Gilead Tsɔsemɔ Mli Jɔɔmɔi Egbɛ Eshwa Jeŋ Fɛɛ
SƐƐNAMƆ bibioo ko pɛ yɔɔ nɛkɛ jeŋ momo nɛɛ woloŋlee mli tsɔsemɔ he. Akɛni edamɔ adesai asusumɔ nɔ titri, fe Nyɔŋmɔ anɔkwale lɛ moŋ nɔ hewɔ lɛ, enyɛŋ eha mɔ anɔkwa yiŋtoo yɛ shihilɛ mli. Shi esoro Gilead Skul lɛ kwraa. Theodore Jaracz ha eje kpo yɛ ehiɛkpamɔ wiemɔ ni eha yɛ Gilead klas ni ji 93 lɛ naagbee nifeemɔ lɛ shishi lɛ mli akɛ nɛkɛ skul nɛɛ kɛ tsɔsemɔ ni sɛɛnamɔ diɛŋtsɛ yɔɔ he haa mɛi. Taakɛ Lala 119:160 kɛɔ lɛ, “[Nyɔŋmɔ] wiemɔ tso muu lɛ fɛɛ lɛ, anɔkwale ni.” No hewɔ lɛ miishɛɛ kpele diɛŋtsɛ toibolɔi ni miihe ashɛ mɛi 6,000 lɛ kɛbo skul naagbee nifeemɔ lɛ toi yɛ September 13, 1992.
Klɛŋklɛŋ wiemɔ ni aha leebi lɛ, ni Lon Schilling ni fata Watchtower Farms Ajinafoi Akuu lɛ he lɛ kɛha lɛ yitso ji “Yaa nɔ Oye Je lɛ kɛ Enɔyelɔ lɛ nɔ Kunim.” Nyɛminuu Schilling gbala jwɛŋmɔ kɛtee Kpojiemɔ 12:11 nɔ ni etsɔɔ mli akɛ nakai kuku lɛ tsɔɔ gbɛi etɛ ni atsɔɔ nɔ ayeɔ kunim: (1) kɛtsɔ Toobi lɛ la lɛ nɔ, (2) kɛtsɔ odaseyeli nɔ, kɛ (3) kɛtsɔ he-kɛ-afɔleshaa mumɔ namɔ nɔ. Ekai nikaselɔi lɛ akɛ Yehowa tsuji babaoo ejie mumɔ ni tamɔ nakai kpo ni amɛjɛ amɛsuɔmɔ mli amɛkpee gbele po naa bɔni afee ni amɛkɛbaa amɛ anɔkwayeli kɛ emuuyeli mlihiɛmɔ lɛ yi.
“Buu Nii Kpakpa ni Akɛwɔ Odɛŋ lɛ He” ji saneyitso ni John E. Barr ni fata Nɔyeli Kuu lɛ he lɛ wie he. Taakɛ ale lɛ akɛ efɔɔ wiemɔ kɛ miishɛɛ gbee lɛ, ekɛ hekɛnɔfɔɔ ni yɔɔ Yehowa kɛ etsuji ateŋ lɛ to hekɛnɔfɔɔ ni anaa yɛ gbalashihilɛ kpakpa mli lɛ he. Ekɛ otii ni yɔɔ 2 Timoteo 1:12, 13 lɛ tsu nii, ni ewo nikaselɔi lɛ hewalɛ ni amɛbu nii ni akɛwo amɛdɛŋ lɛ he kɛtsɔ bu ni amɛaabu “tsamɔ wiemɔi” ni yɔɔ Biblia lɛ mli lɛ akɛ nii ni jara wa lɛ nɔ. Ema bɔ ni esa akɛ amɛkɛ teemɔŋ nikasemɔ afee amɛ daa gbi nifeemɔ ni he hiaa lɛ nɔ mi, ni ekɛ mlihilɛ wo nikaselɔi lɛ hewalɛ ni amɛkaha saji ahetoo ni amɛhaa yɛ kpee shishi lɛ batsɔ nɔ ni amɛmiifee kɛkɛ, shi moŋ amɛha efee nɔ ni shishinumɔ yɔɔ he be fɛɛ be.
William Van De Wall ni fata Sɔɔmɔ Nitsumɔ Ajinafoi Akuu lɛ he lɛ ha wiemɔ ni tsa nɔ lɛ, “Okɛ Suɔmɔ Asusu Gbɔmɛi ni Tamɔ Gwantɛŋi lɛ Ahe.” Ebi nikaselɔi lɛ nɔ ni amɛbaasumɔ ni amɛna yɛ datrɛfonyo ni kwɛɔ amɛweku lɛ he ni ewo amɛ hewalɛ ni amɛna nakai henumɔ, mlihilɛ, kɛ mɔbɔnalɛ ni amɛsumɔɔ waa lɛ nɔŋŋ eko.
Daniel Sydlik ni fata Nɔyeli Kuu lɛ he lɛ kɛ ekaa wie saneyitso ni ji “Nyɔŋmɔ Nyɛɔ Nii Fɛɛ Efeɔ” lɛ he. Ekai nikaselɔi lɛ akɛ Abraham kɛ Sara ŋmɔ yɛ gbɛkpamɔ ni tamɔ nii ni nyɛŋ aba mli, ni ji binuu ni amɛbaafɔ yɛ amɛgbɔlɛ be mli lɛ he. Nyɔŋmɔ shiwooi lɛ pii feɔ tamɔ nɔ ni nyɛŋ aba mli yɛ adesai asusumɔ naa; shi taakɛ ŋwɛibɔfo lɛ bi Abraham lɛ, “ani sane ko wa ha Yehowa?” (1 Mose 18:14) Nyɛminuu Sydlik wo nikaselɔi lɛ ŋaa ni amɛna nyɛmɔ ni Nyɔŋmɔ yɔɔ akɛ ekɛaafee nɔ ni anyɛŋ afee lɛ mli hemɔkɛyeli, ni amɛkaha nakai hemɔkɛyeli lɛ gbɔjɔ loo egbugbãa, ni kaai ni amɛkɛaakpe lɛ eko kwraa kɔɔɔ he eko.
Tsɔɔlɔi kɛ Ŋaawoo Ha
Gilead tsɔɔlɔi enyɔ lɛ wie kɛtsara nɔ. Klɛŋklɛŋ lɛ, Jack D. Redford wie saneyitso ni ji “Gbɛi Kpakpa ni Aaana yɛ Nyɔŋmɔ Hiɛ” lɛ he. Etsɔɔ mli akɛ, nɔ ni haa gbɛi ko feɔ ekpakpa loo gbɛi gbonyo ji mɔ ni hiɛ nakai gbɛi lɛ. Ekɛ gbɛi tamɔ Adam, Nimrod, Yezebel, Saul, kɛ Yuda to gbɛi tamɔ Noa, Abraham, Rut, Paulo, kɛ Timoteo he ni eha ana sɔrɔto feemɔ ni yɔɔ amɛteŋ. Akɛ nibii babaoo toɔ gbɛi lɛ eko fɛɛ eko he yɛ mɔ ni atsɛ́ lɛ nakai lɛ shihilɛ hewɔ. Ebi nikaselɔi lɛ gbɛi ni amɛbaaná yɛ afii 10, 100, loo 1,000 po sɛɛ—ani amɛbaasumɔ ni atsɛ amɛ maŋsɛɛ sanekpakpa shiɛlɔi ni ejo foi loo huhuuhu wielɔi aloo anɔkwafoi? Ewo amɛ ŋaa akɛ amɛkɛ amɛjwɛŋmɔ ama tsabaa kɛ otii anɔ moŋ, shi jeee naagbai anɔ.
“’Te Obuɔ Ohemɔkɛyeli lɛ he Jogbaŋŋ Ohaa Tɛŋŋ?” ji saneyitso ni kanyaa niiahesusumɔ ni Ulysses V. Glass wie he. Ekɛ hemɔkɛyeli ni mli wa lɛ to kompas ni tsɔɔ gbɛ ni ja be fɛɛ be lɛ he. Yɛ shikpɔŋ mli hewalɛ ni gbalaa nii lɛ sɛɛ lɛ, dadei krokomɛi amli hewalɛ ni gbalaa nii lɛ baanyɛ ana tsɔne ko mli kompas nɔ hewalɛ, ni esa akɛ aku nɛkɛ hewalɛi nɛɛ anaa. Nakai nɔŋŋ nɛkɛ jeŋ momo nɛɛ feɔ nibii pii ni naa mɔ nɔ hewalɛ, ni baanyɛ akpalaŋ loo egbɔjɔ wɔhemɔkɛyeli lɛ kɛ wɔŋmɛ amɛ gbɛ. Beni ewoɔ klasbii lɛ aŋaa yɛ nɛkɛ nibii nɛɛ ahe lɛ, Nyɛminuu Glass jie amɛ yi hu yɛ bɔ ni amɛbɔɔ mɔdɛŋ waa ni amɛkɛleɔ mɛi krokomɛi asui kɛ amɛhenumɔi ahe nii lɛ he.
Mɔ ni ha naagbee wiemɔ leebi lɛ ji Albert D. Schroeder, ni fata Nɔyeli Kuu lɛ he lɛ. Ewo nikaselɔi lɛ hewalɛ ni “[Amɛ]hiɛ Maŋsɛɛ Sanekpakpa Shiɛmɔ Mumɔ lɛ Mli,” ni ejie amɛ yi hu akɛ amɛhiɛ nakai maŋsɛɛ sanekpakpa shiɛmɔ mumɔ lɛ nɔŋŋ eko tamɔ klɛŋklɛŋ klasbii lɛ ná yɛ 1943 mli, beni esɔmɔɔ akɛ mɔ ni ŋmaa mɛi agbɛi kɛha skul lɛ. Ekadi akɛ amɛsumɔɔ gbɔmɛi asane waa, shiɛlɔi ji amɛ yɛ amɛsu naa, mɛi ni sumɔɔ ni Nyɔŋmɔ mumɔ lɛ akudɔ amɛ. Ewo amɛ hewalɛ akɛ, amɛya nɔ amɛna nakai mumɔ lɛ, ni amɛkɛ New World Translation lɛ atsu nii kɛmɔ shi yɛ amɛ teemɔŋ nikasemɔ mli. Emu ewiemɔ lɛ naa kɛ Lala 24 lɛ kuku fɛɛ kuku hesusumɔ akɛ ehe nɔkwɛmɔ nɔ.
No sɛɛ lɛ, Gilead nikaselɔi lɛ batsɔmɔ mɛi ni egbe Gilead nikasemɔ naa! Akɛ amɛyijiemɔ woji ha amɛ beni akaneɔ maŋsɛɛ sanekpakpa shiɛmɔ nitsumɔ ni aha amɛ lɛ, ni toibolɔi lɛ kɛ dɛtswaa waa fata he.
Yɛ shwane mli lɛ, Calvin Chyke ni fata Woji Afeemɔ He Ajinafoi Akuu lɛ he lɛ kwɛ Buu-Mɔɔ Nikasemɔ lɛ nɔ. Kɛkɛ ni nikaselɔi lɛ agbɛjianɔtoo ko ni yɔɔ miishɛɛ, ni tsɔɔ niiashikpamɔi ni nikaselɔi lɛ ena yɛ shiɛmɔ mli yɛ nyɔji enumɔ nikasemɔ lɛ mli lɛ tsa nɔ, ni ajie maji ni aha amɛ nitsumɔ yɛ mli lɛ ekomɛi ahe mfonirii atsɔɔ. Kɛfata he lɛ, abi gbalashihilɛ mli hefatalɔi komɛi ni edara saŋŋ lɛ saji, ni amɛgba nilee kɛ niiashikpamɔ ni amɛna yɛ afii babaoo ni amɛkɛtsu nii akɛ maŋsɛɛ sanekpakpa shiɛlɔi lɛ mli lɛ amɛtsɔɔ. Shwane gbɛjianɔtoo lɛ ba naagbee kɛ drama ko ni sa jogbaŋŋ ni yitso Ji Kaaha Alaka Bo loo Ooli Nyɔŋmɔ.
Toibolɔi lɛ shi kɛ miishɛɛ, ni eŋɔɔ amɛnaa waa akɛ amɛna nɔ ni Nyɔŋmɔ anɔkwale lɛ mli tsɔsemɔ baanyɛ atsu, ni amɛmli fili amɛ hu akɛ amɛaale akɛ abaanu sɛɛnamɔi ni jɛɔ nɛkɛ tsɔsemɔ nɛɛ mli baa lɛ he yɛ jeŋ fɛɛ. Yɛ be mli ni maŋsɛɛ sanekpakpa shiɛlɔi 48 nɛɛ mli gbalaa kɛyaa hei ni aha amɛ nitsumɔ yɛ lɛ, sɔlemɔi babaoo nyiɛɔ amɛsɛɛ, kɛtsɔɔ hiɛnɔkamɔ kɛ hekɛnɔfɔɔ ni jɛɔ tsuiŋ akɛ nɛkɛ gbɔmɛi anɔkwafoi nɛɛ baatsɔ jɔɔmɔ amɛha Nyɔŋmɔ webii yɛ he fɛɛ he ni amɛaaya.
[Akrabatsa ni yɔɔ baafa 19]
Klasbii lɛ Ahe Saji
Maji sɔrɔtoi anɔ ni amɛjɛ kɛba: 7
Maji sɔrɔtoi ni aha amɛ nitsumɔ yɛ mli: 18
Nikaselɔi lɛ ayifalɛ: 48
Mɛi abɔ ni ji gbalashihilɛ mli hefatalɔi: 24
Afii abɔ ni amɛye lɛ mlijaa: 32.8
Afii abɔ ni amɛkɛhi anɔkwale lɛ mli lɛ mlijaa: 15.3
Afii abɔ ni amɛkɛsɔmɔ kɛ amɛbe fɛɛ mlijaa: 10.4
[Akrabatsa ni yɔɔ baafa 20]
GILEAD SKUL KROKO LƐ NIKASEMƆ EGBE NAA
Yɛ June 21, 1992 lɛ, maŋsɛɛ sanekpakpa shiɛlɔi 24 gbe Gilead Skul Kroko lɛ naa kɛjɛ klasbii ni ji ejwɛ lɛ mli yɛ Selters/Tounus, yɛ Germany. Klas nɛɛ ni gbalashihilɛ mli hefatalɔi 11 kɛ nyɛmimɛi yei oshijafoi 2 yɔɔ mli lɛ jɛ maji kpawo nɔ, ni afii ni amɛye lɛ mlijaa ji 32 kɛ afii 14 kɛjɛ be mli ni abaptisi amɛ, kɛ afii 8.5 ni amɛkɛsɔmɔ yɛ be-fɛɛ sanekpakpa shiɛmɔ nitsumɔ lɛ mli. Mɛi fe 2,000 tee nikasemɔ naagbee nifeemɔ nɛɛ shishi.
Nyɛminuu Jaracz je gbɛjianɔtoo lɛ shishi kɛ Abɛi 11:24 hesusumɔ, he ni kɛɔ akɛ: “Mɔ ko yɛ ni ekɛ nii shwaa, shi eyaa nɔ eshwereɔ kɛ̃.” Etsɔɔ mli akɛ abaagbɛ nikaselɔi nɛɛ ashwa, shi eka shi faŋŋ akɛ amɛbaaha shweremɔ aya hiɛ.
Aha ŋmalɛ naa wiemɔi ni tswaa mɔ emaa shi, ní mɛi ni ha ji Richard Kelsey ni ji German Nitsumɔ he Nine Ajinafoi Akuu lɛ sɛinɔtalɔ; Wolfgang Gruppe ni yɔɔ Sɔɔmɔ Nitsumɔ He lɛ; Werner Rudtke kɛ Edmund Anstadt ni amɛ hu amɛfata Nitsumɔ he Ajinafoi Akuu lɛ he lɛ; kɛ tsɔɔlɔi enyɔ lɛ Dietrich Förster kɛ Luther Kaemmer. Albert Schroeder ni fata Nɔyeli Kuu lɛ he lɛ ha wiemɔ titri kɛha nifeemɔ lɛ, ni eyitso ji “Nyɛyaa nɔ Nyɛfea Mɛi ni Tooɔ Mumɔŋ Jwetrii.” Nifeemɔ lɛ shɛ enaagbee kwraa beni aha amɛ nitsumɔ yɛ maji 11 mli yɛ Afrika, Central America, kɛ Europa Bokagbɛ lɛ ni no sɛɛ lɛ mɛi ni egbe nikasemɔ naa nɛɛ ateŋ mɔ kome kane wolo ko ni jɛ klasbii lɛ adɛŋ kɛha Nɔyeli Kuu lɛ kɛmiitsɔɔ hiɛsɔɔ ni jɛ amɛtsuiŋ tɔŋŋ.
[Mfoniri ni yɔɔ baafa 18]
Watchtower Bible School of Gilead lɛ Klasbii ní Ji 93 Nɔ
Gbɛi ni yɔɔ shishi lɛ miitsɔɔ bɔ ni amɛdamɔ shi Iɛ mli kɛjɛ hiɛ gbɛ kɛyaa sɛɛ gbɛ, ni ejeɔ shishi jɛkɛɔ abɛku gbɛ kɛyaa ninejurɔ gbɛ.
(1) Hitesman, C.; West, P.; Evans, D.; Hipps, M.; Simonelli, N.; Wood, S.; Corkle, M.; Flores, C.; Thomas, J. (2) Jones, M.; Nissinen, J.; Sponenberg, M.; Zachary, K.; Ravn, G.; Backman, M.; Wettergren, A.; Evans, D.; Flores, R.; Caporale, G. (3) Simonelli, N.; Rechsteiner, M.; Rechsteiner, M.; Ruiz-Esparza, L.; Gerbig, B.; Simpson, C.; Zanewich, C.; Zachary, B.; Ricketts, L.; (4) Simpson, J.; Backman, J.; Corkle, G.; Gerbig, M.; Ricketts, B.; Bagger-Hansen, L.; Jones, A.; Zanewich, K.; Ravn, J.; Hipps, C. (5) Sponenberg, S.; Hitesman, A.; Caporale, L.; Ruiz-Esparza, S.; Thomas, R.; Bagger-Hansen, B.; Wood, M.; West, M.; Wettergren, C.; Nissinen, E.