Maŋtsɛyeli Jajelɔi Bɔ Amaniɛ
Shifimɔ kɛ Nyɔmɔwoo Babaoo Baa
YESU gba efɔ shi akɛ abaawa esɛɛnyiɛlɔi lɛ ayi, ni nakai nɔŋŋ bɔfo Paulo hu kɛɛ, taakɛ ajaje yɛ 2 Timoteo 3:12 lɛ, akɛ: “Shi mɛi fɛɛ hu ni taoɔ akɛ amɛaahi shi yɛ Nyɔŋmɔ jamɔ naa yɛ Kristo Yesu mli lɛ, aaawa amɛ yi.” Shi shifimɔ ni akɛsɔmɔɔ Yehowa Nyɔŋmɔ lɛ kɛ nyɔmɔwoo babaoo baa.
◻ Enɛ ba mli anɔkwale yɛ Malaysia kooyi-bokagbɛ ŋshɔ naa maŋ ko mli. Eyɛ mli akɛ tsɛ ko ji Buddha jalɔ waa ni tsɔɔ ebii anii jogbaŋŋ moŋ, shi nuu nɛɛ nyɛɛɛ atsi ebiyei etɛ kɛ ebihii etɛ lɛ anaa ni amɛkɛ Yehowa Odasefoi akakase Biblia lɛ. Eŋa po na anɔkwale lɛ he miishɛɛ. Kɛkɛ ni gbi ko lɛ ekutsoŋnyo ko ye ehe fɛo akɛ: “Te fee tɛŋŋ ni obii fɛɛ je odɛŋ nɛkɛ, ni oŋmɛ amɛ gbɛ ni amɛtsɔmɔ Yehowa Odasefoi? Mibii lɛ fɛɛ fata mihe gbagbalii yɛ wɔ blema Buddha jamɔ lɛ mli. Onii yɛ mɔbɔ waa!”
Tsɛ lɛ kɛ foi ba shia ni ebawo nyɛmiyoo ni kɛ gbekɛbii lɛ feɔ nikasemɔ lɛ he gbeyei akɛ ebaayi lɛ. Shi, gbekɛbii lɛ kɛ lɛ wie ni amɛkpatã lɛ, ni amɛtee nɔ amɛkɛ Yehowa Odasefoi kase Biblia lɛ ni amɛbɔi kpeeiyaa hu kɛtsɔ amɛmami sɛɛfimɔ nɔ.
Shi, yɛ naagbee lɛ, tsɛ lɛ bua weku muu lɛ fɛɛ naa kɛba ehiɛ. Ekɛɛ amɛ akɛ: “Nyɛhalaa akɛ nyɛmiisumɔ ni nyɛhi shia nɛɛ aloo nyɛbaatsɔmɔ Kristofoi ni nyɛshi shia nɛɛ.” Kɛkɛ ni binuu onukpa, ni wieɔ blɛoo lɛ bɔi enibii too amrɔ nɔŋŋ koni eshi shia lɛ. Ni tsɛ lɛ bo akɛ: “Dabi! Akɛni nyɛ fɛɛ nyɛtsɔmɔ bii atuatselɔi hewɔ lɛ, ehi kɛha mi akɛ magbo moŋ.” Kɛkɛ ni ewo foi kɛshi shia lɛ mli, ni weku muu lɛ fɛɛ nyiɛ esɛɛ, amɛmiikpa lɛ fai ni ekagbe ehe. Amɛfaikpamɔ lɛ na enɔ hewalɛ, ni eku esɛɛ eba shia.
Be saŋŋ baho. Tsɛ lɛ bɔi hewalɛ kpakpa ni Biblia mli anɔkwale lɛ naa yɛ ebii lɛ ajeŋba nɔ lɛ namɔ. Gbi ko lɛ ekɛ enaanyo ni ye ehe fɛo, ni amrɔ nɛɛ ehao waa lɛ kpe, ni ekɛɛ lɛ akɛ: “Mibii lɛ eha minine enyɛ shi kwraa. Amɛmiishishiu mi ni amɛmiiju mi nɔ fɛɛ nɔ.” Shi tsɛ lɛ ni ebii kɛ Yehowa Odasefoi kaseɔ nii lɛ kɛɛ akɛ: “Oo, mi lɛ, esoro mibii lɛ kwraa! Amɛmli jɔ waa kɛha mi, ni amɛye amɛbua mi ni minyɛ miwo shika ni mifa mikɛhe kar lɛ po beni mitsuuu nii lɛ.”
Ŋmɛnɛ, abaptisi biyei etɛ lɛ kɛ amɛmami. Binuu kome miisɔmɔ akɛ gbɛgbalɔ krɛdɛɛ. Ni tsɛ ni tsutsu lɛ emla wa ni emli fuɔ waa lɛ hu? Lɛ hu ena wiemɔ lɛ he miishɛɛ ni eba Kaimɔ lɛ shishi.
Yehowa wo binuu lɛ kɛ enyɛmimɛi yei etɛ lɛ, kɛ amɛnyɛ hu nyɔmɔ yɛ bɔ ni amɛfi shi amɛha Lɛ lɛ he. Amɛji Maŋtsɛyeli shiɛlɔi ni yɔɔ ekaa bianɛ, ni haa Yehowa tsui nyɔɔ emli.—Abɛi 27:11.