Sanebimɔi ni Jɛ Kanelɔi Adɛŋ

Wɔna Daniel gbalɛi lɛ akasemɔ he miishɛɛ waa taakɛ atsɔɔ mli yɛ “Buu-Mɔɔ” lɛ mli lɛ. Shi, mɛni hewɔ esoro afii ni akɛha bei etɛ kɛ fã ni yɔɔ Kpojiemɔ 11:3 lɛ, yɛ nɔ ni yɔɔ “Kpojiemɔ Naagbee” wolo lɛ mli lɛ he lɛ?

Hɛɛ, Buu-Mɔɔ ni ji November 1, 1993 nɔ lɛ kɛ tsakemɔ bibioo ko ha yɛ Kpojiemɔ 11:3 lɛ gbii lɛ aŋmɛnɛŋmɛnɛ mlibaa lɛ he. Mɛni hewɔ?

Klɛŋklɛŋ lɛ, nyɛhaa wɔkwɛa Kpojiemɔ 11:2, he ni atsĩ “nyɔji nyɔŋmai-ejwɛ kɛ enyɔ” lɛ ta yɛ enaagbee lɛ. Wɔtsaa nɔ yɛ kuku 3 lɛ akɛ: “Ni maha midasefoi enyɔ lɛ awo kpekpe ni amɛaagba gbii akpe kɛ ohai enyɔ kɛ nyɔŋmai ejwɛ.” Mɛɛ be he enɛ kɔɔ?

Ojogbaŋŋ, Yehowa Odasefoi etsɔ hiɛ amɛyoo yɛ be kakadaŋŋ mli akɛ nɛkɛ gbalɛ nɛɛ na emlibaa yɛ Kristofoi ni akɛ mumɔ efɔ amɛ mu lɛ agbɛfaŋ yɛ “jeŋmaji abe” (Jeŋmajiaŋbii Abe) lɛ naagbee yɛ 1914 lɛ sɛɛ. (Luka 21:24; 2 Korintobii 1:21, 22) Beni ewieɔ enɛ he lɛ, Kpojiemɔ—Enaagbee Kwraa lɛ Ebɛŋkɛ!a (1991) wolo lɛ wie yɛ baafa 164 akɛ: “Akadi be ni ji afii etɛ kɛ fa ni Nyɔŋmɔ webii aniiashikpamɔ ni mli wa lɛ tamɔ saji ni ba ni agba he sane afɔ shi yɛ biɛ lɛ pɛpɛɛpɛ—nɔ ni je shishi kɛjɛ klɛŋklɛŋ jeŋ ta lɛ fɛmɔ yɛ 1914 naagbee ni tee nɔ aahu kɛyashi 1918 shishijee mli lɛ.”

Kadimɔ akɛ, be ni atsɔɔ lɛ ji “jeŋ ta lɛ fɛmɔ yɛ 1914 naagbee ni tee nɔ aahu kɛyashi 1918 shishijee mli lɛ.” Enɛ kɛ be ni akɛfɔɔ nitsumɔ lɛ kpaa gbee, tamɔ nɔ ni yɔɔ “Then Is Finished the Mystery of God,” wolo lɛ mli yɛ baafai 261-4, (1969) lɛ nɛkɛ.*

Shi, Buu-Mɔɔ lɛ gbala jwɛŋmɔ kɛtee gbalɛi ni yɔɔ Daniel, ni ji wolo ko ni tsĩɔ be falɛ ko ni tamɔ nɔ ni atsĩ ta yɛ sɛɛ mli lɛ tã, yɛ Kpojiemɔ wolo lɛ mli lɛ anɔ—afii 3 1/2, aloo nyɔji 42. Kɛ wɔɔfee lɛ faŋŋ lɛ, Daniel 7:25 kɛɔ akɛ abaahao Nyɔŋmɔ mɛi krɔŋkrɔŋi lɛ “be kɛ bei kɛ be mlijaa,” aloo bei 3 1/2. Yɛ sɛɛ mli lɛ, Daniel 12:7 gba “be kɛ bei kɛ be fã,” aloo bei 3 1/2, ni baaba enaagbee kwraa “kɛ́ akumɔ maŋ krɔŋkrɔŋ lɛ hewalɛ lɛ agbe naa lɛ” efɔ shi.

No hewɔ lɛ, wɔyɛ gbalɛi ni kɔɔ be ni je amɛhe lɛ ahe, yɛ Daniel 7:25, Daniel 12:7, kɛ Kpojiemɔ 11:2, 3 kɛ agbɛnɛ hu yɛ Kpojiemɔ 13:5. Wɔ woji lɛ etsɔɔ akɛ enɛɛmɛi fɛɛ na mlibaa yɛ 1914-18 be lɛ mli. Shi beni ewieɔ nɛkɛ gbalɛi nɛɛ fɛɛ ahe ekomekome lɛ, bei ni atsɔɔ kɛha eshishijee kɛ enaagbee lɛ tsake fioo.

Shi kɛlɛ, Buu-Mɔɔ ni je kpo yɛ November 1, 1993 lɛ bi akɛ: “Mɛɛ gbɛ nɔ nɛkɛ gbalɛi ni je amɛhe nɛɛ fɛɛ ba mli yɛ?” Hɛɛ, ayoo gbalɛi ni kɔɔ bei 3 1/2, ni atsĩ tã yɛ Daniel 7:25, Daniel 12:7, kɛ Kpojiemɔ 11:3 lɛ he lɛ akɛ “gbalɛi ni je amɛhe.” No hewɔ lɛ, amɛkɛ amɛhe baakpa gbee, yɛ amɛshishijee kɛ amɛnaagbee he.

Yɛ enaagbee lɛ he lɛ, wolo tɛtrɛɛ lɛ tsɔɔ bɔ ni mɛi ni Nyɔŋmɔ efɔ amɛ mu (Daniel 7:25) lɛ ahaomɔ shɛ enaagbee kwraa yɛ June 1918 beni amɔ J. F. Rutherford kɛ Buu Mɔɔ Biblia kɛ Woji Bibii Asafo lɛ hiɛnyiɛlɔi krokomɛi ni “abu amɛ fɔ kɛha tsuŋwoo afii babaoo” lɛ. Eka shi faŋŋ akɛ, nakai nii ni ba lɛ bafee kuumɔ ni “akumɔ maŋ krɔŋkrɔŋ lɛ hewalɛ lɛ agbe naa,” taakɛ wɔkadiɔ yɛ Daniel 12:7 lɛ.

Kɛji wɔkane be lɛ kɛtee sɛɛ, kɛjɛ June 1918 lɛ, ekɛ wɔ baa December 1914 akɛ bei 3 1/2 lɛ shishijee. Yɛ nakai 1914 naagbee nyɔŋ lɛ mli lɛ, Nyɔŋmɔ mɛi ni afɔ amɛ mu ni yɔɔ shikpɔŋ nɔ lɛ kase ŋmalɛ oti ni ahala kɛha afi ni baa lɛ jogbaŋŋ, akɛ: “ ‘Ani nyɛaanyɛ kpulu ni mibanu lɛ nyɛnu?’—Mateo 20:20-23.” Sane ni aŋma ni tswa he adafi lɛ bɔ kɔkɔ akɛ: “Shi namɔ le, akɛ ekolɛ kaa krɛdɛɛ ko baaba, amanehulu loo hiɛgbelewoo kpulu, kɛha Toobi lɛ sɛɛnyiɛlɔi anɔkwafoi lɛ yɛ afi 1915 mli!” Taakɛ Daniel 7:25 gba efɔ shi kɛha nɛkɛ be ni ji bei 3 1/2 nɛɛ, ‘haomɔ lɛ te shi ewo Mɔ ni Yɔɔ Ŋwɛi Shɔŋŋ lɛ mɛi krɔŋkrɔŋi lɛ ni etsa nɔ aahu.’ Jeŋmaji kɛ amɛhe wuu yɛ Jeŋ Ta I mli, ni enɛ ha efee mlɛo kɛha amɛ akɛ amɛkɛ haomɔ aaaba amɛnɔ yɛ gbɛ ni ejaaa nɔ. Sane lɛ naamuu ji akɛ: Nɛkɛ gbalɛi etɛ ni je amɛhe—Daniel 7:25, 12:7, kɛ Kpojiemɔ 11:3—nɛɛ fɛɛ ná amɛ mlibaa yɛ afii 3 1/2, aloo nyɔji 42, ni je shishi kɛjɛ December 1914 kɛyashi June 1918 lɛ mli.

Enɛ tsɔɔ tsakemɔ fioo ni eba yɛ Kpojiemɔ 11:3 mlibaa be lɛ he wiemɔ mli lɛ shishi. Esa akɛ wɔha nɛkɛ tsakemɔ nɛɛ ahi wɔjwɛŋmɔ mli beni wɔkaseɔ Kpojiemɔ Naagbee wolo lɛ ni wɔkɛtsuɔ nii hu yɛ wɔsɛɛ be mli lɛ.

[Shishigbɛ niŋmai]

Watchtower Bible and Tract Society of New York, Inc. ji mɛi ni fee.