Aatao Saji ni Agba Afɔ Shi ni Anyɛɔ akɛ He Fɔɔ Nɔ
MƆ NI tsɔɔ hiɛ enaa nibii ni baaba yɛ gbii etɛ mli lɛ baatsɔ niiatsɛ afii akpei abɔ.” Nɛkɛ China abɛbua ko kɛɔ.
Gbɔmɛi miisumɔ ni amɛle nɔ ni baaba yɛ wɔsɛɛ be mli, ni mɛi pii baawo shika pii yɛ miishɛɛ mli koni amɛnu saji ni tamɔ nakai ni anyɛɔ akɛ he fɔɔ nɔ. Amɛtaoɔ saji ni agba afɔ shi ni anyɛɔ akɛ he fɔɔ nɔ. Taakɛ anaa kɛjɛ kɔɔyɔŋ tsakemɔ kɛ shika he saji ni agbaa afɔɔ shi lɛ mli lɛ, wɔsumɔɔ ni wɔle saji ni jwere wɔhiɛ ni baaba. Agbɛnɛ hu wɔsɛɛ be he nilee ni anyɛɔ akɛ he fɔɔ nɔ baaye abua wɔ koni wɔto wɔshihilɛi ahe gbɛjianɔ.
Bɔ ni gbɔmɛi sumɔɔ ni amɛle nɔ ni yɔɔ wɔsɛɛ be lɛ haa mɛi pii yabiɔ ashwai-afeelɔi, jamɔ he nilelɔi, ŋulamiiaŋkwɛlɔi, kɛ okɔmfoi anii. Nɔ ni eyi shwapoi ni hɔɔ woji lɛ amli obɔ ji mɛi ni kɛɔ akɛ amɛgbaa wɔsɛɛ be he saji lɛ ablema kɛ ŋmɛnɛŋmɛnɛ beaŋ niŋmaai. Shi yiŋkɔshikɔshi-feemɔ yɛ saji ni agbaa nɛɛ ahe. Abɔɔ amaniɛ akɛ Roma maŋ onukpa Cato wie akɛ: “Efeɔ mi naakpɛɛ akɛ ashwai feelɔ eŋmɔɔɔ kɛ ekɛ ashwai feelɔ kroko kpe.”
Shi saji ni agbaa afɔɔ shi lɛ sɔrɔtoi yɔɔ. Afi 1972 mli ni majimaji ateŋ nilelɔi kɛ nitsumɔi akuu ko ni ale amɛ akɛ The Club of Rome lɛ ŋma nɔ ko ni amɛkase he nii amɛfɔ shi ni miigba akɛ etsɛŋ ni nibii ni anyɛɛɛ akɛ eko ato najiaŋ lɛ fɛɛ baata yɛ je lɛŋ. Anaŋ shika futru yɛ 1981, mercury yɛ 1985, zinc loo sanyãa yɛ 1990, mu loo pɛtrol yɛ 1992, kɛ nibii krokomɛi. Wɔmiina bianɛ akɛ nibii ni agba afɔ shi nɛɛ baaa mli.
Nibii ni agbaa afɔɔ shi nɛɛ pii damɔ jamɔ mli susumɔi anɔ. Akɛ nɔkwɛmɔ nɔ lɛ: Saxon osɔfonukpa Wulfstan he ye akɛ Denmarkbii ni yatutua Ŋleshi Ablotsiri yɛ afii ohai 11 lɛ shishijee mli lɛ ji okadi ni tsɔɔ akɛ je lɛ naagbee ebɛŋkɛ. Yɛ afi 1525 mli lɛ, Thomas Mũnzer nyiɛ German ohiafoi atuatsemɔ ko hiɛ ejaakɛ ena ni ŋwɛibɔfoi miijɔ ŋmaakpamɔ kaklai anaa yɛ ninaa ko mli kɛmiiha nɔ ni esusuɔ akɛ ebaafee ŋmaakpamɔ be kpeteŋkpele . Eka shi faŋŋ akɛ nɛkɛ nibii ni agba afɔ shi nɛɛ jeee anɔkwale
Taakɛ ekolɛ ole lɛ, nibii ni agba afɔ shi yɛ Biblia lɛ mli. Agbɛnɛ hu Biblia ŋmalɔi kɛɔ akɛ Nyɔŋmɔ mumɔ lɛ tsirɛ amɛ ni amɛŋmala. Kristofonyo bɔfo Petro kɛɛ: “Ŋmalɛ lɛŋ gbalɛ fɛɛ gbalɛ lɛ, ejɛɛɛ gbɔmɔ ko shishitsɔɔmɔ mli. Ejaakɛ gbalɛ ko bako yɛ gbɔmɔ suɔmɔnaa pɛŋ, shi moŋ mumɔ krɔŋkrɔŋ lɛ tsirɛɔ Nyɔŋmɔ gbɔmɛi krɔŋkrɔŋi lɛ ni amɛwieɔ.”—2 Petro 1:20, 21.
Kɛfata he lɛ, Biblia lɛ gba nibii sɔrɔtoi ni baaba ni kadiɔ yinɔ ni baana ba ni Yesu Kristo eba yɛ ŋwɛi Maŋtsɛyeli hewalɛ mli lɛ. Tawuu, hɔmɔ, shikpɔŋ-hosomɔi, kɛ adesai ajeŋba ni fiteɔ ni eko ni tamɔ nakai bako da baafee nibii ni baakadi nɔ ni Biblia lɛ tsɔɔ mli akɛ eji “naagbee gbii lɛ.” (2 Timoteo 3:1-5; Mateo 24:3-14, 34) Taakɛ Biblia lɛ tsɔɔ lɛ, ŋmɛnɛŋmɛnɛ nibii agbɛjianɔtoo nɛɛ jiemɔ baagba gbɛ aha adesai amiishɛɛnamɔ yɛ jeŋ hee ko ni jɔɔmɔi baŋ naagbee yɛ mli lɛ mli.—2 Petro 3:13; Kpojiemɔ 21:1-4.
Te osusuɔ nɛkɛ Biblia mli gbalɛi nɛɛ ahe ohaa tɛŋŋ? Taakɛ nibii ni agbaa afɔɔ shi lɛ ateŋ babaoo ji lɛ, ani amɛji yiŋsusumɔi komɛi kɛkɛ? Wɔbaanyɛ wɔka anɔkwale ni Biblia mli gbalɛi ni bako mli lɛ ji ha lɛ wɔkwɛ kɛtsɔ Biblia mli gbalɛi ni kɔɔ tsutsu nibii ni eho lɛ ni wɔɔkwɛ akɛ fɛɛ ba mli anɔkwale loo jeee nakai lɛ nɔ. Wɔbaasusu enɛɛmɛi ekomɛi ahe yɛ sane ni nyiɛ sɛɛ lɛ mli.
[He ni Mfoniri ni yɔɔ baafa 3 lɛ Jɛ]
Courtesy National Weather Service