Ni Aaajie Mujiwoo Kɛaajɛ Tsui kɛ Jwɛŋmɔ Mli

YEHOWA kɛ muji loo basabasa feemɔ ni adesai aaashwe ebɔɔɔ amɛ. Ato amɛ shibɔlemɔ ŋulami ni ji amɛshia nɛɛ he gbɛjianɔ koni etsɔ paradeiso ko ni mli tse, ni ato he gbɛjianɔ jogbaŋŋ fɛfɛo. Nyɔŋmɔ etoko eyiŋ akɛ etsɔ tumu ko ni bɛ hiŋmɛi nɔ.​—1 Mose 2:​8,9.

Shi kɛlɛ, beni adesai kpoo ŋwɛi gbɛtsɔɔmɔ sɛɛ lɛ, amɛbɔi amɛ diɛŋtsɛ amɛ jeŋ gbɛjianɔtoo ko tswaa kɛ shimaa. Akɛni amɛbɛ ŋwɛi nilee ni amɛbɛ niiashikpamɔ hu hewɔ lɛ, nɔ ni ba ji akɛ, amɛkɛ ekaa kase nii yɛ gbɛi sɔrɔtoi anɔ kɛtsɔ kaa kɛ kwɛmɔ nɔ. Jeŋ yinɔsane maa Biblia mli anɔkwa sane ko nɔ mi akɛ adesai nyɛŋ aye amɛ diɛŋtsɛ amɛhe nɔ kɛ omanyeyeli; afii akpei abɔ sɔŋŋ nɛ ni “gbɔmɔ yeɔ enaanyo gbɔmɔ nɔ ni ekɛyeɔ ehe awui!” (Jajelɔ 8:9; Yeremia 10:23) Ŋmɛnɛŋmɛnɛ beaŋ mujiwoo he naagba, yɛ egbɛi sɔrɔtoi fɛɛ mli lɛ jɛ adesa ni yeɔ nɔ yɛ gbɛ ni ejaaa nɔ lɛ hewɔ.

Ni Aaana Nyɔŋmɔ Jwɛŋmɔ

Gbɔmɛi ni shweɔ ni amɛsa Nyɔŋmɔ hiɛ lɛ bɔɔ mɔdɛŋ waa ni amɛhi shi yɛ Bɔlɔ lɛ hetsemɔ tɛi ni efolɔ eshwie shi lɛ anaa. No hewɔ lɛ, Yehowa Odasefoi kɛ naagba ko kpe beni ato majimaji ateŋ kpee ni abaafee yɛ Prague, Czechoslovakia, yɛ afi 1991 teŋgbɛ lɛ hegbɛjianɔ lɛ.a Gbɔmɛi aaashɛ 75,000 ji mɛi ni baa ba kpee lɛ, ni ji gbɔmɛi akuu ko ni Strahov Shwɛmɔ He lɛ baanyɛ ahe ni ana hejɔlɛ kɛ shitaramɔ. Shi afii enumɔ sɔŋŋ nɛ ni shwɛmɔ ko eyako nɔ yɛ shwɛmɔ he nɛɛ mli. Shwɛmɔ he lɛ efite ejaakɛ asaaa ni kɔɔyɔŋ tsakemɔ efite lɛ. Yehowa Odasefoi ni naa shɛɔ aaafee 1,500 ye ŋmɛlɛtswai ni fa fe 65,000 kɛha esaamɔ kɛ ehe shamɔ. Be mli ni kpee be lɛ shɛɔ lɛ, nɛkɛ falefalefeemɔ he tafaa nɛɛ eha shwɛmɔ he lɛ etsɔ he ko ni sa kɛha anɔkwa Nyɔŋmɔ, Yehowa jamɔ.

Mɛni kanyaa Yehowa Odasefoi ni no haa amɛfeɔ sɔrɔto, yɛ be mli ni hiɛsɔɔ fioo ko pɛ jeŋ muu fɛɛ yɔɔ kɛha falefale-feemɔ kɛ gbɛjianɔ kpakpa lɛ? Ejɛ hiɛsɔɔ ni amɛnaa amɛhaa Biblia mli ŋaawoo akɛ Kristofoi ajie sui ni ejaaa tamɔ pɛsɛmkunya, mɔ he ni asusuuu, hiɛjoomɔ, kɛ suɔmɔ ni abɛ lɛ kɛjɛ amɛ he lɛ hewɔ. Biblia lɛ kɛɔ akɛ: “Ejaakɛ nyɛjie gbɔmɔ momo lɛ kɛ enitsumɔi lɛ nyɛshwie.” Nɔ ni akɛaato najiaŋ ji “gbɔmɔ hee ni tsɔɔ ehee ekoŋŋ kɛyaa nilee mli yɛ Mɔ ni bɔ lɛ lɛ subaŋ lɛ naa” lɛ. Gbɔmɔ ni suɔmɔ ni eyɔɔ kɛha falefalefeemɔ, gbɛjianɔtoo kpakpa, kɛ fɛo nɔ kadiɔ lɛ lɛ bɛ gbɛ kɛha mujiwoo nifeemɔ sui.​—Kolosebii 3:​9, 10; 2 Korintobii 7:1; Filipibii 4:8; Tito 2:⁠14.

Gbɔmɔ hee lɛ biɔ ni Kristofoi ahiɛ ahi amɛ he nɔ yɛ mujiwoo he, jeee ni eewo muji kɛkɛ loo ni ekɛ atuatsemɔ miiku hiɛ kɛmiifɔ mlai ni nɔyelii woɔ kɛshiɔ mujiwoo lɛ anɔ. Eyeɔ ebuaa Kristofoi koni amɛkpoo su ko ni ji nibii ni ashɛrɛɔ ashwieɔ shi ni eji pɛsɛmkunya, kɛ hejɔfeemɔ gbɛ ni atsɔɔ nɔ akɛwoɔ jwɛi lɛ. Mfonirii ni akɛkpɛtɛɔ shi loo atɛŋɔ yɛ gbogboi ahe akɛ gbɛ ni atsɔɔ nɔ akɛjieɔ yiŋsusumɔi kɛ henumɔi akpo, akɛ miishɛɛnamɔ ko kɛkɛ, aloo akɛ gbɛ kroko ni atsɔɔ nɔ akɛtɛŋɔ nii lɛ fataaa bulɛ ni aaana aha mɛi krokomɛi anii lɛ he. Nɔ ni ebiɔ ji ni aha shiai, lɔlei, atadei kɛ gbɔmɔtsei ahe atse.​—Okɛto Yakobo 1:21 he.

Akɛni gbɔmɛi yɛ ni sumɔɔɔ ni amɛwoɔ nɛkɛ gbɔmɔ hee nɛɛ hewɔ lɛ, ani abaanyɛ ashwa Nyɔŋmɔ kɛ etsi amɛnaa kɛjɛ wala ni amɛaana yɛ e-Paradeiso ni baa lɛ mli lɛ he? Dabi kwraa. Mɔ fɛɛ mɔ ni susuɔ mujiwoo he yɛ etsui loo ejwɛŋmɔ mli lolo lɛ baawo shibɔlemɔ ŋulami ni ji Shikpɔŋ nɛɛ ni afee lɛ paradeiso fɛfɛo ni asaa atswa ama shi ekoŋŋ lɛ he gbeyei, ni amɛkɛaawo mɛi ni shweɔ ni amɛha ehi shi nakai lɛ awerɛho. Nyɔŋmɔ yiŋ ni eto akɛ “[e]baafite mɛi ni fiteɔ shikpɔŋ lɛ” ji jalɛ kɛ suɔmɔ kpojiemɔ hu.​—Kpojiemɔ 11:​18; 21:⁠8.

Ani Esa akɛ Wɔkɛ Wɔhe Awo Mli Vii?

Shi, ani enɛ tsɔɔ akɛ aabi ni Kristofoi awo nii ni afeɔ akɛkuɔ mujiwoo naa lɛ mli hewalɛ loo ni akɛwo falefalefeemɔ he hewalɛ?

Eka shi faŋŋ akɛ mujiwoo yeɔ gbɔmɔtsoŋ hewalɛnamɔ kɛ maŋbii shweshweeshwe shihilɛ awui. Yehowa susuɔ saji ni tamɔ nɛkɛ he yɛ gbɛ ni ja nɔ, taakɛ wɔnaa yɛ mlai ni ekɛha Israelbii lɛ amli lɛ. (2 Mose 21:​28-34; 5 Mose 22:8; 23:​12-14) Shi be bako pɛŋ ni ekɛ amɛ etsu nii ekɛkɔne mɛi krokomɛi ayiŋ yɛ saji ni kɔɔ maŋbii ashweshweeshwe shihilɛ he lɛ gbɛfaŋ; ni asaŋ, ekɛɛɛ klɛŋklɛŋ afii oha lɛ mli Kristofoi lɛ hu akɛ amɛfee nakai.

Ŋmɛnɛ, saji ni kɔɔ wɔshihilɛ hei ahe lɛ baanyɛ atsɔ maŋkwramɔŋ saji yɛ gbɛ ni waaa kwraa nɔ. Eji anɔkwale akɛ, ato maŋkwramɔŋ kui komɛi ahe gbɛjianɔ, titri lɛ kɛ yiŋtoo lɛ akɛ akɛaato wɔshihilɛ hei anaagbai ahe gbɛjianɔ ni akɛna tsabaa. Kristofonyo ni haa enɛ naa enɔ hewalɛ ni ekɛ ehe woɔ maŋkwramɔŋ nifeemɔ nii ni tamɔ nɛkɛ mli lɛ jeee mɔ ko ni kɛ ehe wooo maŋkwramɔ saji amli dɔŋŋ. Yesu kɛ shishitoo mla nɛɛ fɔ shi ha ekaselɔi lɛ akɛ: “Amɛjɛɛɛ je lɛ mli, taakɛ bɔ ni mihu mijɛɛɛ je lɛ mli lɛ.” Kristofonyo ni ebuuu nakai taomɔ nii lɛ kɛ ehe woɔ oshara ni haa ekɛ “je nɛŋ onukpai ni hoɔ yaa lɛ” feɔ ekome lɛ mli.​—Yohane 17:​16; 1 Korintobii 2:⁠6.

Yesu ebɔɔɔ mɔdɛŋ akɛ eeetao shihilɛ mli naagbai ni yaa nɔ yɛ egbii lɛ amli lɛ fɛɛ naa tsabaa; asaŋ ekɛɛɛ ekaselɔi lɛ akɛ amɛfee nakai. Famɔ ni ekɛha amɛ ji: “No hewɔ lɛ, nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ . . . , ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.” Ekɛ wɔshihilɛ hei asaji ahe famɔ haaa amɛ.​—Mateo 28:​19, 20.

Beni Kristo tsɔɔ nɔ ni sa akɛ eyeɔ klɛŋklɛŋ gbɛhe yɛ Kristofonyo shihilɛ mli lɛ mli etsɔɔ lɛ, ekɛɛ: “Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu.” (Mateo 6:33) Be mli ni Yehowa tsɔɔ Mesia Maŋtsɛyeli lɛ nɔ ehaa atsuɔ ejalɛ shishitoo mlai lɛ ahe nii yɛ jeŋ muu fɛɛ lɛ, abaana wɔshihilɛ hei ahe naagbai lɛ anaa tsabaa kɛya naanɔ bɔ ni no aaaha mɔ fɛɛ mɔ tsui anyɔ emli.

No hewɔ lɛ, Yehowa Odasefoi ŋmɛɔ pɛpɛɛpɛ. Yɛ Romabii 13:​1-7 hewɔ lɛ, sɔ̃ ka amɛnɔ akɛ esa akɛ amɛjɛ henilee kpakpa mli amɛye mlai ni nɔyelii ewo yɛ wɔshihilɛ hei ahe lɛ anɔ. Kɛfata he lɛ, naanyo gbɔmɔ he anɔkwa suɔmɔ tsirɛɔ amɛ koni amɛjie bulɛ kpo amɛtsɔɔ mɛi krokomɛi anibii​—kɛ eji maŋ fɛɛ nii loo mɔ ko nii​—kɛtsɔ fitemɔ ni wɔfiteee lɛ kɛ agbɛnɛ jwɛi ni wɔshɛrɛɛɛ wɔshwieee shi yɛ gbɛ ni esaaa nɔ lɛ nɔ. Shi eyɛ faŋŋ akɛ afako amɛ ni amɛnyiɛ je lɛŋ falefalefeemɔ he saji ahiɛ. Amɛkɛ Nyɔŋmɔ Maŋtsɛyeli shɛɛ sane lɛ he shiɛmɔ yeɔ klɛŋklɛŋ gbɛhe yɛ gbɛ ni ja nɔ, ni amɛyɔseɔ akɛ enɛ ji gbɛ ni atsɔɔ nɔ afeɔ ekpakpa ni hiɔ shi kɛyaa naanɔ.

Mumɔŋ Falefalefeemɔ

Atee nɔ abɔ blema lsraelbii lɛ kɔkɔ yɛ nɔ ni baaba kɛji amɛwo shikpɔŋ lɛ nɔ muji kɛtsɔ amɛhe ni amɛkɛaawo jeŋba shara mli, aloo kɛtsɔ bulɛ kpo ni amɛjieee amɛtsɔɔɔ krɔŋkrɔŋ nibii lɛ nɔ. (4 Mose 35:​33; Yeremia 3:​1,2; Maleaki 1:​7, 8) Nɔ ni sa kadimɔ jogbaŋŋ lɛ, abu amɛ fɔ yɛ nɛkɛ mumɔŋ mujiwoo nɛɛ hewɔ, shi jeee yɛ gbɔmɔtsoŋ mujiwoo ko ni ekolɛ eeenyɛ ebalɛ akɛ amɛye no hu he fɔ hewɔ.b

No hewɔ lɛ mumɔŋ mujiwoo loo fɔ̃feemɔ ji nɔ ni klɛŋklɛŋ kwraa lɛ Kristofonyo lɛ bɔɔ mɔdɛŋ ni ekwa. Efeɔ enɛ kɛtsɔɔ “gbɔmɔ hee” lɛ ni ewoɔ ni jieɔ mujiwoo nibii kɛjɛɔ tsui kɛ jwɛŋmɔ mli lɛ nɔ. Yehowa Odasefoi fe akpekpei ejwɛ miina mumɔŋ falefale-feemɔ nɛɛ he sɛɛ, ni amɛnaa jamɔŋ kɛ jeŋba mli hetsemɔ yɛ amɛteŋ, kɛ gbɔmɔtsoŋ hetsemɔ ni anaa hu.​—Efesobii 4:​22-24.

Ŋmɛnɛ ji be kɛha mumɔŋ falefalefeemɔ he tafaa. Gbɔmɔtsoŋ falefalefeemɔ yɛ shikpɔŋ lɛ fɛɛ nɔ baanyiɛ sɛɛ yɛ be ni sa mli, ni abaahere wɔshia lɛ yiwala koni ekatsɔ tumu kɛtsɔ ehewɔ shihilɛ hei ni eye ehe kɛjɛ mujiwoo mli ni sa ni eeena ekoŋŋ lɛ nɔ.​—Jajelɔ 3:⁠1.

[Shishigbɛ niŋmai]