Biblia Lɛ—Wolo ko ni Aasumɔ ni Wɔnu Shishi

MƐI komɛi heɔ yeɔ akɛ Biblia lɛ ji Nyɔŋmɔ Wiemɔ ni mli ka shi faŋŋ ni sa akɛ anyiɛ nɔ ni emli wiemɔi lɛ kɛɔ lɛ asɛɛ nakai nɔŋŋ. Yɛ mɛi krokomɛi hu agbɛfaŋ lɛ, “Biblia lɛ shɛɛ sane lɛ mli kaaa shi faŋŋ tamɔ nakai.” Nakai ji bɔ ni hemɔkɛyeli kɛ Nyɔŋmɔ jamɔ he ajinafoi akuu kɛ emlibii 12, kɛha Canada Protestant jamɔ kuu ni da fe fɛɛ lɛ kɛɛ. Osɔfo Clifford Elliott, ni jɛ United Church sɔlemɔ lɛ mli lɛ, nuɔ he akɛ yɛ mɛi komɛi agbɛfaŋ lɛ, “Biblia lɛ bafeɔ nɔ ni shishinumɔ wa, nɔ ni kɔɔɔ mɔ ko pɔtɛɛ ko he, kɛ nɔ ni he ehiaaa.”

Susumɔi ni tamɔ nɛkɛ teeɔ sanebimɔi ni he hiaa ashi, ni sa akɛ aha hetoo. Nɔ ni he hiaa yɛ enɛɛmɛi ateŋ ji, Mɛni hewɔ aŋma Biblia lɛ? Ani eyɛ naakpɛɛ kɛ haŋtsii fe bɔ ni abaanu shishi? Ani mɔ folo kɛkɛ baanyɛ anu shishi? Mɛɛ yelikɛbuamɔ he hiaa koni mɔ ko anyɛ anu Ŋmalɛi lɛ ashishi? Ni mɛni hewɔ Biblia lɛ he nilee ni ja he hiaa yɛ nɛkɛ jaramɔ bei nɛɛ amli lɛ?

Mɛni Hewɔ Aŋma Biblia Lɛ?

Nyɔŋmɔ Wiemɔ lɛ kasemɔ efee nɔ ni he hiaa klɛŋklɛŋ yɛ mɛi ni baana Ŋwɛi Flooflo Nyɔŋmɔ, Yehowa hiɛ duromɔ kɛ enɔkpɛlɛɔ lɛ agbɛfaŋ. Akɛ famɔ ha maŋtsɛmɛi, osɔfoi, fɔlɔi, hii, yei, kɛ gbekɛbii—shikatsɛmɛi kɛ ohiafoi fɛɛ—ni amɛhe be kɛjɛ amɛ daa gbi shihilɛ mli nifeemɔi amli koni amɛtsɔ sɔlemɔ nɔ amɛsusu Nyɔŋmɔ Wiemɔ ni aŋma afɔ shi lɛ he kɛ hiɛdɔɔ.—5 Mose 6:6, 7; 17:18-20; 31:9-12; Nehemia 8:8; Lala 1:1, 2; 119:7-11, 72, 98-100, 104, 142; Abɛi 3:13-18.

Akɛ nɔkwɛmɔ nɔ lɛ, afã Yoshua akɛ: “Kwɛmɔ ni okane Mla wolo nɛɛ yɛ ojamɔ lɛ mli be fɛɛ be. Kasemɔ shwane kɛ nyɔɔŋ, ni okwɛ ni oye nɔ fɛɛ nɔ ni aŋma yɛ mli lɛ nɔ. No lɛ obaashwere ni obaaye omanye hu.” (Yoshua 1:8, Today’s English Version) Nɔ ni nɛkɛ Nyɔŋmɔ Mla nɛɛ kasemɔ kɛ ekɛ nitsumɔ jogbaŋŋ kɛbaaba ji omanyeyeli kɛ miishɛɛ. Yehowa to eyiŋ akɛ, jeee akɛ “gbɔmɛi fɛɛ” anu e-Wiemɔ, ni ji Biblia lɛ shishi kɛkɛ, shi moŋ ni amɛye nɔ hu, kɛ gbɛkpamɔ akɛ amɛnine baashɛ nikeenii ni ji wala nɔ.—1 Timoteo 2:3, 4; Yohane 17:3.

Ani Eyɛ Hwanyaŋŋ Fe bɔ ni Abaanyɛ Anu Shishi?

Dani Yesu baakwɔ kɛbaaya ŋwɛi lɛ, efee lɛ faŋŋ akɛ eetao ni Biblia mli tsɔsemɔ nitsumɔ kpele ko atsa nɔ yɛ shikpɔŋ lɛ nɔ fɛɛ. (Bɔfoi lɛ Asaji 1:8) Ele akɛ esa akɛ anu Biblia lɛ shishi. Beni etsɔɔ mli akɛ Yehowa kɛ hegbɛ fɛɛ eha lɛ yɛ ŋwɛi kɛ shikpɔŋ nɛɛ nɔ lɛ sɛɛ lɛ, kɛkɛ ni ekɛ famɔ nɛɛ ha tɛɛ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi [loo, nikaselɔi], nyɛbaptisia amɛ nyɛwoa Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mitsɔɔ nyɛ lɛ nɔ.”—Mateo 28:19, 20.

Dani abaabaptisi amɛ lɛ, esa akɛ atsɔɔ kaselɔi heei lɛ Yehowa, e-Bi lɛ, kɛ mumɔ krɔŋkrɔŋ lɛ nitsumɔ dã. Kɛfata he lɛ, esa akɛ atsɔse amɛ yɛ Kristofoi anibii agbɛjianɔtoo lɛ mla lɛ mli. (1 Korintobii 9:21; Galatabii 6:2) Dani aaanyɛ afee enɛ lɛ, ehe miihia ni mɛi ni sa lɛ ahe aye klɛŋklɛŋ kwraa akɛ Biblia lɛ jɛ Yehowa ŋɔɔ, ni nɔ ni ji enyɔ lɛ, esa akɛ wɔnu shishi.—Mateo 10:11-13.

Mɛni ataoɔ yɛ ohe koni onyɛ onu Biblia lɛ shishi? Nyɔŋmɔ Bi lɛ bɔ mɔdɛŋ yɛ gbɛ krɛdɛɛ nɔ ni ekɛtsɔɔ Ŋmalɛi lɛ amli jogbaŋŋ. Ele akɛ Ŋmalɛi Krɔŋkrɔŋi lɛ, anɔkwale ni, ni nibii ni yɔɔ mli ji Yehowa suɔmɔnaa nii ni ejie lɛ kpo etsɔɔ. (Yohane 17:17) Yesu Kristo wie, yɛ enitsumɔ ni aha lɛ lɛ he akɛ: “Afɔ mi ni miba je lɛ mli yɛ yiŋtoo kome nɛɛ hewɔ, akɛ mawie anɔkwale lɛ he matsɔɔ. Mɔ fɛɛ mɔ ni ji anɔkwale lɛ nɔ lɛ boɔ mi toi.” (Yohane 18:37, TEV; Luka 4:43) Yesu kpaaa mɛi ni yɔɔ tsuii kɛ jwɛŋmɔi ni baahe wiemɔ lɛ ewo mli lɛ anitsɔɔmɔ. Akɛɔ wɔ yɛ Luka 24:45 akɛ: “Kɛkɛ ni [Yesu Kristo] gbele amɛjwɛŋmɔ naa, koni amɛna ŋmalɛi lɛ anaa.”

Beni Yesu tsuɔ esɔɔmɔ nitsumɔ lɛ, etsɛ wiemɔi asɛɛ kɛjɛ Wiemɔ ni aŋma afɔ̃ shi lɛ mli, ni etsɛ ŋmalɛi kɛjɛ “Mose mla lɛ kɛ Gbalɔi lɛ kɛ Lalai lɛ amli” ni etsɔɔ shishi hu. (Luka 24:27, 44) Bɔ ni ehaa eshishinumɔ feɔ faŋŋ, kɛ agbɛnɛ bɔ ni enyɛɔ etsɔɔ nii jogbaŋŋ lɛ kanya mɛi ni nu e-Ŋmalɛ shishitsɔɔmɔi lɛ. (Mateo 7:28, 29; Marko 1:22; Luka 4:32; 24:32) Ŋmalɛi lɛ ji wolo ko ni eshishinumɔ yɔɔ mlɛo kwraa kɛha lɛ.

Biblia lɛ kɛ Yesu Sɛɛnyiɛlɔi Lɛ

Bɔfo Paulo, ni ji mɔ ko ni kase Yesu Kristo lɛ, na bɔ ni ehe hiaa akɛ etsɔɔ mɛi krokomɛi nɔ ni yɔɔ Ŋmalɛi lɛ amli. Lɛ hu ele akɛ aatao ni wɔnu shishi. No hewɔ ni etsɔɔ nii yɛ faŋŋ mli, ni ŋwanejee ko bɛ he akɛ etsɔɔ Ŋmalɛi lɛ amli yɛ mɛi ni taoɔ ni amɛnu shishi lɛ ashiai amli lɛ. Paulo ha ale eshidaamɔ jogbaŋŋ beni ewie akɛ: “Nyɛle akɛ mitsiii nɔ ko nɔ ko ni baaye abua nyɛ lɛ naa beni mishiɛɔ ni mitsɔɔ nii yɛ faŋŋ mli kɛ agbɛnɛ yɛ nyɛshiai amli hu lɛ.” (Bɔfoi lɛ Asaji 20:20, TEV) Yɛ ekɛ mɛi kɛ sanegbaai amli lɛ, esusuɔ saji ahe kɛjɛɔ Ŋmalɛi lɛ amli, ni etsɛɔ ŋmalɛi ni ekɛtsɔɔ ewiemɔ lɛ mli ni ekɛmaa nɔ mi. (Bɔfoi lɛ Asaji 17:2, 3) Eyɛ he miishɛɛ akɛ eeeye ebua mɛi krokomɛi ni amɛnu Ŋmalɛi lɛ ashishi.

Ani ooshwe ni onu nibii ni Yesu kɛ ekaselɔi lɛ tsɔɔ lɛ ashishi? (1 Petro 2:2) Blema Beroia maŋ lɛ mlibii lɛ ná suɔmɔ ni tamɔ nɛkɛ, ni amɛmiishwe ni amɛhe nɔ ni bɔfo Paulo tsɔɔ amɛ yɛ Kristo lɛ he lɛ amɛye. No hewɔ lɛ awo amɛ hewalɛ ni amɛkase Ŋmalɛi lɛ daa gbi, koni amɛtsɔ no nɔ amɛna nɔmimaa akɛ sanekpakpa ni amɛnu lɛ ji anɔkwale lɛlɛŋ. Akɛni amɛjwɛŋmɔi heɔ sane lɛ ewoɔ mli hewɔ lɛ, “amɛteŋ mɛi pii hé ye.”—Bɔfoi lɛ Asaji 17:11, 12.

Kɛji mɔ ko aaanu Biblia lɛ shishi lɛ, no lɛ esa akɛ mɔ lɛ ana tsui kpakpa, kɛ anɔkwa suɔmɔ akɛ ebaakase nii, kɛ ‘ehiɛ ni aaahi emumɔŋ hiamɔ nii anɔ.’ (Mateo 5:3) Beni abi Yesu akɛ: “Mɛni hewɔ okɛ amɛ wieɔ yɛ abɛbuai amli lɛ?” eha hetoo akɛ: “Ejaakɛ nyɛ lɛ aŋɔha nyɛ akɛ nyɛle ŋwɛi maŋtsɛyeli lɛ mli teemɔŋ saji lɛ, shi amɛ lɛ aŋɔhako amɛ.” Atsɔ hiɛ agba afɔ shi akɛ ‘ebaagbele enaa yɛ abɛbuai amli ni ebaashiɛ nibii ni aŋɔtee lɛ.’ (Mateo 13:10, 11, 35) No hewɔ lɛ, Yesu wie yɛ abɛbuai amli koni ekɛgbala mɛi ni miibo toi kɛkɛ lɛ kɛjɛ mɔ ni miitao ele nii yɛ anɔkwale mli lɛ he. Yesu kaselɔi lɛ tsɔɔ amɛ anɔkwayeli be ko, beni amɛfata ehe kɛtee shia ko mli, ni amɛkɛɛ lɛ yɛ jɛmɛ akɛ: “Tsɔɔmɔ wɔ abɔɔ lɛŋ jwɛi lɛ he abɛbua lɛ shishi.”—Mateo 13:36.

Eyɛ faŋŋ akɛ yelikɛbuamɔ he miihia wɔ, kɛji wɔɔnu Biblia lɛ shishi. Osɔfo Hal Llewellyn, ni ji United Church lɛ woloŋmalɔ ni tsuɔ Nyɔŋmɔ jamɔ kasemɔ, hemɔkɛyeli, kɛ jamɔi krokomɛi ni akɛfeɔ ekome lɛ he nii lɛ, wie akɛ: “Ehe miihia waa ni wɔtsɔɔ nɔ ni Biblia lɛ tsɔɔ kɛha wɔ lɛ mli jogbaŋŋ, kɛ bɔ ni akaneɔ ni atsɔɔ shishi ahaa hu.” Shi kɛ jeee mɛi fɛɛ yooɔ nakai po lɛ, anɔkwale lɛ ji akɛ, wɔ diɛŋtsɛ wɔnyɛŋ wɔkane Biblia lɛ ni wɔnu shishi. Yelikɛbuamɔ he miihia wɔ.

Mɛɛ Yelikɛbuamɔ Yɔɔ?

Wiemɔi komɛi ni yɔɔ naakpɛɛ, kɛ sanebimɔi ni futuɔ mɔ yiŋ, kɛ wiemɔi ni haa mɔ he jɔ̃ɔ ehe, yɛ Biblia lɛ mli ni biɔ shishitsɔɔmɔ. Ekolɛ aje gbɛ akɛ eshishinumɔ lɛ tee, ni akɛ nibii komɛi to ekrokomɛi ahe koni eha shishinumɔ aba he, shi ataooo ni anu shishi yɛ be mli ni aŋma lɛ. Shi amɛkɔɔ Yehowa yiŋtoi ahe. Akɛ nɔkwɛmɔ nɔ lɛ, Kpojiemɔ 13:18 kɛɔ akɛ “kooloo lɛ yibɔ lɛ” ji “ohai ekpaa kɛ nyɔŋmai ekpaa kɛ ekpaa.” Eyɛ mli akɛ kuku lɛ kɛɔ akɛ “biɛ nilee lɛ yɔɔ” moŋ, shi etsɔɔɔ bɔ ni nakai yibɔ lɛ he hiaa ha lɛ mli. Shi, Yehowa etsɔ egbɛjianɔtoo lɛ nɔ eŋmɛ etsuji anɔkwafoi lɛ gbɛ ni amɛnu nɔ ni etsɔɔ lɛ shishi ŋmɛnɛ. (Kwɛmɔ akrabatsa ni ji, “Gbɛ ni Aaatsɔ nɔ Anu Biblia lɛ Shishi.”) Bo hu obaanyɛ ona nɛkɛ shishinumɔ nɛɛ kɛtsɔ mɛi ni yɔɔ niiashikpamɔ ni “[amɛ]jaa anɔkwale wiemɔ lɛ mli pɛpɛɛpɛ” lɛ ayelikɛbuamɔ nɔ.—2 Timoteo 2:2, 15, 23-25; 4:2-5; Abɛi 2:1-5.

Bei komɛi lɛ, Yesu kɛ abɛbuai tsuɔ nii ni ekɛtsɔɔ bɔ ni ahereɔ Maŋtsɛyeli shɛɛ sane lɛ nɔ loo ahereee nɔ ahaa. Etsɔɔ mli akɛ mɛi komɛi eyaŋ hiɛ, yɛ amɛnijiaŋ ni baaje wui kɛtsɔ shitee-kɛ-woo ni baajɛ nanemɛi kɛ wekumɛi aŋɔɔ kɛba amɛnɔ lɛ hewɔ. Mɛi krokomɛi hu baaŋmɛ “haomɔ loo yiwalɛ” gbɛ ni ebaakpata hiɛsɔɔ ni amɛyɔɔ kɛha Maŋtsɛyeli shɛɛ sane lɛ hiɛ. Ni kɛlɛ, mɛi krokomɛi hu baaŋmɛ daa gbi shihilɛ mli nifeemɔi, “je nɛŋ he naagbamɔ kɛ nii pii ahe lakamɔ lɛ” gbɛ, ni ebaagbe suɔmɔ fɛɛ suɔmɔ ni ekolɛ amɛná amɛha sanekpakpa lɛ kwraa. Shi yɛ gbɛ kroko kwraa nɔ lɛ, mɛi komɛi hu yɛ ni kɛ miishɛɛ hereɔ nɔ, ni amɛmiisumɔ ni amɛnu wiemɔ ni ŋɔɔ nɛɛ ni amɛnu shishi hu. Amɛ ji mɛi ni “dɔmɔɔ ŋtsɔi ni amɛyeɔ ŋkɔmɔ yɛ nihiinii fɛɛ ni afeɔ” yɛ Kristendom mli, ni akɛɔ akɛ afee yɛ Yesu Kristo gbɛi amli lɛ hewɔ lɛ. Nɛkɛ gbɔmɛi nɛɛ miishwe ni atsɔɔ amɛ nii yɛ Yehowa gbɛ̀i anɔ koni no aha amɛnu nɔ ni amɛkaneɔ yɛ Biblia lɛ mli lɛ shishi.—Mateo 13:3-9, 18-23; Ezekiel 9:4; Yesaia 2:2-4.

Yɛ mɛi ni taoɔ ni amɛna sɛɛyoomɔ yɛ Yehowa yiŋtoi ahe akɛ aŋkroaŋkroi lɛ agbɛfaŋ lɛ, Yehowa baanyɛ ekwɛ koni akɛ yelikɛbuamɔ ni he hiaa amɛ lɛ aha amɛ. Akɛ nɔkwɛmɔ nɔ lɛ, Biblia lɛ bɔɔ amaniɛ akɛ Yehowa mumɔ kudɔ sanekpakpa jajelɔ Filipo koni eyaye ebua Etiopianyo ko ni miisusu Yesaia wolo lɛ he beni efaa gbɛ kɛjɛɔ Yerusalem lɛ. Beni enyiɛ gbɛ nɔ kɛyaa shia lɛ, no mli lɛ eekane yɛ eshwiili lɛ mli. Yɛ Yehowa mumɔ krɔŋkrɔŋ lɛ hiɛnyiɛmɔ lɛ toiboo mli lɛ, Filipo jo foi kɛnyiɛ shwiili lɛ masɛi ni ebi lɛ akɛ: ‘Ani oonu nɔ ni okaneɔ lɛ shishi?’ Nuu nɛɛ baa ehe shi, ni eji anɔkwafo hu akɛ ekpɛlɛ nɔ akɛ yelikɛbuamɔ he miihia lɛ. Filipo kɛ miishɛɛ tsɔɔ nɛkɛ nuu ni mumɔŋ hɔmɔ yeɔ lɛ, ni sumɔɔ ni atsɔɔ lɛ nii nɛɛ nii. Nitsɔɔmɔ lɛ ye ebua lɛ ni enu Ŋmalɛi lɛ ashishi. Ebana ele nɔ ni sa akɛ efee agbɛnɛ, koni ena ekɛ Yehowa teŋ duromɔ wekukpaa, bɔni afee ni ena naanɔ wala. Ebatsɔ Yehowa tsulɔ ni yɔɔ miishɛɛ ni abaptisi lɛ, ni diɔ shihilɛ ni saa Nyɔŋmɔ hiɛ lɛ sɛɛ.—Bɔfoi lɛ Asaji 8:26-39.

Ekolɛ oyɛ Biblia lɛ eko yɛ shia, ni ekolɛ okane hu shii abɔ. Eeenyɛ efee akɛ ekolɛ bo hu okɛ naagba ni Etiopianyo anɔkwafo lɛ na mli niiashikpamɔ lɛ eko kpe. Enyɛɛɛ enu nɔ ni ekaneɔ lɛ shishi. Yelikɛbuamɔ he miihia lɛ, ni eshashaooo shi akɛ eeekpɛlɛ yelikɛbuamɔ ni Yehowa Nyɔŋmɔ yɔɔ he miishɛɛ akɛ eeeha lɛ lɛ nɔ. Taakɛ Filipo ji lɛ, Yehowa Odasefoi yɛ he miishɛɛ akɛ amɛaaye amɛbua bo yɛ nibii ni kɔɔ Nyɔŋmɔ he, ni aŋmala yɛ e-Wiemɔ, ni ji Biblia lɛ mli lɛ ashishinumɔ mli. Amɛle akɛ Yehowa kɛ Biblia lɛ hã, ni eesumɔ hu ni wɔnu shishi.—1 Korintobii 2:10; Efesobii 3:18; 2 Petro 3:16.

Mɛni Hewɔ Biblia lɛ He Hiaa Lɛ?

Adesai ayinɔsane mli be ni he hiaa waa fe fɛɛ lɛ mli wɔyɔɔ lɛ. Biblia lɛ wie he akɛ “nibii agbɛjianɔtoo lɛ naagbee lɛ.” (Mateo 24:3, New World Translation) Nibii pii ni baa mli, ni haa Biblia gbalɛ baa mli kɛjɛ 1914 kɛbaa nɛɛ tsɔɔ akɛ etsɛŋ ni Nyɔŋmɔ ŋwɛi Maŋtsɛyeli lɛ ‘baajwara maŋtsɛyelii krokomɛi nɛɛ fɛɛ wɔtsɔwɔtsɔ ni eeekpata amɛhiɛ.’—Daniel 2:44.

Bo diɛŋtsɛ kanemɔ nɔ ni atsɔ hiɛ agba afɔ shi yɛ Biblia lɛ mli yɛ Mateo yitso 24, Marko yitso 13, kɛ Luka yitso 21 lɛ oha ohe. Obaana akɛ nibii ni awie he lɛ kɔɔ jeŋ muu fɛɛ he. Amɛteŋ ekomɛi ji jeŋ tai—ni esoro nomɛi kwraa yɛ tai krokomɛi fɛɛ ni awuu lɛ ahe. Kɛjɛ Jeŋ Ta I mli kɛbaa nɛɛ, wɔye hɔmɔ, shikpɔŋ hosomɔi, kɛ mlakwamɔ be ni anako nakai eko dã, ni eba lɛ fɛɛ he odase. Ni amrɔ nɛɛ, etamɔ nɔ ni jeŋmaji lɛ miihe amɛjaje wiemɔ ko ni kɛ okadi ni tɔmɔ ko kwraa bɛ he lɛ baaha, ni tsɔɔ akɛ je lɛ hiɛkpatamɔ lɛ eshɛ kwraa agbɛnɛ lɛ amɛtsɔɔ. Bɔfo Paulo ŋma yɛ enɛ he akɛ: “Nuŋtsɔ [Yehowa] gbi lɛ baaba tamɔ julɔ baa nyɔɔŋ lɛ. Ejaakɛ be mli ni amɛaakɛɛ akɛ: ‘Hejɔlɛ yɛ ni wɔyɛ shweswheeshwe!’ lɛ, no mli nɔŋŋ hiɛkpatamɔ aaabatutua amɛ trukaa, . . . ni amɛjeŋ mli kɔkɔɔkɔ.” (1 Tesalonikabii 5:2, 3) Namɛi ji mɛi ni ejeŋ mli lɛ? Paulo tsɔɔ mli akɛ: “Mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu Kristo sanekpakpa lɛ toi lɛ.” (2 Tesalonikabii 1:7-9) Okadi ni nibii pii yɔɔ lɛ mli lɛ fã ko hu baaba mli kɛtsɔ mɛi ni boɔ famɔ ni akɛha yɛ Mateo 24:14 akɛ ashiɛ “maŋtsɛyeli lɛ he sanekpakpa nɛɛ atsɔɔ je nɛŋ fɛɛ” lɛ toi lɛ anɔ.

Yehowa Odasefoi akpekpei abɔ miitsu famɔ nɛɛ he nii yɛ shikpɔji kɛ ŋshɔkpɔi 231 nɔ. Amɛyaa gbɔmɛi aŋɔɔ yɛ amɛshiai amli ni amɛfɔ̃ɔ amɛ nine ni amɛkase Yehowa Maŋtsɛyeli nɔyeli lɛ he nii. Amɛkɛ mlihilɛ tsɔɔ gbɛ ni esa akɛ mɔ fɛɛ mɔ akɔ bɔni afee ni efata mɛi ni baana yibaamɔ kɛfo nibii agbɛjianɔtoo nɛɛ, ni amɛyahi shi yɛ paradeiso shikpɔŋ nɔ, he ni yaafo, kɛ ŋkɔmɔyeli, kɛ piŋmɔ, aloo gbele bɛ dɔŋŋ lɛ ahe.—Kpojiemɔ 21:3, 4.

Be lɛ miiho oyayaayai kɛha jeŋ fɔŋ nɛɛ, ni ehe miihia waa kɛha mɛi fɛɛ ni taoɔ akɛ amɛna yibaamɔ kɛfo je nɛɛ naagbee lɛ ni amɛkase nɔ ni fata ‘sanekpakpa lɛ toiboo’ he, koni no aha amɛje hiɛkpatamɔ lɛ mli. Be kroko ni Yehowa Odasefoi baaba oshia lɛ mli ekoŋŋ lɛ, mɛni hewɔ okpɛlɛɛɛ hegbɛ ni amɛaaha bo kɛha daa otsi Biblia mli nikasemɔ lɛ nɔ? Aloo nɔ ni fe no lɛ, mɛni hewɔ obiii amɛ ni amɛkɛ bo abakase Biblia lɛ ejaakɛ ootao ni onu shishi?

[Akrabatsa ni yɔɔ baafa 8]

GBƐ NI AAATSƆ NƆ ANU BIBLIA LƐ SHISHI

YESU ma nɔ mi eha wɔ akɛ yɛ egbele kɛ eshitee lɛ sɛɛ lɛ, ebaatee “tsulɔ anɔkwafo kɛ nilelɔ” ko shi, ni ebaasɔmɔ akɛ gbɛ ni etsɔɔ nɔ ekɛ wɔ yeɔ sharamɔ. (Mateo 24:45-47) Bɔfo Paulo wie nɛkɛ gbɛ nɛɛ he etsɔɔ Efeso Kristofoi lɛ beni eŋma akɛ “koni agbɛnɛ atsɔ asafo lɛ nɔ aha onukpai kɛ mɛi ni yɔɔ hegbɛ yɛ ŋwɛiniiaŋ lɛ ale Nyɔŋmɔ nilee ni fa babaoo lɛ, yɛ naanɔ yiŋ ni eto yɛ Kristo Yesu, wɔ-Nuŋtsɔ lɛ, mli lɛ naa.” (Efesobii 3:10, 11) Kristofoi ni afɔ amɛ mu lɛ asafo lɛ, ni afɔ yɛ Pentekoste afi 33 Ŋ.B. lɛ, ji nɔ ni atuu “nii ni ajie kpo lɛ” awo edɛŋ. (5 Mose 29:28) Akɛ kuu lɛ, Kristofoi ni afɔ amɛ mu lɛ sɔmɔɔ akɛ tsulɔ anɔkwafo kɛ nilelɔ lɛ. (Luka 12:42-44) Nitsumɔ ni jɛ Nyɔŋmɔ ŋɔɔ kɛha amɛ ji ni amɛkɛ “nii ni ajie kpo lɛ” he mumɔŋ shishinumɔ aha.

Taakɛ Biblia gbalɛ tsɔ hiɛ ewie Mesia lɛ he lɛ, nakai nɔŋŋ hu ekudɔɔ wɔ kɛyaa Kristofoi Odasefoi ni afɔ amɛ mu lɛ akuu ni efee ekome, ni sɔmɔɔ amrɔ nɛɛ akɛ tsulɔ anɔkwafo kɛ nilelɔ lɛ he.a Eyeɔ ebuaa wɔ ni wɔnuɔ Nyɔŋmɔ Wiemɔ lɛ shishi. Esa akɛ mɛi fɛɛ ni taoɔ ni amɛnu Biblia lɛ shishi lɛ akpɛlɛ nɔ akɛ abaanyɛ ale “Nyɔŋmɔ nilee ni fa babaoo lɛ” kɛtsɔ gbɛ ni Yehowa tsɔɔ nɔ ekɛ wɔ yeɔ sharamɔ, ni ji tsulɔ anɔkwafo kɛ nilelɔ lɛ pɛ nɔ.—Yohane 6:68.

[Shishigbɛ niŋmai]