Nyɛmli Afilia Nyɛ yɛ Wɔsɛɛ Be Shikpɔŋ ni Nɔ Tse He!
KWƐ miishɛɛ ni wɔbaanyɛ wɔna akɛ, Yehowa, ni ji gbɛjianɔtoo kpakpa kɛ falefalefeemɔ Nyɔŋmɔ lɛ baatsu eklɛŋklɛŋ yiŋtoo akɛ ebaaha shikpɔŋ nɛɛ atsɔ jeŋ muu fɛɛ paradeiso lɛ he nii! (Yesaia 11:6-9) Ewoɔ shi akɛ: “Miwiemɔ ni jɛɔ midaaŋ lɛ . . . ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ.” “Nyɔŋmɔ nyɛŋ emale,” no hewɔ lɛ jeee wiemɔi foji nɛ.—Yesaia 55:11; Hebribii 6:18.
Wɔtsui baanyɛ anyɔ wɔmli akɛ Yehowa baajɛ esuɔmɔ mli ekɛ ehe awo mli dani eba akɛ adesai aaaya nɔ aahu kɛyashi be mli ni ehiii nɔ ko feemɔ dɔŋŋ, ni eeeba akɛ adesai aaawo amɛshihilɛ hei amli muji ni nɔ fɛɛ nɔ efite kwraa!—Kpojiemɔ 11:18.
Yehowa baajie mɛi ni woɔ muji kɛkɛ ni tsakeee amɛtsui lɛ, kɛ mɛi ni kɛ atuatsemɔ kuɔ amɛhiɛ amɛshwieɔ eshishitoo mlai ni kɔɔ gbɛjianɔtoo kpakpa kɛ falefale-feemɔ he lɛ anɔ lɛ kɛjɛ jɛmɛ. Aŋmɛŋ mɔ ko gbɛ kwraa koni efite Paradeiso ni atswa ama shi ekoŋŋ lɛ.—Abɛi 2:20-22.
Yɛ Nyɔŋmɔ Maŋtsɛyeli nɔyeli lɛ mli, yɛ Kristo Yesu kudɔmɔ shishi lɛ, abaatsɔɔ adesai anii koni amɛjie nibii ni eshwɛ ni haa awoɔ shihilɛ hei amli muji lɛ kɛya. Nakai be mli—jeee amrɔ nɛɛ—ji be ni ehe baahia waa akɛ Nyɔŋmɔ tsuji fɛɛ kɛ amɛhe awo mli yɛ ekaa naa, ákɛ aŋkroaŋkroi kɛ kui, koni amɛfata he kɛha jeŋ muu fɛɛ falefale-feemɔ ko ni eko bako nakai da.—Okɛto Ezekiel 39:8-16 he.
Mɛi ni abaabaa amɛyi yɛ ŋmɛnɛŋmɛnɛ nibii agbɛjianɔtoo fɔŋ nɛɛ naagbee lɛ mli lɛ kɛ hetuu-kɛhamɔ kɛ miishɛɛ ni amɛkɛwoɔ mumɔŋ falefale-feemɔ he tafaa lɛ mli ŋmɛnɛ lɛ nɔŋŋ baafi nɛkɛ shihilɛ hei afalefale-feemɔ he gbɛjianɔtoo nɛɛ sɛɛ.—Lala 110:3.
Shikpɔŋ ni aha enɔ etse keŋkeŋ baaba kɛ̃, ni nɔ ni tsɔɔ hiɛ ji falefale-feemɔ he tafaa ni fe fɛɛ, ni fe be fɛɛ, ni Nyɔŋmɔ Maŋtsɛyeli lɛ tsuɔ he nii. Abaajie mujiwoo fɛɛ kɛya. Anaŋ mfonirii gbohii ni akɛkpɛtɛɔ gbogboi ahe yɛ he ko dɔŋŋ. Tɔi, tsɛŋsii, rɔba baagii, ama kɛ sikletɛi ahe woji, adafitswaa woji, kɛ woji tɛtrɛbii ni bua shi babaoo yɛ ŋshɔ ko naa loo paradeiso shihilɛ he ko bɛ dɔŋŋ.
Ha omli afili bo yɛ shikpɔŋ ni nɔ tse ni baa lɛ hewɔ!
[Mforiniri yɛ baafa 7]
Ani obaana jeŋ muu fɛɛ falefalefeemɔ ni baa lɛ mli gbɛfaŋnɔ?