛ osusu nɔ ni odamɔɔ nɔ onuɔ nii ahe nakai lɛ he kɛ hiɛdɔɔ.

Ani Nɔdaamɔ Nii Kpakpai Nɛ?

Wolo ko ni ji Hindu World lɛ wie akɛ: “Abaanyɛ awa mligbalamɔ kui ni baa shi lɛ mli nyo ko ni gbeɔ brāhmin lɛ yi aahu kɛbote gbele mli, ni abaahe enibii fɛɛ po kɛjɛ edɛŋ, ni abuɔ esusuma fɔ kɛyaa naanɔ. Shika pɛ anyɛɔ aheɔ yɛ brāhmin ni gbeɔ mɔ ko lɛ dɛŋ ni akɛgbalaa etoi, shi akɛ gbele gbalaaa etoi kɔkɔɔkɔ.” Eyɛ mli akɛ wolo lɛ miiwie blema be ni eho lɛ he moŋ, shi ŋmɛnɛ hu? Hewolo nɔ sui ahe jwɛŋmɔ fɔŋ namɔ kɛ akutseiaŋ béi eha ashwie la babaoo shi yɛ afii ohai 20 nɛɛ mli. Ní jeee India pɛ enɛ eba yɛ. Hetsɛ kɛ yiwalɛ nifeemɔi ni gbɔmɛi amligbalamɔ kɛba yɛ South Afrika, hewolo nɔ sui ahe jwɛŋmɔ fɔŋ ni yɔɔ United States, maŋhedɔɔ mli henumɔi ni yɔɔ Baltic maji lɛ amli​—kɛ babaoo ni fata he lɛ​—fɛɛ jɛ mligbɛ henumɔi komɛi ni haa amɛsusuɔ akɛ amɛnɔ kwɔlɔ lɛ. Eka shi faŋŋ akɛ, nɛkɛ mɔ ni abuɔ fe mɔ kroko yɛ ehewolo nɔ su loo maŋ nɔ ni ejɛ hewɔ nɛɛ wooo yibii kpakpai, ni ji toiŋjɔlɛ yibii.

Shi ninamɔ loo shika hu? Ŋwanejee ko bɛ he akɛ mɛi pii naa nii kɛtsɔɔ anɔkwayeli kɛ deŋmegbomɔ nɔ. Shi, mɛi ni eje gbɛ amɛtsɔmɔ amɛhe efɔŋfeelɔi hu enyɛ amɛna nii babaoo, tamɔ jarayeli ni mla eŋmɛɛɛ gbɛ, tsofai fɔji ahɔɔmɔ kɛ hemɔ, mɛi ni hɔɔ tawuu nibii ni mla eŋmɛɛɛ gbɛ, kɛ mɛi krokomɛi. Eji anɔkwale, bei komɛi lɛ mɛnɛɛmɛi ateŋ mɛi komɛi keɔ shika aloo amɛfiɔ gbɛjianɔtoi ni akɛyeɔ abuaa ohiafoi lɛ sɛɛ. Shi kɛlɛ, amɛnifeemɔi fɔji lɛ kɛ piŋmɔ kɛ amanehulu babaoo eba mɛi ni esaa amɛhe lɛ anɔ. Mɛi ni kɛ akɛ amɛ to he lɛ, amɛnifeemɔi lɛ yɛ bibii, tamɔ mɛi ‘ni heɔ nyɔɔŋ nii aloo amɛkɛ amɛhe woɔ mɛi ashishiumɔ nifeemɔi amli lɛ eha nijiaŋwujee, pilamɔ, kɛ gbele po eba, kɛji nibii ni amɛfee loo amɛhɔɔ amɛha mɛi lɛ tsuuu nii jogbaŋŋ. Lɛlɛŋ, ninamɔ ni mɔ ko yɔɔ lɛ jeee nɔdaamɔ nɔ diɛŋtsɛ kɛha bulɛ kpakpa namɔ.

Belɛ woloŋlee hu? Ani nikasemɔ he wulu mli woo okadii kɛ sablai pii ni akɛtsaraa mɔ ko gbɛi nɔ lɛ tsɔɔ akɛ anɔkwafo kɛ jalɔ ji lɛ? Ani no tsɔɔ akɛ esa akɛ efee mɔ ko ni abuɔ lɛ waa? Eji anɔkwale, woloŋlee baanyɛ aha mɔ ko nilee mli alɛɛ waa, ni mɛi ni kɛ amɛ woloŋlee mli tsɔsemɔ etsu nii ni ahe eba sɛɛnamɔ eha mɛi krokomɛi lɛ sa woo kɛ bulɛ. Shi yinɔsane eyi obɔ kɛ nɔkwɛmɔ nii ni tsɔɔ bɔ ni woloŋlelɔi akuu lɛ ena gbɔmɛi foji lɛ ahe sɛɛ ni amɛnyɛ amɛnɔ hu amɛha. Ní susumɔ nɔ ni yaa nɔ yɛ kɔleg loo univɛsiti nikasemɔ hei ŋmɛnɛ lɛ he okwɛ. Nikasemɔ hei ehao kɛ naagbai ni jɛ tsofai fɔji kɛ nitsumɔ kɛ bɔlɛnamɔ mli helai ahewɔ, ni nikaselɔi lɛ ateŋ mɛi pii yaa skul lɛ yɛ shika, hewalɛ, kɛ gbɛi-namɔ sɛɛdii hewɔ. Mɔ ko woloŋlee pɛ nyɛŋ afee nɔ ni anyɛɔ adamɔɔ nɔ akɛlɛɔ bɔ ni mɔ lɛ su diɛŋtsɛ ji.

Dabi, hewolo nɔ su, woloŋlee, shika, weku ni mɔ lɛ jɛ mli, aloo nibii krokomɛi ni tamɔ nakai jeee nɔdaamɔ nɔ kpakpa kɛha mɔ ko agbojee loo bulɛnamɔ. Esaaa akɛ Kristofoi haa nɛkɛ saji heɔ amɛjwɛŋmɔ titri akɛ mɔdɛŋ ni amɛmiibɔ ni amɛhiɛ aba nyam yɛ mɛi krokomɛi ahiɛ. Belɛ mɛni esa akɛ mɔ aha ehi ejwɛŋmɔ mli fe fɛɛ? Mɛɛ shishitoo mlai esa akɛ mɔ ahi shi yɛ naa?