Gilead Tsɔsemɔ yɛ Hemɔkɛyeli ni Yɔɔ Krɔŋŋ Fe Fɛɛ lɛ Mli
“ATSƆSE wɔ nikaselɔi lɛ jogbaŋŋ yɛ hemɔkɛyeli ni yɔɔ krɔŋŋ fe fɛɛ lɛ mli.” Enɛɛmɛi ji wiemɔi ni akɛje Buu-Mɔɔ Biblia Gilead Skul lɛ klas ni ji 95 lɛ skul naagbee gbɛjianɔtoo, ni afee yɛ Hɔgbaa, September 12, 1993 lɛ shishi. Nakai leebi lɛ, George Gangas nyiɛ mɛi 4,614 ni ji gbɔi ni afɔ amɛ nine kɛ Betel weku lɛ mli bii ni bua amɛhe naa yɛ Jersey City Assembly Hall lɛ ahiɛ kɛ sɔlemɔ ni akɛje shishi. Nyɛminuu Gangas ehi shi akɛ Betel weku lɛ mli bii lɛ ateŋ mɔ kome afii 65 sɔŋŋ, ni eye afii 97, ni lɛ ji mɔ ni eda fe fɛɛ yɛ Nɔyeli Kuu lɛ mli bii lɛ ateŋ.
Albert Schroeder, ni lɛ hu efata Nɔyeli Kuu lɛ he, ni lɛ ji nifeemɔ lɛ sɛinɔtalɔ lɛ wie akɛ: “Nyɔji enumɔ ni eho lɛ mli fɛɛ lɛ, aha Gilead nikasemɔ lɛ edamɔ hemɔkɛyeli ni yɔɔ krɔŋŋ fe fɛɛ lɛ nɔ.” Shi mɛni ji “hemɔkɛyeli ni yɔɔ krɔŋŋ fe fɛɛ lɛ”? Etsɔɔ mli akɛ nɛkɛ “hemɔkɛyeli ni yɔɔ krɔŋŋ fe fɛɛ,” ni atsi ta yɛ Yuda 20 lɛ ji Biblia mli anɔkwale muu lɛ fɛɛ. No hewɔ lɛ Gilead nikasemɔ lɛ damɔ Yehowa Wiemɔ, Biblia, ni ji nikasemɔ wolo titri fe fɛɛ lɛ nɔ.
Akɛ Tsɔsemɔ Babaoo Ha Nikaselɔi lɛ Lolo
Klɛŋklɛŋ wielɔ ji John Stuefloten, ni efata Watchtower Farms Ajinafoi Akuu lɛ he, ni saneyitso ni ewie he ji “Hewalɛ ni Nilelɔi Naa yɛ Wɔnɔ lɛ He Sɛɛ ni Wɔɔna.” Biblia lɛ kɛɔ akɛ mɔ ni “kɛ nilelɔi nyiɛɔ lɛ, eeetsɔ nilelɔ.” (Abɛi 13:20) Nikaselɔi lɛ eye nɔ ni fa fe ŋmɛlɛtswai 900 yɛ Gilead nikasemɔ be lɛ mli ni amɛkɛkase Biblia lɛ. Nyɛminuu Stuefloten bi nikaselɔi lɛ akɛ: “Te hewalɛ ni Yehowa ena yɛ nyɛnɔ lɛ baasa nyɛhe tɛŋŋ wɔsɛɛ? Nyɛmiiya maji 18 anɔ, ni kɛ abua amɛyifalɛ naa lɛ, eshɛɔ gbɔmɛi akpekpei 170. No hewɔ lɛ te nyɛbaana gbɔmɛi nɛɛ anɔ hewalɛ nyɛha tɛŋŋ?” Kɛtsɔ Yehowa nilee lɛ kpojiemɔ nɔ lɛ, maŋsɛɛ sanekpakpa shiɛlɔi heei nɛɛ baanyɛ aye abua mɛi krokomɛi ni amɛtsɔmɔ Yehowa, nilee ni bɛ naagbee Jɛɛhe lɛ jalɔi.
“Ni Aaatsɔ nɔ Fɛɛ nɔ Aha Mɛi Fɛɛ” ji wiemɔ ni nyiɛ sɛɛ lɛ yitso, ni Lloyd Barry ni fata Nɔyeli Kuu lɛ he lɛ hã. (1 Korintobii 9:22, King James Version) Aaafee afii 45 ni eho nɛ lɛ, no mli lɛ Nyɛminuu Barry diɛŋtsɛ hu ji nikaselɔ yɛ Gilead klas ni ji 11 lɛ mli. Amrɔ nɛɛ klas ni ji 95 lɛ ahiɛ sɔ waa akɛ amɛaana ŋaawoo diɛŋtsɛ kɛjɛ tsutsu maŋsɛɛ sanekpakpa shiɛlɔ ko ni kɛ afii babaoo ena niiashikpamɔ yɛ maŋsɛɛ lɛ ŋɔɔ. Ewo nikaselɔi lɛ hewalɛ ni amɛle gbɔmɛi ni yɔɔ amɛ maŋsɛɛ shikpɔŋkuku hee lɛ mli lɛ oya kɛtsɔ le ni amɛaale maŋbii lɛ anifeemɔi kɛ amɛwiemɔ hu ni amɛaakase lɛ nɔ. Ewie akɛ amɛbaanyɛ amɛfee enɛ jogbaŋŋ kɛtsɔ maŋbii lɛ ni amɛkɛ amɛ aaafutu ni amɛkɛ amɛ atsu nii, kɛ agbɛnɛ kɛtsɔ amɛnifeemɔi ni amɛaakase, koni amɛtsake mli be fɛɛ be ni ehe baahia ni amɛfee nakai lɛ nɔ.
No sɛɛ lɛ, Dean Songer ni fata Nitsumɔ He Ajinafoi Akuu lɛ he lɛ wie saneyitso ni yɔɔ miishɛɛ, ni ji “Aha Aye He Kɛjɛ Gbɛnaa Nii Ahe” lɛ he. Yɛ be mli ni ekɛ nɔ ni fa fe afii 35 ehi be-fɛɛ sɔɔmɔ lɛ mli sɛɛ lɛ, Nyɛminuu Songer nuɔ nɔ ni mɔ shihilɛ ni aaama oti pɔtɛɛ ko nɔ, ni efee mlɛo, ni ejwɛŋmɔ ahi nitsumɔ ni he hiaa waa akɛ atsu lɛ nɔ, ni eye ehe kwraa kɛjɛ heloonaa nibii ahe lɛ tsɔɔ lɛ shishi. Ni no ji oti ni je kpo yɛ ŋaawoo ni ekɛha nikaselɔi lɛ mli. Aha lalɔi ni yɔɔ Yehowa sɔlemɔ we lɛ ye amɛhe kɛjɛ nitsumɔi ni Levibii krokomɛi lɛ fɛɛ fɔɔ tsumɔ lɛ he koni amɛnyɛ amɛkɛ amɛhe aha kɛmɔ shi, kɛha amɛnitsumɔ krɛdɛɛ lɛ. (1 Kronika 9:33) Nakai nɔŋŋ aha Gilead maŋsɛɛ sanekpakpa shiɛlɔi lɛ eye amɛhe kɛjɛ saji foji tamɔ heloonaa nitsumɔ mli koni amɛjwɛŋmɔ anyɛ ahi amɛsɔɔmɔ krɛdɛɛ lɛ nɔ. Nyɛminuu Songer mu naa kɛ nɛkɛ ŋaawoo nɛɛ akɛ: “Nyɛhaa bɔ ni nyɛsusuɔ shihilɛ he lɛ amaa oti ko nɔ ni nyɛshihilɛ afea mlɛo. Gbɛnaa nii ni ka nyɛnɔ akɛ mɛi ni eye amɛhe kɛjɛ nitsumɔ mli lɛ ji ni nyɛhi nitsumɔ lɛ mli shwane kɛ nyɔɔŋ fɛɛ, ni nyɛjie Yehowa yi.”
Nɔyeli Kuu lɛ mli nyo Daniel Sydlik nyiɛ sɛɛ kɛ saneyitso ni ji “Mɛi Krokomɛi Anitsɔɔmɔ Koni Amɛna Nɔ ni Hi fe Fɛɛ yɛ Shihilɛ Mli.” Ewo nikaselɔi lɛ hewalɛ “jeee ni amɛtsɔɔ tsɔɔmɔi pɛ kɛkɛ, shi moŋ ni amɛna ekaa ni amɛkɛɛ gbɔmɛi lɛ nɔ ni esa akɛ amɛfee ni eha amɛshihilɛ kɛ Nyɔŋmɔ suɔmɔnaa nii akpa gbee.” Esa akɛ tsɔɔlɔi kpakpai awo mɛi hewalɛ ni amɛkanya amɛ hu. Ekɛɛ akɛ: “Nyɛhiɛ ahia nyɛhe nɔ ni nyɛtswaa Kristofoi asui nyɛwoa mɛi amli moŋ fe ni nyɛaatsɔɔ mlai kɛ akpɔi,” ni ekɛfata he kɛmu naa akɛ: “Nɔ ni fe fɛɛ lɛ, suɔmɔ nyɛmimɛi, nyɛtsɔɔa nyɛ diɛŋtsɛ nyɛhe ni nyɛtsɔɔ mɛi krokomɛi hu bɔ ni asumɔɔ mɛi, ejaakɛ eji ekomefeemɔ kpaa ni yeɔ emuu.”—1 Korintobii 13:1-3; Kolosebii 3:14.
Beni amɛkɛ nyɔji saŋŋ ena tsɔsemɔ sɛɛ lɛ, nikaselɔi lɛ bana amɛ Gilead tsɔɔlɔi enyɔ lɛ ahe miishɛɛ waa. Jack Redford, ni lɛ hu eji tsutsu maŋsɛɛ sanekpakpa shiɛlɔ lɛ wie klɛŋklɛŋ, ni ewiemɔ lɛ yitso ji “Nyɛhala Nɔ ni Ja Lɛ.” Yɛ blema Yudafoi aje lɛ mli, dani Paulo aaatsɔ Kristofonyo bɔfo lɛ, no mli lɛ ehiɛ gbɛhe, ni eyɛ bulɛ, hewalɛ, kɛ shweshweeshwe yɛ shika gbɛfaŋ. Shi Paulo tsɛ enɛɛmɛi fɛɛ akɛ “tumu nɔ nii,” aloo “jwɛi” taakɛ Phillips shishitsɔɔmɔ lɛ eŋma yɛ Filipibii 3:8 lɛ. Etsui yɛ sɔɔmɔ nitsumɔ lɛ mli, ni ehala nii ni ja lɛ. Nɔ ni tamɔɔɔ nakai lɛ, adesai ni yɔɔ ŋmɛnɛ lɛ ateŋ mɛi pii tsɔɔ nii ni amɛhalaa lɛ anɔ amɛtsɔɔ akɛ amɛbuɔ amɛ heloonaa nii ni amɛyɔɔ lɛ akɛ ejara wa kwraa fe naanɔ wala. Gilead maŋsɛɛ sanekpakpa shiɛlɔi ehala nɔ ni ja lɛ. Jack Redford wie kɛmu naa akɛ: “Nɔ ko nɔ ko bɛ ni Abonsam je lɛ baanyɛ aha nyɛ, ni kɛ maŋsɛɛ sanekpakpa sɔɔmɔ lɛ yeɔ egbɔ. Nyɛbua nakai hegbɛi ni jara wa waa lɛ he, ni nyɛhaa je lɛ hu abua ejwɛi lɛ he!”
Afi 32 ni eho nɛ, ni Ulysses Glass etsu nii akɛ tsɔɔlɔ yɛ Gilead. Ekɛ shɛɛyeli ŋaawoo wiemɔ ko ha nikaselɔi lɛ, ni ewiemɔ lɛ yitso ji “Nyɔŋmɔ Pɛ Baanyɛ Afee Tso,” ni eha ewiemɔ lɛ damɔ Lala 1:3 nɔ. Ŋmɛnɛŋmɛnɛ beaŋ tsɔnei ahe nilee nyɛko afee nɔ ko ni kɛ tso, ni Nyɔŋmɔ fee lɛ yeɔ egbɔ aloo etamɔ no. Yɛ shishinumɔ ko naa lɛ, anɔkwa Kristofoi tamɔ tsei ni Yehowa edu ni egbala nu jɔɔi ewo shishi. Nyɛminuu Glass tsɔɔ mli akɛ nyɔji enumɔ ni eho lɛ, atee nɔ “agbala nu jɔɔi awo nikaselɔi lɛ ashishi kɛjɛ wala nu bu ni yɔɔ Nyɔŋmɔ Wiemɔ lɛ mli” lɛ mli, tamɔ tsei yɛ mumɔŋ abɔɔ loo paradeiso mli. Ni kɛlɛ, akɛ maŋsɛɛ sanekpakpa shiɛlɔi lɛ, esa akɛ amɛbu amɛ “mumɔŋ shishifai lɛ ahe ni nɔ ko akafite lɛ.” Awo amɛ ŋaa ni ‘amɛya nɔ amɛnu wala nu ni jɛɔ Yehowa ŋɔɔ lɛ ejaakɛ Nyɔŋmɔ pɛ baanyɛ abɔ tso.’
Mɔ ni ha naagbee wiemɔ ji Carey Barber, ni eji Nɔyeli Kuu lɛ mli bii lɛ ateŋ mɔ kome. Yɛ be mli ni ekɛ afii 70 ehi be-fɛɛ sɔɔmɔ lɛ mli sɛɛ lɛ, Nyɛminuu Barber baanyɛ ekɛ ekaa awie saneyitso ni ji “Okɛ Ohetuu-Kɛhamɔ Aha Yehowa Pɛ” lɛ he. Adesai ateŋ mɛi babaoo ji mɛi ni tuuu amɛhe amɛhaaa Yehowa. (5 Mose 5:9) Shi, taakɛ Nyɛminuu Barber tsɔɔ lɛ, yɛ emuu ni wɔyeee lɛ fɛɛ sɛɛ lɛ, “Wɔbaanyɛ wɔtuu wɔhe kwraa wɔha Nyɔŋmɔ.” Ekɛfata he akɛ: “Mɔ ko mɔ ko nyɛŋ akɛɛ lɛlɛŋ akɛ: ‘Abonsam ha mifee nakai.’” Shi Abonsam baanyɛ aye wɔnɔ kunim kɛji wɔteee shi wɔwooo lɛ. (Yakobo 4:7) Wɔbe fɛɛ ni wɔkɛaatsu Yehowa nitsumɔ lɛ ji gbɛ titri ni wɔtsɔɔ nɔ wɔteɔ shi wɔwoɔ Satan kɛ eje lɛ, ni wɔtuɔ wɔhe kwraa wɔhaa Yehowa.
Ahala Amɛ akɛ Maŋsɛɛ Sanekpakpa Shiɛlɔi
Leebi gbɛjianɔtoo lɛ ba naagbee kɛ nikaselɔi 46 lɛ fɛɛ ahalamɔ akɛ maŋsɛɛ sanekpakpa shiɛlɔi. Gbalashihilɛ mli hefatalɔi 23 lɛ anine shɛ yijiemɔ woji anɔ, ni emli sane lɛ fa ko kɛɔ akɛ nikaselɔi lɛ “ahe esa akɛ amɛkɛ amɛhe aaawo tsɔsemɔ nitsumɔ mli titri, ni amɛkɛ yelikɛbuamɔ aha, ni amɛtsu nii kɛha toiŋjɔlɛ ni hiɔ shi daa kɛ mla gbɛjianɔtoo ni eye emuu kɛ jalɛ ni aaahi gbɔmɛi fɛɛ ateŋ.” Eka shi faŋŋ akɛ Gilead klas ni ji 95 lɛ baabɔ mɔdɛŋ ni amɛtsu nɛkɛ nitsumɔ ni nɔ kwɔ waa nɛɛ yɛ maji 18 ni aha amɛ nitsumɔ yɛ mli lɛ amli. Amɛnitsumɔ lɛ mli lɛɛɔ kɛyaa je lɛŋ fɛɛ, ni amɛteŋ ekomɛi ji maji ni yɔɔ Asia, Afrika, Europa, Latin Amerika, kɛ Caribbean.
Yɛ shwane mli, yɛ Buu-Mɔɔ Nikasemɔ ni akɛ be kuku fee, ni Charles Woody ni fata Sɔɔmɔ Nitsumɔ He Ajinafoi Akuu lɛ he lɛ kwɛ nɔ lɛ sɛɛ lɛ, mɛi heei ni egbe nikasemɔ naa yɛ Gilead lɛ kɛ amɛnikaselɔi agbɛjianɔtoo, ni yitso ji “Gilead Etsɔse Wɔ ni Wɔtsɔɔ Nii akɛ Maŋsɛɛ Sanekpakpa Shiɛlɔi” lɛ tsa nɔ. Gbɛjianɔtoo lɛ ba naagbee kɛ drama ko ni yitso ji “Nibii ni Wɔbaanyɛ Wɔhala Emli nɔ ni Wɔsumɔɔ.”
Yɛ nifeemɔ ni kanyaa mɔ nɛɛ sɛɛ lɛ, maŋsɛɛ sanekpakpa shiɛlɔi lɛ efee klalo agbɛnɛ akɛ aaatsu amɛ kɛya shikpɔŋ lɛ nɔ he fɛɛ he ni amɛkɛ mɛi krokomɛi ayaja “hemɔkɛyeli ni yɔɔ krɔŋŋ fe fɛɛ lɛ.”
[Akrabatsa ni yɔɔ baafa 26]
Klasbii lɛ Ahe Saji
Maji sɔrɔtoi anɔ ni amɛjɛ kɛba: 7
Maji sɔrɔtoi ni aha amɛ nitsumɔ yɛ mli: 18
Nikaselɔi lɛ ayifalɛ: 46
Mɛi abɔ ni ji gbalashihilɛ mli hefatalɔi: 23
Afii abɔ ní amɛye lɛ mlijaa: 30.06
Afii abɔ ni amɛkɛhi anɔkwale lɛ mli lɛ mlijaa: 12.92
Afii abɔ ni amɛkɛsɔmɔ kɛ amɛbe fɛɛ mlijaa: 9.4
[Mfoniri ni yɔɔbaafa 26]
Watchtower Bible School of Gilead Klasbii ni Ji 95 Nɔ
Gbɛi ni yɔɔ shishigbɛ lɛ miitsɔɔ bɔ ni amɛdamɔ shi lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛku kɛyaa ninejurɔ gbɛ.
(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.