Mɛni Hewɔ Esa akɛ Ona Jamɔ he Miishɛɛ?

AYƐ jamɔ he miishɛɛ, yɛ maŋ fɛɛ maŋ mli, yɛ shikpɔŋ lɛ nɔ he fɛɛ he. Yɛ gbɛ kroko nɔ lɛ, mɛi babaoo hu yɛ ni wieɔ faŋŋ akɛ amɛbɛ jamɔ he miishɛɛ ko kwraa. Shi ani nakai ji bɔ ni amɛnu he aahu yɛ bei fɛɛ mli?

Nibii ni fata adesa subaŋ he lɛ eko ji akɛ, jeee heloo naa nibii pɛ haa mɔ tsui nyɔɔ emli diɛŋtsɛ. Mumɔŋ nibii ahe hiaa adesai. Daa gbi shihilɛ ni atswa abɔle heloo naa hiamɔ nibii ni aaana kɛkɛ he, kɛ hiɛtserɛjiemɔ ni anaa yɛ be kɛ bei amli lɛ haaa mɔ nine ashɛ emligbɛ hiamɔ nii anɔ. Adesai tamɔɔɔ kooloi, ejaakɛ amɛsumɔɔ ni amɛle akɛ, ‘Mɛni ji yiŋtoo ni yɔɔ shihilɛ sɛɛ?’ ‘Nɛkɛ shihilɛ be kuku, ni nibii babaoo ni yɔɔ fɛo kɛ nibii babaoo ni yɔɔ taŋ fɛɛ yɔɔ mli nɛɛ, ani enɛ nɔŋŋ ji fɛɛ ni yɔɔ?’ Ani obiko saji ni tamɔ enɛɛmɛi dã?

Ni kɛlɛ, gbɔmɛi akpekpei abɔ ni yɔɔ wala mli ŋmɛnɛ lɛ dara yɛ shihilɛi ni wooo hewalɛ ni ana jamɔ he miishɛɛ kpakpa ko lɛ amli. Ekolɛ nakai hewalɛ ni ana yɛ amɛnɔ lɛ jɛ amɛfɔlɔi, aloo tsɔɔlɔi, tipɛŋfoi, aloo ejɛ nɔyeli lɛ po ŋɔɔ kɛba.

Skalabrino, ni ji obalanyo ko ni jɛ Albania lɛ tsɔɔ mli akɛ, atsɔɔ gbɔmɛi lɛ yɛ Komunist nɔyeli shishi akɛ Nyɔŋmɔ ko bɛ. Kɛfata he lɛ, eyɛ oshara waa kɛha amɛ akɛ amɛaawie jamɔ he; nakai feemɔ baanyɛ eha ayawo mɔ lɛ tsuŋ. Ni kɛlɛ, yɛ 1991 mli, beni eyɔɔ Switzerland akɛ abobalɔ lɛ, aha lɛ hegbɛ ni ekɛkase Biblia lɛ. Ni ekpɛlɛ nɔ. Mɛni hewɔ?

Ojogbaŋŋ, enu akɛ wolo ko yɛ ni atsɛɔ lɛ Biblia, beni eyɔɔ Albania lɛ, shi eleee nɔ ko nɔ ko kwraa yɛ nɛkɛ wolo nɛɛ he. Enɛ hewɔ lɛ, kɛjɛ shishijee lɛ, ekolɛ jeee miishɛɛ ni eyɔɔ akɛ eeenu Biblia lɛ shishi lɛ ji nɔ titri ni kanya lɛ. Eyɛ mli akɛ akɛɛ lɛ akɛ ebaakase Nyɔŋmɔ yiŋtoo kɛha adesai kɛ shikpɔŋ lɛ he nii moŋ, shi ena enikasemɔ lɛ hu akɛ hegbɛ ni ena ni ekɛaaha bɔ ni enyɛɔ ewieɔ nakai maŋ lɛ wiemɔi lɛ ehaa lɛ aya hiɛ. Shi, oya nɔŋŋ ni ena akɛ nɔ ni ekaseɔ lɛ miitsu emligbɛ mumɔŋ hiamɔ nii ko ni mli wa waa he nii yɛ egbɛfaŋ. Nyɔŋmɔ shiwoo ni kɔɔ jeŋ hee ni toiŋjɔlɛ yɔɔ mli yɛ he fɛɛ he lɛ he, ni ji jeŋ ni gbɔmɛi baanyɛ ahi shi yɛ mli kɛya naanɔ, ni amɛna nibii fɛɛ ni he hiaa kɛha shihilɛ lɛ amli ŋɔɔmɔ babaoo lɛ, ha etsui nya waa kɛ miishɛɛ. Emiishɛɛ lɛ bafa babaoo beni ena ele akɛ lɛ kɛ eweku lɛ fɛɛ baanyɛ afee nɛkɛ jeŋ hee nɛɛ fa lɛ. Akɛni enyɛɛɛ ekɛ sanekpakpa nɛɛ ato kɛha ekome ehe hewɔ lɛ, etswa eweku lɛ tɛlifon yɛ Albania tɔ̃ɔ ni ekɛ amɛ gba he sane.

Aleksei, ni yɔɔ Russia lɛ hu naa kpɛ ehe waa yɛ hewalɛ ni Biblia mli anɔkwa nilee nyɛɔ enaa yɛ mɔ shihilɛ nɔ lɛ he. Akɛni naagbai babaoo miiye enɔ ni enyɛɛɛ ena yiŋtoo ni yɔɔ shihilɛ sɛɛ lɛ mlitsɔɔmɔ ni baaha etsui anyɔ emli hewɔ lɛ, ekpɛ eyiŋ akɛ ebaagbe ehe. Shi, klɛŋklɛŋ lɛ, etee Finland akɛ eyaasara enaanyo ko. Beni eta oketeke mli kɛyaa lɛ, ekɛ enamɛi krokomɛi ni faa gbɛ lɛ ekomɛi wie enaagbai lɛ ahe. Amɛteŋ mɔ kome lɛ, Yehowa Odasefonyo ni, ni ewo lɛ hewalɛ ni ekase Biblia lɛ ejaakɛ eyɛ tsabaa kɛha naagbai ni tamɔ nɛkɛ. Aleksei yiŋ fee lɛ kɔshikɔshi fioo yɛ he. Beni ekuɔ esɛɛ kɛbaa lɛ, ena niiashikpamɔ ni tamɔ nakai nɔŋŋ. Yɛ enɛ mli lɛ, Odasefonyo kroko ji mɔ ni kɛ lɛ wie, ni ekɛɛ lɛ akɛ kulɛ lɛ hu eyɛ nɛkɛ naagbai nɛɛ nɔŋŋ pɛpɛɛpɛ, shi Biblia lɛ eye ebua lɛ ni eye nɛkɛ naagbai nɛɛ anɔ. Lɛ hu ewo lɛ hewalɛ ni ekase Biblia lɛ. Beni ebashɛ shia nɔŋŋ kɛkɛ ni etɛlifon lɛ gbɛɛ. Enaanyo kroko ni, ni ekɛ Odasefoi miikase nii, ni eyɛ he miishɛɛ waa. Enɛ ha nuu nɛɛ bɔi yɔsemɔ akɛ ekolɛ lɛlɛŋ, Biblia lɛ baanyɛ aha lɛ nibii ni he hiaa lɛ lɛ, shi ele hu akɛ kɛji enaaa yelikɛbuamɔ lɛ, enyɛŋ enu shishi kɔkɔɔkɔ. Ekpɛlɛ nɔ akɛ ekɛ Yehowa Odasefoi baafee shia Biblia mli nikasemɔ daa, ni ebɔi amɛkpeei yaa hu. Etsɛɛɛ kwraa ni ebanu nɔ hewɔ ni mɛi ni tswaa amɛshihilɛ amɛbɔleɔ nɔ ni Biblia lɛ tsɔɔ lɛ he lɛ yɔɔ miishɛɛ waa lɛ shishi, eyɛ mli akɛ amɛ hu amɛnaa naagbai ni adesai krokomɛi fɛɛ naa lɛ eko.

Yesu kɛ sɛɛyoomɔ ni eyɔɔ yɛ adesa bɔɔ su he lɛ jaje akɛ: “Jeee aboloo kɛkɛ baaha gbɔmɔ ahi wala mli.” (Mateo 4:4, The New English Bible) Ewie hu akɛ: “Miishɛɛ ji mɛi ni hiɛ yɔɔ amɛmumɔŋ hiamɔ nii anɔ lɛ.” (Mateo 5:3, New World Translation) Amɛ miishɛɛ lɛ baa ejaakɛ amɛhiɛ yɛ amɛhiamɔ nii anɔ waa, ni amɛtsɔɔ gbɛi kpakpai anɔ koni amɛtsu he nii, ni amɛnaa Nyɔŋmɔ dɛŋ jɔɔmɔi. Shi kɛlɛ, wɔtsuuu wɔmumɔŋ hiamɔ nii ahe nii kɛtsɔɔɔ sɔlemɔ ko mlinyo ni wɔɔji aloo sɔlemɔ ni wɔɔya daa lɛ nɔ. Jamɔ ni ayɔɔ nifeemɔ ni atsuɔ he nii daa yɛ mli lɛ baanyɛ ana mɛi ahenumɔi anɔ hewalɛ waa, shi ani enɛ haa anaa shihilɛ mli naagbai lɛ ahe tsabaa kpakpa diɛŋtsɛ? Eyɛ mli akɛ jamɔ woɔ shishijee mlai ni hi jogbaŋŋ ahe hewalɛ moŋ, shi kɛji enyɛɛɛ ekɛ anɔkwa shishinumɔ aha yɛ yiŋtoo diɛŋtsɛ ni yɔɔ shihilɛ sɛɛ lɛ he lɛ, ani ebaanyɛ etsu omumɔŋ hiamɔ nii ahe nii? Nɔ ni he hiaa fe enɛ lɛ, ani nɛkɛ jamɔ ni okɛ ohe aaawo mli nɛɛ baaha ona okɛ Nyɔŋmɔ teŋ wekukpaa kpakpa? Kɛji no bɛ lɛ, anɔkwa tsui ni nyɔɔ mɔ mli baŋ kɔkɔɔkɔ.

Yɛ enɛ gbɛfaŋ lɛ, mɛi babaoo miitao nɔ ko ni amɛnine shɛko nɔ lolo.

[Mfoniri ni yɔɔ baafa 3]

Ani onine baashɛ omumɔŋ hiamɔ nii anɔ lɛlɛŋ kɛtsɔ sɔlemɔ ko mlinyo ni oootsɔ lɛ nɔ?

[Mfoniri ni yɔɔ baafa 4]

Mɛi pii ena akɛ kɛ amɛnu Biblia lɛ shishi lɛ, ehaa shihilɛ naa shishinumɔ hee kwraa