Tookwɛlɔi kɛ Tooi ni Yɔɔ Teokrase Mli

“Yehowa ji wɔ Kojolɔ, Yehowa ji wɔ Mla-Halɔ, Yehowa ji wɔ Maŋtsɛ; lɛ nɔŋŋ eeehere wɔyiwala.”—YESAIA 33:22, NW.

1. Yɛ mɛɛ gbɛ nɔ aaanyɛ akɛɛ yɛ akɛ klɛŋklɛŋ afii oha lɛ mli Kristofoi kɛ Kristofoi ni yɔɔ ŋmɛnɛ lɛ ji teokrase?

TEOKRASE shishi ji nɔyeli ni jɛ Nyɔŋmɔ. Nɔ ni ekɔɔ he ji Yehowa nɔyeli hegbɛ ni aaakpɛlɛ nɔ kɛ egbɛtsɔɔmɔi kɛ famɔi asɛɛnyiɛmɔ yɛ yiŋkpɛi wuji kɛ bibii ni wɔfeɔ yɛ shihilɛ mli lɛ amli. Klɛŋklɛŋ afii oha lɛ mli asafo lɛ ji teokrase nɔ̃ ŋmiiŋmi. No hewɔ lɛ Kristofoi baanyɛ awie yɛ anɔkwayeli mli akɛ: “Yehowa ji wɔ Kojolɔ, Yehowa ji wɔ Mla-Halɔ, Yehowa ji wɔ Maŋtsɛ.” (Yesaia 33:22, NW) Akɛni shwɛɛnii ni afɔ amɛ mu lɛ ji amɛshikwɛ̃ɛ he hewɔ lɛ, Yehowa Nyɔŋmɔ gbɛjianɔtoo ni yɔɔ ŋmɛnɛ lɛ hu ji teokrase diɛŋtsɛ.

Wɔji Teokrase Ŋmɛnɛ yɛ Mɛɛ Gbɛi Anɔ?

2. Mɛni ji gbɛ kome ni Yehowa Odasefoi tsɔɔ nɔ amɛbaa amɛhe shi amɛhaa Yehowa nɔyeli?

² Wɔɔnyɛ wɔkɛɛ akɛ Yehowa shikpɔŋ nɔ gbɛjianɔtoo lɛ ji teokrase yɛ mɛɛ gbɛ nɔ? Ejaakɛ mɛi ni yɔɔ mli lɛ baa amɛhe shi amɛhaa Yehowa nɔyeli. Ni amɛnyiɛɔ Yesu Kristo, mɔ ni Yehowa ewo lɛ Maŋtsɛ lɛ sɛɛ. Akɛ nɔkwɛmɔ nɔ lɛ, yɛ naagbee be lɛ mli lɛ, akɛ famɔ ni baa tɛ̃ɛ kɛjɛɔ Teokrat Kpeteŋkpele lɛ ŋɔɔ nɛɛ haa Yesu: “Okɛ onikpamɔ kakla lɛ awo mli ni okpa nii; ejaakɛ nikpamɔ ŋmɛlɛtswaa lɛ eshɛ, ni shikpɔŋ lɛ nɔ nikpamɔ nii lɛ egbi.” (Kpojiemɔ 14:15) Yesu boɔ toi ni ejeɔ shikpɔŋ lɛ nɔ nikpamɔ shishi. Kristofoi yeɔ buaa amɛ Maŋtsɛ lɛ yɛ nitsumɔ kpeteŋkpele nɛɛ mli kɛtsɔɔ sanekpakpa lɛ shiɛmɔ kɛ ekãa kɛ kaselɔi afeemɔ nɔ. (Mateo 28:19; Marko 13:10; Bɔfoi lɛ Asaji 1:8) Yɛ nakai feemɔ mli lɛ, belɛ amɛtsɔmɔ Yehowa, Teokrat Kpeteŋkpele lɛ nanemɛi nitsulɔi hu.—1 Korintobii 3:9.

3. Mɛɛ gbɛ nɔ Kristofoi baa amɛhe shi amɛhaa teokrase yɛ jeŋba he saji amli yɛ?

³ Yɛ jeŋba mli hu lɛ, Kristofoi baa amɛhe shi amɛhaa Nyɔŋmɔ nɔyeli. Yesu kɛɛ: “Mɔ ni feɔ anɔkwale nii lɛ baa la lɛ he, koni enitsumɔi lɛ aje kpo, ejaakɛ Nyɔŋmɔ mli atsu amɛ yɛ.” (Yohane 3:21) Naataomɔi ni kɔɔ tɛi ni afolɔ ashwie shi yɛ jeŋba he lɛ miiya nɔ ni ebaaa naagbee, shi béi ni tamɔ nɛkɛ bɛ Kristofoi ateŋ. Amɛbuɔ nɔ ni Yehowa kɛɔ akɛ ejeee jeŋba kpakpa lɛ akɛ ejeee ekpakpa, ni amɛtsiɔ amɛhe kɛjɛɔ he tamɔ hela ko ni tsɛŋeɔ mɔ! Amɛkwɛɔ amɛwekui anɔ hu, amɛboɔ amɛfɔlɔi atoi, ni amɛbaa amɛhe shi amɛhaa hegbɛi ni yeɔ nɔ lɛ. (Efesobii 5:3-5, 22-33; 6:1-4; 1 Timoteo 5:8; Tito 3:1) No hewɔ lɛ amɛfeɔ amɛnii yɛ teokrase gbɛ nɔ, yɛ Nyɔŋmɔ kɛ gbeekpamɔ naa.

4. Mɛɛ subaŋi gbohii Adam, Hawa, kɛ Saul jie lɛ kpo, shi Kristofoi jieɔ sui ni yɔɔ sɔrɔto kpo yɛ mɛɛ gbɛ nɔ?

⁴ Adam kɛ Hawa laaje Paradeiso lɛ ejaakɛ amɛmiisumɔ ni amɛkpɛ amɛyiŋ yɛ nɔ ni ja kɛ nɔ ni ejaaa he amɛha amɛhe. Yesu miisumɔ nɔ ko ni tamɔɔɔ enɛ. Ekɛɛ: “Mitaooo nɔ ni mi diɛŋtsɛ misumɔɔ, shi moŋ nɔ ni Tsɛ lɛ ni tsu mi lɛ sumɔɔ.” Kristofoi taoɔ nɔ ko ni tamɔ enɛ pɛpɛɛpɛ. (Yohane 5:30; Luka 22:42; Romabii 12:2; Hebribii 10:7) Saul, klɛŋklɛŋ Israel maŋtsɛ lɛ bo Yehowa toi—shi yɛ hiɛaŋhiɛaŋ. Akpoo lɛ yɛ enɛ hewɔ. Samuel kɛɛ lɛ akɛ: “Toiboo hi fe afɔle, ni ninumɔ hu hi fe tooi agboi afɔ.” (1 Samuel 15:22) Ani eji teokrase gbɛ akɛ aaanyiɛ Yehowa suɔmɔnaa nifeemɔ sɛɛ kɛyashɛ he ko, ekolɛ kɛtsɔ shiɛmɔ loo kpeei ni okɛ ohe aaawo mli daa, ni agbɛnɛ oŋmɛɛ saji ahe yɛ jeŋba gbɛfaŋ loo yɛ gbɛ ko nɔ? Dabi kwraa! Wɔbɔɔ mɔdɛŋ ni ‘wɔkɛ wɔsusuma muu fɛɛ afee Yehowa suɔmɔnaa nii.’ (Efesobii 6:6; 1 Petro 4:1, 2) Wɔtamɔɔɔ Saul, wɔbaa wɔhe shi wɔhaa Nyɔŋmɔ nɔyeli kwraa.

Ŋmɛnɛŋmɛnɛ Beaŋ Teokrase

5, 6. Mɛɛ gbɛ nɔ Yehowa kɛ adesai yeɔ yɛ ŋmɛnɛ, ni mɛni jɛɔ ekome ni akɛ gbɛjianɔtoo nɛɛ aaafee lɛ mli baa?

⁵ Yɛ bei ni eho lɛ amli lɛ, Yehowa ye nɔ, ni etsɔɔ aŋkroaŋkroi anɔ ejieɔ anɔkwalei akpo, tamɔ gbalɔi, maŋtsɛmɛi, kɛ bɔfoi. Ŋmɛnɛ, ebɛ lɛ nakai dɔŋŋ; gbalɔi loo bɔfoi ni mumɔ tsirɛɔ amɛ bɛ. Shi moŋ Yesu kɛɛ akɛ, beni eba akɛ maŋtsɛ lɛ, ebaana esɛɛnyiɛlɔi anɔkwafoi akuu ko, “tsulɔ anɔkwafo kɛ nilelɔ,” ni ebaahala lɛ eto enibii fɛɛ kwa nɔ. (Mateo 24:45-47; Yesaia 43:10) Afi 1919 mli ni ayoo nakai tsulɔ lɛ akɛ Kristofoi ni afɔ amɛ mu lɛ ateŋ shwɛɛnii lɛ. Kɛjɛ nakai be lɛ mli kɛbaa ní agbɛnɛ Yehowa Odasefoi a-Nɔyeli Kuu lɛ damɔ shi kɛha amɛ nɛɛ, efee teokrase shikwɛɛ he yɛ shikpɔŋ lɛ nɔ. Nitsumɔ he Nine Ajinafoi, nɔkwɛlɔi gbɛfalɔi, kɛ asafoŋ onukpai damɔɔ Nɔyeli Kuu lɛ najiaŋ yɛ jeŋ fɛɛ.

⁶ Ekome ni akɛ teokrase gbɛjianɔtoo lɛ aaafee lɛ ji heshibaa kɛha teokrase lɛ fa ni he hiaa waa. Gbeekpamɔ ni tamɔ nɛkɛ kɛ ekomefeemɔ kɛ gbɛjianɔtoo kpakpa baa yɛ jeŋ fɛɛ “nyɛmimɛi anaanyobɔɔ muu lɛ fɛɛ” mli. (1 Petro 2:17, NW) Yɛ no sɛɛ lɛ enɛ saa Yehowa ni “jeee sakasaka-feemɔ Nyɔŋmɔ, shi moŋ hejɔlɛ Nyɔŋmɔ ni” lɛ hiɛ.—1 Korintobii 14:33.

Onukpai ni Yɔɔ Teokrase Mli

7. Mɛni hewɔ abaanyɛ akɛɛ akɛ ahalaa Kristofoi onukpai lɛ yɛ teokrase gbɛ nɔ lɛ?

⁷ Anaa hesaai ni atsɔɔ mli yɛ Biblia lɛ mli kɛha nɔkwɛlɔ loo onukpa gbɛhe lɛ yɛ onukpai ni ahala amɛ lɛ fɛɛ ni amɛ gbɛhe kɔɔɔ he eko lɛ ahe. (1 Timoteo 3:1-7; Tito 1:5-9) Agbɛnɛ, Paulo wiemɔi ni ekɛyaha Efeso onukpai lɛ kɔɔ onukpai fɛɛ he: “Nyɛlea nyɛhe nɔkwɛmɔ kɛ tooikuu lɛ fɛɛ ni mumɔ krɔŋkrɔŋ lɛ ewo nyɛ amɛ nɔkwɛlɔi lɛ, koni nyɛlɛ Nyɔŋmɔ asafo lɛ.” (Bɔfoi lɛ Asaji 20:28) Hɛɛ, mumɔ krɔŋkrɔŋ ni baa kɛjɛɔ Yehowa Nyɔŋmɔ ŋɔɔ lɛ hala onukpai lɛ. (Yohane 14:26) Amɛhalamɔ lɛ ji teokrase nɔ̃. Agbɛnɛ, amɛlɛɔ Nyɔŋmɔ asafoku lɛ. Tooikuu lɛ ji Yehowa nii, jeee onukpai lɛ anii. Nyɔŋmɔ gbɛjianɔtoo lɛ ji teokrase nɔ̃.

8. Mɛni ji gbɛnaa nii ni jwere onukpai lɛ anɔ ŋmɛnɛ?

⁸ Bɔfo Paulo tsɔɔ onukpai lɛ agbɛnaa nii lɛ fɛɛ mli yɛ wolo ni eŋma eyaha Efesobii lɛ mli, akɛ: “Eha mɛi komɛi tsɔmɔ bɔfoi, ni mɛi komɛi gbalɔi, mɛi komɛi hu sanekpakpa jajelɔi, ni mɛi komɛi hu nɔkwɛlɔi kɛ tsɔɔlɔi, koni aŋɔsaa hetselɔi lɛ aha sɔɔmɔ nitsumɔ lɛ, kɛ Kristo gbɔmɔtso lɛ tswaa.” (Efesobii 4:11. 12) Bɔfoi kɛ gbalɔi lɛ abe lɛ ho yɛ “Kristo gbɔmɔtso” lɛ abifao-feemɔ lɛ sɛɛ. (Okɛto 1 Korintobii 13:8 he.) Shi onukpai ka he amɛmiijaje sanekpakpa lɛ, amɛmiilɛ tooi lɛ, ni amɛmiitsɔɔ nii lolo ni deka bɛ mli.—2 Timoteo 4:2; Tito 1:9.

9. Te esa akɛ onukpai asaa amɛhe ni amɛdamɔ shi amɛha Nyɔŋmɔ suɔmɔnaa nii yɛ asafo lɛ mli amɛha tɛŋŋ

⁹ Akɛni teokrase ji Nyɔŋmɔ nɔyeli hewɔ lɛ, onukpai ni he esa lɛ le Nyɔŋmɔ suɔmɔnaa nii lɛ jogbaŋŋ. Afa Yoshua ni ekane Mla lɛ daa gbi. Ehe miihia ni onukpai lɛ hu akase nii ni amɛkwɛ Ŋmalɛi lɛ amli daa ni amɛle Biblia kasemɔ he woji ni tsulɔ anɔkwafo kɛ nilelɔ lɛ feɔ lɛ amli saji. (2 Timoteo 3:14, 15) Nɔ ni fata enɛ he ji Buu-Mɔɔ lɛ kɛ Awake! woji tɛtrɛbii lɛ kɛ woji krokomɛi ni tsɔɔ bɔ ni Biblia mli shishitoo mlai kɔɔ shihilɛi pɔtɛɛ komɛi ahe lɛ hu.a Shi, yɛ be mli ni ehe miihia ni onukpa ko ale ni enyiɛ gbɛtsɔɔmɔi ni akɛha yɛ Buu Mɔɔ Asafo lɛ woji amli lɛ asɛɛ lɛ, esa akɛ ele Ŋmalɛ mli shishitoo mlai ni fiɔ gbɛtsɔɔmɔi nɛɛ asɛɛ lɛ hu jogbaŋŋ. Kɛkɛ lɛ ebaanyɛ ni ekɛ Ŋmalɛ naa gbɛtsɔɔmɔi atsu nii kɛ shishinumɔ kɛ mɔbɔnalɛ.—Okɛto Mika 6:8 he.

Kristofoi Asubaŋ loo Mumɔ ni Akɛsɔmɔɔ

10. Mɛɛ subaŋ gbonyo esa akɛ onukpai akwɛ amɛhe nɔ jogbaŋŋ yɛ he, ni yɛ mɛɛ gbɛ nɔ?

¹⁰ Aaafee afi 55 Ŋ.B. lɛ mli ni bɔfo Paulo ŋma eklɛŋklɛŋ wolo lɛ eyaha asafo ni yɔɔ Korinto lɛ. Naagbai ni etsu he nii lɛ ateŋ ekome kɔɔ hii komɛi ni taoɔ atsɔmɔ gbɔmɛi agboi yɛ asafo lɛ mli lɛ he. Paulo ŋma akɛ: “Nyɛtɔrɔ momo, nyɛna nii momo, nyɛshi wɔ sɛɛ ni nyɛmiiye maŋtsɛ; ni mina ni kulɛ nyɛmiiye maŋtsɛ lɛlɛŋ, koni wɔ hu wɔkɛ nyɛ aye!” (1 Korintobii 4:8) Yɛ Ŋ.B. klɛŋklɛŋ afii oha lɛ mli lɛ, Kristofoi lɛ fɛɛ yɛ hiɛnɔkamɔ akɛ, amɛkɛ Yesu baaye nɔ akɛ ŋwɛi maŋtsɛmɛi kɛ osɔfoi. (Kpojiemɔ 20:4, 6) Shi eka shi faŋŋ akɛ mɛi komɛi yɛ Korinto ni amɛhiɛ ekpa nɔ akɛ maŋtsɛmɛi bɛ Kristofoi ateokrase lɛ mli yɛ shikpɔŋ nɔ. Ni amɛaafee amɛhe tamɔ je nɛŋ maŋtsɛmɛi lɛ, nɔkwɛlɔi Kristofoi lɛ kaseɔ heshibaa, su ko ni saa Yehowa hiɛ.—Lala 138:6; Luka 22:25-27.

11. (a) Mɛni ji heshibaa he nɔkwɛmɔ nii komɛi ni ekaaa? (b) Te esa akɛ onukpai kɛ Kristofoi krokomɛi fɛɛ abu amɛhe amɛha tɛŋŋ?

¹¹ Ani heshibaa lɛ gbɔjɔmɔ ni? Dabi kwraa! Atsɔɔ akɛ Yehowa diɛŋtsɛ po baa ehe shi loo emli hi. (Lala 18:35, NW) Israel maŋtsɛmɛi lɛ nyiɛɔ asraafoi lɛ ahiɛ kɛyaa ta ni amɛyeɔ maŋ lɛ nɔ yɛ Yehowa shishi. Ni kɛlɛ esa akɛ amɛteŋ mɔ fɛɛ mɔ akwɛ jogbaŋŋ ‘koni ekawo etsui nɔ fe enyɛmimɛi lɛ.’ (5 Mose 17:20) Yesu ni atee lɛ shi lɛ ji ŋwɛi Maŋtsɛ. Shi beni eyɔɔ shikpɔŋ nɔ lɛ, efɔ́ ekaselɔi lɛ anaji ahe. Mɛɛ heshibaa po nɛ! Ni beni etsɔɔ akɛ eesumɔ ni ebɔfoi lɛ afee nakai nɔŋŋ lɛ, ekɛɛ: “Kɛji mi, Tsɔɔlɔ kɛ Nuŋtsɔ lɛ, mifɔ nyɛnaji ahe lɛ, esa akɛ nyɛ hu nyɛfɔfɔɔ nyɛnanemɛi anaji ahe.” (Yohane 13:14; Filipibii 2:5-8) Esa ákɛ akɛ anunyam kɛ yijiemɔ fɛɛ aha Yehowa, shi jeee gbɔmɔ ko. (Kpojiemɔ 4:11) Esa akɛ Kristofoi fɛɛ, kɛ amɛji onukpai loo jeee nakai amɛji hu lɛ adamɔ Yesu wiemɔi nɛɛ anɔ asusu amɛ diɛŋtsɛ amɛhe: “Tsuji ni he bɛ sɛɛnamɔ ko ji wɔ; nɔ ni ji wɔgbɛnaa akɛ wɔtsuɔ lɛ, no pɛ wɔtsu nɛɛ.” (Luka 17:10) Jwɛŋmɔ fɛɛ jwɛŋmɔ ni tamɔɔɔ enɛ lɛ jeee teokrase nɔ.

12. Mɛni hewɔ suɔmɔ ji su ni he hiaa ni esa akɛ Kristofoi onukpai ana lɛ?

¹² Kɛfata heshibaa he lɛ, Kristofoi onukpai hu naa suɔmɔ. Bɔfo Yohane tsɔɔ bɔ ni suɔmɔ he hiaa ha beni ekɛɛ akɛ: “Mɔ ni sumɔɔɔ mɔ lɛ, eleee Nyɔŋmɔ; ejaakɛ Nyɔŋmɔ lɛ, suɔmɔ ji lɛ.” (1 Yohane 4:8) Aŋkroaŋkroi ni sumɔɔɔ mɔ lɛ efeee amɛnii yɛ teokrase gbɛ nɔ. Amɛleee Yehowa. Biblia lɛ kɛɔ yɛ Nyɔŋmɔ Bi lɛ he akɛ: “Bɔ ni [Yesu] esumɔɔ emɛi ni yɔɔ je lɛŋ lɛ, nakai esumɔ amɛ kɛwula shi.” (Yohane 13:1) Yɛ be mli ni Yesu wieɔ etsɔɔ hii 11 ni baafee nɔyeli kuu lɛ fa yɛ Kristofoi asafo lɛ mli lɛ, ekɛɛ: “Enɛ ji mikita, akɛ nyɛsumɔ nyɛhe tamɔ bɔ ni misumɔ nyɛ lɛ.” (Yohane 15:12) Suɔmɔ ji anɔkwa Kristojamɔ kadimɔ nii. Egbalaa mɛi ni tsuii ekumɔ lɛ, mɛi ni yeɔ awerɛho, kɛ mumɔŋ nomii ni miishwe ni amɛye amɛhe lɛ. (Yesaia 61:1, 2; Yohane 13:35) Esa akɛ onukpai lɛ ajie suɔmɔ nɛɛ kpo yɛ gbɛ ni ekaaa nɔ.

13. Eyɛ mli akɛ naagbai ni yɔɔ ŋmɛnɛ lɛ baanyɛ afee nɔ ni mli wawai moŋ, shi te onukpa lɛ aaafee tɛŋŋ afee mɔ ni woɔ nɔ kpakpa he hewalɛ yɛ shihilɛi fɛɛ mli?

¹³ Ŋmɛnɛ, afɔɔ onukpai lɛ abimɔ akɛ amɛtsu naagbai komɛi ni yɔɔ hwanyaŋŋ he nii. Gbalashihilɛ mli naagbai baanyɛ afee nɔ ni etsɛ ni yaa nɔ daa. Obalaŋtai yɛ naagbai ni ebaawa kɛha mɛi ni edara yɛ afii amli lɛ akɛ amɛaana naa. Yɛ bei pii amli lɛ anuuu henumɔŋ helai ashishi jogbaŋŋ. Onukpa ni kɛ saji ni tamɔ nɛkɛ miikpe lɛ baleŋ nɔ ni esa akɛ efee. Shi ebaanyɛ ena hekɛnɔfɔɔ akɛ kɛ etsɔ sɔlemɔ nɔ ekɛ ehe fɔ Yehowa nilee nɔ, ni epɛi Biblia lɛ mli kɛ woji ni tsulɔ anɔkwafo kɛ nilelɔ lɛ eŋmala lɛ amli, ni ekɛ tooi lɛ ye yɛ heshibaa kɛ suɔmɔ naa lɛ, ebaanyɛ ena amɛnɔ hewalɛ kpakpa yɛ shihilɛ ni mli wa fe fɛɛ lɛ po mli.

14, 15. Mɛni ji wiemɔi komɛi ni tsɔɔ akɛ Yehowa kɛ onukpai kpakpai pii ejɔɔ ewebii lɛ?

¹⁴ Yehowa kɛ “gbɔmɛi ateŋ nikeenii” babaoo ejɔɔ egbɛjianɔtoo lɛ. (Efesobii 4:8) Yɛ be kɛ bei amli lɛ, Buu Mɔɔ Asafo lɛ nine shɛɔ woji ni shɛjeɔ mɔ mii ni yeɔ bɔ ni onukpai ni baa amɛhe shi lɛ kɛ musuŋtsɔlɛ kwɛɔ Nyɔŋmɔ tooi lɛ anɔ lɛ nɔ. Akɛ nɔkwɛmɔ nɔ lɛ, asafoŋ onukpa ko ŋma akɛ: “Minyɛŋ makai kpokpaa nɔkwɛlɔ ko saramɔ ni ná minɔ hewalɛ waa loo ni aawie he lolo yɛ asafo lɛ mli fe enɛ. Kpokpaa nɔkwɛlɔ lɛ ye ebua mi koni mina bɔ ni ehe hiaa ni mana jwɛŋmɔ kpakpa yɛ be mli ni mikɛ nyɛmimɛi lɛ yeɔ sharamɔ lɛ, ni ema yijiemɔ loo kafomɔ nɔ mi.”

¹⁵ Nyɛmiyoo ko ni ehe bahia ni efa gbɛ kɛya helatsamɔ he ko yɛ shɔŋŋ kɛha kwɛmɔ lɛ ŋma akɛ: “Kwɛ bɔ ni mina miishɛɛ ha beni minyɛ mikɛ onukpa ko kpe yɛ klɛŋklɛŋ gbɛkɛ ni miye yɛ helatsamɔ he ni yɔɔ shɔŋŋ ni kɛ shia jɛkɛ ni mitsui yeɔ lɛ! Lɛ kɛ nyɛmimɛi krokomɛi fite bei pii yɛ mimasɛi. Je lɛŋ bii po ni le amanehulu ni minaa lɛ nu he akɛ eji jeee miishɛjemɔ, kwɛmɔ, kɛ nakai nyɛmimɛi ni amɛtuu amɛhe amɛha ni yɔɔ suɔmɔ lɛ sɔlemɔi lɛ kulɛ miyi naŋ wala.” Nyɛmiyoo kroko hu ŋma akɛ: “Miyɛ wala mli ŋmɛnɛ ejaakɛ onukpai akuu lɛ kɛ tsuishitoo kudɔ mi yɛ be mli ni miyɔɔ nɔnyɛɛ ni naa wa waa shishi mli lɛ. . . . Nyɛminuu ko kɛ eŋa leee nɔ ni amɛbaakɛɛ mi. . . . Shi nɔ ni na minɔ hewalɛ fe fɛɛ ji akɛ, eyɛ mli akɛ amɛnuuu nɔ ni mitsɔɔ mli lɛ shishi jogbaŋŋ moŋ, shi amɛkɛ suɔmɔ kwɛ minɔ.”

16. Mɛɛ ŋaawoo Petro kɛhaa onukpai lɛ?

¹⁶ Hɛɛ, onukpai pii kɛ bɔfo Petro ŋaawoo lɛ miitsu nii: “Nyɛlɛa Nyɔŋmɔ asafoku ni yɔɔ nyɛteŋ lɛ, nyɛkwɛa nɔ, jeee nɔnyɛɛ naa, shi moŋ yɛ suɔmɔ naa; asaŋ jeee sɛɛnamɔ ni yɔɔ hiɛgbele hewɔ, shi moŋ tsuijurɔ naa; asaŋ jeee akɛ mɛi ni yeɔ asafoi lɛ anɔ nuŋtsɔmɛi-asane, shi moŋ mɛi ni toɔ okadii amɛhaa asafoku lɛ.” (1 Petro 5:1-3) Mɛɛ jɔɔmɔ po nɛkɛ teokrase onukpai nɛɛ ji nɛkɛ!

Tooi ni Yɔɔ Teokrase lɛ Mli

17. Tsĩi sui komɛi ni esa akɛ asafo lɛ mli bii fɛɛ ana lɛ ekomɛi ata.

¹⁷ Shi, jeee onukpai pɛ feɔ teokrase lɛ. Kɛ esa akɛ tookwɛlɔi lɛ afee amɛnii yɛ teokrase gbɛ nɔ lɛ, belɛ nakai nɔŋŋ esa akɛ tooi lɛ hu afee. Yɛ mɛɛ gbɛi anɔ? Ojogbaŋŋ, esa akɛ shishitoo mlai ni kudɔɔ tookwɛlɔi lɛ nɔŋŋ akudɔ tooi lɛ. Esa akɛ Kristofoi fɛɛ, ni jeee onukpai lɛ pɛ, aba amɛhe shi, kɛ amɛnine aaashɛ Yehowa dɛŋ jɔɔmɔ nɔ. (Yakobo 4:6) Esa akɛ amɛ fɛɛ amɛna suɔmɔ, ejaakɛ kɛ no bɛ mli lɛ, afɔlei ni wɔshãa wɔhaa Yehowa lɛ esaaa ehiɛ. (1 Korintobii 13:1-3) Ni esa akɛ wɔ fɛɛ, ni jeee onukpai lɛ pɛ “[a]yimɔ obɔbɔ kɛ [Nyɔŋmɔ] esuɔmɔnaa nii alee yɛ mumɔŋ nilee kɛ shishinamɔ fɛɛ mli.”—Kolosebii 1:9.

18. (a) Mɛni hewɔ anɔkwale lɛ he nilee ni ji hiɛaŋhiɛaŋ nɔ kɛkɛ faaa lɛ? (b) Mɛɛ gbɛ nɔ anɔkwale nilee aaatsɔ ayimɔ wɔ fɛɛ obɔbɔ yɛ?

¹⁸ Gbekɛbii kɛ onukpai fɛɛ kɛ yiŋkpɛi ni mli wawai kpeɔ daa gbi yɛ be mli ni amɛbɔɔ mɔdɛŋ ni amɛhi shi akɛ anɔkwafoi, yɛ Satan jeŋ ni amɛyɔɔ mli lɛ fɛɛ sɛɛ. Je lɛ su yɛ atadewoo, lalai, sinii, kɛ woji ahe lɛ kaa mɛi komɛi amumɔŋ shidaamɔ. Anɔkwale lɛ he nilee ni wɔɔna yɛ hiɛaŋhiɛaŋ kɛkɛ lɛ faaa bɔ ni no aaaha wɔŋmɛ pɛpɛɛpɛ. Kɛ wɔɔnyɛ wɔna nɔmimaa akɛ wɔɔhi shi akɛ anɔkwafoi lɛ, belɛ esa akɛ anɔkwa nilee ayimɔ wɔ obɔbɔ. Sanesɛɛkɔmɔ kɛ nilee ni Nyɔŋmɔ Wiemɔ lɛ pɛ baanyɛ ekɛha wɔ lɛ he miihia wɔ. (Abɛi 2:1-5) Enɛ tsɔɔ akɛ esa akɛ wɔna nikasemɔ sui kpakpai, ni wɔjwɛŋ nɔ ni wɔkaseɔ lɛ nɔ, ni wɔkɛtsu nii yɛ wɔshihilɛ mli. (Lala 1:1-3; Kpojiemɔ 1:3) Paulo miiŋma ayaha Kristofoi fɛɛ, shi jeee onukpai lɛ pɛ, beni ekɛɛ: “Mɛi ni edara lɛ anɔ ji niyenii kpakpa, mɛi ni fɔ ni amɛfɔɔ feemɔ lɛ eha amɛhenumɔ nii lɛ ele ekpakpa kɛ efɔŋ mlikpamɔ” lɛ.—Hebribii 5:14.

Tookwɛlɔi kɛ Tooi Tsuɔ Nii yɛ Ekomefeemɔ Mli

19, 20. Mɛɛ ŋaawoo akɛhaa mɔ fɛɛ mɔ koni akɛ onukpai lɛ afee ekome, ni mɛni hewɔ?

¹⁹ Yɛ naagbee lɛ, esa akɛ akɛɛ akɛ mɛi ni kɛ onukpai lɛ feɔ ekome lɛ ji mɛi ni jieɔ anɔkwa teokrase mumɔ loo subaŋ kpo. Paulo ŋma eyaha Timoteo akɛ: “Onukpai ni yeɔ nɔ jogbaŋŋ lɛ, esa akɛ aŋɔ woo toi enyɔ awo amɛ, titri lɛ mɛi ni bɔɔ wiemɔ kɛ tsɔɔmɔ he mɔdɛŋ lɛ.” (1 Timoteo 5:17; 1 Petro 5:5, 6) Onukpayeli ji hegbɛ ko ni sa yijiemɔ, shi onukpai pii yɛ wekui, ni amɛtsuɔ heloo gbɛfaŋ nitsumɔi daa gbi, ni amɛyɛ ŋamɛi kɛ bii ni amɛkwɛɔ amɛnɔ. Yɛ be mli ni amɛyɔɔ miishɛɛ akɛ amɛaasɔmɔ lɛ, amɛ nitsumɔ lɛ feɔ mlɛo ni nyɔmɔwoo jɛɔ mli baa yɛ be mli ni asafo lɛ fiɔ amɛsɛɛ, ni amɛwieee amɛshiii amɛ ni amɛfeee keketee yɛ nibimɔ mli lɛ.—Hebribii 13:17.

²⁰ Bɔfo Paulo kɛɛ: “Nyɛkaia nyɛ tsɔɔlɔi, mɛi ni wie Nyɔŋmɔ wiemɔ lɛ tsɔɔ nyɛ lɛ; nyɛkwɛa amɛjeŋba lɛ naagbee, ni nyɛkasea amɛhemɔkɛyeli lɛ.” (Hebribii 13:7) Dabi, Paulo wooo nyɛmimɛi lɛ hewalɛ ni amɛnyiɛ onukpai lɛ asɛɛ. (1 Korintobii 1:12) Gbɔmɔ sɛɛnyiɛmɔ jeee teokrase nɔ̃. Shi nilee yɛ mli akɛ aaakase teokrase onukpa ni yɔɔ ekaa yɛ sanekpakpa jajemɔ nitsumɔ lɛ mli, ni baa kpeei daa, ni kɛ asafo lɛ yeɔ yɛ heshibaa kɛ suɔmɔ mli lɛ hemɔkɛyeli ni aka akwɛ lɛ.

Hemɔkɛyeli He Odaseyeli

21. Kristofoi jieɔ hemɔkɛyeli ni mli wa tamɔ Mose nɔ lɛ kpo yɛ mɛɛ gbɛ nɔ?

²¹ Eji anɔkwale akɛ, teokrase gbɛjianɔtoo ni yɔɔ shihilɛ mli yɛ adesa yinɔsane be ni ekpɔtɔ fe fɛɛ nɛɛ mli lɛ yeɔ hewalɛ ni Teokrat Kpeteŋkpele lɛ yɔɔ lɛ he odase. (Yesaia 2:2-5) Eji odaseyeli hu kɛha Kristofoi hii, yei, kɛ gbekɛbii aaafee akpekpei enumɔ, ni kɛ daa gbi shihilɛ mli naagbai kpeɔ, shi amɛhiɛ kpaaa nɔ akɛ Yehowa ji amɛ Nɔyelɔ lɛ. Bɔ ni Mose anɔkwafo lɛ “mɔ Mɔ ni anaaa lɛ lɛ mli tamɔ nɔ ni eena lɛ” lɛ, nakai nɔŋŋ Kristofoi ni yɔɔ ŋmɛnɛ lɛ yɔɔ hemɔkɛyeli ni mli wa ni tamɔ nakai. (Hebribii 11:27) Amɛna hegbɛ akɛ amɛaahi teokrase mli, ni amɛdaa Yehowa shi daa yɛ enɛ hewɔ. (Lala 100:4, 5) Yɛ be mli ni amɛnuɔ Yehowa yiwalaheremɔ hewalɛ lɛ he lɛ, amɛkɛ miishɛɛ jajeɔ akɛ: “Yehowa ji wɔ Kojolɔ, Yehowa ji wɔ Mla-Halɔ, Yehowa ji wɔ Maŋtsɛ; lɛ nɔŋŋ eeehere wɔyiwala.”—Yesaia 33:22, NW.

[Shishigbɛ niŋmai]

Mɛni Biblia lɛ Tsɔɔ?

◻ Kristofoi baa amɛhe shi amɛhaa teokrase yɛ mɛɛ gbɛ nɔ?

◻ Ato teokrase he gbɛjianɔ aha ŋmɛnɛ yɛ mɛɛ gbɛ nɔ?

◻ Mɛɛ gbɛi anɔ nɛkɛ esa akɛ onukpai lɛ atsɔ asaa amɛhe ni amɛtsu amɛgbɛnaa nii ahe nii yɛ?

◻ Mɛɛ Kristofoi asubaŋi ehe hiaa ni onukpai lɛ ana ni amɛjie nomɛi akpo?

◻ Mɛɛ wekukpaa esa akɛ ekã tooi lɛ kɛ tookwɛlɔi lɛ ateŋ yɛ teokrase lɛ mli?

[Mfoniri ni yɔɔ baafa 16]

Adam kɛ Hawa laaje Paradeiso ejaakɛ amɛmiisumɔ ni amɛkpɛ amɛ diɛŋtsɛ amɛyiŋ yɛ nɔ ni ja kɛ nɔ ni ejaaa he amɛha amɛhe

[Mfoniri ni yɔɔ baafa 17]

Kɛ onukpa ko kɛ tooi lɛ ye yɛ heshibaa kɛ suɔmɔ mli lɛ, ebaanyɛ efee mɔ ni woɔ nɔ kpakpa he hewalɛ yɛ be fɛɛ mli