Yehowa Yeɔ Nɔ—Kɛtsɔɔ Teokrase Nɔ
“Yehowa aaaye maŋtsɛ kɛaatee naanɔ.”—LALA 146:10.
1, 2. (a) Mɛni hewɔ gbɔmɔ mɔdɛŋbɔɔ yɛ nɔyeli he lɛ efee yaka lɛ? (b) Mɛni efee nɔyeli kome pɛ ni eye omanye?
KƐJƐ Nimrod be mli ni gbɔmɛi eka gbɛi sɔrɔtoi ni amɛaatsɔ nɔ amɛye gbɔmɛi anɔ lɛ amɛkwɛ. Yiwalɛ nɔyelii, maŋtsɛmɛi anɔyelii, nɔyelii ni hewalɛ fɛɛ yɔɔ gbɔmɛi akuu fioo ko dɛŋ, kɛ maŋbii anɔyelii sɔrɔtoi. Yehowa eŋmɛ fɛɛ gbɛ. Yɛ anɔkwale mli lɛ, akɛni Nyɔŋmɔ ji hegbɛ fɛɛ Jɛɛhe hewɔ lɛ, yɛ shishinumɔ ko naa lɛ, lɛ ji mɔ ni kɛ nɔyelɔi lɛ tara amɛgbɛhei ni husu yɔɔ mli lɛ. (Romabii 13:1) Ni kɛlɛ, mɔdɛŋ fɛɛ ni gbɔmɔ ebɔ yɛ nɔyeli he lɛ efee yaka. Adesa nɔyelɔ ko kɛ adesai asafo ko ni hiɔ shi daa, ni yɔɔ shiŋŋ, ni ja bako. Shii abɔ ni “gbɔmɔ eye enyɛmi gbɔmɔ nɔ ni ekɛye lɛ awui.”—Jajelɔ 8:9, New World Translation.
2 Ani esa akɛ enɛ afee wɔ naakpɛɛ? Dabi! Abɔɔɔ gbɔmɔ ni yeee emuu lɛ akɛ eye lɛ diɛŋtsɛ ehe nɔ. “Gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enajifamɔi eha lɛ, ebɛ edɛŋ.” (Yeremia 10:23) Ni no hewɔ ni yɛ adesa yinɔsane be fɛɛ mli lɛ, nɔyeli kome pɛ eye omanye diɛŋtsɛ lɛ. Te nɔ ni ji? Teokrase ni yɔɔ Yehowa Nyɔŋmɔ shishi. Yɛ Biblia ni aŋma yɛ Hela mli lɛ gbɛfaŋ lɛ, “teokrase” shishi ji nɔyeli [kraʹtos] ni Nyɔŋmɔ [the·osʹ] to. Mɛɛ nɔyeli kpakpa baanyɛ ahi shi fe Yehowa Nyɔŋmɔ diɛŋtsɛ nɔ̃ lɛ?—Lala 146:10.
3. Mɛni ji mra be mli nɔkwɛmɔ nii komɛi ni tsɔɔ akɛ teokrase hi shikpɔŋ lɛ nɔ?
3 Teokrase ye nɔ yɛ be kukuoo mli yɛ Eden, kɛyashi be mli ni Adam kɛ Hawa tse atua amɛshi Yehowa. (1 Mose 3:1-6, 23) Etamɔ nɔ ni teokrase nɔyeli hi shi yɛ Abraham gbii lɛ amli yɛ Salem maŋtiase lɛ mli, beni Melkizedek ji maŋtsɛ kɛ osɔfo fɛɛ lɛ. (1 Mose 14:18-20; Hebribii 7:1-3) Shi, ato klɛŋklɛŋ maŋ ni yɔɔ teokrase ni yɔɔ Yehowa Nyɔŋmɔ shishi lɛ ama shi yɛ Sinai ŋa lɛ nɔ yɛ afii ohai 16 D.Ŋ.B. lɛ mli. Mɛɛ gbɛ nɔ atsɔ akɛ enɛ ba? Ni nakai teokrase nɔyeli lɛ tsu nii yɛ mɛɛ gbɛ nɔ?
Ato Teokrase Ama Shi
4. Te fee tɛŋŋ ni Yehowa to Israel teokrase maŋ lɛ?
4 Afi 1513 D.Ŋ.B. lɛ mli ni Yehowa here Israelbii lɛ ayiwala kɛjɛ nyɔŋyeli mli yɛ Mizraim ni ekpata Farao asraafoi ni tiuɔ amɛ lɛ ahiɛ yɛ Ŋshɔ Tsuru lɛ mli. Kɛkɛ ni E-nyiɛ Israelbii lɛ ahiɛ kɛtee Sinai Gɔŋ lɛ hiɛ. Beni amɛbɔ ŋsara yɛ gɔŋ lɛ shishi lɛ, Yehowa tsɔ Mose nɔ ekɛɛ amɛ akɛ: “Nyɛ diɛŋtsɛ nyɛna nɔ ni mifee Mizraimbii lɛ, kɛ bɔ ni mitere nyɛ yɛ okropɔŋi fiji anɔ, ni mikɛnyɛ ba miŋɔɔ nɛɛ. No hewɔ lɛ, agbɛnɛ kɛji nyɛaabo migbee toi, ni nyɛye mikpaŋmɔ lɛ nɔ lɛ, no lɛ nyɛaatsɔ mi diɛŋtsɛ minɔ yɛ maji fɛɛ ateŋ.” Israelbii lɛ ha hetoo akɛ: “Nibii fɛɛ ni Yehowa ewie lɛ, wɔɔfee.” (2 Mose 19:4, 5, 8) Afee kpaŋmɔ yɛ jɛmɛ, kɛkɛ ni afɔ Israel teokrase maŋ lɛ loo ato shishi.—5 Mose 26:18, 19.
5. Te aaafee tɛŋŋ anyɛ akɛɛ akɛ Yehowa ye maŋtsɛ yɛ Israel?
5 Shi mɛɛ gbɛ nɔ Yehowa, ni adesa hiŋmɛi enaaa lɛ lɛ tsɔ eye Israel nɔ maŋtsɛ yɛ? (2 Mose 33:20) No ji akɛ, Yehowa ji mɔ ni kɛ maŋ lɛ mlai kɛ osɔfoyeli lɛ ha. Mɛi ni bo mlai lɛ atoi ni amɛkɛ jamɔ ha taakɛ ajɛ ŋwɛi ato he gbɛjianɔ lɛ sɔmɔ Teokrat Kpeteŋkpele lɛ, Yehowa. Kɛfata he lɛ, osɔfonukpa lɛ yɛ Urim kɛ Tumim, ni Yehowa Nyɔŋmɔ tsɔɔ nɔ ekɛ gbɛtsɔɔmɔ haa yɛ hiamɔ bei amli. (2 Mose 28:29, 30) Agbɛnɛ, onukpai ni he esa ji Yehowa najiaŋdamɔlɔi yɛ teokrase lɛ mli ni amɛtsu Nyɔŋmɔ Mla lɛ nɔ yeli he nii. Kɛ wɔsusu nɛkɛ hii nɛɛ ekomɛi ahe sane he lɛ, ebaaha wɔnu bɔ ni esa akɛ adesai aba amɛhe shi amɛha Nyɔŋmɔ nɔyeli lɛ shishi jogbaŋŋ.
Nɔyeli Hegbɛ yɛ Teokrase Shishi
6. Mɛni hewɔ eji mɔdɛŋbɔɔ kɛ hiɛmiamɔ akɛ gbɔmɛi aaahiɛ hegbɛ ko yɛ teokrase nɔyeli mli lɛ, ni mɛɛ hii nɛkɛ he hiaa kɛha nɛkɛ gbɛnaa nii nɛɛ?
6 Mɛi ni yɔɔ nɔyeli hegbɛ yɛ Israel lɛ na hegbɛ kpeteŋkpele diɛŋtsɛ, shi ebi mɔdɛŋbɔɔ kɛ hiɛmiamɔ yɛ pɛpɛɛpɛ ni amɛaaŋmɛ lɛ mli. Esa akɛ amɛkwɛ jogbaŋŋ koni amɛkasusu amɛ diɛŋtsɛ amɛhe babaoo fe Yehowa gbɛi lɛ hetsemɔ. Mumɔŋ wiemɔ akɛ “gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enajifamɔi eha lɛ, ebɛ edɛŋ” lɛ ji anɔkwale yɛ Israelbii lɛ ahe taakɛ eji yɛ adesai ni eshwɛ lɛ fɛɛ he lɛ. Israel shwereɔ yɛ be mli ni onukpai lɛ kaiɔ akɛ Israel ji teokrase ni ákɛ esa akɛ amɛfee Yehowa suɔmɔnaa nii shi jeee amɛnɔ̃ lɛ. Beni ato Israel shishi etsɛɛɛ ni Mose shaanuu, Yetro tsɔɔ nɔ̃ hii ni esa akɛ amɛji lɛ mli jogbaŋŋ, ni ji akɛ, “hii ni yɔɔ hewalɛ, ni sheɔ Nyɔŋmɔ gbeyei, ni amɛji anɔkwafoi, ni hiɔ hiɛjoomɔ.”—2 Mose 18:21.
7. Yɛ mɛɛ gbɛ nɔ Mose ji nɔkwɛmɔ nɔ kpakpa kɛha mɛi ni hiɛ hegbɛ yɛ Yehowa Nyɔŋmɔ shishi lɛ?
7 Klɛŋklɛŋ mɔ ni na nɔyeli hegbɛ ni kwɔ fe fɛɛ yɛ Israel ji Mose. Eji hegbɛ ni akɛtsuɔ nii yɛ teokrase gbɛjianɔtoo mli lɛ he nɔkwɛmɔ nɔ kpakpa. Eji anɔkwale akɛ adesa gbɔjɔmɔ jie ehe kpo yɛ emli be ko. Shi, Mose kɛ ehe fɔɔ Yehowa nɔ be fɛɛ be. Beni sanebimɔi komɛi ni ahako hetoo momo tetee shi lɛ, etao Yehowa gbɛtsɔɔmɔ yɛ mli. (Okɛto 4 Mose 15:32-36 he.) Mɛɛ gbɛ nɔ Mose tsɔ ekũ kaa akɛ ekɛ egbɛhe ni kwɔ lɛ atsu nii ni ekɛwo lɛ diɛŋtsɛ ehiɛnyam lɛ naa yɛ? Ojogbaŋŋ, eyɛ mli akɛ enyiɛ maŋ ni amɛfalɛ shɛɔ akpekpei abɔ hiɛ moŋ, shi “ehe jɔ fe gbɔmɛi fɛɛ ni yɔɔ shikpɔŋ nɛɛ nɔ.” (4 Mose 12:3) Etaooo lɛ diɛŋtsɛ ehiɛnyam ko, shi moŋ nɔ ni esusuɔ he waa ji Nyɔŋmɔ anunyam. (2 Mose 32:7-14) Ni Mose yɛ hemɔkɛyeli ni mli wa. Beni Paulo wieɔ bɔ ni eji dani ebatsɔ maŋ hiɛnyiɛlɔ lɛ he lɛ, ekɛɛ: “Emɔ Mɔ ni anaaa lɛ lɛ mli tamɔ nɔ ni eena lɛ.” (Hebribii 11:27) Eyɛ faŋŋ akɛ Mose hiɛ kpaaa nɔ akɛ Yehowa ji maŋ lɛ Nɔyelɔ diɛŋtsɛ. (Lala 90:1, 2) Mɛɛ nɔkwɛmɔ nɔ kpakpa po enɛ ji kɛha wɔ ŋmɛnɛ nɛkɛ!
8. Mɛɛ kita Yehowa wo Yoshua, ni mɛni hewɔ enɛ sa kadimɔ jogbaŋŋ lɛ?
8 Beni Israel nɔkwɛmɔ bafee nɔ ni fa tsɔ kɛha Mose kome pɛ lɛ, Yehowa kɛ emumɔ wo onukpai 70 mli koni amɛye amɛbua lɛ yɛ maŋ lɛ kojomɔ mli. (4 Mose 11:16-25) Maŋtiasei lɛ fɛɛ baana amɛ onukpai yɛ sɛɛ mli afii lɛ amli. (Okɛto 5 Mose 19:12; 22:15-18; 25:7-9 he.) Mose gbele sɛɛ lɛ, Yehowa fee Yoshua maŋ lɛ hiɛnyiɛlɔ. Wɔbaanyɛ wɔsusu akɛ yɛ hegbɛ nɛɛ hewɔ lɛ Yoshua yɛ babaoo feemɔ. Shi lɛ lɛ, Yehowa kɛɛ lɛ akɛ nɔ kome ko yɛ ni esaaa akɛ ekuɔ ehiɛ eshwieɔ nɔ: “Kaaha nɛkɛ mla wolo nɛɛ mli wiemɔi lɛ miikpa yɛ odaaŋ, shi jwɛŋmɔ he nyɔɔŋ kɛ shwane, koni ojwɛŋ nɔ ni ofee tamɔ bɔ ni aŋma yɛ mli lɛ pɛpɛɛpɛ.” (Yoshua 1:8) Kadimɔ akɛ eyɛ mli akɛ Yoshua kɛ nɔ ni fe afii 40 esɔmɔ moŋ, shi ehe miihia ni eya nɔ ekane Mla lɛ. Ehe miihia ni wɔ hu wɔkase Biblia lɛ ni wɔha Yehowa mlai kɛ eshishitoo taomɔ nii afee ehee daa yɛ wɔjwɛŋmɔ mli—ni bɔ ni wɔsɔmɔ yɛ be kakadaŋŋ mli wɔha loo bɔ ni hegbɛi sɔrɔtoi abɔ ni wɔyɔɔ lɛ fa ha kɔɔɔ he eko.—Lala 119:111, 112.
9. Mɛni tee nɔ yɛ Israel yɛ kojolɔi lɛ abe lɛ mli?
9 Kojolɔi sɔrɔtoi nyiɛ Yoshua sɛɛ ba. Shi nɔ ni miishɛɛ bɛ mli ji akɛ, yɛ amɛbei lɛ amli lɛ, Israelbii lɛ “fee efɔŋ yɛ Yehowa hiɛ.” (Kojolɔi 2:11) Nɔ ni aŋma afɔ shi lɛ wieɔ kojolɔi lɛ abe lɛ he akɛ: “Nakai gbii lɛ amli lɛ, maŋtsɛ ko bɛ Israel; mɔ fɛɛ mɔ feɔ nɔ ni ja yɛ lɛ diɛŋtsɛ ehiɛ.” (Kojolɔi 21:25) Mɔ fɛɛ mɔ kpɛɔ eyiŋ yɛ jeŋba kɛ jamɔ he, ni yinɔsane tsɔɔ akɛ Israelbii lɛ ateŋ mɛi pii kpɛ yiŋ ni ejaaa. Amɛkɛ amɛhe yawo wɔŋjamɔ mli ni yɛ bei komɛi amli lɛ amɛfeɔ efɔŋ ni hiɛdɔɔ yɔɔ mli. (Kojolɔi 19:25-30) Ni kɛlɛ, mɛi komɛi jie hemɔkɛyeli ni ekaaa kpo.—Hebribii 11:32-38.
10. Yɛ mɛɛ gbɛ nɔ nɔyeli tsake kwraa yɛ Israel yɛ Samuel be lɛ mli, ni mɛni kɛ enɛ ba?
10 Yɛ naagbee kojolɔ ni ji Samuel shihilɛ be mli lɛ, Israel tsɔ haomɔ mli yɛ nɔyeli hewɔ. Akɛni maŋtsɛmɛi yeɔ henyɛlɔi amaji ni ebɔle amɛhe lɛ fɛɛ nɔ hewɔ lɛ, Israelbii lɛ hu wie akɛ amɛ hu amɛmiitao maŋtsɛ. Amɛhiɛ kpa nɔ akɛ amɛyɛ Maŋtsɛ momo, ni ákɛ amɛ nɔyeli lɛ ji teokrase nɔ̃. Yehowa kɛɛ Samuel akɛ: “Jeee bo amɛkwa, shi mi moŋ amɛkwa, akɛ mikaye amɛnɔ maŋtsɛ.” (1 Samuel 8:7) Amɛ nɔkwɛmɔ nɔ lɛ kaiɔ wɔ bɔ ni ewaaa kwraa akɛ wɔɔlaaje wɔmumɔŋ nikwɛmɔ ni wɔha jeŋ ni ebɔle wɔhe lɛ ana wɔnɔ hewalɛ.—Okɛto 1 Korintobii 2:14-16 he.
11. (a) Yɛ tsakemɔ yɛ nɔyeli mli nɛɛ fɛɛ sɛɛ lɛ, te aaafee tɛŋŋ akɛɛ akɛ Israel tee nɔ akɛ teokrase nɔyeli yɛ maŋtsɛmɛi lɛ ashishi? (b) Mɛɛ kita Yehowa wo Israel maŋtsɛmɛi lɛ, yɛ mɛɛ yiŋtoo hewɔ?
11 Ni kɛlɛ, Yehowa kpɛlɛ Israelbii lɛ anibimɔ lɛ nɔ ni ehala amɛ klɛŋklɛŋ maŋtsɛmɛi enyɔ, Saul kɛ David eha amɛ. Israel tee nɔ ehi shi akɛ teokrase, ni Yehowa ji mɔ ni yeɔ nɔ. Bɔni afee ni emaŋtsɛmɛi lɛ akai enɛ lɛ, ebafee gbɛnaa nii ni ka amɛteŋ mɔ fɛɛ mɔ nɔ akɛ eŋma Mla lɛ eko eha lɛ diɛŋtsɛ ehe ni ekane daa, “koni ekase Yehowa, e-Nyɔŋmɔ lɛ gbeyeishemɔ, kɛ nɛkɛ mla nɛɛ mli wiemɔi fɛɛ kɛ akpɔi nɛɛ fɛɛ nɔ yeli, ni efee nakai, koni etsui akawo ehe nɔ fe enyɛmimɛi lɛ.” (5 Mose 17:19, 20) Hɛɛ, Yehowa miisumɔ ni mɛi ni yɔɔ hegbɛ yɛ eteokrase lɛ mli lɛ afee mɛi ni holeee amɛhe nɔ, ni akɛ esa akɛ amɛnifeemɔi atsɔɔ akɛ amɛdiɔ e-Mla lɛ sɛɛ.
12. Mɛɛ anɔkwayeli ni kɔɔ Maŋtsɛ David he aŋma afɔ shi?
12 Maŋtsɛ David yɛ hemɔkɛyeli ni ekaaa yɛ Yehowa mli, ni Nyɔŋmɔ kɛ lɛ fee kpaŋmɔ akɛ maŋtsɛmɛi aweku ko ni baahi shi daa baatsɔ ewekukpaa mli aba. (2 Samuel 7:16; 1 Maŋtsɛmɛi 9:5; Lala 89:30) Bɔ ni David ba ehe shi eha Yehowa lɛ sa kasemɔ. Ekɛɛ: “Yehowa, maŋtsɛ lɛ mii shɛɔ ehe yɛ ohewalɛ lɛ mli, ni kwɛ bɔ ni emli efili lɛ babaoo yɛ oyiwalaheremɔ lɛ mli!” (Lala 21:2) Eyɛ mli akɛ David tɔɔ fã yɛ bei komɛi amli yɛ helooŋ gbɔjɔmɔ hewɔ moŋ, shi nɔ ni efeɔ ji ehe ni ekɛfɔɔ Yehowa hewalɛ nɔ, shi jeee lɛ diɛŋtsɛ enɔ̃ nɔ.
Nifeemɔi kɛ Subaŋi ni Jeee Teokrase Nɔ̃
13, 14. Mɛni ji nifeemɔi ni jeee teokrase nɔ ni David sɛɛyelɔi lɛ kɛ amɛhe wo mli lɛ ekomɛi?
13 Jeee Israel hiɛnyiɛlɔi fɛɛ tamɔ Mose kɛ David. Mɛi pii jie lɛ kpo akɛ amɛbɛ bulɛ ko kwraa kɛha teokrase gbɛjianɔtoo, ni amɛŋmɛ apasa jamɔ gbɛ yɛ Israel. Nɔyelɔi anɔkwafoi lɛ ateŋ mɛi komɛi po feɔ amɛnii yɛ bei komɛi amli yɛ gbɛ ni jeee teokrase nɔ̃ nɔ. Nɔ ni yɔɔ mɔbɔ waa ji Salomo sane lɛ, mɔ ni aha lɛ nilee kɛ nifalɛ babaoo diɛŋtsɛ lɛ. (1 Maŋtsɛmɛi 5:5, 9) Ni kɛlɛ, akɛni ebuuu Yehowa mla hewɔ lɛ, ekɛ ŋamɛi pii bote gbalashihilɛ mli ni eŋmɛ wɔŋjamɔ gbɛ yɛ Israel. Eka shi faŋŋ akɛ Salomo nɔyeli lɛ bafee yiwalɛ nɔyeli yɛ enaagbee afii lɛ amli.—5 Mose 17:14-17; 1 Maŋtsɛmɛi 11:1-8; 12:4.
14 Salomo binuu Rehabeam kɛ nibimɔ ko kpe akɛ eha maŋbii lɛ akɔŋtso lɛ afee mlɛo. Ní ekɛ mlijɔlɛ aaatsu sane lɛ he nii moŋ lɛ, ekɛ ninekpokpookpo-feemɔ jie ehewalɛ kpo—ni akutsei 12 lɛ mli 10 shĩ lɛ. (2 Kronika 10:4-17) Akutsei nyɔŋma ni tse amɛhe lɛ klɛŋklɛŋ maŋtsɛ ji Yerobeam. Bɔni afee ni ebɔ mɔdɛŋ ni emaŋtsɛyeli lɛ akayafata enyɛmimɛi lɛ ahe dɔŋŋ hewɔ lɛ, eto tsinabi jamɔ ema shi. Enɛ baanyɛ afee maŋkwramɔŋ nifeemɔ ko ni hiɛtɛɛ yɔɔ mli, shi etsɔɔ bulɛ ni abɛ kwraa kɛha teokrase lɛ. (1 Maŋtsɛmɛi 12:26-30) Yɛ sɛɛ mli, yɛ be mli ni Maŋtsɛ Asa kɛ anɔkwayeli esɔmɔ yɛ be kakadaŋŋ mli lɛ, eŋmɛ gbɛ ni henɔwomɔ fite enitsumɔ fɛfɛo lɛ. Ekɛ gbalɔ ni kɛ ŋaawoo ni jɛ Yehowa ŋɔɔ lɛ baha lɛ lɛ yeee yɛ mlijɔlɛ naa. (2 Kronika 16:7-11) Hɛɛ, ŋaawoo he hiaa mɛi ni amɛtsɛ lɛ po yɛ bei komɛi amli.
Teokrase ko Naagbee
15. Beni Yesu yɔɔ shikpɔŋ nɔ lɛ, yɛ mɛɛ gbɛ nɔ Yudafoi ajamɔ mli hiɛnyiɛlɔi lɛ yeee omanye akɛ mɛi ni yɔɔ hegbɛ yɛ teokrase mli lɛ?
15 Beni Yesu Kristo yɔɔ shikpɔŋ nɔ lɛ, no mli lɛ Israel ka he eji teokrase. Shi mɔbɔ sane ji akɛ, emli onukpai ni gbɛnaa nii jwere amɛnɔ lɛ ateŋ mɛi pii ajwɛŋmɔ bɛ mumɔŋ nibii anɔ. Amɛkaseee heshibaa ni Mose jie lɛ kpo lɛ. Yesu gbala jwɛŋmɔ kɛtee bɔ ni amɛfite yɛ mumɔŋ lɛ nɔ beni ekɛɛ: “Woloŋmalɔi lɛ kɛ Farisifoi lɛ, Mose sɛi lɛ nɔ amɛtara lɛ; no hewɔ lɛ nɔ fɛɛ nɔ ni amɛaakɛɛ nyɛ akɛ nyɛye nɔ lɛ, nyɛyea nɔ ni nyɛfea; shi amɛ nifeemɔnii lɛ nyakafea; ejaakɛ amɛkɛɔ moŋ, shi amɛfeee.”—Mateo 23:2, 3.
16. Yɛ mɛɛ gbɛ nɔ klɛŋklɛŋ afii oha lɛ mli Yudafoi ajamɔ mli hiɛnyiɛlɔi lɛ tsɔɔ yɛ akɛ amɛbɛ bulɛ kɛha teokrase?
16 Beni Yudafoi ajamɔ mli hiɛnyiɛlɔi lɛ kɛ Yesu ewo Pontio Pilato dɛŋ lɛ sɛɛ ni amɛkɛtsɔɔ bɔ ni amɛkpalaŋ kɛjɛ heshibaa ni amɛaafee amɛha teokrase lɛ he kɛtee shɔŋŋ amɛha. Pilato bibii Yesu sane ni ebu sane naa akɛ eyeee fɔ. Beni Pilato kɛ Yesu badamɔ Yudafoi lɛ ahiɛ lɛ, ekɛɛ: “Naa, nyɛ Maŋtsɛ lɛ!” Beni Yudafoi lɛ bi ni agbe Yesu lɛ, Pilato bi amɛ akɛ: “Nyɛ maŋtsɛ lɛ, misɛŋ lɛ lo?” Osɔfonukpai lɛ ha hetoo akɛ: “Wɔbɛ maŋtsɛ ko akɛ ja Kaisare.” (Yohane 19:14, 15) Amɛkpɛlɛ Kaisare nɔ akɛ maŋtsɛ, jeee Yesu, ni ba ‘yɛ Yehowa gbɛi amli’ lɛ!—Mateo 21:9.
17. Mɛni hewɔ heloo naa Israel ebafeee teokrase maŋ dɔŋŋ lɛ?
17 Akɛni amɛkpoo Yesu hewɔ lɛ, belɛ Yudafoi lɛ ekpoo teokrase, ejaakɛ lɛ ji mɔ ni baafee mɔ titri yɛ wɔsɛɛ be mli teokrase gbɛjianɔtoo lɛ mli. Yesu ji David bi odehe ni baaye maŋtsɛ kɛya naanɔ. (Yesaia 9:6, 7; Luka 1:33; 3:23, 31) No hewɔ lɛ, heloo naa Israel ebafeee maŋ ni Nyɔŋmɔ ehala dɔŋŋ.—Romabii 9:31-33.
Teokrase Hee
18. Mɛɛ teokrase hee ato ama shi yɛ klɛŋklɛŋ afii oha lɛ mli? Tsɔɔmɔ mli.
18 Shi kɛlɛ heloo naa Israel ni Nyɔŋmɔ kpoo lɛ lɛ jeee teokrase naagbee yɛ shikpɔŋ nɔ. Yehowa tsɔ Yesu Kristo nɔ eto teokrase hee. Enɛ ji Kristofoi ni afɔ amɛ mu lɛ asafo lɛ, ni ji maŋ hee diɛŋtsɛ lɛ. (1 Petro 2:9) Bɔfo Paulo tsɛ lɛ “Nyɔŋmɔ Israel,” ní yɛ naagbee lɛ emlibii lɛ ba kɛjɛ “akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ” mli lɛ. (Galatabii 6:16; Kpojiemɔ 5:9, 10) Yɛ be mli ni amɛ baa amɛhe shi amɛhaa adesa nɔyelii ni amɛhiɔ amɛ shishi lɛ, kɛlɛ Nyɔŋmɔ ji mɔ ni yeɔ teokrase hee lɛ mlibii lɛ anɔ diɛŋtsɛ. (1 Petro 2:13, 14, 17) Beni ato teokrase hee lɛ ama shi lɛ sɛɛ etsɛɛɛ ni heloo naa Israel nɔyelɔi lɛ nyɛ kaselɔi lɛ ateŋ mɛi komɛi anɔ koni amɛkabo famɔ ni Yesu kɛha amɛ lɛ toi. Mɛni ji hetoo lɛ? “Esa akɛ aboɔ Nyɔŋmɔ moŋ toi fe gbɔmɛi.” (Bofoi lɛ Asaji 5:29) Eji teokrase susumɔ diɛŋtsɛ!
19. Yɛ mɛɛ gbɛ nɔ abaanyɛ atsɛ klɛŋklɛŋ afii oha lɛ mli Kristofoi asafo lɛ akɛ eji teokrase lɛ?
19 Shi, mɛɛ gbɛ nɔ teokrase hee lɛ tsu nii yɛ? Maŋtsɛ ko yɛ, Yesu Kristo, ni damɔ Teokrat Kpeteŋkpele lɛ, Yehowa Nyɔŋmɔ najiaŋ. (Kolosebii 1:13) Eyɛ mli akɛ Maŋtsɛ lɛ yɛ ŋwɛi ni anaaa lɛ moŋ, shi enɔyeli lɛ ji nɔ ko ni yɔɔ pɔtɛɛ kɛha eshishibii lɛ, ni ewiemɔi ji nɔ ni yeɔ amɛshihilɛ nɔ. Yɛ enɔkwɛmɔ ni anaa lɛ he lɛ, ahala onukpai ni he esa yɛ mumɔŋ. Kuu ko ni tamɔ nɛkɛ sɔmɔ yɛ Yerusalem akɛ nɔyeli kuu. Mɛi ni damɔ nakai kuu lɛ najiaŋ ji nɔkwɛlɔi gbɛfalɔi tamɔ Paulo, Timoteo kɛ Tito. Onukpai akuu ko ni amɛdara yɛ mumɔŋ kwɛɔ asafo fɛɛ asafo nɔ. (Tito 1:5) Kɛ sane loo naagba ko ni mli wa te shi lɛ, onukpai lɛ biɔ nɔyeli kuu lɛ loo enajiaŋdamɔlɔi lɛ mɔ ko, tamɔ Paulo sane. (Okɛto Bɔfoi lɛ Asaji 15:2; 1 Korintobii 7:1; 8:1; 12:1 he.) Agbɛnɛ hu, asafo lɛ mlibii lɛ ateŋ mɔ fɛɛ mɔ tsuɔ egbɛfaŋnɔ yɛ teokrase lɛ sɛɛfimɔ mli. Eji gbɛnaa nii ni ka mɔ fɛɛ mɔ nɔ yɛ Yehowa hiɛ akɛ ekɛ Ŋmalɛ mli shishitoo mlai atsu nii yɛ eshihilɛ mli.—Romabii 14:4, 12.
20. Mɛni abaanyɛ awie yɛ teokrase he yɛ bɔfoi lɛ abei lɛ sɛɛ?
20 Paulo bɔ kɔkɔ akɛ yɛ bɔfoi lɛ agbele sɛɛ lɛ, hemɔkɛyeli kwamɔ baaba, ni eba nakai pɛpɛɛpɛ. (2 Tesalonikabii 2:3) Beni be shwieɔ mli lɛ, mɛi ni kɛɔ akɛ amɛji Kristofoi lɛ ayifalɛ bafee akpekpei ohai abɔ. Amɛto sɔlemɔ nɔyelii sɔrɔtoi ahe gbɛjianɔ, tamɔ osɔfoi sɔŋŋ anɔyeli, presbyteria, kɛ asafoŋ nɔ̃. Shi, nɛkɛ sɔlemɔi nɛɛ ajeŋba loo hemɔkɛyelii ejieee Yehowa nɔyeli kpo. Amɛjeee teokrasei!
21, 22. (a) Yehowa eku sɛɛ ekɛ teokrase eba ekoŋŋ yɛ naagbee be lɛ mli yɛ mɛɛ gbɛ nɔ? (b) Mɛɛ sanebimɔi ni kɔɔ teokrase he abaaha hetoo yɛ enɛ sɛɛ?
21 Anɔkwa Kristofoi ni ahalaa amɛ kɛjɛɔ apasa Kristofoi lɛ ateŋ baaya nɔ yɛ nibii agbɛjianɔtoo nɛɛ naagbee be lɛ mli. (Mateo 13:37-43) Enɛ ba mli yɛ 1919, tsakemɔ afi ni he hiaa waa yɛ teokrase lɛ yinɔsane be mli. Nakai be lɛ mli Yesaia 66:8 anunyam gbalɛ lɛ ba mli: “Namɔ enu enɛ eko pɛŋ, aloo namɔ ena enɛ eko pɛŋ? Ani gbi kome afɔɔ shikpɔŋ, aloo shikome afɔɔ jeŋmaŋ?” Nakai sanebimɔi lɛ ahetoo ji hɛɛ ni jijeɔ! Afi 1919 mli ni Kristofoi asafo lɛ bahi shi ekoŋŋ akɛ “maŋ” kroko. Afɔ teokrase “shikpɔŋ” diɛŋtsɛ tamɔ yɛ gbi kome nɔ! Yɛ be mli ni naagbee be lɛ yaa hiɛ lɛ, afee tsakemɔ yɛ maŋ hee lɛ gbɛjianɔtoo mli koni ebɛŋkɛ bɔ ni klɛŋklɛŋ afii oha lɛ mli lɛ nɔ̃ lɛ ji ha lɛ he kpaakpa. (Yesaia 60:17) Shi eji teokrase yɛ be fɛɛ mli. Yɛ jeŋba kɛ hemɔkɛyeli mli lɛ, ejieɔ ŋwɛi mlai kɛ shishitoo taomɔ nii ni yɔɔ Ŋmalɛi lɛ amli lɛ kpo yɛ be fɛɛ mli. Ni ebaa ehe shi ehaa Yesu Kristo, ni awo lɛ Maŋtsɛ lɛ yɛ be fɛɛ mli.—Lala 45:18; 72:1, 2.
22 Ani okɛ ohe ebɔ teokrase nɛɛ he? Ani oyɛ hegbɛ loo gbɛhe ko yɛ mli? Kɛji nakai ni lɛ, ani ole nɔ ni onii ni ooofee yɛ teokrase gbɛ nɔ lɛ tsɔɔ lɛ shishi? Ani ole osharai loo tsɔnei ni esa akɛ okwa? Abaasusu naagbee sanebimɔi enyɔ lɛ ahe yɛ nikasemɔ ni nyiɛ enɛ sɛɛ lɛ mli.
Ani Obaanyɛ Otsɔɔ Mli?
◻ Mɛni ji teokrase?
◻ Israel ji teokrase yɛ mɛɛ gbɛ nɔ?
◻ Mɛɛ gbɛjianɔ Nyɔŋmɔ to koni ekɛkai maŋtsɛmɛi lɛ akɛ Israel ji teokrase?
◻ Kristofoi asafo lɛ ji teokrase yɛ mɛɛ gbɛ nɔ, ni mɛɛ gbɛ nɔ atsɔ ato he gbɛjianɔ?
◻ Mɛɛ teokrase gbɛjianɔtoo akɛma shi yɛ wɔbei nɛɛ amli?
[Mfoniri ni yɔɔ baafa 12]
Yudafoi ajamɔ mli hiɛnyiɛlɔi lɛ kpɛlɛ Kaisare nɔ yɛ Pontio Pilato hiɛ, moŋ fe Maŋtsɛ ni Yehowa ehala lɛ yɛ teokrase gbɛ nɔ lɛ